1. Kasanotayo a maammuan ti mapasamak iti masanguanan?

NAPADASAM kadin ti nagbuya iti damdamag ket napanunotmo, ‘Nagkaro metten ti mapaspasamak’? Nakaad-adu ti trahedia ken nakaro ti kinaranggas isu a mamati ti dadduma nga asidegen ti panungpalan ti lubong. Agpayso kadi dayta? Adda kadi pamay-an tapno maammuantayo ti mapasamak iti masanguanan? Adda. Saan a maibaga dagiti tattao no ania ti mapasamak iti masanguanan ngem kabaelan dayta ni Jehova a Dios. Babaen ti Biblia, impakaammona ti mapasamak kadatayo ken iti daga iti masanguanan.​—Isaias 46:10; Santiago 4:14.

2, 3. Ania ti kayat a maammuan dagiti adalan ni Jesus, ken ania ti insungbatna kadakuada?

² No mabasatayo iti Biblia ti maipapan iti panungpalan ti lubong, saan a ti panungpalan ti planeta a Daga ti tuktukoyenna no di ket ti panungpalan ti kinadakes. Insuro ni Jesus kadagiti tattao nga iturayanto ti Pagarian ti Dios ti intero a daga. (Lucas 4:43) Kayat a maammuan dagiti adalan ni Jesus no kaano nga umay ti Pagarian ti Dios isu nga insaludsodda kenkuana: “Kaanonto a mapasamak dagita, ken anianto ti pagilasinan ti kaaddam ken ti panungpalan daytoy a sistema ti bambanag?” (Mateo 24:3) Saan nga imbaga kadakuada ni Jesus ti eksakto a petsa, ngem imbagana no ania ti mapasamak sakbay unay ti panungpalan daytoy a lubong. Mapaspasamaken dagita ita.

³ Iti daytoy a kapitulo, adalentayo dagiti pammaneknek  nga agbibiagtayon iti panawen sakbay unay ti panungpalan ti lubong. Adalentayo nga umuna ti maipapan iti gubat a napasamak idiay langit tapno maawatantayo no apay a nakadakdakes ti kasasaad ditoy daga.

4, 5. (a) Ania ti napasamak idiay langit kalpasan unay a nagbalin ni Jesus nga Ari? (b) Sigun iti Apocalipsis 12:12, ania ti napasamak iti daga kalpasan a naitapuak ni Satanas?

⁴ Iti Kapitulo 8, naadaltayo a nagbalin ni Jesus nga Ari idiay langit idi 1914. (Daniel 7:13, 14) Ibaga ti libro nga Apocalipsis no ania ti napasamak: “Adda gubat a napasamak idiay langit: Nakigubat ni Miguel [kayatna a sawen, ni Jesus] ken dagiti anghelna iti dragon [ni Satanas]. Nakigubat met ti dragon ken dagiti anghelna.” * Naabak ni Satanas ken dagiti demoniona iti gubat ken naitapuakda ditoy daga. Nakaragragsak la ketdi dagiti anghel! Komusta ngay dagiti tattao ditoy daga? Ibaga ti Biblia nga agbalin a nagulo ti kasasaad ti lubong. Apay? Gapu ta nakaro ti pungtot ti Diablo, “ta ammona nga ababan ti tiempona.”​—Apocalipsis 12:7, 9, 12.

⁵ Ar-aramiden ti Diablo ti amin a kabaelanna a mangpataud iti riribuk ditoy daga. Napalalo ti pungtotna ta bassiten ti nabati a tiempo sakbay a pasardengen ti Dios dagiti aramidna ditoy daga. Adalentayo no ania ti imbaga ni Jesus a mapasamak bayat ti maudi nga al-aldaw.​—Kitaen ti Endnote 24.

6, 7. Ania ti makunam iti gubat ken bisin ita?

⁶ Gubat. Kuna ni Jesus: “Bumusorto ti nasion iti sabali  a nasion ken ti pagarian iti sabali a pagarian.” (Mateo 24:7) Ad-adu a tattao ti natay kadagiti gubat iti panawentayo ngem iti aniaman a tiempo iti pakasaritaan ti tao. Ipakita ti maysa a report ti Worldwatch Institute a manipud idi 1914, nasurok a 100 a milion a tattao ti napapatay iti gubat. Adu ti napapatay iti uneg ti 1,900 a tawen sakbay ti 1900, ngem mamitlo nga ad-adu ti napapatay iti uneg ti 100 a tawen iti nagbaetan ti 1900 ken 2000. Napalalo la ketdi ti liday ken saem a narikna ti minilion a tattao gapu iti gubat!

