1. Aw wi go no bɔt tumara bambay?

YU DƆN ɛva wach nyuz na tɛlivishɔn ɔ lisin to redio ɛn wɔnda, ‘Wetin rili de apin na di wɔl?’ Bɔku bad bad tin dɛn de apin tide we mek sɔm pipul dɛn biliv se wi de na di tɛm we di wɔl want fɔ dɔn. Yu tink se dat na tru? Ɛni we de fɔ no wetin go apin tumara bambay? Yɛs. Pan ɔl we mɔtalman nɔ ebul fɔ sho wetin go apin tumara bambay, Jiova Gɔd ebul fɔ sho wetin go apin. I tɛl wi insay di Baybul bɔt wetin go apin to wi ɛn di wɔl tumara bambay.—Ayzaya 46:​10; Jems 4:​14.

2, 3. Wetin Jizɔs in disaypul dɛn bin want fɔ no? Aw Jizɔs bin ansa dɛn?

² We di Baybul tɔk bɔt di tɛm we di wɔl want fɔ dɔn, i nɔ min se na di wɔl Gɔd go pwɛl kpatakpata, bɔt na di bad bad tin dɛn we de apin na di wɔl go dɔn. Jizɔs bin tich pipul dɛn se na Gɔd in Kiŋdɔm go rul di wɔl. (Lyuk 4:​43) In disaypul dɛn bin want fɔ no ustɛm Gɔd in Kiŋdɔm go kam, ɛn dɛn aks Jizɔs se: “Tɛl wi ustɛm dɛn tin ya go bi, us sayn go sho wi se yu de kam bak ɛn di wɔl de dɔn?” (Matyu 24:​3) Jizɔs nɔ bin sho dɛn di rayt tɛm, bɔt i tɛl dɛn wetin go apin jɔs bifo di wɔl dɔn. Wetin Jizɔs bin se go bi, de apin rayt naw.

 ³ Insay dis chapta, wi go tɔk bɔt tin dɛn we de sho se wi de na di tɛm we di wɔl want fɔ dɔn. Fɔs, wi nid fɔ lan bɔt wan wɔ we bin apin na ɛvin, so dat wi go ɔndastand wetin mek bad bad tin dɛn de apin na di wɔl.

4, 5. (a) Wetin bin apin na ɛvin jɔs afta Jizɔs bi Kiŋ? (b) Frɔm wetin de na Rɛvɛlɛshɔn 12:​12, wetin apin na di wɔl afta dɛn dɔn trowe Setan kam dɔŋ?

⁴ Insay Chapta 8, wi bin lan se Jizɔs bi Kiŋ na ɛvin insay 1914. (Daniɛl 7:​13, 14) Di Baybul buk we nem Rɛvɛlɛshɔn tɛl wi wetin bin apin we i se: “Wantɛm wa fɔdɔm na ɛvin, Maykɛl ɛn in enjɛl dɛn go fɛt di dragɔn, di dragɔn insɛf fɛt bak wit in yon mɛsenja dɛn.” * Setan ɛn in dɛbul dɛn lɔs di fɛt ɛn dɛn bin trowe dɛn dɔŋ na di wɔl. Imajin aw di enjɛl dɛn bin gladi! Bɔt we di pipul dɛn we de na di wɔl? Di Baybul se na trɔbul fɔ mɔtalman dɛn na di wɔl. Wetin mek? Na bikɔs Setan vɛks bad bad wan, “i no se na smɔl tɛm nɔmɔ lɛf fɔ am.”—Rɛvɛleshɔn 12:​7, 9, 12.

⁵ Setan de du ɔl wetin i ebul fɔ mek bad bad tin dɛn apin na di wɔl. I rili vɛks bikɔs na shɔt tɛm lɛf fɔ mek Gɔd pul am kɔmɔt. Lɛ wi si wetin Jizɔs se go apin di tɛm we di wɔl want fɔ dɔn.—Luk Ɛndnot 24 na pej 220.

6, 7. Wetin wi go se tide bɔt wɔ ɛn angri?

⁶ Wɔ. Jizɔs bin se: “Wan kɔntri go fɛt ɔda kɔntri; wan neshɔn go fɛt ɔda neshɔn.” (Matyu 24:​7) Insay wi yon tɛm, dɛn dɔn kil bɔku pipul dɛn pan wɔ pas ɛni ɔda tɛm na istri. Wan ripɔt frɔm di Worldwatch Institute sho se frɔm 1914, wɔ dɔn kil pas 100 milyɔn pipul dɛn. Di pipul dɛn we dɛn bin kil na wɔ frɔm di ia 1900 to di ia 2000 bɔku fawe pas di wan dɛn we dɛn bin kil bifo di ia 1900. Jɔs imajin di kayn pen we wɔ dɔn mek bɔku bɔku pipul dɛn dɔn fil!

