1. Къытпэщылъ гъащІэм теухуауэ пэжыр хэт къыджезыІэфынур?

ХЪЫБАРЫЩІЭХЭМ уедэІуа иужь: «Ди зэманым хуэдэу дунейр Іей щыхъуа къэхъуакъым!» — жыпІэу мызэ-мытІэу уегупсысауэ къыщІэкІынщ. Дыщыпсэу дунейм гузэвэгъуэхэмрэ лей зехьэнымрэ зэрызыщаубгъуам щхьэкІэ, куэдым я гугъэщ дунейкъутэжыр къэсауэ. Ауэ ар пэжу пІэрэ? Къытпэщылъ гъащІэм теухуауэ пэжыр къэтщІэфыну пІэрэ? КъэтщІэфынущ. Абы теухуауэ Алыхь Иеговэ къыджеІэ. Ди къэкІуэным теухуауэ цІыхухэм ямыщІэр Алыхьым ещІэ икІи абы ищІэр Библием къыщытхузэІуех (Исаия 46:10; Екъуб 4:14).

2, 3. Хьисэ и гъэсэнхэр сыт зыщІэупщІар икІи Хьисэ сыт хуэдэ жэуап абыхэм яритар?

² Мы дунейм и кІэухыр къэблэгъауэ Библием щыжиІэм деж, абы зи гугъу ищІыр щІыр зэрыкъутэжынуракъым. ЩІыр зэи кІуэдыжынукъым, кІуэдыжынур абы тет Іейращ. Хьисэ жиІат Алыхьым и Пащтыхьыгъуэр щІылъэм и тепщэу зэрыщытынур (Лука 4:43). Пащтыхьыгъуэм тепщэн щыщІидзэнур къащІэну хуейуэ Хьисэ и гъэсэнхэр щІэупщІат: «КъыджеІэт, а жыхуэпІа Іуэхухэр сыт щыгъуэ къыщыхъунур,  икІи уэ дунейм укъызэрыкІуэжынумрэ мы дунейм и кІэухыр къызэрыкІуэнумрэ я нэщэнэхэр сыт?» (Маттэ 24:3). А псор къыщыхъуну махуэр жимыІами, кІэухым ипэ къихуэу дунейм къыщекІуэкІыну Іуэхугъуэхэм Хьисэ и гугъу ищІащ.

³ Мы дунейм и кІэухыр къыщыблэгъа зэманым дэ дыщопсэу. Абы щыхьэт техъуэ Іуэхугъуэхэр зэпкърытхынщ. Ауэ япэщІыкІэ къэтщІэжынщ нобэ дунейм къыщекІуэкІымрэ уафэм къыщыхъуа зауэмрэ дауэ зэпхами.

4, 5. 1) Хьисэ Пащтыхь хъуа иужь уафэм сыт къыщыхъуар? 2) Апокалипсис 12:12 зэрыжиІэмкІэ, а зауэм цІыхухэм сыт къахуихьар?

⁴ Мы тхылъым, 8-нэ псалъащхьэм къыщытщІащ 1914-нэ гъэм Хьисэ Пащтыхь зэрыхъуар (Даниил 7:13, 14). Абы щыгъуэ уафэм къыщыхъуам Апокалипсис тхылъыр мыпхуэдэу топсэлъыхь: «Уафэм зауэ къыщыхъеящ. Михаилрэ [Хьисэрэ] * абы и мелыІычхэмрэ благъуэжьым [Иблисым] езэуащ, благъуэжьри абы и мелыІычхэри абыхэм къапэуващ». А зауэм текІуар Хьисэщ. Абы Иблисымрэ жин бзаджэхэмрэ щІым къридзыхащ. МелыІычхэм я дежкІэ ар, дауикІ, гуфІэгъуэшхуэт, ауэ цІыхухэм я дежкІэ ар гуауэшхуэ хъуащ. Сыт щхьэкІэ? ШейтІаным  «зэману езым къыхуэнэжыр зэрымащІэр ещІэри, и гум губжьышхуэ илъщ» (Апокалипсис 12:7, 9, 12).

⁵ ШейтІаным хузэфІэкІ къигъанэкъым цІыхухэм зэран яхуэхъун щхьэкІэ. Ар егъэлеяуэ губжьащ, сыт щхьэкІэ жыпІэмэ куэд мыщІэу Алыхьым зэригъэкІуэдыжынур ещІэри. Мы дунейм и кІэухыр къыщыблагъэкІэ щІылъэм къыщыхъун хуей Іуэхугъуэхэу Хьисэ зи гугъу ищІахэр зэпкърытхынщ. (24-нэ Приложением еплъ.)

