1. ¿Jalasü aküjünüin wamüin tü kasa alatajatkat mapeena?

«¿JAMEETCHE sukuwaʼipa tü mmapaʼakat watta kaʼi?», eeshii wamüle waapüle süchiki tü kasa mojusü alatakat sainküin mma. Süka jouluin kasa mojusü otta mojulaain maʼin wayuu, alüʼütsü sükalia süpüla sajaʼttajatüin tü Mmakat saashin wayuu. ¿Shiimainchejeʼe tia? ¿Eesüche süpüla watüjaain saaʼu tü kasa alatajatkat mapeena? Mayaainjeʼe isain wachiki wayaawatüin saaʼu tü kasa alatajatkat mapeena, nütüjaa aaʼu shia Jeʼwaa otta nüküjain suluʼu tü Wiwüliakat tü wakuwaʼipainjatkat mapeena otta tü sukuwaʼipainjatkat tü Mmakat (Isaías 46:10; Santiago 4:14).

2, 3. (1) ¿Kasa natüjaweeka aaʼu na nikirajüinkana Jesuu? (2) ¿Kasa nüküjaka Jesuu namüin?

² Süküjale tü Wiwüliakat sajaʼttajatüin kasakat süpüshuaʼa, nnojotsü shiain süküjeein achiki najaʼttirüinjatüin Maleiwa tü Mmakat, shia najaʼttirüinjatka tü kasa mojusü joutkat saaʼu tü Mmakat. Nüküjain Jesuu aluwataainjachin chi Maleiwakai saaʼu tü Mmakat (Lucas 4:43). Süka natüjaweein saaʼu na nikirajüinkana Jesuu joujaleerüin shikeraajüin tia, nasakirüin nia: «¿Kasa shiyaawaseetka wamüin süpüla watüjaainjatüin saaʼu sünain sülüʼülüin pükalia süpüla piweetüinjachin, tü sükaliajatkat sajaʼlajaain kasakat süpüshua?» (Mateo 24:3). Nnojotsü nüküjain Jesuu namüin tü sükaliainjatkat maʼin, nüküjapejeʼe kaseerüin alatüin sülüʼütpa sükalia süpüla najaʼttirüinjatüin Maleiwa süpüshuaʼa tü kasa mojusükat. Shiaʼaya maʼin alataka maaʼutpünaa tü nüküjatüjütkalia achiki Jesuu. (Paashajeʼera noota 23).

³ Sünain ekirajaayakat tüü, wekirajaajeerü anain tü kasa wayaawatakalü anainjee sülüʼülüin maʼin sükalia süpüla sajaʼttajatüin kasa mojusü. Ekirajaainjana waya palajana süchiki wanee  atkawaa eejatka chaa iipünaa, wayaawateetka anainjee jamüin joutka maʼin müliaa saaʼu tü Mmakat.

4, 5. (1) ¿Kasa eejatka chaa iipünaa süchikijeechon nüikalaain Jesuu sünain aluwatawaa? (2) ¿Kasa alatajatka saaʼu tü Mmakat sutuma nujutunuin Satanaa iipünaajee saashin Alateetkat Mapeena 12:12?

⁴ Sünain ekirajaaya 8 wekirajaa anainrü nuʼttüin Jesuu sünain aluwatawaa soʼu juyakat 1914 (Daniel 7:13, 14). Suluʼu Alateetkat Mapeena (Apocalipsis) aküjünüsü tü alatakat süchikijeechon nuʼttüin Jesuu sünain aluwatawaa. Müsü mayaa: «Eesü wane atkawaa chaʼaya iipünaa eere chi Maleiwakai. Chi aapiee müleʼoshikai kanüliakai Miguel je na aapiee nümaajanakana nütüma Maleiwa, atkaashii naya nümaa chi kayuushikai je sümaa tü aapiee nümaajatkalüirua». Miguel * nia Jesuu otta chi kayuushikai nia Satanaa. Ayamüluushi Satanaa nutuma Jesuu, nujutunaka Satanaa mmapaʼamüin namaʼaleʼeya na yolujaakana. ¡Talatakajasaʼa maʼin naaʼin na aapieekana sutuma tia! ¿Kasache alatajatka saaʼu tü Mmakat? Süküjain tü Wiwüliakat miyoʼuinjatüin tü müliaa shiʼrüinjatkat wayuu süka nujutunuin chi Yolujaakai saʼakamüin jee jashichishaatashi maʼin nia «süka nütüjaain saaʼu sünain sülüʼülüin nükalia süpüla ataʼünnaa» (Alateetkat Mapeena 12:7-9, 12).

