1. ¿Mbaʼéichapa ikatu jaikuaa mbaʼépa oikóta amo gotyove?

REHECHA térã rehendu jave umi notísia oiméne ere jepi: “¿Mbaʼéiko oikopáta ñandehegui la péichante jahárõ hese?”. Hetaiterei mbaʼe vai ningo oiko, upévare la hénte opensa hiʼag̃uimbaitemaha pe fin del múndo. Péro, ¿ikatúne piko jaikuaa mbaʼépa oikóta ñandehegui? ¿Oñehundítapa añetehápe ko múndo? Yvyporakuéra ningo ndaikatúi oikuaa mbaʼépa oikóta amo gotyove, péro Jehová si oikuaa. La Bíbliape haʼe omombeʼu ñandéve mbaʼépa oikóta ñandehegui ha ko múndogui (Isaías 46:10; Santiago 4:14).

2, 3. ¿Mbaʼépa oporandu Jesúspe ijapostolkuéra, ha mbaʼépa haʼe heʼi chupekuéra?

² La Biblia oñeʼẽ jave fin del múndore, ndeʼiséi hína ko yvy oñehunditaha síno umi hénte aña la oñehundítava. Jesús omboʼe vaʼekue la héntepe Ñandejára Rréino ogovernataha ko yvy (Lucas 4:43). Umi apóstol oikuaase vaʼekue arakaʼetépa oñepyrũta ogoverna Ñandejára Rréino, ha oporandu hikuái Jesúspe: “¿Arakaʼe piko oikóta koʼã mbaʼe? ¿Ha mbaʼe señálpa oĩta ropilla hag̃ua nde reimemaha orendive, ha pe fin ou potaitemaha?” (Mateo 24:3). Jesús ndeʼíri chupekuéra arakaʼetépa oikóta upéva, péro omombeʼu chupekuéra mbaʼépa oikóta oñehundi potaite vove umi hénte añáme. Umi mbaʼe Jesús heʼi vaʼekue oikotaha oñekumplipaitéma ohóvo koʼág̃a.

³ Ko kapítulope jahecháta mbaʼérepa jaʼekuaa oñehundi potaitemaha ko múndo aña. Péro primero ñañeʼẽmíta peteĩ gérra oiko vaʼekuére yvágape, upéva ñanepytyvõta  ñantende hag̃ua mbaʼérepa oiko hetaite mbaʼe vai ko múndope.

4, 5. a) ¿Mbaʼépa oiko yvágape Jesúsgui oiko riremi Rréi? b) Heʼiháicha Apocalipsis 12:12, ¿mbaʼépa oiko Satanás ou rire ko yvy ape ári?

⁴ Kapítulo 8-pe jahecha kuri áño 1914-pe oiko hague Jesúsgui Rréi (Daniel 7:13, 14). Ha la Biblia omombeʼu ñandéve mbaʼépa oiko upe rire. Lívro de Apocalípsispe heʼi: “Oiko peteĩ gérra yvágape: Miguel [térã Jesús] ha hiʼanhelkuéra oñorairõ pe dragón [térã Satanás] kóntrape, ha pe dragón ha hiʼanhelkuéra oñorairõ ikontrapekuéra”. * Satanás ha idemoniokuéra operde pe gérra ha oñemosẽ chupekuéra yvágagui ha ou hikuái ko yvy ape ári. ¡Eñeimahinamína mbaʼeichaitépa oiméne ovyʼa umi ánhel oikórõ guare upéva! Péro, ¿mbaʼépa oiko upe rire ko yvy ape ári? La Biblia omombeʼu Satanás ha idemoniokuéra ou guive ko yvy ape ári oĩha hetave provléma ha ojejapoha hetave mbaʼe vai. Satanás “ipochyeterei hína pórke oikuaa mbykypaitemaha pe tiémpo hembýva chupe” (Apocalipsis 12:7, 9, 12).

⁵ Satanás ojapo hína heta mbaʼe vai ko yvy ape ári. Haʼe ipochyeterei pórke Ñandejára koʼẽrõitéma nopermitimoʼãvéi chupe ojapo upéva. Jahechamína mbaʼépa heʼi vaʼekue Jesús oikotaha koʼã ára pahápe (ehecha nóta 24).

