1. Ki liv ka pèwmèt-nou konnèt sa ki ké fèt dèmen ?

LÈ OU ka gadé enfòwmasyon, pétèt ou ja mandé-w : « Men ola nou kay menm ? » Ni tèlman malè ka fèt é ni tèlman méchansté, kè ni moun ka di lafen di mond toupré. Ès sé vré sa ? Ès ni mwayen konnèt sa ki ké fèt dèmen ? Wi, sa posib. Sé vré, lézòm pé pa di alavans sa ki ké fèt dèmen, men li Jéova, i pé fè sa. Adan Labib, i ka di-nou ka dèmen ké pòté ban nou é ka latè ké divini (Izayi 46:10 ; Jak 4:14).

2, 3. Ka disip a Jézi té vlé sav ? É ka Jézi réponn-yo ?

² Lè Labib ka palé dè lafen di mond, sa pa vlé di kè latè ké disparèt, men sé laméchansté ki ké disparèt. Jézi aprann disip a-y kè wayòm a Bondyé ké dirijé latè (Lik 4:43). Yo té vlé sav kitan wayòm a Bondyé té ké vin. Sé pousa yo mandé Jézi : « Kitan sé biten-lasa ké fèt, é ki sign ki ké montré kè ou la é kè mond-la kay bout ? » (Matyé 24:3) (gadé nòt n^o 24 la, paj 220). Jézi pa ba-yo on dat, pawkont i di-yo ka ki té’é rivé jis avan. É tousa Jézi té di, sé sa ki ka fèt jòdijou.

³ Adan chapit-lasa, nou kay vwè ki prèv nou ni kè nou ka viv an tan a lafen. Pou édé-nou konprann poukwa lavi rèd konsa si latè, an-nou palé dè on lagè ki fèt an syèl-la.

4, 5. a) Apré Jézi vin Wa, ka ki pasé an syèl-la ? b) Dapré sa Révélasyon 12:12 ka di, ka ki ka fèt asi latè dépi yo jété Satan asi-y ?

⁴ Adan chapit 8 la, nou aprann kè Jézi vin Wa an syèl-la an 1914 (Danyèl 7:13, 14). Liv a Larévélasyon ka di-nou sa ki pasé apré : « On lagè pété an syèl-la : Michèl [Jézi] é zanj a-y goumé èvè dragon-la [Satan], é dragon-la é zanj a-y goumé èvè yo. » Satan é démon a-y pèd lagè é Jézi é zanj a-y jété-yo asi latè. A pa ti kontan sé zanj-la té kontan ! Men ka ki té kay rivé asi latè ? Dapré labib, onpakèt malè té’é rivé. Poukwa ? Pas Dyab-la anrajé : i sav sé yenki on « titak tan » ka rété-y (Révélasyon 12:7, 9, 12).

⁵ Toutotan i pé, Dyab-la ka fè malè rivé asi latè. I anrajé pas i sav pa’a rété onlo tan avan Bondyé fè-y disparèt. Men konnyéla, an-nou gadé ka Jézi di anrapò èvè lé dènyé jou.

6, 7. Sa nou ka vwè jòdila sé ègzaktèman sa Jézi té anonsé parapòt a lagè é moun ka mò fen. Ka ki ka montré sa ?

⁶ Lagè. Jézi di : « Nasyon ké lévé kont nasyon é wayòm kont wayòm » (Matyé 24:7). A épòk an nou, lagè ja tchouyé lontan plis moun ki a nenpòt ki dòt épòk. Èspésyalis ki ka étidyé sa ki ka fèt adan lèmond ka di kè asi 1900 lanné, dépi prèmyé syèk-la jiska 1914, lagè tchouyé apépré 30 milyon moun. Men an mwens ki 100 an, ant 1914 é 2000, lagè tchouyé pliski 100 milyon moun. Ni milyon é milyon moun ka soufè akòz dè lagè !

⁷ Moun ka mò fen. Jézi di : « Manjé ké vin ra » (Matyé 24:7). Potoko jen ni tousa nouriti  asi latè. É poutan, onlo moun pa ni asé manjé pou yo manjé. Kijan sa pé fèt ? Sé pas yo pa ni asé lajan pou achté manjé oben pou achté on mòso tè pou fè jaden. Ni pliski on milya moun ki ka viv èvè mwens ki on dola pa jou. Sèlon Òwganizasyon mondyal a lasanté, ni pliski 5 milyon timoun ki ka tonbé malad é ki ka mò chak lanné pas yo pa ni asé manjé.

