1. Ari ni kitai ulih nemu pasal jemah ila?

BISI mayuh macham penusah di serata dunya. Orang ngereja utai ti jai ngagai orang bukai, lalu kitai enda nemu utai ke deka nyadi dudi hari ila. (James 4:14) Taja pia, Petara kitai nemu utai ke deka nyadi jemah ila. (Isaiah 46:10) Ari menya Petara udah madahka utai ke deka nyadi lebuh pengujung dunya nyau semak, lalu baka ni gaya pengidup pengudah pengujung dunya.

2, 3. Nama deka ditemu bala murid Jesus, lalu baka ni Jesus nyaut sida?

² Lebuh kitai macha pasal pengujung dunya dalam Bup Kudus, tu ukai reti planet Bumi deka nadai agi, tang penyai ke deka nadai agi. Jesus madahka, Perintah Petara deka merintah atas dunya. (Luke 4:43) Bala murid Jesus deka nemu kemaya Perintah Petara deka datai, lalu sida nanya iya: ‘Kemaya semua utai tu deka nyadi, lalu nama tanda ti nunjukka nuan deka datai baru, enggau pengujung dunya?’ (Matthew 24:3) Jesus nadai madahka haribulan iya, tang iya madah ngagai sida utai ke deka nyadi sebedau pengujung dunya datai. Utai ti dipadah Jesus nya benung nyadi diatu.

³ Ba pelajar tu kitai deka berandauka bukti ke nunjukka kitai benung idup ba maya sebedau pengujung dunya datai. Keterubah, kitai patut nemu pasal perang ke nyadi di serega ngambika kitai ulih meretika kebuah utai majak jai ba dunya.

4, 5. (a) Nama nyadi di serega enda lama pengudah Jesus nyadi Raja? (b) Nitihka Pemandang 12:12, nama deka nyadi ba dunya pengudah Sitan dibuai?

⁴ Ba Pelajar 8 kitai udah belajar pasal Jesus ke nyadi Raja di serega ba taun 1914. (Daniel 7:13, 14) Bup Pemandang madahka utai ke nyadi: “Perang lalu nyadi di serega. Mikael [iya nya, Jesus] enggau bala melikat iya beperang ngelaban naga [Sitan] nya, lalu naga nya enggau bala melikat iya beperang ngelaban Mikael enggau bala melikat iya.” * Sitan enggau bala antu iya alah ba perang nya, lalu dibuai ke dunya. Uji gambarka pengaga ati bala melikat ti di serega! Tang, baka ni enggau orang ke ba dunya? Bup Kudus madahka, nya meh maya mensia deka balat tusah. Nama kebuah? Laban Sitan balat pedis ati, “nemu timpuh diri nyau deka abis.”—Pemandang 12:7, 9, 12.

⁵ Sitan enggau naka ulih ngenataika mayuh penusah ba dunya. Iya balat pedis ati laban nemu timpuh diri nyau deka abis sebedau Petara muai iya. Aram kitai mansik nama dipadah Jesus pasal utai ke deka nyadi maya hari ti penudi.—Peda Nota Penutup 24.

6, 7. Baka ni jaku Jesus pasal perang enggau lapar pungkang nyadi kemaya hari tu?

⁶ Perang. Jesus madahka: “Bansa siti deka beperang ngelaban bansa siti, lalu menua siti deka beperang ngelaban menua siti.” (Matthew 24:7) Mayuh agi orang mati ba perang maya jeman kitai enti dibanding enggau maya jeman bukai dalam sejarah. Siti riput ari  gerempung ke mansik utai ke nyadi ba dunya madahka, kenyau ari taun 1914, perang udah munuh lebih ari 100 juta iku orang. Orang ke mati ba perang kenyau ari taun 1900 nyentuk ngagai taun 2000 mayuh agi ari orang ke mati sebedau taun 1900. Uji gambarka pemerinsa sereta pemedis ke diasaika bejuta iku orang ketegal perang!

⁷ Lapar pungkang. Jesus madahka: “Lapar pungkang . . . deka nyadi.” (Matthew 24:7) Taja pan diatu bisi mayuh pemakai ari ke udah, tang orang agi enda chukup pemakai. Nama kebuah? Laban sida enda chukup duit kena meli pemakai tauka enda chukup tanah alai betanam. Lebih ari satu biliun iku orang idup enggau duit ke mimit aja ninting hari. World Health Organization madahka, tiap taun bejuta iku anak mit mati ketegal enda chukup vitamin ba pemakai.