6, 7. Jesús heʼi vaʼekue oikotaha gérra ha oĩtaha ñembyahýi, ¿mbaʼéichapa oñekumpli hína upéva?

⁶ Gérra. Jesús heʼi vaʼekue: “Peteĩ país opuʼãta ótro país  rehe, ha umi goviérno opuʼãta ojuehe” (Mateo 24:7). Ñane tiémpope hetaitereive hénte omano umi gérra káusare. Peteĩ organisasión ostudiáva umi mbaʼe oikóva ko múndope heʼi 1914 guive mas de 100 millón de persóna omano hague umi gérra káusare. Áño 1900 mboyve omano kuri hetaiterei hénte umi gérra káusare, péro umi 100 áño ohasa vaʼekuépente, pe áño 1900 guive 2000 peve, hetaitereive oñemano. Ajépa hetaitéma ojesufri ha ojehasa asy umi gérra káusare.

⁷ Ñembyahýi. Jesús heʼi vaʼekue: “Oĩta ñembyahýi” (Mateo 24:7). Koʼág̃arupi ningo hetaitereive hiʼupy oĩ opárupi, upéicharõ jepe heta oĩ ndorekóiva hoʼu vaʼerã. ¿Mbaʼérepa? Pórke ndorekói pláta ojogua hag̃ua ni yvy oñemitỹ hag̃ua. Hetaiterei oĩ ndohupytýiva hemikotevẽ káda día g̃uarã. Pe Organización Mundial de la Salud heʼi káda áño hetaiterei mitã hasyha ndokaruporãigui ha upévare omano.

8, 9. Jesús heʼi vaʼekue oikotaha terremóto ha oĩtaha heta mbaʼasy, ¿mbaʼérepa ikatu jaʼe oñekumplimaha koʼã mbaʼe?

⁸ Terremóto. Jesús heʼi vaʼekue: “Oĩta yvyryrýi tuicháva” (Lucas  21:11). Káda áño hetaiterei terremóto oiko. Áño 1900 guive mas de 2 millón de persónama omano upéva káusare. Koʼág̃a oĩramo jepe umi mákina opilláva oikóta jave umi yvyryrýi, lomímonte hetaiterei jey oñemano.

⁹ Mbaʼasy. Jesús heʼi vaʼekue avei oĩtaha “opaichagua mbaʼasy” (Lucas 21:11). Ha upeichaite oiko, oĩ heta mbaʼasy pyaʼeterei oñekontahiáva ha ñandejuka. Umi doktór oikuaáramo jepe mbaʼéichapa oñepohãnóta heta mbaʼasy, oĩ gueteri mbaʼasy naipohãiva. Peteĩ estúdio ojejapo vaʼekue heʼi káda áño hetaiterei hénte omanoha mbaʼasýgui. Por ehémplo, hetaitereípema ojuka pe mbaʼasypoʼi, kólera ha malária. Ha ndahaʼéi umívante la oĩva, umi 40 áño ohasa vaʼekuépe umi doktór odeskuvri 30 mbaʼasy pyahu ha umíva apytégui oĩ naipohãiva gueteri koʼág̃a peve.

10. ¿Mbaʼéichapa oñekumpli koʼág̃a 2 Timoteo 3:1-5 heʼíva?

¹⁰ La Bíbliape, 2 Timoteo 3:1-5-pe heʼi: “Umi ára pahápe pe situasión ijetuʼúta ha ipeligrósota”.  Apóstol Pablo omombeʼu mbaʼéichapa oñekomportáta la hénte koʼã ára pahápe. Haʼe heʼi:

