1. Modi ki nu pode sabe kuzê ki sta pa kontise na futuru?

ÓRAS ki bu odja tilivizon i bu obi rádiu, talvês bu ta pergunta: ‘Kuzê ki sta ben kontise ku es mundu?’ Monti algen ta kridita ma nu sta na fin di mundu, pamodi maldadi i kuzas ki sta ta kontise oji. Má é simé? Modi ki nu pode sabe kuzê ki sta pa ben kontise na mundu? Nos nu ka ta konsigi fla kuzê ki sta pa kontise na futuru. Má Jeová Deus ta konsigi. El ta uza Bíblia pa fla-nu modi ki nos futuru ta ser i kuzê ki ta ben kontise ku Téra. — Isaías 46:10; Tiago 4:14.

2, 3. (a) Kuzê ki disiplus di Jizus krê sabeba? (b) Ki respósta Jizus da-s?

² Bíblia ta fla ma fin di mundu é ka fin di Téra, má é fin di maldadi. Jizus fla ma maldadi ta ben kaba óras ki Reinu di Deus ben governa mundu interu. (Lucas 4:43 ) Disiplus di Jizus krê sabeba na ki ténpu ki Reinu ta binha. Es pergunta: ‘Na ki ténpu ki kes kuza li ta ben kontise i kal ki é sinal di bu prezénsa i di fin di es sistéma?’ (Mateus 24:3 ) Jizus ka fla-s é ki dia. Má el fla-s kuzê ki ta kontiseba antis di es mundu finda. Kuzê ki Jizus fla-s sta ta kontise oji.

³ Na es kapítlu nu ta ben odja próvas ki ta mostra ma nu sta ta vive na ténpu di fin. Má primeru nu meste sabe sobri un géra ki kontise na Séu. Kel-li ta  splika pamodi ki sta ta kontise kuzas mariadu na Téra.

4, 5. (a) Kuzê ki kontise na Séu dipôs ki Jizus bira Rei? (b) Modi ki situason na Téra ta fikaba dipôs ki Satanás tradu di Séu?

⁴ Na kapítlu 8 nu prende ma Jizus bira Rei na 1914. (Daniel 7:13, 14 ) Apocalipse, un livru di Bíblia, ta fla ma kontise un géra na Séu: ‘Miguel ku se anjus géra kóntra dragon, i dragon ku se anjus géra’. * Satanás i se dimónis perde géra i es botadu di Séu pa Téra. Imajina alegria ki anjus xinti! Má i kes algen na Téra? Bíblia fla ma situason ta pioraba. Pamodi? Pamodi Diabu sta uma xatiadu, ‘dja ki el sabe ma falta-l poku ténpu.’ — Apocalipse 12:7, 9, 12.

⁵ Falta poku ténpu pa Deus poi Diabu prézu. Pur isu, Diabu sta ta faze tudu kel ki el pode pa poi prublémas na Téra. Nu ben odja kuzê ki Jizus fla ma ta kontiseba na ténpu di fin. — Djobe párti PRENDE MÁS n^u 24.

6, 7. (a) Modi ki nu sabe ma profesia di Jizus sobri géra sta ta kunpri? (b) I sobri fómi?

⁶ Géra. Jizus fla: “Gentis di un nason ta briga ku gentis di otu nason.” (Lúkas 21:10, BPK ) Nunka ka móre txeu algen na géra sima na nos ténpu. Un organizason (Worldwatch) ki ta faze piskiza sobri kuzas ki ta kontise na mundu, fla ma géra ki fazedu di anu 1900 ti anu 2000 mata algen três bês más txeu di ki na  géra ki fazedu di ténpu di Jizus ti anu 1900. Kel piskiza tanbê mostra ma di 1914 ti gósi géra dja mata más di 100 milhon di algen. Imajina mizéria i sufrimentu ki milhons di algen ta pasa pamodi géra!

⁷ Fómi. Jizus fla: “Gentis ta ben sufri txeu fómi”. (Lúkas 21:11, BPK ) Nbóra oji ten kumida más txeu ki un bês, simé un monti algen ta pasa fómi. Pamodi? Pamodi es ka ten dinheru pa kunpra kumida ô es ka ten txon pa es símia. Ten más di un bilhon di algen ki ta vive ku ménus di un dóla (ménus di 100 skudu di Kabu Verdi) pur dia. Organização Mundial da Saúde ta fla ma milhons di kriansa ta móre tudu anu pamodi es ka ten kumida pa kume.