8, 9. Nama nunjukka utai ti dipadah Jesus pasal tanah berenyang enggau penyakit amat nyadi?

⁸ Tanah berenyang. Jesus madahka: “Tanah berenyang deka  balat nyadi.” (Luke 21:11) Mayuh tanah berenyang ke balat deka nyadi ninting taun. Kenyau ari taun 1900, lebih dua juta iku orang udah mati ketegal tanah berenyang. Lalu taja pan teknologi udah nulung sida nyidi tumu tanah berenyang ke deka nyadi, tang agi mayuh orang ke mati.

⁹ Penyakit. Jesus madahka deka bisi “penyakit.” Penyakit ke tau nganu deka jampat ngelekai sereta munuh mayuh orang. (Luke 21:11) Taja pan bala lutur udah belajarka chara ngubat mayuh penyakit, tang agi bisi penyakit ke enda ulih disumanka. Indah siti riput madahka, tiap taun bejuta iku orang mati ketegal penyakit baka batuk rangkai tauka tibi, malaria, sereta muang ai. Ukai nya aja, dalam timpuh 40 taun ke udah, bala lutur udah tetemuka lebih ari 30 bengkah penyakit ti baru, lalu sekeda ari penyakit nya enda ulih diubat.

10. Baka ni 2 Timoti 3:1-5 dikeamatka kemaya hari tu?

¹⁰ Ba 2 Timoti 3:1-5, Bup Kudus madahka: “Ba hari ti penudi  mayuh macham penusah deka nyadi.” Rasul Paul nerangka baka ni ulah orang ba hari ti penudi. Iya madahka orang deka

• berundingka diri empu aja

• angkunka duit

• enda ngasika apai indai

• enda nemu meri terima kasih

• nadai nemu siruka orang

• enda nemu nagang diri

• mangah

• ngelantangka diri lalu enda rinduka Petara

• pepura rinduka Petara tang enggai ngasika Iya

11. Nitihka Masmur 92:7, nama deka nyadi ba orang ke jai?

¹¹ Kati mayuh orang ke diau semak nuan ngembuan ulah ke baka tu? Ba serata dunya, mayuh orang bisi ulah ke baka tu. Tang enda lama agi, Petara deka mutarka utai tu. Iya besemaya: “Orang ke jai nyangka ulih tumbuh baka rumput,  orang ke ngereja penyalah nyangka tau nyadi kaya-raja, tang sida deka dirusak abis lengis.”—Masmur 92:7.

12, 13. Nama udah diajar Jehovah ngagai kitai maya hari ti penudi?

¹² Bup Kudus madahka, maya hari ti penudi, dunya deka penuh enggau pemedis sereta pemerinsa. Tang Bup Kudus mega madahka bisi utai manah ke deka nyadi.

¹³ Meretika Bup Kudus. Nabi Daniel nulis pasal hari ti penudi. Ku iya: “Semina sida ke bepenemu-dalam aja deka mereti.” Petara deka meri nembiak Iya penau kena meretika Bup Kudus enggau terang agi ari ke udah. (Daniel 12:9, 10) Kelebih agi, Petara udah ngereja tu kenyau ari taun 1914. Ngambika chunto, Iya udah ngajar kitai pemesai reti nama Iya, tuju Iya ngaga dunya, pemendar pasal tebus, nama nyadi pengudah kitai mati, sereta pasal pengangkat ari mati. Kitai udah belajar, semina Perintah Petara aja ke ulih mutarka semua penusah kitai. Kitai mega udah belajarka chara ulih lantang ati sereta chara idup ti ngerinduka ati Petara. Tang nama digaga nembiak Petara enggau utai ti udah dipelajarka sida? Saut ngagai tanya tu bekaul enggau siti agi utai ti dipadah ba Bup Kudus.—Peda Nota Penutup 21 enggau 25.