⁵ Watta saalii kasa mojusü naaʼinraka Satanaa saaʼu tü Mmakat otta jashichishaatashi nia süka nütüjaain saaʼu sülüʼülüin nükalia süpüla ataʼünaa. Wekirajaa sünain tü nümakat Jesuu süchiki tü alatajatkat sülüʼütpa sükalia süpüla sajaʼlajaain kasakat süpüshuaʼa.

6, 7. ¿Jamüsü shikeraajia maaʼulu tü nümakat Jesuu süchiki atkawaa jee süchiki jamü?

⁶ Atkawaa. Müsü nünüiki Jesuu: «Atkaajiraajeerü wayuu  sainküin mmakat süpüshua» (Mateo 24:7). Outusü watta saalii wayuu maaʼutpünaa sutuma tü atkawaakat. Naashin na ekirajaakana süchiirua tü kasa alatakat mmapaʼa, alatüsü suulia 100 miyoone na wayuu outakana sutuma atkawaa soʼujee tü juyakat 1914. Wainma wayuu outaka sutuma atkawaa süpülapünaa tü juyakat 1900. Wainmaleepejeʼe maʼin na outakana sutuma atkawaa soʼujee tü juyakat 1900 sünainmüinreʼeya tü juyakat 2000. Müliashaatasü saaʼin wayuu sutuma tia.

⁷ Jamü. Müsü nünüiki Jesuu: «Mülieerü maʼi saaʼin wayuu sütüma jamü» (Mateo 24:7). Mayaainjeʼe wainmain maʼin eküülü eeka maaʼutpünaa, ayatüsia neʼe müliain saaʼin wayuu sutuma jamü. Eeshii na manneetsekana süpüla ayaʼlajaa tü neküinjatkat jee moumainre naya süpüla apünajaa. Alatüshii suulia 1.000 miyoone na wayuu masetaainkana nanneetse süpüla nayaʼlajüin tü neküinjatkat kaʼiwai. Saashin Organización Mundial de la Salud watta maʼin naalii na tepichi outakana juyawai sutuma jamü.

8, 9. ¿Jamüsü shikeraajia maaʼulu tü nümakat Jesuu süchiki sukutkujaainjatüin tü mmakat otta süchiki tü ayuuliikat?

⁸ Akutkujaweerü tü mmakat. Müsü nünüiki Jesuu: «Akutkujaweerü tü mmakat sainküin mma» (Lucas  21:11). Wainmatua maʼin sukutkujaain tü mmakat juyawai otta emetuluwaisü maʼin shia. Soʼujee tü juyakat 1900, alatüshii suulia piama miyoone wayuu outaka sutuma tia. Mayaainjeʼe wainmain kasa sukumajaka wayuu süpüla sütüjaanüin aaʼu sukutkajaainjatüle tü mmakat, ayatüsia outuin wayuu sutuma.

⁹ Ayuulii. Nüküjain Jesuu müliainjatüin maʼin saaʼin wayuu sutuma ayuulii. Tia shia tü ayuulii aisükat maʼin, aʼwalakajaainjatka sainküin mma jee outuinjatka atuma wainma wayuu (Lucas 21:11). Mayaainjeʼe wainmain na tottoot atüjakana maʼin eiyajaa wayuu, ayatayülia mepin wainma ayuulii. Naashin waneinnua wayuu atüjakana süpüleerua tü kasa alatakat, watta saalii tü wayuu outakat sutuma kamüsoina, cólera, paludismo, cáncer jee sutuma ayuulin tü saaʼinkat. Soʼutpünaa tü 40 juya alatüitpakat, alatüsü suulia 30 ayuulii jeketü akumajaaka, soʼutku tia ayuuliikat eesü eekai mepin.

