1. Sa diin naton mahibaluan ang parte sa palaabuton?

NAKALANTAW ka na bala sang balita kag nagpamensar, ‘Magalala pa bala ini?’ Madamo na gid sing trahedya kag kapintas amo nga ang pila nagapati nga malapit na gid ang katapusan sang kalibutan. Matuod bala ina? May paagi ayhan para mahibaluan ang matabo sa ulihi? Huo. Indi mapaktan sang mga tawo ang matabo sa ulihi, pero nahibaluan ini ni Jehova nga Dios. Paagi sa Biblia, ginasugid niya kon ano ang matabo sa ulihi sa aton kag sa duta.—Isaias 46:10; Santiago 4:14.

2, 3. Ano ang gusto mahibaluan sang mga disipulo ni Jesus, kag ano ang sabat niya sa ila?

² Kon magsiling ang Biblia parte sa katapusan sang kalibutan, indi katapusan sang Duta ang ginatumod sini, kundi ang katapusan sang kalainan. Gintudluan ni Jesus ang mga tawo nga gamhan sang Ginharian sang Dios ang bilog nga duta. (Lucas 4:43) Gusto mahibaluan sang mga disipulo ni Jesus kon san-o maabot ang Ginharian sang Dios, gani ginpamangkot nila sia: “San-o bala ini matabo, kag ano bala ang tanda sang imo presensia kag sang hingapusan sang sistema sang mga butang?” (Mateo 24:3) Wala sila ginsugiran ni Jesus sang petsa, pero ginsugid niya kon ano ang matabo antes sang katapusan sang kalibutan, kag nagakatabo na gid ini subong.

³ Matun-an naton sa sini nga kapitulo nga nagakabuhi na kita sa panahon antes sang katapusan sang kalibutan.  Tun-an anay naton ang parte sa inaway sa langit para maintiendihan naton kon ngaa kagamo gid sa duta.

4, 5. (a) Ano ang natabo sa langit wala madugay pagkatapos nangin Hari si Jesus? (b) Base sa Bugna 12:12, ano ang matabo sa duta pagkatapos itagbong si Satanas?

⁴ Sa Kapitulo 8 natun-an naton nga nangin Hari si Jesus sa langit sang 1914. (Daniel 7:13, 14) Ginasugiran kita sang libro sang Bugna sang natabo: “Nagdabdab ang inaway sa langit: Si Miguel [buot silingon, si Jesus] kag ang iya mga anghel nagpakig-away sa dragon [si Satanas] kag ang dragon kag ang mga anghel sini nagpakig-away sa ila.” * Napierde si Satanas kag ang iya mga demonyo kag gintagbong sila sa duta. Nalipay gid ang mga anghel! Pero kamusta naman ang mga tawo sa duta? Nagsiling ang Biblia nga indi gid maayo ang mangin sitwasyon sang mga tawo. Ngaa? Bangod akig gid ang Yawa, “kay nahibaluan niya nga malip-ot na lamang ang iya tion.”—Bugna 12:7, 9, 12.

⁵ Grabe gid ang pagpanghalit sang Yawa sa duta. Akig gid sia kay malapit na lang sia dulaon sang Dios. Hibaluon naton kon ano ang ginsiling ni Jesus nga matabo sa katapusan nga mga adlaw.—Tan-awa ang Endnote 24.

6, 7. Ano ang masiling mo parte sa inaway kag gutom subong?

⁶ Inaway. Nagsiling si Jesus: “Magailinaway ang mga pungsod kag subong man ang mga ginharian.” (Mateo 24:7) Mas madamo ang napatay subong sa inaway sangsa bisan ano nga panahon sa kasaysayan. Ang Worldwatch Institute nagreport nga halin sang 1914, sobra 100 ka milyon ang napatay sa inaway. Sobra tatlo ka pilo  ang napatay sa inaway sa sulod lang sang 100 ka tuig halin sang 1900 asta 2000 sangsa napatay sang nagligad nga 1,900 ka tuig. Imadyina ang pag-antos kag kasakit sang minilyon bangod sa inaway!

⁷ Gutom. Nagsiling si Jesus: “May kakulang sa pagkaon.” (Mateo 24:7) Bisan pa mas madamo nga pagkaon subong ang ginapatubas, madamo gihapon ang wala sing makaon. Ngaa? Bangod wala sila sing kuarta nga ibakal ukon wala sila sing duta nga matamnan. Ang kita gani sang sobra isa ka bilyon ka tawo indi kalab-ot sing isa ka dolyar kada adlaw. Ang World Health Organization nagsiling nga minilyon ka bata ang nagakapatay kada tuig kay wala sila sing bastante nga pagkaon.

