1. Mun lo be se k’an dɛmɛ ka siniko lɔn?

YALA i delila ka telewisɔn filɛ wala ka arajo lamɛn ani k’i yɛrɛ ɲininga ko: ‘Duniɲa nin be tagara min le?’ Gwɛrɛgwɛrɛkow ani fariyakow ka ca fɔɔ mɔgɔ dɔw b’a miiri ko duniɲa laban surunyana. O ye tiɲɛn ye wa? Mun lo be se k’an dɛmɛ ka siniko lɔn? Hali ni adamadenw tɛ se ka siniko lɔn, Jehova Ala kɔni be se. An ka siniɲasigi bena kɛ min ye ani dugukolo bena kɛ cogo min na, Jehova b’o fɔ an ye Bibulu kɔnɔ.—Ezayi 46:10; Zaki 4:14.

2, 3. Yezu ka kalandenw tun b’a fɛ ka mun lo lɔn ani Yezu y’u jaabi cogo di?

² Ni Bibulu be kuma duniɲa laban koo la, o kɔrɔ tɛ ko dugukolo bena halaki dɛ. Nka, juguya lo bena ban. Yezu ye mɔgɔw kalan ko Ala ka Masaya bena dugukolo mara (Luka 4:43). A ka kalandenw tun b’a fɛ k’a lɔn Ala ka Masaya bena na tuma min na. O kama u ye Yezu ɲininga ko: “Koo nunu bena kɛ tuma jumɛn? Taamasiɲɛ jumɛn bena i nako, ni diɲɛ laban koo yira?” (Matiyo 24:3). Yezu ma loon tigitigi fɔ u ye. Nka koo minw tun bena kɛ sanni duniɲa ka ban, a y’o fɔ u ye ani o lo be kɛra sisan.

³ Dalilu minw b’a yira ko an be duniɲa laban tuma na, an bena olu lo lajɛ kalansen nin na. Sanni an k’u lajɛ, an ka baro kɛ kɛlɛ dɔ koo la min kɛra sankolo la. O la, an bena a faamu fɛɛn min kama duniɲa ɲagaminin be ten.

4, 5. a) Wagati dɔɔni Yezu siginin kɔ Masaya la, mun lo kɛra sankolo la? b) Yirali 12:12 ka fɔta la, Sutana gwɛnnin kɔ ka bɔ sankolo la, mun lo tun bena kɛ dugukolo kan?

⁴ Kalansen 8nan y’a ɲɛfɔ ko Yezu Krista kɛra Masacɛ ye sankolo la saan 1914 la (Daniyɛli 7:13, 14). Yirali ka kitabu b’a fɔ ko “kɛlɛ wilila sankolo la. Misɛli [o kɔrɔ, Yezu] n’a ka mɛlɛkɛw ye Sogojugu [Sutana] nin n’a kɔmɔgɔw kɛlɛ.” * Sutana n’a ka jinaw ma see sɔrɔ kɛlɛ la. U gwɛnna ka bɔ sankolo la ka na dugukolo kan. Miiri k’a filɛ Ala ka mɛlɛkɛw dusu diyara cogo min na! Nka, dugukolo kan mɔgɔw do? Bibulu b’a fɔ k’o kɛlɛ tun bena kɛ bɔnɛ sababu ye adamadenw fɛ. Mun na do? Sabu Sutana dimininba lo, “a b’a lɔn ko a halakilon tɔɔ man jan tugu.”—Yirali 12:7, 9, 12.

⁵ Sutana b’a seko bɛɛ kɛra ka bɔnɛba lase mɔgɔw ma dugukolo kan. A dimininba lo sabu Ala bena a halaki yanni dɔɔni. Koo minw tun bena kɛ laban loonw na, Yezu tun kɔnna k’o fɔ. An k’o koow lajɛ.—Kunnafoni wɛrɛw lajɛ, a 24nan.

6, 7. An be se ka mun lo fɔ bi ka marifakɛlɛw ni kɔngɔ koo la?