10. ¿Jamüinjatü sukuwaʼipa wayuu maaʼulu saashin 2 Timoteo 3:1-5?

¹⁰ Anuu tü sümakat tü Wiwüliakat süchiki tü alatajatkat sülüʼütpa sükalia süpüla sajaʼlajaain kasa süpüshuaʼa: «Shiimüin sünain müliainjatüin maʼi wayuu süpüshua soʼu kaʼikat tia» (2 Timoteo 3:1-5). Nüküjain  chi aluwataaushikai Pablo jamüinjatüin sukuwaʼipa tü wayuukalüirua sülüʼütpa süpüla sajaʼlajaain kasa süpüshuaʼa:

• Kapülainjatü naaʼin nakuwaʼipa neʼe namüiwaʼa.

• Kachiiruainjatü naaʼin washirüü.

• Moonooinjana sümaa nanüiki nashi jee nei.

• Mojutuinjachi Maleiwa natuma.

• Maalinjatü wayuu napüla.

• Maaʼinjatü naaʼin.

• Jashichinjana maʼin.

• Nayoutuinjatü tü anasükat.

• Ashaitüinjana waneepia saaʼu maalin Maleiwa napüla.

• Anoujayaainjana nünain Maleiwa sümaa moonooloin naya sümaa nünüiki.

11. ¿Kasa alatajatka namüin na mojulaashiikana saashin Salmo 92:7?

¹¹ ¿Shiimainchejeʼe müin sukuwaʼipa tü wayuukalüirua maaʼutpünaa? Maʼleesia sukuwaʼipa wayuu sainküin mma. Najaʼttirüinjanapejeʼe Maleiwa napüshuaʼa na mojulaashiikana. Anuu tü nümakat wamüin: «Nakooʼomüinraapa maʼin na mojulaakana maʼaka shimiyoʼulaain tü mojuuikat otta nakooʼomüinraapa na eʼrüliikana wayumüin maʼaka suʼwuiraain tü süsiikat wunuʼu, süpülajatü najaʼttinnüin süpüla kaʼikat süpüshuaʼa» (Salmo 92:7).

12, 13. ¿Kasa nikirajaka anain waya Jeʼwaa?

¹² Süküjatüjülia tü Wiwüliakat müliainjatüin maʼin saaʼin wayuu sainküin mma. Süküjapejeʼe süchiki tü kasa anasü alatajatkat.

¹³ Shiyaawatüinjatü saaʼu wayuu tü sümakat tü Wiwüliakat. Müsü nünüiki Daniel nüshajaiwaʼaya süchiki tü alatajatkat sülüʼütpa sükalia süpüla sajaʼlajaain kasa süpüshuaʼa: «Atüjaaneerü maʼin aaʼu tü nüchikimaajatkat Maleiwa» (Daniel 12:4). Nükaaliijeerüin Jeʼwaa tü nupueulosekat süpüla shiyaawatüin saaʼu tü pütchi suluʼukat tü Wiwüliakat. Ekeraajüsü maʼin tia soʼujee tü juyakat 1914. Sutuma nikirajüin waya Jeʼwaa, kojutusü wamüin tü nünüliakat otta tü naaʼinrüinjatkat mapeena saaʼu tü Mmakat. Watüjaa aaʼu taashin wayuu sutuma naapajiraain nikii Jesuu. Watüjaa aaʼu nnojoluin jalamüin oʼunuin naaʼin wanee wayuu outapa nia otta süsoʼiraainjatüin naaʼin na outushiikana. Sükajee nikirajüin waya Jeʼwaa, wayaawata aaʼu niain neʼe niakai anouteʼerüinjachika tü kasa mojusü alatakat saaʼu mmaka. Talatüsü waaʼin sünain aaʼinraa tü kasa nüchekakat Maleiwa wapüleerua. ¿Kasa naaʼinraka na aʼyataashiikana nümüin Jeʼwaa süka kojutuin namüin tü natüjaakalü aaʼu? Watüjaajeerü aaʼu tia wekirajaale sünain wanee pütchi aküjünatüjütkalia achiki paala. (Paashajeʼera noota 20 otta noota 24).