6, 7. Зауэмрэ гъаблэмрэ теухуауэ Хьисэ жиІа псалъэхэр дауэ къызэрыхъур?

⁶ Зауэхэр. Хьисэ жиІат: «3ы лъэпкъыр адрей лъэпкъым, зы къэралри адрей къэралым езэуэну къызэщІэтэджэнущ» (Маттэ 24:7). Япэм нэхърэ нэхъыбэ цІыху ди зэманым зауэхэм хокІуадэ. «Уорлдуотч» институтым къызэрихутамкІэ, ди эрэм 1914-нэ гъэм нэсыху зауэхэм цІыху мелуан 30 хуэдиз хэкІуэдащ. Ауэ 1914-нэ гъэм щыщІэдзауэ 2000 гъэм нэсыху зауэхэм мелуанищэм щІигъу цІыху хэкІуэдащ. ЦІыху мелуанхэм сыт хуэдиз гуауэрэ узрэ а зауэхэм къахуихьа?!

⁷ Гъаблэхэр. Хьисэ жиІат: «Гъабли къэхъунущ» (Маттэ 24:7). Иджы хуэдэу ерыскъыр куэду щыщыІа къэхъуакъым, ауэ, абы емылъытауэ, мэжэщІалІэ цІыхухэр кІуэ пэтми нэхъыбэ  мэхъу. Сыт абы и щхьэусыгъуэр? ЦІыхухэм е ахъшэ ягъуэткъым, е хадэхэкІ къыщагъэкІын щІы кІапэ яІэкъым. ЦІыху миллиардым щІигъум яшхын къызэращэхун ахъшэ мащІэ дыдэщ яІэр. Узыншагъэр хъумэным кІэлъыплъ дунейпсо организацэм зэрыжиІэмкІэ, илъэс къэс мелуан бжыгъэкІэ сабийхэр гъаблэм йолІыкІ.

8, 9. ЩІыр зэрыхъеинумрэ узыфэхэм зэрызаубгъунумрэ теухуауэ Хьисэ жиІа псалъэхэр дауэ къызэрыхъур?

⁸ ЩІыр зэрыхъеир. Хьисэ жиІауэ щытат: «ЩІыр щІыпІэ-щІыпІэхэмкІи хуабжьу щыхъеинущ» (Лука 21:11). ЩІэныгъэлІхэм жаІэ илъэс къэс щІыр хуабжьу щІыпІэ-щІыпІэкІэрэ зэрыхъеинур. 1 900 гъэм щыщІэдзауэ щІыр зэрыхъеим цІыху мелуанитІым щІигъу ихьащ. Иджыпсту щІэныгъэлІхэм щІыр здэхъеину щІыпІэхэр къахутэф, ауэ,  абы щхьэкІэ къэмынэу, цІыху куэд хокІуадэ.

⁹ Узыфэхэр. Хьисэ жиІат цІыху куэд уз зэрыцІалэхэм зэрихьынур (Лука 21:11). Дохутырхэр узыфэ куэдым текІуами, абыхэм яхуэмыгъэхъуж узыфэхэр иджыри щыІэщ. Илъэс къэс лышхым, жьэн узым (туберкулёзым), нэгъуэщІ узыфэ хьэлъэхэм мелуан бжыгъэкІэ цІыхухэр йолІыкІ. Абы нэмыщІ иужьрей илъэс 40-р къапщтэмэ, дохутырхэм узыфэ 30-м щІигъу къагъуэтащ. Абыхэм щыщу языныкъуэхэр яхуэгъэхъужкъым.

10. 2 Тимофей 3:1—5 ит псалъэхэр дауэ къызэрыхъур?

¹⁰ 2 Тимофей 3:1—5 щыжыІащ: «Мы дунейм и иужьрей махуэхэм зэман гугъухэр къызэрыкІуэнур пщІэн хуейщ». Иужьрей махуэхэм  цІыхухэм яхэлъыну хьэл-щэнхэр апостол Паул къребжэкІ:

• фІыуэ залъагъужынущ

• ахъшэ фІыуэ ялъагъунущ

• адэ-анэхэм едэІуэнукъым

• уащыгугъ хъужынукъым

• унагъуэм исхэм зэкІужыныгъэр зыхуэдэр ящІэнукъым

• захуэшыІэжынукъым

• гущІэгъуншэ хъунущ

• Тхьэр фІыуэ ялъагъуным нэхърэ, загъэтхъэжыныр нэхъ къащтэнущ

• Тхьэм и фІэлІыкІ ягу илъ хуэдэу зыкъагъэлъагъуэнущ, ауэ Алыхьым хуэжыІэмыдаІуэу щытынущ

11. Псалом 92:7 зэрыжиІэмкІэ, сыт цІыху Іейхэм къащыщІынур?