8, 9. Ano ang nagapakita nga ang tagna ni Jesus parte sa mga linog kag balatian nagakatuman na subong?

⁸ Mga linog. Si Jesus nagtagna: “May mabaskog nga mga linog.” (Lucas 21:11) Madamo nga mabaskog nga linog ang ginapaabot nga mabatyagan kada tuig. Halin sang tuig 1900, sobra duha ka milyon ang napatay bangod sa linog. Kag bisan pa mas madasig na subong mahibaluan sang teknolohiya ang linog, madamo gihapon ang nagakapatay.

 ⁹ Balatian. Gintagna ni Jesus ang parte sa “mga balatian.” Madasig nga magalapta ang malala nga balatian kag madamo ang mapatay. (Lucas 21:11) Bisan pa mabulong sang mga doktor ang madamo nga balatian, madamo gihapon ang wala pa gid sing bulong. Ang matuod, base sa isa ka report, minilyon ang nagakapatay bangod sa TB, malaria, kag kolera kada tuig. Magluwas sina, may nasapwan pa nga 30 ka bag-o nga balatian ang mga doktor, kag ang pila sini wala pa sing bulong.

10. Paano nagakatuman subong ang 2 Timoteo 3:1-5?

¹⁰ Sa 2 Timoteo 3:1-5, ang Biblia nagsiling: “Sa katapusan nga mga adlaw magaabot ang makahalanguyos [ukon, kululbaan] nga mga tion nga mabudlay atubangon.” Ginsugid ni apostol Pablo ang mangin batasan sang mga tawo sa katapusan nga mga adlaw. Nagsiling sia nga ang mga tawo

• mangin maiyaiyahon

• mangin mahigugmaon sa kuarta

• mangin indi matinumanon sa mga ginikanan

•   mangin indi mainunungon

• mangin indi mapinalanggaon sa ila pamilya

• wala sing pagpugong sa kaugalingon

• mangin mapintas kag agresibo

• mangin mahigugmaon sa kinasadya sa baylo nga mahigugmaon sa Dios

• nagapakunokuno nga palangga ang Dios pero wala nagatuman sa iya

11. Base sa Salmo 92:7, ano ang matabo sa mga malauton?

¹¹ Amo bala sini ang batasan sang mga tawo sa inyo? Madamo ang amo sini sa bilog nga kalibutan. Pero may himuon ang Dios sa indi madugay. Nagpromisa sia: “Kon ang malauton magtubo kaangay sang mga gamhon kag ang tanan nga makasasala maglambo, ini agod pagalaglagon sila sing dayon.”—Salmo 92:7.

12, 13. Ano ang gintudlo ni Jehova sa aton sa tion sang katapusan nga mga adlaw?

¹² Gintagna sang Biblia nga sa katapusan nga mga adlaw, ang kalibutan mapuno  sang kasakit kag pag-antos. Pero nagsiling man ini nga may maayo nga matabo.

¹³ Pag-intiende sa Biblia. Si propeta Daniel nagsulat parte sa katapusan nga mga adlaw. Nagsiling sia: “Ang matuod nga ihibalo magabugana.” (Daniel 12:4) Buligan sang Dios ang iya katawhan nga maintiendihan pa gid ang Biblia. Ginahimo ini ni Jehova halin pa sang 1914. Halimbawa, gintudluan niya kita nga importante ang iya ngalan kag kon ano ang iya katuyuan sa duta. Gintudluan man niya kita sang kamatuoran parte sa gawad, kon ano ang matabo kon mapatay kita, kag pagkabanhaw. Natun-an naton nga ang Ginharian sang Dios lamang ang makasolbar sang tanan naton nga problema. Natun-an man naton kon paano mangin malipayon kag kon paano magkabuhi nga nagapahalipay sa Dios. Pero ano ang ginahimo sang mga alagad sang Dios sa ila natun-an? Ginasabat ini sang isa pa ka tagna.—Tan-awa ang Endnote 21 kag 25.

14. Sa diin ginabantala ang maayong balita sang Ginharian, kag sin-o ang nagahimo sini?

¹⁴ Bilog kalibutan nga pagbantala. Parte sa katapusan nga mga adlaw, si Jesus nagsiling: “Ining maayong balita sang Ginharian ibantala sa bug-os nga duta.” (Mateo 24:3, 14) Ginabantala subong ang maayong balita sang Ginharian sa sobra 230 ka kadutaan kag sa sobra 700 ka lenguahe. Huo, ginabuligan sang mga Saksi ni Jehova, nga naghalin sa “tanan nga pungsod kag tribo,” ang mga tawo nga maintiendihan ang parte sa Ginharian kag kon ano ang himuon sini para sa mga tawo. (Bugna 7:9) Kag ginahimo nila ini sing libre. Bisan pa nga madamo ang naakig kag nagahingabot sa ila, wala sing makapugong sa ila pagbantala, pareho sa gintagna ni Jesus.—Lucas 21:17.