⁶ Marifakɛlɛw. Yezu y’a fɔ ko: “Siya dɔ bena wili siya wɛrɛ kama. Jamana dɔ bena wili jamana wɛrɛ kama.” (Matiyo 24:7). Mɔgɔ minw fagara marifakɛlɛw la an ka wagati la, o ɲɔgɔn ma kɛ ka ye. Jɛnkulu dɔ ka rapɔɔri b’a yira ko kabi saan 1914, mɔgɔ miliyɔn 100  ni kɔ lo fagara marifakɛlɛw la. Mɔgɔ hakɛ min fagara marifakɛlɛ la saan kɛmɛkulu tɛmɛnin na, o ka ca ka tɛmɛ minw fagara ka kɔn saan 1900 ɲɛ fɔɔ siɲɛ saba (Worldwatch Institute). Miiri k’a filɛ marifakɛlɛ ye mɔgɔ miliyɔn caaman dusu kasi ani k’u bila ɲani min na!

⁷ Kɔngɔ. Yezu y’a fɔ ko: “Kɔngɔ bena don yɔrɔ dɔw la.” (Matiyo 24:7). Dumunifɛnw ka ca sisan ka tɛmɛ fɔlɔ kan. Nka, mɔgɔ caaman tɛ dumuni kɛ ka fa. Mun na do? Sabu wari bɛrɛ tɛ mɔgɔw fɛ ka dumunifɛnw san wala ka foro san. Mɔgɔ minw ka sɔrɔ ma se dɔrɔmɛ kɛmɛ ma tile kɔnɔ, olu ka ca ni mɔgɔ miliyari kelen ni kɔ ye. Jɛnkulu min be kɛnɛyako kun na duniɲa kɔnɔ (O.M.S), o b’a yira ko saan o saan, denmisɛn miliyɔn caaman be sa kɔngɔ kosɔn.

8, 9. Yezu ye min fɔ dugukoloyɛrɛyɛrɛw ani banaw koo la, mun lo b’a yira ko o be dafara?

 ⁸ Dugukoloyɛrɛyɛrɛ. Yezu tun ko: “Dugukolo bena yɛrɛyɛrɛ kosɔbɛ yɔrɔ dɔw la.” (Luka 21:11). Dugukoloyɛrɛyɛrɛbaw be kɛ saan o saan. Saan kɛmɛ ni kɔ tɛmɛninw na, u ye mɔgɔ miliyɔn fila ni kɔ lo faga. Dugukoloyɛrɛyɛrɛw bele be mɔgɔ caaman faga hali k’a sɔrɔ bi, mansinw be se ka mɔgɔw lasɔmi u koo la.

⁹ Banaw. Yezu tun kɔnna k’a fɔ ko “fɔɲɔbanaw” bena kɛ yen. Bana juguw tun bena jɛnsɛn joona joona ani ka mɔgɔ caaman faga (Luka 21:11). Dɔgɔtɔrɔw be bana caaman furakɛcogo lɔn. Nka, bana dɔw bele be yen fura tɛ minw na. Lɔnnikɛla dɔw b’a fɔ ko sɔgɔsɔgɔgwɛ, sumaya ani kolera be mɔgɔ miliyɔn caaman faga saan o saan. O dɔrɔn tɛ. Dɔgɔtɔrɔw bɔra bana kura 30 kala ma. U dɔw yɛrɛ tɛ se ka furakɛ.

10. Cogo juman na 2 Timote 3:1-5 ka kumaw be dafara bi?

¹⁰ Bibulu b’a fɔ 2 Timote 3:1-5 na ko “laban tuma na, waati bena gwɛlɛya.” Mɔgɔ  caaman sɔɔn tun bena kɛ min ye laban loonw na, ciden Pol y’o ɲɛfɔ. A ko mɔgɔw . . .

