ជំពូកទី៩

តើពិភពលោកនេះជិតមកដល់ទីបញ្ចប់ឬ?

លេង

១. តើយើងអាចដឹងអំពីអនាគតតាមវិធីណា?

អ្នកប្រហែលជាធ្លាប់មើលព័ត៌មានតាមកញ្ចក់ទូរទស្សន៍ឬឮតាមវិទ្យុ រួចឆ្ងល់ថា ‹តើពិភពលោកយើងនឹងទៅជាយ៉ាងណា?›។ ដោយសារមានរឿងខ្លោចផ្សានិងអំពើឃោរឃៅច្រើនដល់ម៉្លេះបានជាមនុស្សខ្លះជឿថា យើងកំពុងរស់នៅជិតទីបញ្ចប់នៃពិភពលោកនេះ។ តើនេះជាការពិតឬ? តើមានវិធីណាដើម្បីដឹងអំពីអ្វីដែលនឹងកើតឡើងនៅអនាគតទេ? ពិតជាមាន។ ទោះបើមនុស្សមិនអាចប្រាប់ទុកជាមុនអំពីអ្វីដែលនឹងកើតឡើងក៏ដោយ តែព្រះយេហូវ៉ាអាចប្រាប់បាន។ ក្នុងគម្ពីរ លោកបានប្រាប់យើងអំពីអនាគតរបស់យើងនិងអនាគតរបស់ផែនដី។—អេសាយ ៤៦:១០; យ៉ាកុប ៤:១៤

២, ៣. តើពួកអ្នកកាន់តាមលោកយេស៊ូចង់ដឹងអំពីអ្វី ហើយតើលោកបានឆ្លើយតបយ៉ាងណា?

^២ពេលយើងអានគម្ពីរអំពីទីបញ្ចប់នៃពិភពលោក នេះមិនមានន័យថាជាទីបញ្ចប់នៃផែនដីទេ តែជាទីបញ្ចប់នៃអំពើអាក្រក់វិញ។ លោកយេស៊ូបានបង្រៀនបណ្ដាជនថារាជាណាចក្ររបស់ព្រះនឹងគ្រប់គ្រងមកលើផែនដី។ (លូកា ៤:៤៣) ពួកអ្នកកាន់តាមលោកចង់ដឹងអំពីពេលដែលរាជាណាចក្រព្រះនឹងមក ដូច្នេះពួកគេសួរលោកយេស៊ូថា៖ «តើការទាំងនេះនឹងកើតឡើងនៅពេលណា? ហើយតើអ្វីជាសញ្ញាសម្គាល់ដែលបញ្ជាក់វត្ដមានរបស់លោក និងគ្រាចុងបញ្ចប់នៃរបៀបរបបពិភពលោក?»។ (ម៉ាថាយ ២៤:៣) លោកយេស៊ូមិនបានប្រាប់អំពីពេលកំណត់ទេ តែលោកប្រាប់ពួកគេអំពីអ្វីដែលនឹងកើតឡើងបន្ដិចមុនទីបញ្ចប់មកដល់។ អ្វីដែលលោកយេស៊ូមានប្រសាសន៍កំពុងកើតឡើងនៅសព្វថ្ងៃនេះ។

^៣ក្នុងជំពូកនេះយើងនឹងពិចារណាអំពីភ័ស្ដុតាងដែលបញ្ជាក់ថាយើងកំពុងរស់នៅគ្រាចុងក្រោយបង្អស់មុនទីបញ្ចប់នៃពិភពលោកនេះមកដល់។ ប៉ុន្ដែ មុនដំបូងយើងត្រូវដឹងអំពីសង្គ្រាមដែលបានកើតឡើងនៅស្ថានសួគ៌សិន ដើម្បីយើងអាចយល់នូវមូលហេតុដែលនាំឲ្យមានអំពើអាក្រក់ច្រើនម៉្លេះនៅផែនដី។

សង្គ្រាមនៅស្ថានសួគ៌

៤, ៥. (ក) តើអ្វីបានកើតឡើងនៅស្ថានសួគ៌មិនយូរក្រោយពីលោកយេស៊ូបានក្លាយទៅជាស្ដេច? (ខ) យោងទៅតាមការបើកបង្ហាញ ១២:១២ តើអ្វីបានកើតឡើងនៅផែនដីក្រោយពីសាថានបានត្រូវបោះទម្លាក់មក?