• umi hénte ojepyʼapýta ijehénte

• iplatarayhúta

• naiñeʼẽrendumoʼãi ituakuérape

• oheja reíta hapichápe

• ndohayhumoʼãi ihéntepe

• ndojejokokuaamoʼãi

• isalváheta

• ojapóta chupekuéra ogustávante ohayhu rangue Ñandejárape

• heʼíta ohayhuha Ñandejárape, péro naiñeʼẽrendumoʼãi chupe

11. Ohechaukaháicha Salmo 92:7, ¿mbaʼépa oikóta umi hénte iñañávagui?

¹¹ ¿Oñekumplípa avei nde reikohápe 2 Timoteo 3:1-5 heʼíva? Opárupi jahechakuaa oñekumpliha upéva. Péro Ñandejára koʼẽrõitéma oipeʼapáta umi mbaʼe vai oikóva. Haʼe heʼi voi: “Rehecha vove umi iñañávape oho porãitereiha, ha ñanáicha hetaveha ohóvo hikuái, upéva heʼise oñehundi potaitemaha pára siémpre” (Salmo 92:7).

12, 13. ¿Mbaʼépa ñanemboʼe Jehová koʼã ára pahápe?

¹² La Biblia heʼíma vaʼekue voi koʼã ára pahápe oĩtaha heta sufrimiénto ha oikotaha heta mbaʼe vai. Péro heʼi avei oikotaha heta mbaʼe iporãva.

¹³ Oñentende porãve la Biblia. Proféta Daniel oñeʼẽrõ guare koʼã ára paháre, heʼi vaʼekue: “Umi enseñánsa verdadéra heta hetavéta” (Daniel 12:4). Jehová siémpre oipytyvõ isiervokuérape ontende porãve hag̃ua heta mbaʼe oĩva Iñeʼẽme ha koʼýte ojapo upéva áño 1914 guive. Por ehémplo, ñanemboʼe mbaʼérepa iñimportánte jaikuaa héra, mbaʼépa oipota ñandéve g̃uarã, mbaʼéichapa Jesús sakrifísio rupive ikatúta jajei pekádo ha ñemano poguýgui, mbaʼépa oiko umi omano vaʼekuégui, oñemoingove jeytaha umi omano vaʼekuépe, ha Ñandejára goviérno añoite osolusionataha umi provléma oĩva ko múndope. Jahecháma avei kuri mbaʼépa jajapo vaʼerã javyʼa hag̃ua ha mbaʼépa jajapo vaʼerã Ñandejára ñandeguerohory hag̃ua. Péro ¿mbaʼépa ojapo Ñandejára siervokuéra umi mbaʼe oaprendévagui? Oĩ ótra profesía ohechaukáva upéva (ehecha nóta 21 ha nóta 25).

14. ¿Moõ moõpa ojepredika umi notísia porã oñeʼẽva Ñandejára Rréinore, ha mávapa hína umi ojapóva upéva?

¹⁴ Ojepredika opárupi. Jesús oñeʼẽrõ guare umi ára paháre, heʼi vaʼekue: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári” (Mateo 24:3, 14). Umi notísia porã oñeʼẽva Ñandejára Rréinore ojepredika hína mas de 230 paíspe ha mas de 700 idiómape. Oparupiete umi testígo de Jehová oipytyvõ hína la héntepe ontende hag̃ua mbaʼépa Ñandejára Rréino ha mbaʼépa ojapóta yvyporakuéra rehehápe (Apocalipsis 7:9).  Haʼekuéra ndokovrái mbaʼevete la héntepe. Oĩramo jepe ndochaʼéiva hesekuéra opredika haguére, avave ndojokói chupekuéra osegi hag̃ua opredika Jesús heʼi haguéicha (Lucas 21:17).

15. a) ¿Ndépa rekree koʼẽrõitéma oñehunditaha umi hénte iñaña ha ojapóvape mbaʼe vai? b) ¿Mbaʼépa oikóta umi naiñeʼẽrendúivagui Jehovápe ha mbaʼépa ohupytýta umi iñeʼẽrendúva?