⁷ Bisin. Kuna ni Jesus: “Addanto met bisin.” (Mateo 24:7) Nupay ad-adu itan ti mapatpataud a taraon, adu latta ti agkurkurang ti pagtaraonna. Apay? Gapu ta kurang ti kuartada nga igatangda iti makan wenno daga a pagmulaanda. Nasurok a maysa a bilion a tattao ti nakurang a maysa a doliar (agarup 50 a piso) laeng ti inaldaw a pagbiagda. Ibaga ti World Health Organization a minilion nga ubbing ti matmatay iti kada tawen, kangrunaanna gapu ta agkurangda iti taraon a mangpasalun-at kadakuada.

8, 9. Ania dagiti pammaneknek a natungpal dagiti padto ni Jesus maipapan kadagiti ginggined ken sakit?

 ⁸ Ginggined. Impadto ni Jesus: “Addanto napipigsa a ginggined.” (Lucas 21:11) Manamnama nga adu a napipigsa a ginggined ti mapasamak iti kada tawen. Manipud idi 1900, nasurok a dua a milion ti natay gapu iti ginggined. Ken nupay adda simmayaatan ti teknolohia a mangdetek kadagiti ginggined, adu latta ti matmatay gapu iti ginggined.

⁹ Sakit. Impakpakauna ni Jesus nga addanto “makapapatay a saksakit.” Napartak nga agwaras dagiti nakabutbuteng a sakit ket adu ti matmatay gapu kadagita. (Lucas 21:11) Uray no naadalen dagiti doktor no kasano nga agasan ti adu a sakit, adda latta dagiti sakit a saan a maagasan. Kinapudnona, inlawlawag ti maysa a report nga iti kada tawen, minilion ti matmatay kadagiti sakit a kas iti TB, malaria, ken kolera. Ngem saan la a dayta. Adda 30 a baro a sakit a natakuatan dagiti doktor, ket dadduma kadagita ti saan a maagasan.

10. Kasano a matungtungpal ita ti 2 Timoteo 3:1-5?

¹⁰ Kuna ti Biblia iti 2 Timoteo 3:1-5: “Iti maudi nga al-aldaw, dumtengto dagiti delikado ken narigat a tiempo.” Imbaga ni apostol Pablo no anianto ti ugali ti kaaduan a tattao iti maudi nga al-aldaw. Kunana a dagiti tattao ket

• managayat iti bagida

• managayat iti kuarta

• nasukir kadagiti nagannak

• saan a matalek

• awanan iti ayat iti pamilia

• saan a makapagteppel

• naranggas ken agresibo

• managayat iti ragragsak imbes a ti Dios

• agpampammarang nga ay-ayatenda ti Dios ngem dida kayat ti agtulnog kenkuana

11. Sigun iti Salmo 92:7, ania ti mapasamak kadagiti dakes a tattao?

¹¹ Kasta kadi ti adu a tattao iti lugaryo? Adu ti kasta iti intero a lubong. Ngem solbarento ti Dios dayta. Inkarina: “Uray no agtubo a kas iti ruot dagiti managdakdakes ken umadu ti amin nga agar-aramid iti dakes,  madadaeldanto met laeng iti agnanayon.”​—Salmo 92:7.

12, 13. Ania ti insuro kadatayo ni Jehova bayat ti maudi nga al-aldaw?

¹² Impakpakauna ti Biblia a napno ti maudi nga al-aldaw iti saem ken panagsagaba. Ngem ibaga met ti Biblia nga adda naimbag a bambanag a mapasamak.

¹³ Pannakaawat iti Biblia. Insurat ni propeta Daniel maipapan iti maudi nga al-aldaw. Kunana: “Umadunto ti pudno a pannakaammo.” (Daniel 12:4) Ikkanto ti Dios ti ilina iti abilidad a mangtarus a naimbag iti Biblia. Inaramid dayta ni Jehova nangruna idi 1914. Kas pagarigan, insurona kadatayo ti kinapateg ti naganna ken ti panggepna iti daga, kasta met ti kinapudno maipapan iti subbot, ti mapasamak no mataytayo, ken ti panagungar. Naammuantayo a ti laeng Pagarian ti Dios ti makasolbar iti amin a problematayo. Naadaltayo met no kasanotayo nga agbalin a naragsak ken no ania ti aramidentayo tapno agbalintayo a makaay-ayo iti Dios. Ngem ania ti ar-aramiden dagiti adipen ti Dios kadagiti naadalda? Sungbatan dayta ti sabali pay a padto.​—Kitaen ti Endnote 21 ken 25.

