1. Htawm hpang hte seng nna anhte gara kaw hkaja lu na kun?

SHIGA ni yu ai shaloi masa ni grau sawng wa na kun? nga nna nang myit ga na re. N hkru ai lam hte yawn hpa lam ni grau law wa ai majaw, masha nkau mi gaw mungkan htum wa hkyen sai ngu shadu ma ai. Dai gaw teng ai kun? Htawm hpang hta hpa byin na hpe chye lu na kun? Chye lu ai. Masha gaw hpa byin na hpe tau hkrau n lu tsun tim, Yehowa gaw lu tsun ai. Mungkan hte anhte a htawm hpang lam ni hpe, Chyum Laika hta shi tsun da ai.—Esaia 46:10; Yaku 4:14.

2, 3. Yesu a sape ni hpa hpe chye mayu nna, Yesu shanhte hpe gara hku mahtai jaw ai kun?

² Mungkan a jahtum hte seng n na Chyum Laika hta tsun da ai lam gaw, ndai mungkan ga hten za mat na n re ai sha, n hkru ai lam ni htum mat na hpe tsun mayu ai re. Karai Kasang a Mungdan gaw mungkan ga hpe uphkang na lam masha ni hpe Yesu sharin ya ai. (Luka 4:43) Shi a sape ni gaw, Karai Kasang a Mungdan galoi du wa na hpe chye mayu nna, Yesu hpe “dai hte gaw galoi ai me byin wa na ra ta? Nang bai du na hte mungkan ga a htum wa na kumla gaw, hpa kumla rai na ra ta?” nga nna san ai. (Mahte 24:3) Yesu gaw shanhte hpe aten hkrak n tsun dan tim, ndai mungkan n htum shi yang, byin na lam ni hpe tsun dan ai. Yesu tsun ai ga ni gaw ya aten hta byin nga sai.

³ Ndai daw hta, mungkan a jahtum aten hta anhte asak hkrung nga ai hpe madun ai kumla ni hpe hkaja lu na re. Sumsing lamu hta byin wa ai majan a lam hpe shawng hkaja yu ga. Dai rai yang mungkan hta hten za ai lam ni hpa majaw grau sawng nga ai hpe chye lu na re.

4, 5. (a) Yesu Hkawhkam byin ngut ai hpang kade n na yang, sumsing lamu hta hpa byin wa ai kun? (b) Shingran Laika 12:12 hta tsun da ai hte maren, Satan hpe ga de jahkrat ngut ai hpang mungkan hta hpa byin wa ai kun?

⁴ Yesu gaw 1914 ning hta, sumsing lamu kaw Hkawhkam byin sai lam, Daw 8 hta hkaja wa sai. (Daniela 7:13, 14) Shingran Laika hta, hpa byin wa ai lam anhte hpe tsun dan ai: “Sumsing lamu kata e majan gasat nga ai: Mihkaela [Yesu] hte shi a ali ama ni gaw, dai baren numraw [Satan] hte gasat nga ma ai; dai baren numraw hte shi a ali ama ni mung, gasat nga ma ai.” * Satan hte shi a nat ni majan sum mat nna, mungkan ga de jahkrat kau hkrum ma ai. Dai majaw lamu kasa ni grai kabu nga ai. Rai yang, shinggyim masha ni gaw gara hku kun? Masha ni a matu yakhkak ai aten byin wa ai lam, Chyum Laika hta tsun da ai. Hpa majaw kun? Nat gaw, “shi a nhtoi loi mi sha ngam sai” hpe chye nna grai masin pawt nga ai majaw re.—Shingran 12:7, 9, 12.

⁵ Nat Satan gaw Karai Kasang shi hpe nau n na yang yeng seng na hpe shi chye ai majaw grai pawt nga ai. Dai majaw mungkan hta yakhkak ai lam ni law wa hkra Satan aja awa galaw nga ai. Yesu tsun wa ai jahtum nhtoi hta byin wa na lam ni hpe hkaja yu ga.—Jahtum Matsing 23 hpe yu u.

