1. Алнында полар чуртастаңар хайдаң піліп аларға чарир?

СІРЕР хабарлар кӧрген соонда, пірееде сағынчазар, арса: «Пу киректердең хомай кирек полар ба?». Амғы туста уғаа кӧп чобағлар паза чабал нимелер полчатхан ӱчӱн, кӧп кізілер тилекейнің тӱгенҷізі чағдапча тіп сағынчалар. Че анзы андағ ба? Алнында ниме поларын піліп алар оңдай пар ба? Йа, пар. Алнында ниме поларын кізілер азынада пілбинчетселер дее, Иегова Худай аннаңар прай пілче. Ол аннаңар Библияда чоохтапча (Исаия 46:10; Иаковтың 4:14).

2, 3. Ӱгренҷілер Иисустаң нимедеңер сурғаннар паза Иисус оларға хайди нандырған?

² Библияда тилекейнің тӱгенҷізі килерінеңер пазылча, че анзы чир чох пол парарын таныхтабинча. Че чир ӱстӱнде чабал киректер чох иділерін таныхтапча. Иисус Христос Худайның Хан-ӱлгӱзі чирнең устир тіп чоохтаан (Лука 4:43). Аның ӱгренҷілері ол Хан-ӱлгӱ хаҷан килерін піліп аларға хынғаннар. Аннаңар олар Иисустаң сурғаннар: «Хаҷан полар ол ниме? Тӱгенҷі тус поларына паза Синің килеріңе хайдағ танығ полар?» (Матфей 24:3). Тӱгенҷі кӱн хаҷан поларын Иисус кӧні чоохтабаан, че аның алнында чир-чалбахта хайдағ киректер поларынаңар чоохтап пирген. Иисус чоохтаан киректер амғы туста полчалар.

³ Пу тилекейнің тӱгенҷі кӱннерінде чуртапчатханыбысты ниме киречілепчеткенін кӧр кӧреелер. Пастап,  ноға чирде андағ хомай чуртас полчатханын піліп алар ӱчӱн, тигірде полған чаадаңар піліп аларға кирек.

4, 5. а) Иисус Ханға турған соонда, тигірде ниме пол парған? б) Азых чоох 12:12 хоостыра, Сайтанның тигірдең тастаттырыбысханы чирдегілерге хайди теңен?

⁴ 8-ҷі пастағдаң Иисус 1914 чылда тигірде Хан пол парғаннаңар піліп алғабыс (Даниил 7:13, 14). Азых чоох тіп киндеде анаң тигірде ниме пол парғаннаңар пазылча: «Тигірде чаа пасталыбысхан. Пір саринда улуғ ангел Михаил [Иисус] * паза аның ангеллері, паза пір саринда, тізең, сыр чылан [Сайтан] позының ангеллерінең хада олардаң тоғыр чааласхан». Ол чаада Иисус Сайтанны паза айналарны чиңіп алып, чирзер тастабысхан. Сағын на кӧріңер, ангеллер тигірде хайди ӧрінген поларлар! Че чирде кізілерге анзы кӧп чобағ ағылған. Ноға? Диавол «позының тузының асхынах халғанын пілче», аннаңар «ол улуғ ӧкпеде» (Азых чоох 12:7, 9, 12).

⁵ Диавол кізілерге хомай идер ӱчӱн, прай кӱзін салча. Ӱр ниместең Худай аны чох идібізер, аннаңар ол улуғ ӧкпеде. Диаволға сынап асхынах тус халған. Библияда пу тус халғанҷы кӱннер тіп адалча. Ол туста чирде ниме поларынаңар Иисус ниме чоохтаанын піліп алаалар. (24 приложениені кӧріңер.)

6, 7. Чаадаңар паза ӧзӧгістеңер Иисус Христостың сӧстері хайди толчалар?

⁶ Чаалар. Иисус теен: «Чон чоннаң, хан ханнаң  тоғыр кӧдірілер» (Матфей 24:7). Пӱӱнгі чааларда, мының алнындағызынаң хай-хай кӧп кізі ӧлче. «Уорлдуотч» институт 1914 чылдаң ала чааларда 100 миллион азыра кізі хырыл парған тіп пасча. Пастағы чӱс чылдаң сығара 1914 чылға читіре (1 900 чыл аразына) чааларда 30 миллионҷа кізі ӧл парған. Че 1914 чылдаң 2 000 чылға читіре (100 чыл аразына) чааларда 100 миллион азыра кізі ӧл парған. Сағын на кӧріңер, чаа кізілерге нинҷе кӧп ирее паза чобағ ағылған!