¹¹ Ущыпсэу щІыпІэм цІыхухэм апхуэдэ хьэл-щэнхэр яхэлъу плъагъурэ? Ди жагъуэ зэрыхъунщи, дуней псор апхуэдэщ. Ауэ куэд мыщІэу Алыхьым зыгуэр ищІэнущ. Абы дыкъегъэгугъэ:  «Хабзэншагъэ зезыхьэхэм удзым хуэдэу зыщІаубгъур, икІи бзаджащІэхэм ехъулІэныгъэ щІаІэр — ахэр игъащІэкІэ щымыІэжыну ягъэкІуэдын щхьэкІэщ» (Псалом 92:7).

12, 13. Иужьрей махуэхэм Иеговэ сыт хуэдэ щІэныгъэхэр къытхузэІуиха?

¹² Библием щыжыІат иужьрей махуэхэр узрэ гуауэкІэ гъэнщІауэ зэрыщытынур. Ауэ абы иджыри щыжыІащ фІы гуэр зэрыщыІэнур.

¹³ Библием ит пэжыр къыдгуроІуэ. Бегъымбар Даниил итхат иужьрей махуэхэм «щІэныгъэ пэжым» зэрызиубгъунур. Даниил и псалъэхэм къагъэлъагъуэ Библием итыр нэхъыфІу къыдгурыІуэн щхьэкІэ Иеговэ къызэрыддэІэпыкъунур (Даниил 12:4). Ар псом хуэмыдэу наІуэ хъуащ 1914-нэ гъэм щыщІэдзауэ. Псалъэм папщІэ, Иеговэ къытхузэІуихащ и цІэм къикІыр, щІым хуиІэ мурадыр, щхьэщэхужым къикІыр, лІэныгъэмрэ лІахэр къызэрытэджыжынумрэ теухуа пэжыр. Дэ къэтщІащ ди гугъуехьу хъуам кІэ езытыфынур Алыхьым и Пащтыхьыгъуэрауэ зэрыщытыр. НасыпыфІэ дыхъун икІи Алыхьыр арэзы къытхуэхъун щхьэкІэ тщІэн хуейр къэтщІащ. Апхуэдэ щІэныгъэ лъапІэр Алыхьым и лэжьакІуэхэм дауэ къызэрагъэсэбэпыр? Библием абы и жэуапыр итщ. (21-нэ, 25-нэ Приложениехэм еплъ.)

14. Дэнэ хъыбарыфІыр щагъэІур икІи хэт а лэжьыгъэр зыгъэзащІэр?

 ¹⁴ Дуней псом хъыбарыфІыр щыдогъэІу. Хьисэ жиІат иужьрей махуэхэм «Тхьэм и Тепщэныгъэшхуэм теухуа хъыбарыфІыр» дуней псом зэрыщагъэІунур (Маттэ 24:3, 14). Нобэ Алыхьым и Пащтыхьыгъуэм теухуа хъыбарыфІыр къэрал 240-м щІигъум бзэ 900-м щІигъукІэ щагъэІу. «Лъэпкъ псоми, унагъуэ лъэпкъ псоми» къыхэкІа Иеговэ и Щыхьэтхэр псоми ядогуашэ Алыхьым и Пащтыхьыгъуэм теухуа хъыбарыфІымкІэ икІи абы цІыхухэм яхуищІэнумкІэ (Апокалипсис 7:9). Абыхэм я лэжьыгъэм щхьэкІэ ахъшэ хахкъым. Иеговэ и Щыхьэтхэр куэдым ялъагъу хъукъым икІи ахэр гугъу ирагъэхь. Ауэ хъыбарыфІ гъэІуныр зыми къигъэувыІэфынукъым (Лука 21:17).

15. 1) Иужьрей махуэхэм дызэрыщыпсэур уи фІэщ хъурэ? Сыт ар уи фІэщ зыщІыр? 2) Алыхьым емыдаІуэхэм сыт къащыщІынур? Иеговэ хуэжыІэдаІуэхэм сыт къалъысынур?