^៤ក្នុងជំពូកទី៨យើងបានរៀនថាលោកយេស៊ូបានក្លាយទៅជាស្ដេចនៅស្ថានសួគ៌ក្នុងឆ្នាំ១៩១៤។ (ដានីយ៉ែល ៧:១៣, ១៤) សៀវភៅការបើកបង្ហាញប្រាប់យើងអំពីអ្វីដែលបានកើតឡើងថា៖ «សង្គ្រាមបានផ្ទុះឡើងនៅស្ថានសួគ៌៖ មីកែល[គឺលោកយេស៊ូ]និងបណ្ដាទេវតារបស់លោកបានច្បាំងនឹងនាគ[សាថាន]និងបណ្ដាទេវតារបស់វា»។ * សាថាននិងពួកវិញ្ញាណកំណាចរបស់វាបានចាញ់សង្គ្រាមនោះ ហើយបានត្រូវបោះទម្លាក់មកផែនដី។ ទេវតាស្មោះត្រង់ច្បាស់ជារីករាយខ្លាំងណាស់! ប៉ុន្ដែ ចុះយ៉ាងណាវិញចំពោះមនុស្សជាតិនៅផែនដី? គម្ពីរចែងថានៅពេលនោះនឹងមានសេចក្ដីវេទនាច្រើនជាងចំពោះពួកគេ។ ហេតុអ្វី? ពីព្រោះមេកំណាចមានកំហឹងយ៉ាងខ្លាំង«ដោយដឹងថាវាមានពេលតែបន្ដិចបន្ដួច»។—ការបើកបង្ហាញ ១២:៧, ៩, ១២

^៥មេកំណាចខំអស់ពីសមត្ថភាពដើម្បីធ្វើឲ្យមានទុក្ខវេទនាកាន់តែច្រើននៅផែនដី ពីព្រោះវាមានកំហឹងយ៉ាងខ្លាំងដោយសារវានៅសល់ពេលតែបន្ដិចបន្ដួចទេ មុនដែលព្រះនឹងបញ្ឈប់សកម្មភាពរបស់វានៅផែនដី។ សូមយើងពិចារណាអំពីព្រឹត្ដិការណ៍ផ្សេងៗដែលលោកយេស៊ូបានមានប្រសាសន៍ថានឹងកើតឡើងក្នុងអំឡុងគ្រាចុងក្រោយបង្អស់នេះ (សូមមើលលេខ២៤ក្នុងកំណត់នៅចុងសៀវភៅ)។

គ្រាចុងក្រោយបង្អស់

៦, ៧. តើអ្វីបង្ហាញថាប្រសាសន៍របស់លោកយេស៊ូអំពីសង្គ្រាមនិងការអត់ឃ្លានកំពុងកើតឡើង?

^៦សង្គ្រាម។ លោកយេស៊ូមានប្រសាសន៍ថា៖ «ប្រជាជាតិមួយនឹងលើកទ័ពទៅច្បាំងនឹងប្រជាជាតិមួយ ហើយរាជាណាចក្រមួយនឹងលើកទ័ពទៅច្បាំងនឹងរាជាណាចក្រមួយ»។ (ម៉ាថាយ ២៤:៧) នៅសម័យយើង មនុស្សជាច្រើនបានស្លាប់ក្នុងសង្គ្រាម ច្រើនជាងសម័យណាទាំងអស់ក្នុងប្រវត្ដិសាស្ដ្រ។ សេចក្ដីរាយការណ៍ពីវិទ្យាស្ថានមួយ (Worldwatch Institute)បានបង្ហាញថាតាំងពីឆ្នាំ១៩១៤ សង្គ្រាមបានសម្លាប់មនុស្សជាង១០០លាននាក់។ ចំនួនមនុស្សដែលបានស្លាប់ដោយសារសង្គ្រាមក្នុងអំឡុង១០០ឆ្នាំ រវាងឆ្នាំ១៩០០និងឆ្នាំ២០០០ គឺច្រើនជាងមួយជាបី បើប្រៀបធៀបចំនួនមនុស្សទាំងអស់ដែលបានស្លាប់ដោយសារសង្គ្រាមមុនឆ្នាំ១៩០០។ មនុស្សរាប់លាននាក់បានរងទុក្ខខ្លោចផ្សាដោយសារសង្គ្រាម!

