1. Ki liv ka di nou sa dimen ké poté ?

KÉ TOUT enfòrmasyon yé ka bay annan télévizyon-an, ès ou ja di an ou tchò : « Bagaj-ya ka vini plizanpli mové ! » I gen tèlman malò ké méchansté ki dapré roun ran moun lafen monn-an ké vini titalò. Ès a vré ki lafen monn-an ké rivé titalò ? Ès nou pouvé savé sa dimen ké poté ? Wi. Pyès moun asou latè-a pa pouvé di kisa ki ké fèt anvan sa rivé, mé Jéova pouvé fè l’. É a sa i fè : Labib-a ka palé di sa dimen ké poté pou nou é pou latè-a osi (Isaïe 46:10 ; Jacques 4:14).

2, 3. Kisa disip Jézi-ya té lé savé ? É kisa Jézi réponn yé ?

² Lò Labib-a ka palé di lafen monn-an, i pa ka di ki Latè-a ké disparèt, mé ki a méchansté-a ki ké disparèt. Jézi anprann so disip-ya ki Rwayonm Bondjé-a té ké dirijé latè-a (Luc 4:43). So disip-ya té lé savé kitan Rwayonm Bondjé-a té ké vini. A pou sa yé doumandé li : « Kitan sa bagaj-ya ké fèt é ki sign ké montré to prézans ké dèrnyé moman sa monn-an ? » (Matthieu 24:3) (gadé nòt n^o 24, paj 220). Jézi pa di so disip-ya ki jou lafen monn-an té ké rivé. Mé i di yé kisa ki té ké fèt jis anvan lafen monn-an rivé. É sa i té di yé, a sa menm ki ka rivé annan nou lépòk.

³ Annan sa chapit-a, nou ké wè prèv ki nou ka viv  tou pròch lafen monn-an. Mé pou konprann poukisa bagaj-ya mové konsa asou latè-a, a pou nou palé di roun lagèr ki pasé annan syèl-a.

4, 5. a) Kisa ki pasé annan syèl-a apré Jézi divini Rwa ? b) Dapré Révélation 12:12, dipi yé jité Satan asou latè-a, kisa ki ka rivé moun-yan ?

⁴ Annan chapit 8-a, nou anprann ki Jézi divini Rwa annan syèl-a an 1914 (Daniel 7:13, 14). Liv Révélation-an ka di sa ki pasé apré sa : « Roun lagèr pété annan syèl-a : Michèl [Jézi] ké so zanj briga kont dragon-an [Satan], é dragon-an ké so zanj briga. » Satan ké démon-yan pédi lagèr-a é Jézi jité yé asou latè-a. Zanj-ya té kontan toubonnman ! Mé kisa ki té ké rivé moun-yan asou latè-a ? Dapré Labib-a, yé té ké jwenn roun patché malò. Poukisa ? Paské a pa ti kòlè Djab-a kòlè : i savé ki a « roun ti moso tan » i ka rété li (Révélation 12:7, 9, 12).

⁵ Djab-a ka mété malò asou malò anlè latè-a. I kòlè toubonnman paské i savé ki Bondjé ké fè l’ disparèt titalò. Mé annou wè aprézan sa Jézi di asou dèrnyé jou-ya.

6, 7. Sa Jézi té di asou lagèr ké lafamin ka fèt annan nou lépòk. Poukisa nou pouvé di sa ?

⁶ Lagèr. Jézi di : « Roun nasyon ké lévé kont rounòt nasyon é roun rwayonm kont rounòt rwayonm » (Matthieu 24:7). Lagèr tchwé plis moun  annan nou lépòk pasé nenpòrt ki ròt lépòk. Dapré roun òrganizasyon ki ka étidyé sa ki ka pasé asou latè-a (Worldwatch Institute), dipi 1914, lagèr tchwé plis ki 100 milyon moun. Pannan 100 lannen, ant 1900 ké 2000, i té gen trwa fwa plis moun ki mouri akoz di lagèr ki pannan 1900 lannen-yan ki pasé anvan sa. Lagèr ka fè milyon moun soufri !

⁷ Moun ki fen. Jézi di : « I ké gen lafamin » (Matthieu 24:7). Jòdla i gen manjé kou i pa té janmen gen anvan. Magré sa, bokou moun pa gen asé pou yé manjé. Poukisa ? Paské yé pa gen asé soumaké pou achté manjé ouben yé pa gen roun ti moso latè pou planté. I gen plis ki roun milyar moun ki pa menm gen roun éro pou viv chak jou. Dapré Òrganizasyon mondyal di lasanté, milyon timoun ka tonbé malad é ka mouri chak lannen paské yé pa gen asé manjé.