6, 7. Dai ni byin nga ai majan hte hku hku ai lam hte seng nna anhte hpa chye lu ai kun?

⁶ Majan. “Amyu mi hte amyu mi, mung mi hte mung mi shada da gumlau hkat na ma ra ai” ngu Yesu tsun ai. (Mahte 24:7) Labau hpe yu yang, majan a majaw anhte a aten hta masha grau si nga ai. 1914 ning kaw nna majan  a majaw, masha wan 100 jan si ai lam, Mungkan Masa Yu Dap (Worldwatch Institute) kaw nna tsun da ai. A.D. 1900 hte 2000 lapran shaning 100 laman hta majan a majaw si ai masha jahpan gaw, A.D. 1 kaw nna A.D. 1900 laman si ai masha hta htam masum grau law ai. Majan a majaw masha wan law law gaw matsan mayan hte yawn hkyen ai lam ni hkrum nga ai hpe shingran yu u.

⁷ Hku hku ai. “Hku hku ai . . . byin wa na” nga nna Yesu tsun ai. (Mahte 24:7) Lusha ni hpe moi na hta grau shapraw lu tim, masha law law gaw lusha n law ai majaw kawsi hpang gara nga ai. Hpa majaw kun? Shanhte hta lusha mari na matu gumhpraw (sh) hkai shara n nga ai majaw re. Masha wan hkying mi jan gaw, lani mi a shang gumhpraw dollar langai pyi n re ai hte sha asak hkrung nga ai. Wan hku law ai ma ni gaw hkam ja lam a matu malu masha nlu sha ai majaw shaning shagu si nga ai ngu, Mungkan Hkamja Dap (WHO) kaw nna tsun ai.

8, 9. Nnang nawn ni, ana zinli ni byin wa na ngu ai Yesu a myihtoi ga ni hpring tsup wa ai gaw hpa hpe madun a ta?

⁸ Nnang Nawn. “Nnang nawn kaba” byin wa na ngu Yesu myihtoi  htoi da ai. (Luka 21:11) Dai ni aten hta nnang nawn kaba ni shaning shagu byin nga ai. 1900 ning kaw nna nnang nawn a majaw, masha wan lahkawng jan si mat sai. Ladat hpaji gaw nnang nawn byin na hpe, moi na hta tau hkrau chye lu tim, nnang nawn a majaw masha law law naw si nga ding yang re.

⁹ Ana Zinli. “Ana zinli” ni byin wa na nga nna Yesu tau hkrau tsun da ai. Hkrit hpa ana zinli ni gaw, chyam bra lawan nna masha law law hpe sat nga ai. (Luka 21:11) Ana amyu myu hpe tsi na matu tsi hpaji ni rawt jat wa tim, tsi n lu tsi ai ana zinli ni law law naw nga nga ai. Shiga langai hta sinwawp ana, hkali hte htawk dang ni zawn re ai ana zinli ni a majaw, shaning shagu masha wan hku si nga ai lam tsun da ai. Dai sha n-ga lai wa sai shaning 40 laman hta ana zinli nnan, amyu 30 hpe sarawun ni mu wa ai. Dai kaw nna nkau mi hpe n lu tsi ai.

10. Ya aten hta, 2 Timohti 3:1-5 gaw gara hku hpring tsup nga ai kun?

¹⁰ 2 Timohti 3:1-5 hta, “hpang jahtum na nhtoi ni hta e, yak la ai aten du na ra ai” ngu tsun da  ai. Kasa Pawlu gaw hpang jahtum nhtoi na masha law law a akyang lailen ni hpe ndai hku tsun da ai