^៧ការអត់ឃ្លាន។ លោកយេស៊ូបានមានប្រសាសន៍ថា៖ ‹នឹងមានការអត់ឃ្លាន›។ (ម៉ាថាយ ២៤:៧) ទោះបីជាការផលិតអាហារបានកើនឡើងយ៉ាងណាក៏ដោយ មនុស្សជាច្រើននៅតែគ្មានអាហារបរិភោគគ្រប់គ្រាន់។ ហេតុអ្វី? ពីព្រោះពួកគេគ្មានលុយគ្រប់គ្រាន់ដើម្បីទិញអាហារបរិភោគឬដីសម្រាប់ដាំដំណាំឡើយ។ មនុស្សជាងមួយពាន់លាននាក់ត្រូវចិញ្ចឹមជីវិតដោយទទួលលុយតិចជាងមួយដុល្លារក្នុងមួយថ្ងៃ។ អង្គការសុខភាពពិភពលោកនិយាយថា មូលហេតុសំខាន់បំផុតមួយដែលនាំឲ្យកុមាររាប់លាននាក់ស្លាប់ជារៀងរាល់ឆ្នាំ គឺដោយសារគ្មានអាហារបរិភោគគ្រប់គ្រាន់។

៨, ៩. តើអ្វីបង្ហាញថាប្រសាសន៍របស់លោកយេស៊ូស្ដីអំពីការរញ្ជួយដីនិងជំងឺកំពុងសម្រេចមែន?

^៨ការរញ្ជួយដី។ លោកយេស៊ូបានប្រាប់ទុកជាមុនថា៖ «នឹងមានរញ្ជួយដីជាខ្លាំង»។ (លូកា ២១:១១) អ្នកវិទ្យាសាស្ដ្រប៉ាន់ស្មានថានឹងមានការរញ្ជួយដីធំៗជាច្រើនរៀងរាល់ឆ្នាំ។ ចាប់តាំងពីឆ្នាំ១៩០០មក មនុស្សជាងពីរលាននាក់បានស្លាប់ដោយសារការរញ្ជួយដី។ សព្វថ្ងៃនេះ បច្ចេកវិទ្យាមានការរីកចម្រើន ហើយអាចប្រាប់លឿនជាងមុនថានឹងមានការរញ្ជួយដី។ យ៉ាងណាក្ដី មនុស្សជាច្រើននៅតែបាត់បង់ជីវិត។

^៩ជំងឺ។ លោកយេស៊ូប្រាប់ថានឹងមាន«រោគរាតត្បាត»។ ជំងឺដ៏សាហាវៗនឹងឆ្លងរាលដាលយ៉ាងឆាប់ហើយសម្លាប់មនុស្សជាច្រើន។ (លូកា ២១:១១) ទោះបីជាគ្រូពេទ្យដឹងអំពីរបៀបព្យាបាលជំងឺជាច្រើនក៏ដោយ តែនៅតែមានជំងឺជាច្រើនទៀតដែលមិនអាចព្យាបាលបានទេ។ តាមពិត របាយការណ៍មួយពន្យល់ថាមនុស្សរាប់លាននាក់ស្លាប់ជារៀងរាល់ឆ្នាំដោយសារជំងឺផ្សេងៗដូចជាជំងឺរបេង គ្រុនចាញ់ និងអាសន្នរោគរាករូសជាដើម។ មិនត្រឹមតែប៉ុណ្ណោះ គ្រូពេទ្យបានស្រាវជ្រាវឃើញថាមានជំងឺថ្មី៣០ប្រភេទ ហើយជំងឺខ្លះក្នុងចំណោមជំងឺទាំងនោះមិនអាចព្យាបាលបានឡើយ។

លក្ខណៈរបស់មនុស្សនៅគ្រាចុងក្រោយបង្អស់

១០. តើធីម៉ូថេទី២ ៣:១-៥ កំពុងតែសម្រេចនៅសព្វថ្ងៃនេះយ៉ាងដូចម្ដេច?