8, 9. (a) Modi ki kes profesia di Jizus sobri tremor di téra sta ta kunpri? (b) I kes sobri duénsa?

⁸ Tremor di téra. Jizus fla: “Téra ta treme ku forsa.” (Lúkas 21:11, BPK ) Piskiza ta mostra ma tudu anu ta kontise txeu tremor di téra. Désdi  anu 1900 más di 2 milhon di algen móre pamodi tremor di téra. Mákinas ki ómis ten oji, ta konsigi fla ma sta ben kontise un tremor di téra, más sédu ki kes mákina di un bês. Má simé un monti algen ti inda sta ta móre pamodi tremor di téra.

⁹ Duénsa. Jizus fla ma ta ben tinha txeu duénsa prigozu ki ta spadjaba faxi i ki ta mataba un monti algen. (Lucas 21:11 ) Dotoris ta konsigi trata un monti duénsa, má inda ten otus duénsa ki ka ten kura. Ten rilatórius ki ta fla ma tudu anu milhons di algen ta móre pamodi duénsas, sima tuberkulozi, paludismu i kólera. Alén di kel-li, na últimus 40 anu, dotoris dja diskubri más di 30 duénsa novu. Alguns di kes duénsa li ka ten kura.

10. Modi ki 2 Timóteo 3:1-5 ta fla ma pesoas ta sérba na ténpu di fin?

¹⁰ Na 2 Timóteo 3:1-5, Bíblia  ta fla: ‘Na ténpu di fin, kuzas ta fika konplikadu, difísil di aguenta’. Apóstlu Polu fla ma pesoas

• ta pensaba sô na ses kabésa

• ta amaba dinheru

• ka ta obiba ku pai ku mai

• ta sérba traidoris

• ka ta tinha amor pa família

• ta sérba diskontroladu

• ta sérba violéntus

• ta gostaba más di pasa sábi di ki di Deus

• ta finjiba ma es ta amaba Deus, má es ka ta obiba ku el

11. Kuzê ki Salmo 92:7 ta fla ma ta ben kontise ku algen mau?

¹¹ Bu ta atxa ma oji pesoas ta konporta asi? Na mundu interu ten un monti algen ki ta konporta asi. Má Deus promete ma el ka ta dexa kuzas kontínua si pa txeu ténpu. Salmo 92:7 ta fla ma óras ki nu odja ‘algen mau ta bira txeu sima padja ô kes algen ki ta faze maldadi ta ten bons rezultadu, é pamodi es sta kuazi ta ser distruídu pa tudu ténpu.’

12, 13. Kuzê ki Jeová djuda-nu prende na ténpu di fin?

¹² Nu odja ma Bíblia dja flaba ma pesoas ta sufreba txeu na ténpu di fin. Má tanbê Bíblia fla ma ta kontiseba kuzas sábi. Nu ben odja dôs di kes kuza.

¹³ Povu di Deus ta ntendeba Bíblia midjór. Proféta Daniel skrebe sobri ténpu di fin. El fla: ‘Konhisimentu di verdadi ta bira rei di txeu.’ (Daniel 12:4 ) Deus ta ben djudaba se povu ntende Bíblia mutu más ki un bês. Jeová Deus sta ta faze kel-li désdi 1914. Pur izénplu, nu prende ma nómi di Deus é inportanti i kuzê ki el krê pa Téra. Tanbê nu prende verdadi sobri resureison i nu ntende kuzê ki é resgati. Nu prende ma é sô Reinu di Deus ki pode rezolve nos prubléma. Alén di kel-li, Deus inxina-nu kuzê ki nu meste faze pa nu ser filís i pa nu faze se vontadi. Má kuzê ki povu di Deus ta faze ku tudu kes kuza ki es prende? Pa responde es pergunta nu ben odja un otu profesia. — Djobe pártis PRENDE MÁS n^u 21 i n^u 25.

14. (a) Na undi ki sta ta pregadu notísias sábi di Reinu? (b) Ken ki sta faze es trabadju di pregason?