• tingkyeng myit rawng ai wa

• gumhpraw marin ai wa

• kanu kawa ga n madat ai wa

• sadi n dung ai wa

• dinghku ntsa tsawra myit n nga ai wa

• tinang hkum hpe n hkang lu ai wa

• grai matse ai wa

• Karai Kasang hta lai nna pyaw hpa lam hpe grau tsawra ai wa

• Karai Kasang a ga n madat nna, shi hpe tsawra masu ai wa

11. Shakawn Kungdawn 92:7 hta, n hkru ai masha ni hpa byin mat na lam tsun da ai kun?

¹¹ Na a makau grupyin na masha ni hta dai zawn akyang lailen ni nga ai kun? Mungkan ting na masha law law hta dai zawn akyang ni nga ai. Kade nna yang Karai Kasang gaw lama ma galaw ya sana re. Shi ndai hku ga sadi jaw da ai: “Tara n lang ai ni tsingdu zawn tu wa nna, shut hpyit ai hku galaw ai ni nlang pu wa ma yang, dai gaw, shanhte a prat dingsa e hten mat hkrum na lam rai nga ai.”—Shakawn 92:7.

12, 13. Yehowa gaw jahtum nhtoi hta anhte hpe hpa sharin ya ai kun?

¹² Mungkan a ndai jahtum nhtoi hta yakhkak ai lam hte tsin-yam tsindam ni hpring nga na ngu Chyum Laika hta tau hkrau tsun da ai. Raitim, kaja ai lam ni mung byin wa na nga nna Chyum Laika hta tsun da ai.

¹³ Chyum Laika grau chye na wa. Myihtoi Daniela gaw jahtum nhtoi hte seng nna, “nyan hpaji jat wa na” nga nna tsun da ai. (Daniela 12:4) Dai hte maren, Yehowa gaw 1914 ning kaw nna shi a masha ni Chyum Laika hpe teng man ai hku grau chye na wa hkra karum ya wa ai. Ga shadawn, shi a amying, mungkan ga a yaw shada lam, gawng malai jahpu a teng man ai lam, hkrung rawt ai lam, si mat ai ni hpa byin mat ai lam ni hte seng nna chye na wa hkra karum ya wa ai. Karai a Mungdan sha anhte a manghkang ni hpe hparan ya lu ai lam hkaja ngut sai. Anhte ngwi pyaw lam gara hku lu na hte, Karai Kasang myit pyaw hkra gara hku galaw lu na lam mung hkaja ngut sai. Dai hku chye wa ai majaw, Karai Kasang a mayam ni gaw hpa galaw wa ai kun? Dai hpe chye na matu, myihtoi ga langai hpe hkaja yu ga.—Jahtum Matsing 20 hte 24 hpe yu u.

14. Mungdan kabu gara shiga hpe gara shara ni hta hkaw tsun nga ai kun? Kadai ni hkaw tsun nga ai kun?

¹⁴ Mungkan ting hkaw tsun bungli. Jahtum nhtoi a lam tsun ai shaloi, Yesu gaw “dai mungdan a kabu gara shi ga gaw, . . . mungkan ting hta e hkaw dan lu na rai nga ai” nga nna tsun wa ai. (Mahte 24:3, 14) Mungdan a kabu gara shiga hpe, amyu ga 700 jan hte mungdan 230 jan hta hkaw tsun nga ai. Mungkan ting na amyu baw shagu hte baw lakung shagu hta na Yehowa Sakse Ni gaw, Mungdan lam hte dai mungdan galaw ya na lam hpe masha ni chye na hkra karum ya nga ai. (Shingran 7:9) Shanhte gaw tsawra myit hte galaw nga ma ai. Yesu  myihtoi htoi da ai hte maren, shanhte gaw n ju n dawng ai hte zingri hkrum tim, hkaw tsun bungli hpe hpa a majaw mung n jahkring kau ma ai.—Luka 21:17.

15. (a) Jahtum nhtoi hta anhte asak hkrung nga ai hpe nang kam ai kun? Hpa majaw kun? (b) Yehowa a ga madat ai ni hpa akyu lu nna, n madat ai ni hpa byin mat na kun?