^១០គម្ពីរចែងនៅធីម៉ូថេទី២ ៣:១-៥ ថា៖ «គ្រាចុងក្រោយបង្អស់នឹងលំបាកណាស់»។ សាវ័កប៉ូលបានពណ៌នាអំពីលក្ខណៈទូទៅរបស់មនុស្សនៅគ្រាចុងក្រោយបង្អស់។ គាត់បានប្រាប់ថាមនុស្សនឹង

ស្រឡាញ់តែខ្លួនឯង
ស្រឡាញ់ប្រាក់
មិនស្តាប់បង្គាប់ឪពុកម្ដាយ
មិនស្មោះត្រង់
គ្មានសេចក្ដីស្រឡាញ់ចំពោះក្រុមគ្រួសារ
មិនចេះទប់ចិត្ដ
កាចសាហាវ
ស្រឡាញ់ការសប្បាយជាជាងស្រឡាញ់ព្រះ
មានឫកពាជាមនុស្សដែលស្រឡាញ់ព្រះ តែមិនព្រមស្តាប់បង្គាប់លោក

១១. តាមទំនុកតម្កើង ៩២:៧ តើអ្វីនឹងកើតឡើងដល់មនុស្សអាក្រក់?

^១១តើមនុស្សនៅក្នុងសហគមន៍របស់អ្នកមានលក្ខណៈដូចនេះទេ? នៅទូទាំងពិភពលោកមានមនុស្សជាច្រើនដែលមានលក្ខណៈអាក្រក់។ នេះជួយយើងឲ្យដឹងថា មិនយូរទៀតព្រះនឹងចាត់វិធានការដើម្បីកម្ទេចមនុស្សអាក្រក់ ពីព្រោះលោកសន្យាថា៖ «វេលាណាដែលមនុស្សអាក្រក់ដុះដាលឡើងដូចជាស្មៅ ហើយអស់អ្នកដែលប្រព្រឹត្ដអំពើទុច្ចរិតលូតលាស់ឡើង នោះគឺសំរាប់តែឲ្យគេត្រូវវិនាស[ឬបំផ្លាញចោល]ទៅអស់កល្បជានិច្ចប៉ុណ្ណោះ»។—ទំនុកតម្កើង ៩២:៧

ដំណឹងល្អនៅគ្រាចុងក្រោយបង្អស់

១២, ១៣. តើព្រះយេហូវ៉ាបានបង្រៀនយើងអំពីអ្វីខ្លះក្នុងគ្រាចុងក្រោយបង្អស់នេះ?

^១២គម្ពីរបានចែងទុកជាមុនថានៅគ្រាចុងក្រោយបង្អស់ ពិភពលោកនឹងពោរពេញទៅដោយទុក្ខវេទនានិងការឈឺចាប់។ ប៉ុន្ដែ គម្ពីរក៏ប្រាប់ដែរថានឹងមានអ្វីល្អៗកើតឡើង។

«ដំណឹងល្អនេះអំពីរាជាណាចក្រ នឹងត្រូវផ្សព្វផ្សាយនៅគ្រប់ទីអាស្រ័យនៅផែនដី»។—ម៉ាថាយ ២៤:១៤