8, 9. Sa nou ka vwè jòdila sé ègzaktèman sa Jézi té anonsé parapòt a tranmanntè é maladi. Ka ki ka montré sa ?

⁸ Tranmanntè. Jézi té anonsé : « Ké ni gwo tranmanntè » (Lik 21:11). Sé syantifik-la ka prévwa kè chak lanné ké ni gwo manman tranmanntè. Dépi lanné 1900 jousalè, tranmanntè ja tchouyé pliski 2 milyon moun. Menmsi latèknoloji ka fè pwogré, tranmanntè ka tchouyé onlo moun toujou.

⁹ Maladi. Jézi té anonsé  kè té’é ni « épidémi ». Onlo moun ka mò akòz dè maladi grav ki ka kouri vit toubònman (Lik 21:11). Sé mèdsen-la konnèt kijan pou yo swagné onpakèt maladi, men ni sa yo pa ka rivé géri. Chak lanné, maladi kon tibèwkilòz, malarya é koléra ka tchouyé milyon é milyon moun. Men anplisdisa, sé mèdsen-la dékouvè 30 nouvo maladi é pou déotwa adan yo, pa ni rimèd.

10. Poukwa nou pé di kè sa ki maké adan 2 Timoté 3:1 a 5 sé sa ki ka fèt jòdijou ?

¹⁰ Dapré 2 Timoté 3:1 a 5, adan lé dènyé jou, té’é ni dé moman ki té’é « rèd a sipòté ». Lapòt Pòl èspliké kijan onlo moun té’é konpòwté-yo. I di kè sé moun-la...

• té ké sonjé yenki yomenm,

• té ké enmé lajan,

• pa té ké kouté fanmi a yo,

•   pa té ké fidèl,

• pa té ké ni lanmou pou pwòp fanmi a yo,

• pa té ké ni métriz,

• té ké brital é égri,

• té ké plis enmé plézi ki Bondyé,

• té ké di yo enmé Bondyé, men yo té ké rèfizé kouté-y.

11. Sèlon Sòm 92:7, ka i ké rivé sé méchan-la ?

¹¹ Èskè la ou ka rété la sé konsa sé moun-la yé ? Sé konsa onlo moun ka konpòwté-yo an mond-lasa. Men talè, Bondyé kay fè on biten. I fè on pwomès : « Lè sé méchan-la ka pousé kon vyé zèb é lè sé malfétè-la ka fléri, sé détwi yo kay détwi-yo pou touttan » (Sòm 92:7).

12, 13. Pannan lé dènyé jou, ka Jéova édé-nou konprann ?

¹² Labib anonsé té ké ni onlo malè é onpakèt  soufrans pannan lé dènyé jou. Men i palé dè bon biten ki té’é fèt osi.

¹³ Sèwvitè a Bondyé té ké konprann Labib plibyen. Mi sa pwofèt Danyèl maké anrapò èvè lé dènyé jou : « An tan a lafen [...] ké tini vré konésans-la annabondans » (Danyèl 12:4). Pannan lé dènyé jou, Bondyé té ké édé sèwvitè a-y konprann Labib plibyen. Sé sa i fè, é plis ankò dépi 1914. Pa ègzanp, nou aprann kè non a Bondyé enpòwtan é nou vwè ka i ni lentansyon fè pou latè. Nou dékouvè ka ki laranson, ka nou ka divini lè nou mò é nou vin sav kè moun-mò ké wouviv (gadé sé nòt n^o 21 la é 25 la, paj 216 é 221). Nou aprann kè sèl gouvènman ki pé réglé tout pwoblèm an nou sé wayòm a Bondyé. Nou rivé konprann ka pou nou fè pou tchè an nou kontan é kijan nou pé viv on mannyè ki ka fè Bondyé plézi. Men ès sèwvitè a Bondyé ka gadé sa yo ka aprann pou yo ? Ondòt pwofési ka réponn a kèsyon-lasa.

14. Kimoun ki té ké préché bon nouvèl a Wayòm-la é ola yo té ké préché-y ?

¹⁴ Sèwvitè a Bondyé té ké préché toupatou si latè. Anrapò èvè lé dènyé jou, Jézi té di : « Bon nouvèl a wayòm-la, yo ké préché-y toupatou asi latè » (Matyé 24:3, 14). Sèwvitè a Bondyé ka préché bon nouvèl a wayòm-la an plis ki 900 lang é adan 240 péyi é téritwa. Témwen a Jéova ka vin dè « tout nasyon [...] é pèp » é yo ka préché toupatou si latè. Yo ka édé moun konprann ka wayòm a Bondyé yé é sa i ké fè ba limanité (Révélasyon 7:9). Yo ka fè sa  san mandé lajan. É menmsi, kon Jézi té di, ni onlo moun ki hay-yo oben ki ka malmenné-yo, ayen pé pa arété-yo (Lik 21:17).