¹⁴ Pregason ta fazedu na mundu interu. Kantu ki Jizus staba ta pâpia di ténpu di fin, el fla: ‘Es notísias sábi di Reinu ta ben ser pregadu na mundu interu’. (Mateus 24:3, 14 ) Kes notísia sábi di Reinu sta ta ser pregadu na más di 230 país i na más di 700 língua. Tistimunhas di Jeová di tudu nason i di tudu rasa sta ta djuda pesoas di tudu lugar ntende kuzê ki é Reinu di Deus i kuzê ki el ta ben faze pa mundu.  (Apocalipse 7:9 ) Es ta faze es trabadju di grasa. Má sima Jizus dja flaba txeu algen ta fikaba ku raiba i ta pirsigiba se sigidoris. Má simé ka ten nada ki ta konsigi para es trabadju di pregason. — Lucas 21:17.

15. (a) Bu ta kridita ma nu sta vive na ténpu di fin? Pamodi? (b) Kuzê ki ta ben kontise ku kes algen ki ka ta obi ku Jeová? I ku kes ki ta obi?

¹⁵ Bu ta kridita ma nu sta vive na ténpu di fin? Txeu profesia di Bíblia ki ta fala sobri ténpu di fin sta ta kontise. Ka ta dura, Jeová ta manda para pregason di notísias sábi i ‘fin’ ta txiga. (Mateus 24:14 ) Kuzê ki é fin? É óras ki Jeová traze se géra di Armajedon pa kaba ku tudu maldadi. Jizus i se anjus poderozu ta ben kaba ku tudu kes algen ki ka krê obi ku Jeová i Jizus. (2 Tessalonicenses 1:6-9 ) Dipôs, Satanás i se dimónis ta podu prézu i asi es ka ta pode ngana ningen. I pesoas ki ta obi ku Deus i ta seta se Reinu ta ben odja tudu promésas di Deus ta kunpri. — Apocalipse 20:1-3; 21:3-5.

16. Dja ki fin sta pértu, kuzê ki bu meste faze?

¹⁶ Ka ta dura es mundu governadu pa Satanás ta txiga fin. Pur isu, é inportanti nu pergunta: ‘Kuzê ki N meste faze?’ Primeru, ka bu dexa nada trapadja bu studu di Bíblia. Jeová krê pa bu prende kada bês más. (João 17:3 ) Sugundu, sforsa pa bu sisti tudu runions di Tistimunhas di Jeová. Tudu simana es ta djunta pa studa Bíblia. (Lé Hebreus 10:24, 25.) Tirseru, si bu odja ma bu meste faze mudansas na bu  vida ka bu dura ki faze-s. Si bu faze vontadi di Jeová, bu amizadi ku el ta fika más fórti. — Tiago 4:8.

17. Pamodi ki fin ta txiga na un óra ki txeu algen ka ta sta ta spéra?

¹⁷ Apóstlu Polu splika ma distruison di algen mau ta txiga na un óra ki kuazi tudu algen ka ta sta ta spéra. El fla ma es dia ta ben ‘sima un ladron di noti.’ (1 Tessalonicenses 5:2 ) Jizus dja flaba ma monti algen ka ta ligaba pa kes próva ki ta mostra ma nu sta ta vive na ténpu di fin. El konpara ténpu di fin ku ténpu di Nué. El fla: ‘Na kel ténpu es ta viveba ses vida normal, es ta bebeba, es ta kumeba, es ta kazaba sima éra ses kustumu, ti ki txiga dia ki Nué entra na kel grandi barku ki ta txomadu arka. Nton ben un grandi txuba ku txeia ki kaba ku tudu es ki ka entra na arka.’ — Lúkas 17:27, BPK.

18. Ki avizu Jizus da-nu?

¹⁸ Jizus aviza ma fin ta ben di rapenti ‘sima un armadilha’, i ma el ta ben ‘pa tudu algen na mundu.’ Tanbê el fla se sigidoris pa ka fika distraídu ku ‘kume dimás, ku bebe dimás i ku preokupasons di vida’. El fla-s pa es sta sénpri ku ‘atenson i ta faze orason tudu óra pa es pode skapa di tudu kes kuza ki sta pa kontise i pa es pode fika sakédu dianti di Fidju di Ómi’, ô Jizus. (Lucas 21:34-36 ) Pamodi ki é rei di inportanti nu presta atenson na avizu ki Jizus da? Pamodi ka ta dura, mundu di Satanás ta ben ser distruídu. Sô kes ki obi ku Jeová i ku Jizus é ki ta skapa di distruison i es ta ben vive pa tudu ténpu na kel mundu novu. — João 3:16 ; 2 Pedro 3:13.