^១៣ការយល់ដឹងអំពីគម្ពីរ។ អ្នកប្រកាសទំនាយដានីយ៉ែលបានសរសេរអំពីគ្រាចុងក្រោយបង្អស់ថា៖ «ចំណេះនឹងបានចំរើនឡើង»។ (ដានីយ៉ែល ១២:៤) នេះមានន័យថាព្រះនឹងជួយរាស្ដ្ររបស់លោកឲ្យយល់កាន់តែច្បាស់អំពីសេចក្ដីបង្រៀនក្នុងគម្ពីរ។ ជាពិសេស ព្រះយេហូវ៉ាបានធ្វើដូច្នេះតាំងពីឆ្នាំ១៩១៤មក។ ជាឧទាហរណ៍ លោកបានបង្រៀនយើងអំពីសារៈសំខាន់នៃនាមលោកនិងបំណងប្រាថ្នារបស់លោក។ លោកថែមទាំងជួយយើងឲ្យយល់សេចក្ដីពិតអំពីថ្លៃលោះ អំពីអ្វីកើតឡើងពេលយើងស្លាប់ និងអំពីការប្រោសឲ្យរស់ឡើងវិញ។ ម្យ៉ាងទៀត យើងបានរៀនថាមានតែរាជាណាចក្ររបស់ព្រះប៉ុណ្ណោះដែលអាចដោះស្រាយបញ្ហាទាំងអស់របស់យើងបាន។ យើងក៏បានរៀនអំពីរបៀបមានសុភមង្គល និងអំពីរបៀបរស់នៅដែលព្រះពេញចិត្ដ។ ប៉ុន្ដែ តើអ្នកបម្រើព្រះនឹងធ្វើអ្វីចំពោះចំណេះដែលពួកគេបានរៀន? ទំនាយមួយទៀតផ្ដល់ចម្លើយចំពោះសំណួរនេះ (សូមមើលលេខ២១និង២៥ក្នុងកំណត់នៅចុងសៀវភៅ)។

១៤. តើដំណឹងល្អអំពីរាជាណាចក្ររបស់ព្រះកំពុងត្រូវប្រកាសប្រាប់នៅកន្លែងណាខ្លះ ហើយតើអ្នកណាកំពុងធ្វើកិច្ចការនេះ?

^១៤ការផ្សព្វផ្សាយទូទាំងផែនដី។ ស្ដីអំពីគ្រាចុងក្រោយបង្អស់ លោកយេស៊ូបានមានប្រសាសន៍ថា៖ «ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី»។ (ម៉ាថាយ ២៤:៣, ១៤) ដំណឹងល្អអំពីរាជាណាចក្រកំពុងត្រូវផ្សព្វផ្សាយនៅជាង២៣០ប្រទេស ហើយជាង៧០០ភាសា។ ពិតណាស់ នៅទូទាំងផែនដី សាក្សីព្រះយេហូវ៉ាមកពី«គ្រប់ប្រជាជាតិ គ្រប់កុលសម្ព័ន្ធ» ហើយកំពុងជួយមនុស្សឲ្យយល់អំពីរាជាណាចក្ររបស់ព្រះ និងអំពីអ្វីដែលរាជាណាចក្រនោះនឹងធ្វើសម្រាប់មនុស្សជាតិ។ (ការបើកបង្ហាញ ៧:៩) មិនត្រឹមតែប៉ុណ្ណោះ ពួកគេធ្វើកិច្ចការនេះដោយស្ម័គ្រចិត្ដ។ ដូចដែលលោកយេស៊ូបានប្រាប់ទុកជាមុន ទោះបីជាពួកគេបានត្រូវមនុស្សជាច្រើនស្អប់និងទទួលការបៀតបៀនយ៉ាងណាក៏ដោយ គ្មានអ្វីអាចបញ្ឈប់កិច្ចការផ្សព្វផ្សាយនេះឡើយ។—លូកា ២១:១៧

តើអ្នកនឹងធ្វើអ្វី?

១៥. (ក) តើអ្នកជឿថាយើងកំពុងរស់នៅក្នុងគ្រាចុងក្រោយបង្អស់ឬទេ ហើយហេតុអ្វី? (ខ) តើនឹងមានអ្វីកើតឡើងចំពោះអ្នកដែលស្តាប់បង្គាប់ព្រះយេហូវ៉ានិងអ្នកដែលមិនស្តាប់បង្គាប់លោក?