14. ¿Jalamüinsü aküjünüin tü pütchi anasükat otta jaralii na aküjakana süchiki?

¹⁴ Aküjünajatü tü pütchi anasükat sainküin mma. Müsü nünüiki Jesuu wanaa sümaa nüküjain süchiki tü alatajatkat sülüʼütpa sükalia süpüla sajaʼlajaain kasa süpüshuaʼa: «Aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa» (Mateo 24:3, 14). Alatüsü suulia 240 mma aküjünaka aluʼu tü pütchi anasükat otta alatüsü suulia 1.000 anüikii süshajünaka aluʼu. Na aküjaliikana pütchi nüchiki Jeʼwaa suluʼujeejanakana mmakat süpüshuaʼa nekirajüin wayuu süchiki nukuwaʼipa Maleiwa sünain  aluwatawaa otta tü naaʼinrajatkat süpüleerua wayuu (Alateetkat Mapeena 7:9). Aʼyataashii maʼin na Aküjaliikana pütchi süka naaʼin namüiwaʼa otta nnojoishii naya achekajüin. Maʼaka nüküjain Jesuu, wainma na wayuu üttakana aaʼin nanain otta apüleeruaanüsü naaʼin, nnojotpejeʼe süpüla suuʼuleʼerüin wayuu tü aküjaakat pütchi (Lucas 21:17).

15. (1) ¿Alüʼütsüche saaʼin pümüin sükalia sajaʼlajaainjatka oʼu kasa süpüshuaʼa? (2) ¿Kaseerü alataka namüin na nnojoliikana jaa müin nümüin Jeʼwaa? ¿Kaseerü alataka namüin na wayuu jaa makana nümüin Jeʼwaa?

¹⁵ ¿Alüʼütsüche saaʼin pümüin sükalia sajaʼlajaainjatka oʼu kasa süpüshuaʼa? Sükajee tü kasa ekeraajaakat maaʼutpünaa, watüjaa aaʼu sülüʼülüin tia kaʼikat. Soʼu palitchon kaʼi, nüshaʼwaleʼereerü Jeʼwaa tü aküjaakat süchiki pütchi anasü jee «kettaapa shia, anteerü sükalia sajaʼlajaainjatkat oʼu tü kasakat süpüshua» (Mateo 24:14). ¿Joujeetche süntaka tü kaʼi sajaʼlajaainjatkalü oʼu tü kasakat süpüshuaʼa? Alateerü tia soʼu Armagedón. Soʼu kaʼikat tia, najaʼttireerü Jeʼwaa tü kasa mojusükat. Nüjüteechi Jeʼwaa chi Nüchonkai otta na aapieekana süpüla najaʼttirüinjanain na wayuu nnojoliikana jaa müin nümüin otta nümüin chi Nüchonkai (2 Tesalónica 1:6-9). Süchikijee Armagedón nnojoleerü emeejünüin tü wayuukalüirua nutuma Satanaa otta sutuma tü yolujaakalüirua. Napüshuaʼa na wayuu jaa makana nümüin Jeʼwaa, neʼreerü shikeraajüin süpüshuaʼa tü nümatüjütkalia (Alateetkat Mapeena 20:1-3; 21:3-5).

16. ¿Kasa anaka süpüla paaʼinrüin süka sülüʼülüin maʼin sükalia süpüla sajaʼttajatüin kasa süpüshuaʼa?