¹⁵ Jahtum nhtoi hta anhte asak hkrung nga ai hpe nang kam ai kun? Jahtum nhtoi hte seng ai Chyum Laika myihtoi ga law law gaw, teng sha byin nga ai. Kade n na yang, Yehowa gaw kabu gara shiga hkaw tsun ai lam hpe jahkring kau na re. Dai hpang “jahtum” du wa na re. (Mahte 24:14) Jahtum ngu ai gaw hpa rai kun? N hkru ai lam yawng hpe, Karai Kasang yeng seng kau na Hara Magedon hpe tsun ai re. Yehowa gaw shi hte Yesu a ga n madat ai ni hpe jahten na matu, Yesu hte lamu kasa ni hpe shangun na re. (2 Htesaloni 1:6-9) Dai hpang, Satan hte shi a nat ni gaw masha hpe hkalem lu sana n re. Karai Kasang a ga madat ai ni hte shi a mungdan hpe hkap la ai ni gaw, Karai Kasang a ga sadi ni hpring tsup wa ai hpe mu lu na re.—Shingran 20:1-3; 21:3-5.

16. Jahtum nhtoi grai ni wa sai majaw nang hpa galaw ra na kun?

¹⁶ Satan uphkang nga ai ndai mungkan gaw, kade n na yang htum mat sana re. Dai majaw, ‘Ngai hpa galaw ra na kun?’ nga nna tinang hkum tinang san na matu grai ahkyak ai. Yehowa gaw nang hpe dang lu ai daram Chyum Laika hkaja shangun mayu ai. Nang ahkyak shatai nna hkaja ra ai. (Yawhan 17:3) Yehowa Sakse Ni gaw Chyum Laika hpe chye na hkra karum ya ai zuphpawng ni bat shagu galaw ma ai. Dai zuphpawng ni hpe ayan sa lung na matu saw shaga ga ai. (Hebre 10:24, 25 hpe hti u.) Nang hta galai shai ra ai lam ni nga ai hpe chye wa yang, galai shai na matu hkum hkrit. Dai hku galai shai yang Yehowa hte grau hku hkau wa na re.—Yaku 4:8.

17. Mungkan a jahtum du wa ai shaloi masha law malawng gaw hpa majaw mau na kun?

 ¹⁷ N hkru ai lam hpe jahten na aten gaw, shana “lagut shang ai zawn” masha law malawng n myit mada ai aten hta byin na nga nna kasa Pawlu tsun da ai. (1 Htesaloni 5:2) Masha law law gaw, jahtum nhtoi hta asak hkrung nga ai hpe n dum shami byin nga na ngu Yesu myihtoi htoi da ai. “Noa a ban e rai nga ai hte maren, Masha Kasha a bai sa du ai hta e rai wa na ra ai. Kaning rai nme law, dai sha-u garai n-ing yang na masha ni gaw Noa shanghpaw li kata de shang wa ai nhtoi du hkra, lu lu sha sha, num la num ya rai nga ma ai rai nna, dai sha-u ing wa ai hte nlang hte hpe magawn mat wa ai du hkra, shanhte n dum shami nga nga ma ai hte maren, dai Masha Kasha a bai sa du ai hta mung, rai wa na ra ai” nga nna shi tsun da ai.—Mahte 24:37-39.

18. Yesu anhte hpe hpa sadi jaw da ai kun?

¹⁸ “Lu lai sha lai ai, chyaru nang ai, dinghta ga myit ru myit tsang ai” lam ni a majaw n dum shami n byin na matu, Yesu anhte hpe sadi jaw da ai. Jahtum gaw, “mahkam htim ai zawn” a kajawng sha du wa na ngu shi tsun ai. Dai gaw, “ga ningtsa ting e nga nga ai ni nlang hte a ntsa e” du wa na re nga nna mung shi tsun ai. Bai nna, “dai byin wa na ra ai lam ni yawng hta na nanhte lawt lu nna, Masha Kasha a man e tsap lu ging ai ni tai lu myit ga, akyu hpyi let, ahkying aten shagu hta a maja nga mu” ngu tsun ai. (Luka 21:34-36) Yesu sadi jaw ai hpe madat na matu hpa majaw grai ahkyak ai kun? Satan a n hkru ai mungkan, jahten hkrum na grai ni sai majaw re. Yehowa hte Yesu a ga madat ai ni sha, jahtum nhtoi hta lawt lu nna, mungkan n nan hta htani htana nga lu na re.—Yawhan 3:16; 2 Petru 3:13.