^១៥តើអ្នកជឿថាយើងកំពុងរស់នៅក្នុងគ្រាចុងក្រោយបង្អស់ឬទេ? ទំនាយជាច្រើនអំពីគ្រាចុងក្រោយបង្អស់កំពុងក្លាយទៅជាការពិត។ មិនយូរទៀត ព្រះយេហូវ៉ានឹងសម្រេចចិត្ដបញ្ឈប់ការផ្សព្វផ្សាយដំណឹងល្អ ហើយ«ទីបញ្ចប់»នឹងមកដល់។ (ម៉ាថាយ ២៤:១៤) តើទីបញ្ចប់ជាអ្វី? គឺជាពេលដែលព្រះនឹងបំផ្លាញចោលអំពើអាក្រក់ទាំងអស់ ពេលនោះហៅថាសង្គ្រាមហាម៉ាគេដូន។ ព្រះយេហូវ៉ានឹងចាត់លោកយេស៊ូ ព្រមទាំងទេវតាដ៏ខ្លាំងក្លារបស់លោក ឲ្យបំផ្លាញចោលអស់អ្នកដែលមិនព្រមស្តាប់បង្គាប់លោកនិងបុត្ររបស់លោក។ (ថែស្សាឡូនិចទី២ ១:៦-៩) ក្រោយមក សាថាននិងពួកវិញ្ញាណកំណាចរបស់វានឹងលែងនាំមនុស្សឲ្យវង្វេងទៀត។ នៅទីបំផុត អស់អ្នកដែលស្តាប់បង្គាប់ព្រះ ហើយទទួលយករាជាណាចក្ររបស់លោក នឹងឃើញសេចក្ដីសន្យាទាំងអស់របស់ព្រះក្លាយទៅជាការពិត។—ការបើកបង្ហាញ ២០:១-៣; ២១:៣-៥

១៦. ដោយសារទីបញ្ចប់ជិតមកដល់ហើយ តើអ្នកត្រូវធ្វើយ៉ាងណា?

^១៦ពិភពលោកនេះបានត្រូវគ្រប់គ្រងដោយសាថាន ហើយនឹងត្រូវបំផ្លាញចោលក្នុងពេលឆាប់ៗនេះ។ ដូច្នេះ គឺជាការសំខាន់ដែលយើងសួរខ្លួនឯងថា ‹តើខ្ញុំត្រូវធ្វើអ្វី?›។ ព្រះយេហូវ៉ាចង់ឲ្យអ្នករៀនឲ្យបានច្រើនបំផុតពីគម្ពីរ។ សូមសិក្សាគម្ពីរដោយយកចិត្ដទុកដាក់។ (យ៉ូហាន ១៧:៣) សាក្សីព្រះយេហូវ៉ាមានកិច្ចប្រជុំជារៀងរាល់សប្ដាហ៍ដើម្បីជួយមនុស្សឲ្យយល់អំពីគម្ពីរ។ សូមព្យាយាមចូលរួមកិច្ចប្រជុំទាំងនោះយ៉ាងទៀតទាត់។ (សូមអាន ហេប្រឺ ១០:២៤, ២៥) បើអ្នកដឹងថាអ្នកត្រូវធ្វើការកែប្រែអ្វីមួយ សូមធ្វើការកែប្រែនោះភ្លាមៗដោយឥតស្ទាក់ស្ទើរ។ ដោយធ្វើដូច្នេះ ចំណងមិត្ដភាពរបស់អ្នកជាមួយនឹងព្រះយេហូវ៉ានឹងកាន់តែជិតស្និទ្ធថែមទៀត។—យ៉ាកុប ៤:៨

១៧. ហេតុអ្វីនៅពេលទីបញ្ចប់មកដល់ មនុស្សភាគច្រើននឹងភ្ញាក់ផ្អើល?