¹⁵ Иужьрей махуэхэм дызэрыщыпсэур уи фІэщ хъурэ? Пэж дыдэу, иужьрей махуэхэм теухуауэ Библием жиІа псалъэхэр нобэ гъэзэщІа мэхъу. Куэд мыщІэу Иеговэ хъыбарыфІ гъэІуныр къигъэувыІэнущ. Абы щыгъуэ «дунейм и кІэухыр къэсынущ» (Маттэ 24:14). Іей псом кІэ езытынур Армагеддон зауэращ. Хьисэрэ лъэкІыныгъэ зиІэ мелыІычхэмрэ Иеговэ унафэ  яхуищІынущ жыІэмыдаІуэ псори ягъэкІуэдыну (2 Фессалоникэ 1:6—9). Иблисымрэ жин бзаджэхэмрэ зыри къагъэпцІэжыфынукъым. Алыхьым хуэжыІэдаІуэу абы и Пащтыхьыгъуэм и лъабжьэ щІэтыну хуейхэм ялъэгъунущ Иеговэ жиІа псалъэхэр зэригъэзэщІэжыр (Апокалипсис 20:1—3; 21:3—5).

16. Мы дунейм куэд мыщІэу кІэ къыщыхуэкІуэнукІэ, сыт уэ пщІэн хуейр?

¹⁶ ШейтІаным и дунейм куэд мыщІэу кІэ къыхуэкІуэнущ. Абы къыхэкІкІэ: «Сыт сэ сщІэн хуейр?» — жыпІэу узэупщІыжыным мыхьэнэшхуэ иІэщ. Иеговэ хуейщ Библием итыр уэ фІыуэ къэпщІэну. Аращ Библие джыным мыхьэнэшхуэ щІептын хуейр (Иуан 17:3). Иеговэ и Щыхьэтхэм тхьэмахуэ къэс зэгъусэу Библиер ядж. Апхуэдэ зэІущІэхэм уэри укъыдогъэблагъэ. (Къеджэ Еврейхэм 10:24, 25.) Уи гъащІэм зыгуэр пхъуэжын хуейуэ гу лъыптамэ, укъимыкІуэту зэхъуэкІыныгъэхэр хэлъхьэ. Абы Иеговэрэ уэрэ фи зэхуаку дэлъ ныбжьэгъугъэр нэхъ быдэ ищІынущ (Екъуб 4:8).

17. ЦІыхухэм я нэхъыбэр мы дунейм и кІэухым сыт щІыпэмыплъэнур?

¹⁷ Апостол Паул итхат цІыхухэм и нэхъыбэм я дежкІэ мы дунейм и кІэухыр «дыгъуакІуэр... жэщым къызэрыкІуэм хуэдэу» къызэрыкІуэнур. НэгъуэщІу жыпІэмэ, куэдыр а махуэм пэплъэнукъым (1 Фессалоникэ 5:2). Хьисэ жиІат мы дунейм и кІэм дызэрыщыпсэум и нэщэнэхэм  цІыху куэдым гу лъатэну зэрыхуэмеинур. Абы жиІащ: «Нухь бегъымбарым и махуэхэм Іуэхухэр зэрыщытам хуэдэу, ЦІыху Лъэпкъым и Къуэр дунейм къыщыкІуэжынум дежи Іуэхухэр абы тетынущ. Псыдзэр къащІэмыуауэ, а махуэхэм цІыхухэр шхэрт икІи ефэрт, къашэрт икІи дэкІуэрт. Абы тетащ Нухь кхъухьым щитІысхьа махуэр нэсыху. Къэхъунур ямыщІэурэ, псыдзэр къащІэуэри, ахэр псори ихьащ икІи итхьэлащ. ЦІыху Лъэпкъым и Къуэр дунейм къыщыкІуэжынум дежи апхуэдэущ Іуэхухэр зэрыщытынур» (Маттэ 24:37—39).

18. Сыт хуэдэ чэнджэщ Хьисэ къыдитар?

¹⁸ Дунейм и кІэухыр цІыхухэм «хъым хуэдэу къащхьэрипхъуэнущ». Аращ Хьисэ мыпхуэдэу щІыжиІар: «Ефэ-ешхэнымкІи, удэфэнымкІи, мы дунейм и гугъуехьхэмкІи фи щхьэр зэрызэІывмыгъэхьэнми фыхуэсакъ». Абы дыкъыхуриджащ: «Сыт щыгъуи фысакъ икІи къэхъуну псоми фахэкІын щхьэкІэ, къару къэвгъуэтурэ, ЦІыху Лъэпкъым и Къуэм и пащхьэм фызэриувэфынкІэ Тхьэм фелъэІу зэпыт» (Лука 21:34—36). Хьисэ жиІам сыт дыщІедэІуэн хуейр? Куэд мыщІэу Иблисым и дунейм кІэ къыхуэкІуэнущ. Абы щыгъуэ къелынухэри гъащІэ мыухыж яІэу дунеищІэм щыпсэунухэри Иеговэрэ Хьисэрэ зыхуэарэзы цІыхухэращ (Иуан 3:16; 2 Петр 3:13).