⁷ Ӧзӧгіс. Иисус «анда-мында ӧзӧгіс-хырылыстар» полар тіп ухаанҷылаан (Матфей 24:7). Амғы туста мының алнындағызының хыринда ас-тамах хай-хай кӧп полза даа, уғаа кӧп кізі ӧзӧкче. Ноға? Кізілернің чіҷең ниме алҷаң ахчалары алай чіҷең ниме ӧскіріп алҷаң чирлері чоғыл, аннаңар ӧзӧкчелер. Миллиард азыра кізі, уғаа тың хызылып, чуртапча. Хазыхты арачылаҷаң прай тилекейдегі организацияның (ВОЗ) пічіктерін кӧрзе, читіре чібинчеткен ӱчӱн, чыл  сай пис миллион азыра пала ӱрепче.

8, 9. Чир тітіреенінеңер паза ағырығлардаңар Иисус Христостың ухаанҷыластары хайди толчалар?

⁸ Чир тітіреені. Иисус теен: «Анда-мында чир тітірир» (Лука 21:11). Учёнайлар даа чир чыл сай тың тітірир тіпчелер. 1 900 чылдаң сығара чир тітіреені ӱчӱн ікі миллион азыра кізі ӧл парған. Амғы наа технологиялар хайда чир тітірирін піліп аларға оңдай пирчетселер дее, чир тітіреені ӱчӱн ам даа уғаа кӧп кізі ӧлче.

⁹ Ағырығлар. Иисус уғаа табырах тарапчатхан паза кӧп кізі хырчатхан ағырығлар полар тіп ухаанҷылаан (Лука 21:11). Имҷілер уғаа кӧп ағырығларны имнирге ӱгреніп алғаннар, че пірее ағырығларны ам даа имнеп полбинчалар. Пір отчётта чыл сай миллионнар туберкулезтаң, маляриядаң паза холерадаң ӧлчеткеннеңер чоохталча. Ағаа хоза, халғанҷы 40 чыл аразында имҷілер 30 азыра наа ағырығлар таап алғаннар. Ол ағырығларның піреелері имнелбинчелер.

10. 2 Тимофейге 3:1—5-гі сӧстер хайди толчалар?

¹⁰ 2 Тимофейге 3:1—5-те чоохталча: «Тӱгенҷі кӱннерде сидік тустар полыбызарын піл». Павел илҷі кізілер халғанҷы кӱннерде хайдағ поларынаңар пас салған:

• постарына ла хынарлар

• ахчаа хынарлар

• іҷе-пабаларының чооғын испестер

• киртістіг полбастар

• сӧбірелеріне тартылбастар

• постарын тудын пілбестер

• чабал чӱректіг паза хазыр поларлар

• чуртас хыниина Худайдаң артых хынарлар

• Худайға тудынаачыхтанарлар, че сынында аның чооғын испестер

11. Псалом 92:7 хоостыра, чабал кізілерні ниме сағыпча?

¹¹ Сірер чуртапчатхан орында піди тудынчатхан кізі кӧп пе? Сынында прай чир ӱстӱндегі чон іди ардап парған. Че ӱр ниместең Худай прай нимені тӱзедібізер. Ол молҷапча: «Худайны улуғлабинчатханнар, от чіли, ӧсчетселер паза чабал киректер итчеткеннер  прайлары ӧңненчетселер, анзы олар хаҷанға даа чох иділер [алай хырылар] ӱчӱн полча» (Псалом 92:7).

12, 13. Халғанҷы кӱннерде Иегова піске ниме піліп аларға полыс пирген?

¹² Библияда халғанҷы кӱннерде чир-чалбахта ағырығлар паза иреелер кӧп полар тіп ухаанҷылалча, че анда ідӧк ол туста чахсы киректер полар тіп чоохталча.

¹³ Библияны орта оңнааны. Даниил ухаанҷы халғанҷы кӱннерде «сын піліс кӧптелер» тіп пасхан (Даниил 12:4). Худай нымысчыларына Библияны чахсы арах піліп аларға полысча. Анзы 1914 чылдаң сығара іле кӧрін сыххан. Кӧзідімге, Иегова позының ады ниме таныхтапчатханын, чирдеңер сағын салған сағызын, толығдаңар сынны чарыда чоохтап пирген паза ӧлімнеңер, тірілістеңер сынны ас пирген. Худайның Хан-ӱлгӱзі ле пістің сидіктерібісті пӧк поларынаңар піліп алғабыс, ідӧк хайди часкалығ полып аларынаңар паза Худайның кӧңніне кірер ӱчӱн, хайди чуртирға киректеңер піліп алғабыс. Ол пілістерні алып алып, Худайның нымысчылары ниме итчелер? Аннаңар пасха ухаанҷыласта пазыл парған. (21 паза 25 приложениелерні кӧріңер.)

14. Хан-ӱлгӱдеңер чахсы хабар нинҷе кӧп тарап парған паза кем аны искірче?