8, 9. Sa Jézi di asou tranblémandétèr ké maladi-ya ka fèt annan nou lépòk. Poukisa nou pouvé di sa ?

 ⁸ Tranblémandétèr-ya. Jézi di : « I ké gen gran tranblémandétèr » (Luc 21:11). Syantifik-ya ka prévwè ki i ké gen gran tranblémandétèr chak lannen. Dipi 1900, plis ki dé milyon moun mouri akoz di tranblémandétèr-ya. Jòdla, ké tèknoloji-a, nou pouvé savé pi bònò kitan tranblémandétèr-ya ké rivé. Magré sa, yé toujou ka tchwé roun patché moun.

⁹ Maladi-ya. Jézi di ki i té ké gen « épidémi ». Roun patché moun ka mouri akoz di maladi grav ki ka kouri toupatou ké gran vitès (Luc 21:11). Dòktèr-ya konnèt kouman pou swanyé roun lo maladi, mé yé pa gen rémèd pou yé tout. Chak lannen, milyon moun ka mouri akoz di maladi kou tibèrkiloz, palidiz ké koléra. Pannan sa 40 lannen ki pasé-ya, dòktèr-ya dékouvri 30 maladi yé pa té konnèt. É annan sa-ya i gen sa ki pa gen pyès rémèd.

10. Poukisa nou pouvé di ki sa ki ékri annan 2 Timothée 3:1 jiska 5 ka fèt jòdla ?

¹⁰ Dapré 2 Timothée 3:1 jiska 5, dèrnyé jou-ya, té ké « difisil pou sipòrté ». Apot Pòl di ki kalité ajisman bokou moun té ké gen. I di ki moun-yan...

• té ké gadé pou yé pròp kò,

• té ké kontan soumaké,

• té ké dézobéyi yé paran,

• pa té ké fidèl,

• pa té ké kontan yé fanmi,

• pa té ké kontrolé yé kò,

• té ké vyolan ké agrésif,

• té ké plis kontan plézi pasé Bondjé,

• té ké di yé kontan Bondjé mé yé pa té ké lé kouté l’.

11. Dapré Psaume 92:7, kisa ki ké rivé méchan-yan ?

¹¹ Ès a konsa moun koté ou ka viv-a ka aji ? Asou latè-a, bokou moun ka aji konsa. Mé Bondjé ké fè roun bagaj titalò. I ka promèt : « Lò méchan-yan ka pousé kou mové zèrb, é ki zafè tout sa ki ka fè sa  ki mové ka maché, a pou trapé yé dèstriksyon pou tout-tan » (Psaume 92:7).

12, 13. Pannan dèrnyé jou-ya, kisa Jéova idé nou konprann ?

¹² Labib-a di ki pannan dèrnyé jou-ya i té ké gen roun patché malò ké soufrans. Mé i di osi ki bèl bagaj té ké rivé.

¹³ Sèrvitèr Bondjé-ya té ké konprann Labib-a pi byen. Profèt Danyèl ékri asou dèrnyé jou-ya : « Vré konésans-a ké bokou » (Daniel 12:4). Pannan dèrnyé jou-ya, Bondjé té ké idé so sèrvitèr-ya konprann Labib-a pi byen. É a sa i fè, èspésyalman dipi 1914. Parèkzanp, i idé nou konprann pi byen ki so non gen bokou valò, i idé nou konprann so projè pou latè-a, a kisa ki ranson-an, sa ki ka pasé lò nou mouri é èspwar rézirèksyon-an (gadé nòt-ya n^os 21 ké 25, paj 216 ké 221). Nou konprann ki Rwayonm Bondjé-a sa sèl gouvèrnman-an ki pouvé réglé tout traka nou gen. Nou konprann osi kisa pou nou fè pou nou gen tchò kontan é kouman pou nou viv pou nou fè Bondjé plézi. Mé ès sèrvitèr Bondjé-ya ka séré sa yé ka anprann pou yé rounso ? Rounòt profési ka réponn sa késyon-an.