15. a) Sèlon vou, ès nou adan lé dènyé jou ? Ka i ka fè-w di sa ? b) Ka i ké rivé tousa ki pa ka kouté Jéova ? c) Ka i ké rivé tousa ki ka kouté Jéova ?

¹⁵ Ès ou ka di kè nou adan lé dènyé jou ? Onlo pwofési a Labib anrapò èvè lé dènyé jou ka réyalizé konnyéla. Talè, Jéova ké di sèwvitè a-y pa préché bon nouvèl a Wayòm-la ankò. Aprésa « lafen » ké vin (Matyé 24:14). « Lafen », ka sa yé ojis ? « Lafen », sé Awmagédon. Sé a moman-lasa Jéova ké woté tout méchansté ki tini asi latè. I ké sèvi èvè Jézi é èvè zanj puisan a-y pou i détwi toutmoun ki ka rèfizé kouté-y é ki ka rèfizé kouté Jézi (2 Tésalonisyen 1:6-9). Aprésa, Satan é démon a-y pé ké kouyonné ponmoun ankò. Toutmoun ki vlé kouté Bondyé é ki ka aksèpté dominasyon a wayòm a-y ké vwè tout pwomès a Bondyé vin réyalité (Révélasyon 20:1-3 ; 21:3-5).

16. Padavwa lafen toupré, ka pou-w fè ?

¹⁶ Talè, mond a Satan ké détwi. Sé pousa, sa enpòwtan kè nouchak mandé-nou : « Ka pou mwen fè ? » Jéova vlé ou kontinyé aprann onlo biten adan Bib-la. Pran étid a-w oséryé (Jan 17:3). Chak simenn, Témwen a Jéova ka òwganizé réinyon pou édé moun konprann Labib. Fè tousa ou pé pou-w ay adan sé réinyon-lasa (li Ébré 10:24, 25). Si ou ka rann-vou kont kè ou ni dé chanjman a fè, pa pè :  fè-yo. Konsa, lanmityé a-w èvè Jéova ké vin dè plizanpli fò (Jak 4:8).

17. Poukwa lafen ké souprann onlo moun ?

¹⁷ Lapòt Pòl èspliké kè dèstriksyon a sé méchan-la ké vin « kon on vòlè pannan lannuit » (1 Tésalonisyen 5:2). Kivédi, lamajorité a moun pé ké ka atann-yo a dèstriksyon-lasa. Jézi té anonsé kè onlo moun pa té ké vlé rèkonnèt kè nou adan lé dènyé jou. I di : « Pannan Gason a lòm ké la [kivédi pannan lé dènyé jou], sé ké menm biten ki an tan a Noé. Avan délij-la, moun té adan bwè é manjé, sé misyé-la té ka mayé é moun té ka mayé fi a yo, jiskatan jou-la rivé pou Noé antré adan lawch-la ; é yo pa rété véyatif jiskatan délij-la rivé é i chayé-yotout » (Matyé 24:37-39).

18. Ki avèwtisman Jézi ban-nou ?

¹⁸ Jézi avèti-nou : fò pa nou lésé dé biten kon « manjé twòp, bwè twòp, penn é traka a lavi » distrè-nou. I èspliké kè lafen ké vin fap, « kon on zatrap », nou pé’é menm ka atann-nou. I di osi kè lafen « ké vin asi toutmoun ki ka viv toupatou asi latè ». É i ajouté : « Sé pousa, kontinyé fè atansyon é sipliyé [Bondyé] toutlè [priyé èvè on tchè sensè] pou zòt rivé chapé anba tousa ki pou fèt, é pou zòt rivé rété doubout douvan Gason a lòm » (Lik 21:34-36). Kouté avèwtisman a Jézi, sa enpòwtan toubònman. Poukwa ? Paskè talè mond a Satan ké détwi. Sé yenki moun ki ké fè Jéova é Jézi plézi ki ké rété vivan. Yo ké viv adan mond nouvo la pou touttan (Jan 3:16 ; 2 Pyè 3:13).