¹⁴ Худай сӧзін прай чир-чалбахта искіргені. Иисус халғанҷы кӱннерде Хан-ӱлгӱдеңер чахсы хабар прай чир ӱстӱндегі чоннарға искірілер тіп чоохтаан (Матфей 24:3, 14). Пӱӱн Хан-ӱлгӱдеңер чахсы хабар 240 азыра хазналарда паза чирлерде, 900 азыра тілнең искірілче. «Полған на чоннаң, полған на  сӧӧктең» сыххан Иегованың киречілері Худайның Хан-ӱлгӱзінеңер паза кізілерге ол ниме идерінеңер прай чир ӱстӱнде искірчелер (Азых чоох 7:9). Олар аның ӱчӱн ахча албинчалар. Иегованың киречілерін хырт кӧрчетселер дее паза оларны сӱрчетселер дее, Хан-ӱлгӱдеңер чахсы хабарны искірерін пір дее ниме тохтат полбас тіп Иисус ухаанҷылаан (Лука 21:17).

15. а) Халғанҷы кӱннерде чуртапчатханыбысха киртінчезер бе? Ноға? б) Худайның чооғын исчеткеннернең ниме полар, аның чооғын испинчеткеннернең ниме полар?

¹⁵ Халғанҷы кӱннерде чуртапчатханыбысха киртінчезер бе? Халғанҷы кӱннердеңер кӧп ухаанҷыластар амғы туста толчалар. Ӱр ниместең Иегова чахсы хабарны искірерін тохтадыбызар. Андада «тӱгенҷізі килер» (Матфей 24:14). Армагеддон тіп адалчатхан чаа «тӱгенҷізі» полар. Ол чаада Худай прай чабал нимені чох идібізер. Иегованың кӧңнін толдырып, Иисус паза аның кӱстіг ангеллері Худайның чооғын истерге хынминчатханнарны прайларын чох идібізерлер (2 Фессалониктегілерге 1:6—9). Сайтаннаң айналар пірдеезін паза алаахтыр полбастар. Худайның чооғын истіп, аның Хан-ӱлгӱзінде чуртирға хынчатхан кізілер Худайның полған на молҷаа толарын кӧрерлер (Азых чоох 20:1—3; 21:3—5).

16. Тӱгенҷізі чағдапчатхан ӱчӱн сірерге ниме идерге кирек?

¹⁶ Сайтан устапчатхан чир-чалбах ӱр ниместең чох пол парар. Аннаңар посты сурарға кирек: «Мағаа ниме идерге?» Иегова сірерні Библияны чахсы арах піліп алзыннар тіп хынча. Аннаңар Библияны кӱстеніп ӱгренерге кирек (Иоанн 17:3). Иегованың киречілері неделя сай чыылығлар иртірчелер, анда Библияны чахсы  арах піліп аларға чарир. Ол чыылығларға сыбыра чӧрерге кӱстеніңер. (Еврейлерге 10:24, 25 хығырыбызыңар.) Позыңарда пірее ниме алыстырарға кирек полчатханын кӧр салзар, алызарға хорыхпаңар. Андада Иегованаң ынархазыңар улам пик пол парар (Иаковтың 4:8).

17. Ноға пу чабал чир-чалбахтың тӱгенҷізі кӧбізі сағыбаан туста килер?

¹⁷ Павел илҷі чабал чир-чалбахтың тӱгенҷізі кӧбізіне кинетін, хараа оғыр кірчеткен чіли, килер теен (1 Фессалониктегілерге 5:2). Тӱгенҷі кӱннерде чуртапчатханыбысты киречілепчеткен киректерні кӧп кізі санға албас тіп Иисус ухаанҷылаан. Иисус теен: «Нойның тузында хайди полған, ідӧк Кізі Оолғы килер туста полар. Суғ тазар кӱннернің алнында Ной позының улуғ кимезіне одырыбысханынҷа, ідӧк чееннер, іскеннер, ипчі алғаннар паза ирге парғаннар. Чир ӱстӱне суғ чайылып, прайзын хыр парыбысханҷа, [«сағынмааннар», НТ] олар ниме полчатханын піл тее полбааннар. Кізі Оолғы килзе, ідӧк полар» (Матфей 24:37—39).

18. Иисус нимедеңер сизіндірген?

¹⁸ Тӱгенҷізі, «сӧзірбе чіли», олар сағыбаан туста килер, аннаңар Иисус теен: «Сиргек тудыныңар, иртіре чырғап, чуртастың оох-теек нимелеріне пастырбаңар». Анаң хосхан: «Че, сыбыра сиргек полып, пазыр чӧріңер, андада, прай полар саайлардаң ос халып, Кізі Оолғының алнында турарзар» (Лука 21:34—36). Ноға Иисустың сӧстерінің хоостыра тудынарға кирек? Сайтанның чабал чир-чалбағы чох иділер тус уғаа чағын, андада Иегованың паза Иисустың кӧңніне кірчеткеннер ле арачыланып алып, наа тилекейде мӧгі чуртирлар (Иоанн 3:16; 2 Петрның 3:13).