^១៧សាវ័កប៉ូលពន្យល់ថាការបំផ្លាញមនុស្សទុច្ចរិតនឹងកើតឡើងនៅពេលដែលមនុស្សភាគច្រើនមិននឹកស្មាន ដូចជាពេលដែល«ចោរមកនៅពេលយប់»ដោយគ្មានអ្នកណាដឹង។ (ថែស្សាឡូនិចទី១ ៥:២) ពេលនោះមនុស្សជាច្រើននឹងភ្ញាក់ផ្អើល។ ហេតុអ្វី? លោកយេស៊ូបានប្រាប់ទុកជាមុនថា ពួកគេនឹងមិនអើពើចំពោះភ័ស្ដុតាងដែលបញ្ជាក់ថា យើងកំពុងតែរស់នៅគ្រាចុងក្រោយបង្អស់ទេ។ លោកបានមានប្រសាសន៍ថា៖ «វត្ដមានរបស់កូនមនុស្ស[ឬគ្រាចុងក្រោយបង្អស់] នឹងដូចសម័យណូអេ។ ព្រោះមនុស្សនៅសម័យនោះ មុនទឹកជំនន់មកដល់ ពួកគេកំពុងពិសាអាហារពិសាស្រា រៀបការប្ដីប្រពន្ធ រហូតដល់ថ្ងៃដែលណូអេចូលទៅក្នុងទូកធំនោះ ហើយពួកគេមិនបានយកចិត្ដទុកដាក់សោះ រហូតដល់ទឹកជន់ឡើង កញ្ឆក់យកគេទាំងអស់គ្នាទៅ។ ពេលកូនមនុស្សមានវត្ដមាន ក៏នឹងដូចគ្នាដែរ»។—ម៉ាថាយ ២៤:៣៧-៣៩

១៨. តើលោកយេស៊ូបានព្រមានយើងអំពីអ្វី?

^១៨លោកយេស៊ូបានព្រមានថាយើងមិនគួរអនុញ្ញាតឲ្យ«ការផឹកនិងការបរិភោគហួសប្រមាណ និងកង្វល់អំពីជីវិត»ពង្វក់ចិត្ដយើងឡើយ។ លោកបានមានប្រសាសន៍ថាទីបញ្ចប់នឹងមកដល់ភ្លាមមួយរំពេច«ដូចជាលប់»។ ម្យ៉ាងទៀត លោកបានប្រាប់ថាទីបញ្ចប់«នឹងមកគ្របលើអស់ទាំងមនុស្សនៅលើផែនដី»។ បន្ទាប់មក លោកមានប្រសាសន៍បន្ថែមទៀតថា៖ «ដូច្នេះ ចូរចាំយាមព្រមទាំងអធិដ្ឋានជានិច្ចអង្វរសុំឲ្យរួចផុតពីការទាំងអស់នេះដែលត្រូវកើតឡើង ហើយឲ្យឈរនៅមុខកូនមនុស្សផង»។ (លូកា ២១:៣៤-៣៦) ហេតុអ្វីជាការសំខាន់ដែលយើងស្តាប់តាមការព្រមានរបស់លោកយេស៊ូ? ពីព្រោះនៅពេលឆាប់ៗនេះពិភពលោកដ៏អាក្រក់របស់សាថាននឹងត្រូវបំផ្លាញចោល ហើយមានតែអ្នកដែលបានទទួលការពេញចិត្ដពីព្រះយេហូវ៉ានិងលោកយេស៊ូប៉ុណ្ណោះ នឹងរួចជីវិតហើយរស់នៅជារៀងរហូតក្នុងពិភពលោកថ្មី។—យ៉ូហាន ៣:១៦; ពេត្រុសទី២ ៣:១៣

^ វគ្គ 4 មីកែលគឺជានាមមួយទៀតរបស់លោកយេស៊ូគ្រិស្ដ។ ដើម្បីបានព័ត៌មានថែមទៀត សូមមើលលេខ២៣ក្នុងកំណត់នៅចុងសៀវភៅ។

សេចក្ដីសង្ខេប

សេចក្ដីពិតទី១: ព្រះយេហូវ៉ាបើកបង្ហាញឲ្យយើងដឹងអំពីអនាគត

«តាំងតែពីដើមដំបូង អញរមែងសំដែងប្រាប់ពីការដែលត្រូវមកខាងចុងបំផុត ហើយតាំងពីចាស់បុរាណ ក៏ប្រាប់ពីការដែលមិនទាន់មានមកដែរ»។—អេសាយ ៤៦:១០

តើមានព្រឹត្ដិការណ៍អ្វីខ្លះដែលកំពុងកើតឡើង ក្នុងគ្រាចុងក្រោយបង្អស់?