• bena u yɛrɛ nafa dɔrɔn ɲini

• bena wari kanu

• tɛna mɛnni kɛ u wolobagaw fɛ

• tɛna kɛ kantigiw ye

• tɛna u somɔgɔw kanu

• bena kɛ yɛrɛminɛbaliw ye

• bena fariya

• bena ɲɛnagwɛkow kanu ka tɛmɛ Alako kan

• bena a fɔ k’u be Ala kanu, nka u tɛ mɛnni kɛ a fɛ

11. Zaburuw 92:8 b’a fɔ ko mun lo bena mɔgɔ juguw sɔrɔ?

¹¹ I m’a kɔrɔsi ko i siginin be yɔrɔ min na, mɔgɔ caaman sɔɔn be ten wa? O kelen lo duniɲa kuru bɛɛ kɔnɔ. Nka yanni dɔɔni, Ala bena wuli mɔgɔ juguw kama. A yɛrɛ y’a fɔ ko: “Hali ni mɔgɔjuguw wilila i ko biin, hali ni kojugukɛlaw ka koo yiriwara, u bena halaki pewu!”—Zaburuw 92:8.

12, 13. Jehova y’an kalan mun lo la laban loonw na?

¹² Bibulu tun kɔnna k’a fɔ ko laban loonw na, dusukasi ni tɔɔrɔ koow tun bena caya. Nka a fana y’a fɔ ko koo ɲumanw bena kɛ.

¹³ Bibulu faamuyali. Kira Daniyɛli y’a sɛbɛ laban loonw koo la ko: “Dɔnniya kow na caya.” (Daniyɛli 12:4, ABM). Jehova tun bena a sagokɛlaw dɛmɛ u ka Bibulu faamu koɲuman ka tɛmɛ fɔlɔ kan. O kiraya kuma dafara kabi saan 1914. Ɲɛyirali fɛ, Jehova y’an dɛmɛ k’a faamu ko a tɔgɔ kɔrɔtanin lo ani ko a sagonata ye min ye dugukolo koo la, o fana kɔrɔtanin lo. A y’an dɛmɛ fana ka tiɲɛn faamu kunmabɔsara, suuw cogoya ani sukununi koo la. An y’a faamu ko Ala ka Masaya dɔrɔn lo be se k’an ka kunkow bɛɛ ɲɛnabɔ. An be se ka hɛɛrɛ sɔrɔ cogo min na ani k’an koo diya Ala ye, Jehova y’an kalan o la fana. Nka Ala sagokɛlaw be mun lo kɛ n’o lɔnniya bɛɛ ye? An bena o jaabili sɔrɔ kiraya kuma wɛrɛ kɔnɔ.—Kunnafoni wɛrɛw lajɛ, 21 ani 25nan.

14. Masaya kibaro diiman waajuli be kɛra min ani jɔn lo b’o baara kɛra?

¹⁴ Waajuli baara, duniɲa kuru bɛɛ kɔnɔ. Yezu y’a fɔ laban loonw koo la ko: “Nin Kibaru Duman waajuli na kɛ diɲɛ yɔrɔw bɛɛ la sankolo masaya ko la.” (Matiyo 24:3, 14, ABM). Waajuli be kɛra Masaya kibaro diiman koo la jamana 230 ni kɔ kɔnɔ ani kaan 700 ni kɔ la. O Masaya ye min ye ani a bena min kɛ adamadenw ye, Jehova Seerew be mɔgɔw dɛmɛna k’o faamu duniɲa kuru bɛɛ kɔnɔ.  U b’o baara kɛ gwansan. O Seerew be bɔ ‘jamanaw bɛɛ ni siyaw bɛɛ la’ ( Yirali 7:9). Hali ni mɔgɔ caaman b’u kɔniya ani k’u tɔɔrɔ, foyi tɛ se k’u bali waajuli baara la i ko Yezu tun y’a fɔ cogo min na.—Luka 21:17.

15. a) Yala i lanin b’a la ko an be laban loonw na wa? Mun na do? b) Minw be mɛnni kɛ Jehova fɛ ani minw tɛ mɛnni kɛ a fɛ, mun lo bena olu sɔrɔ?