14. Dini alai berita manah pasal Perintah Petara benung ditusui, lalu sapa ke nusui iya?

¹⁴ Pengawa nginjil di serata dunya. Lebuh bejaku pasal hari ti penudi, Jesus madahka: ‘Berita Manah pasal Perintah Petara deka ditusui di serata dunya.’ (Matthew 24:3, 14) Berita manah pasal Perintah Petara benung ditusui ba lebih 230 buah menua dalam lebih ari 700 iti bansa jaku. Amat, di serata dunya, Saksi-Saksi  Jehovah ari “genap bengkah bansa, ari semua raban bansa” nulung orang nemu pasal Perintah Petara sereta utai ke deka digaga Perintah nya ke mensia. (Pemandang 7:9) Lalu sida ngereja tu enggau enda bebayar. Taja pan sida dipegedi sereta diperinsaka orang, nadai utai ke ulih nagang pengawa nginjil nya, baka ke udah dipadah Jesus.—Luke 21:17.

15. (a) Kati nuan pechaya kitai benung idup ba hari ti penudi, lalu nama kebuah? (b) Nama deka nyadi ba orang ke ngasi enggau ke enda ngasika Jehovah?

¹⁵ Kati nuan pechaya kitai benung idup ba hari ti penudi? Mayuh utai ti dipadah Bup Kudus pasal hari ti penudi udah dikeamatka. Enda lama agi, Jehovah deka ngetuka pengawa nusui berita manah lalu “pengujung” datai. (Matthew 24:14) Nama reti pengujung? Iya nya Armagedon, maya Petara deka muai semua penyai. Jehovah deka ngena Jesus sereta bala melikat Iya ti kering ngemunaska semua orang ke enggai ngasika Iya sereta Anak Iya. (2 Tesalonika 1:6-9) Udah nya, Sitan enggau bala antu iya enda agi nesatka orang. Lalu semua orang ke ngasika Petara sereta nerima Perintah Iya deka meda semua semaya Petara dikeamatka.—Pemandang 20:1-3; 21:3-5.

16. Ketegal pengujung nyau semak, nama patut digaga nuan?

¹⁶ Enda lama agi, dunya ke dipegai Sitan deka nadai agi. Nya alai, endang beguna kitai nanya diri empu, ‘Nama patut digaga aku?’ Jehovah deka nuan enggau naka ulih belajarka Bup Kudus. Nuan patut ngemeratka pengawa belajar nya. (John 17:3) Saksi-Saksi Jehovah ngatur pengawa begempuru ninting minggu kena  nulung orang meretika Bup Kudus. Datai meh ngagai pengawa begempuru nya enggau bejarit. (Bacha Hebrew 10:24, 25.) Enti nuan nemu nuan patut ngaga ubah, anang takut ngereja nya. Seraya nuan ngereja nya, kaul nuan enggau Jehovah deka teguh agi.—James 4:8.

17. Nama kebuah mayuh orang deka tekenyit lebuh pengujung datai?

¹⁷ Rasul Paul madahka, pengerusak orang ke jai deka datai lebuh sida enda ngadang, “baka penchuri ke datai lebuh malam hari.” (1 Tesalonika 5:2) Jesus madahka, mayuh orang enggai ibuhka bukti ke nunjukka kitai benung idup ba hari ti penudi. Ku iya madahka: “Baka lebuh maya Noah menya, baka nya meh gaya penatai Anak Mensia. Laban berapa hari sebedau bah besai nyadi, orang majak makai ngirup, jadi melaki-bini, nikah, nyentuk ngagai hari Noah tama ke dalam bandung, lalu sida nadai nemu utai, nyentuk ngagai maya ai bah datai lalu nabanka semua sida.”—Matthew 24:37-39.

18. Nama jaku tangkan ke diberi Jesus ngagai kitai?

¹⁸ Jesus nangkan kitai, kitai enda patut dilimpangka enggau ulah ti “gian ngirup, lalu mabuk, lalu selalu irauka pengidup.” Iya madahka pengujung deka ngenyit datai, “baka panjuk ti nyintak.” Iya mega madahka, “Hari nya deka datai ngagai semua orang ke diau di serata dunya.” Udah nya ku iya agi: “Bejaga berari, besampi minta diri kering rari ari semua utai ti deka nyadi, lalu bediri di mua Anak Mensia.” (Luke 21:34-36) Nama kebuah nya beguna amat mendingka jaku tangkan Jesus? Laban enda lama da agi dunya Sitan ti jai deka dirusak. Semina orang ke diterima Jehovah enggau Jesus deka selamat maya pengujung datai, lalu diau belama iya ba dunya baru.—John 3:16; 2 Peter 3:13.