¹⁵ ¿Ndépa rekree koʼẽrõitéma oñehunditaha umi hénte iñaña ha ojapóvape mbaʼe vai? Heta profesía oñeʼẽva umi ára paháre oñekumplipáma ohóvo. Koʼẽrõitéma Jehová heʼíta anivéma hag̃ua ojepredika umi notísia porã, “ha upéi og̃uahẽta pe fin” (Mateo 24:14). ¿Mbaʼépa hína pe fin? Upéva hína pe Armagedón. Armagedónpe Ñandejára ohundipaitéta umi hénte iñaña ha ojapóvape mbaʼe vai. Jehová omboúta Jesús ha umi ánhel ipoderosoitévape ohundi hag̃ua entéro umi naiñeʼẽrendúivape chupe ha Itaʼýrape (2 Tesalonicenses 1:6-9). Upe rire Satanás ha idemoniokuéra ndaikatumoʼãvéima ombotavy la héntepe. Enterove iñeʼẽrendúva Jehovápe ha oñemoĩva igoviérno poguýpe, ohecháta mbaʼéichapa Ñandejára okumplipaite umi mbaʼe porã oprometéva (Apocalipsis 20:1-3; 21:3-5).

16. ¿Mbaʼépa tekotevẽ rejapo pe fin hiʼag̃uimbaitéma rupi?

¹⁶ Umi hénte aña ha opa mbaʼe oĩva Satanás poguýpe oñehundi potaitéma. Upévare iñimportánte reñeporandumi: “¿Mbaʼépa tekotevẽ ajapo?”. Jehová ningo oipota nde reaprende opa ikatúva la Bíbliagui. Upévare tekotevẽ rejagarra ensério la nde estúdio (Juan 17:3). Káda semána testígo de Jehová ojapo umi rreunión oipytyvõva la héntepe ontende hag̃ua la Biblia. Eñehaʼãkena eho meme umi rreunionhápe (elee Hebreos  10:24, 25). Rehechakuaáramo tekotevẽha rekambia algúna kósape, ani rekyhyje rekambia hag̃ua. Rejapóramo upéicha, katuete reñemoag̃uivéta Jehováre (Santiago 4:8).

17. ¿Mbaʼéicha rupípa pe fin ojagarráta de sorpresaite umi héntepe?

¹⁷ Apóstol Pablo heʼi pe fin outaha “peteĩ mondaháicha pyharekue” umi hénte ohaʼarõʼỹve jave (1 Tesalonicenses 5:2). Jesús oprofetisa vaʼekue umi hénte ohechakuaáramo jepe ñaimemaha umi ára pahápe, nopenamoʼãiha upévare. Jesús heʼi: “Oiko haguéicha Noé tiémpope, péichata avei pe tiémpo pe Yvypóra Raʼy oĩ vove penendive. Upe tiémpope, pe dilúvio mboyve umi hénte okaru ha hoʼu vevída, kuimbaʼe ha kuñanguéra omenda joa, Noé oike peve pe árkape. Haʼekuéra noñatendéi la oikóvare ha upéi ou pe dilúvio ha oñehundipaite hikuái. Péichata avei pe tiémpo pe Yvypóra Raʼy oĩ vove penendive” (Mateo 24:37-39).

18. ¿Mbaʼépa heʼi porã ñandéve Jesús?

¹⁸ Jesús heʼi porã ñandéve: “Peñatendéke pendejehe ani hag̃ua núnka peiko pekaru rasa, pemokõ rasa térã peñekevrantaiterei umi mbaʼe peikotevẽvare”. Haʼe heʼi pe fin ñandejagarrataha ‘peteĩ lásoicha’ ñahaʼarõʼỹve jave, ha ‘pe día outaha enterove persóna ári, umi oikóva ko yvy apére’. Upévare heʼi: “Peñatende porãke siémpre, ha tódo el tiémpo pejerure asy Ñandejárape tapenepytyvõ pejesalva hag̃ua entéro koʼã mbaʼe oikótavagui. Péicha ikatúta peime pe Yvypóra Raʼy renondépe” (Lucas 21:34-36, nóta). ¿Mbaʼérepa iñimportánte jajapo Jesús heʼi vaʼekue? Pórke koʼẽrõitéma oñehundíta umi hénte aña ha opa mbaʼe oĩva Satanás poguýpe. Umi persóna Jehová ha Jesús oguerohorýva añoite ojesalváta ou vove pe fin, ha oikovéta opa árare Ñandejára goviérno poguýpe (Juan 3:16; 2 Pedro 3:13).