14. Kasano kasaknap ti pannakaikasaba ti naimbag a damag maipapan iti Pagarian, ken siasino ti mangikaskasaba iti dayta?

¹⁴ Trabaho a panangasaba iti intero a lubong. Kuna ni Jesus maipapan iti maudi nga al-aldaw: “Ti naimbag a damag maipapan iti Pagarian maikaskasabanto iti intero a daga.” (Mateo 24:3, 14) Maikaskasaban ti naimbag a damag maipapan iti Pagarian iti nasurok a 230 a pagilian ken iti nasurok a 700 a lengguahe. Wen, iti intero a lubong, dagiti Saksi ni Jehova a naggapu iti ‘amin a nasion ken tribu’ tultulonganda dagiti tattao tapno maawatanda  no ania ti Pagarian ken no anianto ti aramiden dayta para kadagiti tattao. (Apocalipsis 7:9) Ar-aramidenda dayta nga awan bayadna. Uray no adu ti manggurgura ken mangidaddadanes kadakuada, awan ti makapasardeng iti trabaho a panangasaba kas iti impadto ni Jesus.​—Lucas 21:17.

15. (a) Mamatika kadi nga agbibiagtayon iti maudi nga al-aldaw, ken apay? (b) Anianto ti mapasamak kadagidiay agtultulnog ken Jehova ken kadagidiay saan nga agtultulnog kenkuana?

¹⁵ Mamatika kadi nga agbibiagtayon iti maudi nga al-aldaw? Adu a padto ti Biblia ti matungtungpal itan. Iti din agbayag, pasardengenton ni Jehova ti pannakaikasaba ti naimbag a damag ket umayton “ti panungpalan.” (Mateo 24:14) Ania ti panungpalan? Isu ti Armagedon, inton pukawen ti Dios ti amin a kinadakes. Usarento ni Jehova ni Jesus ken dagiti mannakabalin nga anghel a mangdadael iti amin a saan a mayat nga agtulnog Kenkuana ken iti Anakna. (2 Tesalonica 1:6-9) Kalpasanna, saanto nga allilawen ni Satanas ken dagiti demoniona dagiti tattao. Ken amin a mayat nga agtulnog iti Dios ken agpaituray iti Pagarianna makitadanton a matungpal ti amin a kari ti Dios.​—Apocalipsis 20:1-3; 21:3-5.

16. Gapu ta nakaas-asidegen ti panungpalan, ania ti masapul nga aramidem?

¹⁶ Dandanin ti panungpalan daytoy lubong nga iturturayan ni Satanas. Nagpateg ngarud nga isaludsodtayo iti bagitayo, ‘Ania ti masapul nga aramidek?’ Kayat ni Jehova nga ad-adu pay ti maadalmo iti Biblia. Masapul a seriosuem dayta. (Juan 17:3) Linawas nga aggigimong dagiti Saksi ni Jehova tapno tulonganda dagiti tattao a mangtarus iti Biblia. Ikagumaam ti regular a makigimong. (Basaen ti Hebreo 10:24, 25.) No maammuam nga adda dagiti  masapul a balbaliwam, dika agbuteng a mangaramid iti dayta. Bayat nga ar-aramidem dayta, ad-adda met a tumibker ti panaggayyemyo ken Jehova.​—Santiago 4:8.

17. Apay a makigtotto ti kaaduan inton umay ti panungpalan?

¹⁷ Inlawlawag ni apostol Pablo a dumteng ti pannakadadael dagiti managdakdakes iti tiempo a saan a namnamaen ti kaaduan, “kas iti mannanakaw iti rabii.” (1 Tesalonica 5:2) Impadto ni Jesus nga adunto ti saan a mangikankano kadagiti pagilasinan nga agbibiagtayon iti maudi nga al-aldaw. Kunana: “Ta no ania ti kasasaad idi kaaldawan ni Noe, kastanto met ti kasasaad iti kaadda ti Anak ti tao [wenno, iti maudi nga al-aldaw]. Ta dagiti tattao sakbay ti Layus ket mangmangan, umin-inum, ken agaassawa, agingga iti aldaw a simrek ni Noe iti daong. Saanda a nangikankano agingga a dimteng ti Layus ket nayanudda amin. Kastanto met iti kaadda ti Anak ti tao.”​—Mateo 24:37-39.

18. Ania ti impakdaar kadatayo ni Jesus?

¹⁸ Impakdaar ni Jesus a ditay koma ipalubos a masingatayo “iti sobra a pannangan ken panaginum ken kadagiti pakaringgoran iti biag.” Kunana a bigla nga umay ti panungpalan, “kas maysa a silo.” Kunana pay a “dumtengto dayta iti amin nga agnanaed iti intero a daga.” Sa innayonna: “Agtultuloykayo ngarud nga agbantay, ken kanayon nga agpakpakaasikayo tapno malasatanyo amin dagitoy a masapul a mapasamak ken makapagtakderkayo iti sanguanan ti Anak ti tao.” (Lucas 21:34-36) Apay a nakapatpateg nga agtulnogtayo iti pakdaar ni Jesus? Gapu ta nakaas-asidegen a madadael ti nakadakdakes a lubong ni Satanas. Dagidiay laeng nakagun-od iti pabor ni Jehova ken ni Jesus ti makalasat iti panungpalan ken agbiag nga agnanayon iti baro a lubong.​—Juan 3:16; 2 Pedro 3:13.