ដានីយ៉ែល ៧:១៣, ១៤

លោកយេស៊ូបានក្លាយទៅជាស្ដេចនៅស្ថានសួគ៌ក្នុងឆ្នាំ១៩១៤។
ម៉ាថាយ ២៤:៣-១៤

លោកយេស៊ូប្រាប់ទុកជាមុនអំពីគ្រាដ៏លំបាកសម្រាប់មនុស្សជាតិ។
ការបើកបង្ហាញ ១២:៧-៩, ១២

មិនយូរក្រោយពីលោកយេស៊ូបានក្លាយទៅជាស្ដេច លោកបានបោះទម្លាក់សាថានចេញពីស្ថានសួគ៌មកផែនដី។ សាថានមានកំហឹងយ៉ាងខ្លាំងដោយសារវាដឹងថាវា«មានពេលតែបន្ដិចបន្ដួច»ទេ មុនដែលព្រះនឹងបញ្ឈប់សកម្មភាពរបស់វានៅផែនដី។

សេចក្ដីពិតទី២: យើងកំពុងរស់នៅគ្រាចុងក្រោយបង្អស់

«តើអ្វីជាសញ្ញាសម្គាល់ដែលបញ្ជាក់ . . . គ្រាចុងបញ្ចប់នៃរបៀបរបបពិភពលោក?»។—ម៉ាថាយ ២៤:៣

តើអ្នកបានឃើញទំនាយអ្វីខ្លះក្នុងគម្ពីរកំពុងកើតឡើង?

ម៉ាថាយ ២៤:៧; លូកា ២១:១១

ជាងពេលមុនៗទៅទៀត សព្វថ្ងៃនេះយើងឃើញមានសង្គ្រាម ការអត់ឃ្លាន ការរញ្ជួយដី និងជំងឺ។
ធីម៉ូថេទី២ ៣:១-៥

សាវ័កប៉ូលរៀបរាប់អំពីលក្ខណៈរបស់មនុស្សនៅគ្រាចុងក្រោយបង្អស់។
ដានីយ៉ែល ១២:៤

ព្រះកំពុងជួយរាស្ដ្ររបស់លោកឲ្យយល់កាន់តែច្បាស់អំពីគម្ពីរ។
ម៉ាថាយ ២៤:១៤

ដំណឹងល្អអំពីរាជាណាចក្រកំពុងត្រូវផ្សព្វផ្សាយនៅទូទាំងផែនដី។

សេចក្ដីពិតទី៣: សូមចាត់វិធានការនៅឥឡូវនេះ ដើម្បីធ្វើឲ្យព្រះយេហូវ៉ាពេញចិត្ដ

«ថ្ងៃរបស់ព្រះយេហូវ៉ានឹងមកដូចជាចោរមកនៅពេលយប់»។—ថែស្សាឡូនិចទី១ ៥:២

ដោយសារទីបញ្ចប់ជិតមកដល់ហើយ តើអ្នកត្រូវធ្វើអ្វី?

យ៉ូហាន ១៧:៣

សូមសិក្សាគម្ពីរដោយយកចិត្ដទុកដាក់។
ហេប្រឺ ១០:២៤, ២៥

សូមរៀនថែមទៀតដោយចូលរួមកិច្ចប្រជុំរបស់សាក្សីព្រះយេហូវ៉ា។
យ៉ាកុប ៤:៨

សូមធ្វើការកែប្រែដែលចាំបាច់ក្នុងជីវិតរបស់អ្នកដើម្បីអ្នកអាចចូលទៅកាន់តែជិតព្រះ។
លូកា ២១:៣៤-៣៦

កុំឲ្យអ្វីមកពង្វក់ចិត្ដអ្នក តែសូមចាត់ទុកការគោរពប្រណិប័តន៍ព្រះយេហូវ៉ាថាជាអ្វីដ៏សំខាន់បំផុត។