14. Ki koté bon nouvèl Rwayonm-an préché é a kimoun ki ka fè sa travay-a ?

¹⁴ Sèrvitèr Bondjé-ya té ké préché asou tout latè-a. Jézi di asou dèrnyé jou-ya : « Sa bon nouvèl di rwayonm-an ké préché asou tout latè-a » (Matthieu 24:3, 14). Bon nouvèl Rwayonm-an préché annan plis di 900 lang é annan pasé 230 péyi. Témwen Jéova-ya, ki ka vini di « tout  nasyon ké pèp », ka préché asou tout latè-a. Yé ka idé moun-yan konprann a kisa ki Rwayonm Bondjé-a épi sa i ké fè pou nou (Révélation 7:9). Yé ka fè l’ pou bon tchò. É menm si, kou Jézi té di, roun patché moun rayi yé ouben ka malmennen yé, anyen pa pouvé baré yé chimen (Luc 21:17).

15. a) Ès ou ka pansé nou ka viv annan lépòk dèrnyé jou-ya ? Poukisa ? b) Kisa ki ké rivé sa ki pa ka kouté Jéova ? c) Kisa ki ké rivé sa ki ka kouté Jéova ?

¹⁵ Ès ou ka pansé ki nou ka viv annan lépòk dèrnyé jou-ya ? Jòdla, roun patché profési Labib-a ka bay asou dèrnyé jou-ya ka fèt. Titalò, Jéova ké désidé ki bon nouvèl-a pa divèt préché ankò. A la « lafen-an » ké vini (Matthieu 24:14). A kisa ki « lafen » ? « Lafen », a Armagédon. A lò Jéova ké fè tout méchansté-a disparèt. I ké voyé Jézi ké so zanj pwisan-yan pou yé détrwi sa ki pa lé kouté ni li ni Jézi (2 Thessaloniciens 1:6-9). Apré sa, Satan ké so démon-yan pa ké bloublou pésonn ankò. Sa ki lé obéyi Bondjé é rété anba dominasyon so Rwayonm ké wè kouman tout so promès ké fèt (Révélation 20:1-3 ; 21:3-5).

16. Kou lafen ké vini titalò, kisa ou divèt fè ?

¹⁶ Sa monn Satan ka dirijé-a ké détrwi titalò. A pou sa tout moun divèt pozé yé kò sa késyon-an : « Kisa mo divèt fè ? » Jéova lé ki ou anprann tousa ou pouvé asou Labib-a. Pran tan byen étidyé l’ (Jean 17:3). Chak simenn Témwen Jéova-ya ka fè réinyon pou idé moun konprann Labib-a. Fè tousa ou pouvé pou alé annan sa réinyon-yan (li Hébreux 10:24, 25).  Si ou ka konprann ki i gen dé bagaj ou divèt chanjé annan ou lavi, pa pè : fè sa ou divèt fè. Konsa ou lanmityé ké Jéova ké divini plizanpli fò (Jacques 4:8).

17. Poukisa près tout moun ké rété èstébékwé lò lafen-an ké vini ?

¹⁷ Apot Pòl di ki dèstriksyon méchan-yan té ké rivé « kou roun volèr pannan lannwit » (1 Thessaloniciens 5:2). Sa lé di ki i ké rivé roun moman koté près tout moun pa ké antann sa. Jézi di ki bokou moun pa té ké lé wè prèv ki nou ka viv annan lépòk dèrnyé jou-ya. I di : « Kou jou-ya té fika annan lépòk Noé-a, a konsa prézans Pitit wonm-an ké fika [dèrnyé jou-ya]. Menm bagaj yé té ka fè jou anvan délij-a : yé té ka manjé ké bwè, mouché-ya té ka maryé, é yé té ka bay famn-yan pou maryé jis jou Noé antré annan arch-a ; yé pa panga jistan délij-a vini é mennen yé tout alé » (Matthieu 24:37-39).

18. Ki avèrtisman Jézi bay nou ?

¹⁸ Jézi avèrti nou : nou pa divèt lésé bagaj kou « manjé tròp, bwè tròp ké traka lavi-a » pran nou lèspri. I di ki lafen-an ké vini « kou roun trap », sa lé di ki i ké fè tout moun rété èstébékwé. I di ankò ki lafen-an « té ké vini asou tout sa ki ka viv asou [...] tout latè-a ». Pou fini i di : « Pa dronmi, sipliyé toulong [priyè ké tout ou tchò], pou zòt rivé chapé anba tout sa bagaj-ya ki pou rivé, é pou zòt doubout douvan Pitit wonm-an » (Luc 21:34-36). Poukisa sa enpòrtan di kouté sa avèrtisman Jézi-a ? Paské monn Satan-an ké détrwi titalò. A moun Jéova ké Jézi kontan rounso ki ké kontinyé viv. Yé ké viv pou tout-tan annan monn nouvo-a (Jean 3:16 ; 2 Pierre 3:13).