15. (a) Nagapati ka bala nga nagakabuhi na kita sa katapusan nga mga adlaw, kag ngaa? (b) Ano ang matabo sa mga nagatuman kay Jehova kag sa mga wala nagatuman sa iya?

¹⁵ Nagapati ka bala nga nagakabuhi na kita sa katapusan nga mga adlaw? Madamo nga tagna sa Biblia parte sa katapusan nga mga adlaw ang nagakatuman subong. Sa indi madugay, pauntaton ni Jehova ang pagbantala sang maayong balita kag magaabot “ang katapusan.” (Mateo 24:14) Ano nga katapusan? Amo ini ang Armageddon, ang tion nga dulaon sang Dios ang tanan nga malain. Gamiton ni Jehova si Jesus kag ang iya gamhanan nga mga anghel para laglagon ang mga wala nagatuman sa Iya kag sa iya Anak. (2 Tesalonica 1:6-9) Pagkatapos sina, indi na mapatalang ni Satanas kag sang iya mga demonyo ang mga tawo. Masaksihan sang tanan nga nagatuman sa Dios kag nagabaton sang iya Ginharian ang katumanan sang iya mga promisa.—Bugna 20:1-3; 21:3-5.

16. Bangod malapit na lang ang katapusan, ano ang dapat mo himuon?

¹⁶ Sa indi madugay, tapuson na ini nga kalibutan nga ginagamhan ni Satanas. Gani importante nga pamangkuton naton ang aton kaugalingon, ‘Ano ang dapat ko himuon?’ Gusto ni Jehova nga tun-an mo gid sing maayo ang Biblia. Dapat seriosuhon mo ang imo pagtuon. (Juan 17:3) May mga miting kada semana ang mga Saksi ni Jehova nga nagabulig sa mga tawo nga maintiendihan ang Biblia. Tilawi nga tambungi sing regular ina nga mga miting. (Basaha ang Hebreo 10:24, 25.) Kon natun-an mo nga kinahanglan mo magbag-o, indi mahadlok nga himuon ini. Samtang ginahimo mo ini, nagabakod pa gid ang inyo pag-abyanay ni Jehova.—Santiago 4:8.

17. Ngaa makibot ang kalabanan nga tawo kon mag-abot na ang katapusan?

 ¹⁷ Ginpaathag ni apostol Pablo nga ang kalaglagan sang mga malain matabo sa tion nga wala ginapaabot sang madamo, “subong sang kawatan sa kagab-ihon.” (1 Tesalonica 5:2) Gintagna ni Jesus nga balewalaon sang madamo ang pamatuod nga nagakabuhi na kita sa katapusan nga mga adlaw. Nagsiling sia: “Ang presensia sang Anak sang tawo [ukon, katapusan nga mga adlaw] kaangay sang adlaw ni Noe. Kay kaangay sang panahon sang wala pa ang Baha, ang mga tawo nagakaon kag nagainom, nagapangasawa kag nagapamana, tubtob sa adlaw nga nagsulod si Noe sa arka, kag wala gid sila magtalupangod tubtob nga nag-abot ang Baha kag nag-anod sa ila tanan, kaangay man sini ang matabo sa presensia sang Anak sang tawo.”—Mateo 24:37-39.

18. Ano ang paandam ni Jesus sa aton subong?

¹⁸ Ginpaandaman kita ni Jesus nga indi kita dapat mawili sa “sobra nga pagkaon kag sobra nga pag-inom kag mga kabalaka sa kabuhi.” Nagsiling sia nga hinali nga magaabot ang katapusan, “subong sang siod.” Nagsiling man sia nga “magaabot ini sa tanan nga nagaistar sa bug-os nga duta.” Dayon nagsiling pa gid sia: “Magpadayon kamo nga nagamata kag nagaampo [ukon, sinsero nga nagapangamuyo] sa tanan nga tion agod magmadinalag-on kamo sa pagpalagyo sa sining tanan nga butang nga mahanabo kag sa pagtindog sa atubangan sang Anak sang tawo.” (Lucas 21:34-36) Ngaa dapat gid kita mamati sa paandam ni Jesus? Kay dali na lang tapuson ang malain nga kalibutan ni Satanas. Ang mga nagatuman lamang kay Jehova kag kay Jesus ang maluwas kag mabuhi sing wala katapusan sa bag-o nga kalibutan.—Juan 3:16; 2 Pedro 3:13.