¹⁵ Yala i lanin b’a la ko an be laban loonw na wa? Bibulu tun kɔnna ka kuma minw fɔ laban loonw koo la, u caaman be dafara bi. Yanni dɔɔni, Jehova bena daan sigi waajuli baara la ani “laban” bena se (Matiyo 24:14). O laban ye mun lo ye? Arimagedɔn kɛlɛ lo, o min na Ala bena juguya bɛɛ ban. Minw bɛɛ be ban ka mɛnni kɛ Jehova n’a Dencɛ fɛ, Jehova bena tɛmɛ Yezu n’a ka mɛlɛkɛ barikamanw fɛ k’olu halaki (2 Tesalonikaw 1:6-9). O kɔ, Sutana n’a ka jinaw tɛna mɔgɔw lafili tugun. O la, minw bɛɛ be mɛnni kɛ Ala fɛ ani u be sɔn a ka Masaya la, u bena a ye ko Ala ka kiraya kumaw bɛɛ be dafara.—Yirali 20:1-3; 21:3-5.

16. Komi laban surunyana, i ka kan ka mun lo kɛ?

¹⁶ Sutana ka duniɲa nin bena ban yanni dɔɔni. O kama, a kɔrɔtanin lo an k’an yɛrɛ ɲininga ko: ‘Ne ka kan ka mun lo kɛ do?’ Jehova b’a fɛ i ka koo caaman lɔn Bibulu kɔnɔ. I ka kan k’i sɔbɛ don i ka kalan na (Zan 17:3). Lɔgɔkun o lɔgɔkun, Jehova Seerew be lajɛnw kɛ walisa ka mɔgɔw dɛmɛ u ka Bibulu faamu. I jija ka taga o lajɛnw na tuma bɛɛ (Eburuw 10:24, 25 kalan). N’i y’a ye ko i ka kan ka yɛlɛmani dɔw kɛ i ka ɲɛnamaya kɛcogo la, kana siran k’u kɛ. N’i tora k’o  yɛlɛmaniw kɛ, teriya min be e ni Jehova cɛ, o bena barika sɔrɔ.—Zaki 4:8.

17. Mun na duniɲa laban bena bari mɔgɔ caaman na?

¹⁷ Ciden Pol y’a ɲɛfɔ ko mɔgɔ juguw halakili bena bari mɔgɔ caaman na i ko soon be bari mɔgɔ la cogo min na sufɛ (1 Tesalonikaw 5:2). Daliluw b’a yira ka gwɛ ko an be laban loonw na. Nka Yezu tun kɔnna k’a fɔ ko mɔgɔ caaman bena u ɲɛɛ tugu o daliluw kan. A y’a fɔ ko: “Koo min tun kɛra Nuhun ka tile la, o ɲɔgɔn bena kɛ fana Mɔgɔ Dencɛ natuma la. Bari sanni jiba ka na, mɔgɔw tun be dumunibabaw kɛ ka minni kɛ, ani ka furu fɔɔ ka taga se Nuhun donlon ma kurunba kɔnɔ. O tun te miiri foyi la, fɔɔ jiba nana u halaki. Mɔgɔ Dencɛ ka nako bena kɛ ten fana.”—Matiyo 24:37-39.

18. Yezu y’an lasɔmi mun lo la?

¹⁸ Yezu y’an lasɔmi ko ‘an k’an yɛrɛw kɔlɔsi, an kan’a to nugubaya, ni dɔrɔtɔya, ani diɲɛ hamikow k’an hakili ɲagami.’ A ko duniɲa laban bena bari mɔgɔw la “i n’a fɔ jɔɔ be fɛɛn minɛ cogo min na.” A y’a fɔ fana k’o “loon bena cun diɲɛ mɔgɔw bɛɛ kan.” O kɔ, a y’a fɔ ko: “Aw ye jija ka Ala daali tuma bɛɛ, ka kɛ mɔgɔ timinadiyaninw ye, waasa aw ka se ka kisi o koo nataw bɛɛ ma, ani aw ka se ka lɔ Mɔgɔ Dencɛ ɲakɔrɔ.” (Luka 21:34-36). Mun na a kɔrɔtanin lo an k’an janto Yezu ka lasɔmini kumaw na? Sabu Sutana ka duniɲa jugu bena halaki yanni dɔɔni. Minw koo ka di Jehova ni Yezu ye, olu dɔrɔn lo bena kisi ani ka ɲɛnamaya kɛ fɔɔ abada duniɲa kura kɔnɔ.—Zan 3:16; 2 Piyɛri 3:13.