¹⁶ Alüʼütsü maʼin sükalia süpüla sajaʼttinnajatüin tü kasa nuluwataakalü aaʼu Satanaa, makalaka anain püsakirüle paaʼin sünain kasain paaʼinrüinjatüin. Keeʼireesüle naaʼin Jeʼwaa pütüjainjachin maʼin süpüleerua tü Wiwüliakat, anashi pikirajaale otta paaʼinrüle tü sümakat tü Wiwüliakat (Juan 17:3, TNM). Outkajaʼawaishii semaanawai na aküjaliikana pütchi nüchiki Jeʼwaa. Sünain tü outkajawaakat, nakaaliijain na wayuukana süpüla  nayaawatüin saaʼu tü sümakat tü Wiwüliakat. Anashi puutkajaale namaa waneepia (paashajeʼera Hebreokana 10:24, 25). Piyaawatüle saaʼu tü kasa punouteʼerüinjatkat suluʼu pukuwaʼipa, punouteʼeramaata shia. Paaʼinrüle tia, aleeweechi maʼin pia nümaa Jeʼwaa (Santiago 4:8).

17. ¿Jamüsü süntalaa meetka tü nükaliakat Jeʼwaa saaʼu watta saalii wayuu?

¹⁷ Müsü nünüiki chi aluwataaushikai Pablo: «Maa aka wane wayuu nipiajachi sünain nnojolüin nütüjaain saaʼu joujaleechin nüntüin wane kaʼruwarai nünainmüin, meeria aka tü wayuukolüirua süpülapünaa tü nükaliakat chi Senyotkai» (1 Tesalónica 5:2). Nüküjain Jesuu wainmeenain na wayuu nnojoluinjanaka kachipünaain naaʼin sülüʼülüin maʼin tü nükaliakat Jeʼwaa. Anuu nünüiki Jesuu: «Soto jaaʼin tü alatakat nükalioʼu Noé süka meerüin nükalia chi Shipayakai Wayuu nüleʼejapa nüchikuaʼa. Nnojoluiwaʼaya noʼotooin Noé suluʼumüin tü anuwakat, shia neʼe jülüjaka saaʼin wayuu ekawaa otta asawaa, achuntunusü tü jieyuukalüirua süpüla kasaalüü otta kaʼwayuuseyaa müshii na tooloyuukana. Ayatüshii macheʼein naya shiʼitaleepa tü juya miyoʼukat maʼin süpüla najaʼttinnüinjanain sutuma» (Mateo 24:37-39, TNM).

18. ¿Kasa eejüinjatka atuma waaʼin naashin Jesuu?

¹⁸ Nüküjain Jesuu eejüinjatüin waaʼin suulia jülüjain neʼe waaʼin asawaa, ekawaa ooʼulaka shapaale maʼin waaʼin saaʼu tü katüinjatkalü atuma woʼu. Nüchiaain waya suulia tia süka süntalaa meerüin tü nükaliakat Jeʼwaa saaʼu wayuu süpüshuaʼa. Müshijeseʼe nümüin: «Anakaja müleka jülüjüle jaaʼin tü takaliakat waneepia, sümaa jüchuntüin nümüin Maleiwa süpüla süchechennajatüin jaaʼin sünain tü jünoulakat suʼunnaa tü kasa mojusü alateetkat, suulia japüijain jia tamülatuʼu tayakai» (Lucas 21:34-36). ¿Jamüsü waaʼinrüinjatka tü nümakat Jesuu? Shia süka sülüʼülüin maʼin sükalia süpüla sajaʼttinnüin tü nuluwataakalü aaʼu Satanaa. Na wayuu aaʼinrakana tü kasa anasükat noʼuluʼu Jeʼwaa otta Jesuu, naya katüinjanaka oʼu süpüla kaʼikat süpüshuaʼa suluʼu tü Paʼaraiisükat (Juan 3:16, TNM; 2 Pedro 3:13, TNM).