⁷ Angri. Jizɔs bin se: “Bad aŋri go de na [di] wɔl.” (Matyu 24:​7) Pan ɔl we bɔku it de naw pas trade, bɔku pipul dɛn nɔ gɛt plɛnti tin dɛn fɔ it. Wetin mek? Na bikɔs dɛn nɔ gɛt bɛtɛ mɔni fɔ bay tin fɔ it ɔ say fɔ plant it fɔ dɛnsɛf. Plɛnti pipul dɛn nɔ gɛt bɛtɛ mɔni fɔ kia fɔ dɛnsɛf. Di World Health Organization se ɛvri ia, i pas lɛk  fayv milyɔn pikin dɛn we kin day bikɔs dɛn nɔ gɛt bɛtɛ tin fɔ it.

8, 9. Wetin sho se di tin we Jizɔs bin tɔk bɔt atkwek ɛn bad bad sik dɛn, dɔn kam tru?

⁸ Atkwek. Jizɔs bin se: “Di grɔn go de trimbul bad.” (Lyuk 21:​11) Ɛvri ia, bɔku bad bad atkwek dɛn de apin. Frɔm di ia 1900, atkwek dɔn kil pas tu milyɔn pipul dɛn. Pan ɔl we naw sayɛnsman dɛn dɔn ebul fɔ no we atkwek want fɔ apin, bɔku pipul dɛn stil de day.

⁹ Bad bad sik. Jizɔs bin tɔk se: “Dɛn sik we de prɛd go de ɔlsay.” Bad bad sik dɛn go prɛd kwik kwik wan ɛn kil bɔku pipul dɛn. (Lyuk 21:​11) Pan ɔl we dɔktɔ dɛn dɔn lan aw fɔ mɛn bɔku sik dɛn, stil sik dɛn de we dɛn nɔ ebul fɔ mɛn. Infakt, wan ripɔt ɛksplen se sik dɛn lɛk dray-kɔf, maleria, ɛn kɔlɛra, de kil bɔku bɔku pipul dɛn ɛni ia. Apat frɔm dat, insay di las 40 ia, dɔktɔ dɛn dɔn si se i pas lɛk 30 nyu sik dɛn so we dɔn kam. Sɔm pan dɛn sik ya nɔ de mɛn.

10. Aw wetin de na Sɛkɛn Lɛta To Timoti 3:​1-5 de apin tide?

¹⁰ Na Sɛkɛn Lɛta To Timoti 3:​1-5, di Baybul se: “Jɛs bifo Jizɔs kam bak di tɛm go traŋa.” Di apɔsul Pɔl bin ɛksplen aw bɔku pipul dɛn go de biev insay di las dez. I bin se pipul dɛn

• go de mɛmba dɛnsɛf nɔmɔ

• go lɛk mɔni

• nɔ go de yɛri dɛn mama ɛn papa dɛn wɔd

• nɔ go de tɛl tɛnki fɔ ɛni gud we pɔsin du fɔ dɛn

• nɔ go gɛt sɔri at fɔ dɛn fambul dɛn

• nɔ go ebul kɔntrol dɛnsɛf

• go wayl if pɔsin ambɔg dɛn

• go lɛk fɔ ɛnjɔy dɛnsɛf, pas fɔ wɔship Gɔd

• go de mek lɛk se dɛn lɛk Gɔd, bɔt dɛn nɔ de obe am

11. Frɔm wetin de na Sam 92:​7, wetin go apin to wikɛd pipul dɛn?

¹¹ Na so bɔku pipul dɛn de biev na di say we yu de? Ɔlsay na di wɔl, na so pipul dɛn de biev. Bɔt Gɔd go du sɔntin bɔt dat jisnɔ. I prɔmis  se: “I lɛk usay pɔsin we de du bad dɔn rich, PAPA GƆD mɔs briŋ am kam dɔŋ we i nɔ go ɛva go ɔp,” dat min se i go day ɛn i nɔ go ɛva gɛt layf igen.—Sam 92:​7.

12, 13. Wetin Jiova dɔn tich wi insay dis las dez?

¹² Di Baybul bin tɔk se insay di las dez, bad bad tin dɛn go de apin ɛn pipul dɛn go sɔfa. Bɔt di Baybul tɔk bak se gud tin dɛn go apin.

¹³ Pipul dɛn go ɔndastand di Baybul. Di prɔfɛt Daniɛl bin rayt bɔt di las dez. I bin se: “Di tru go bɔku.” (Daniɛl 12:​4, NW) Gɔd go ɛp in pipul dɛn fɔ ɔndastand di Baybul klia wan pas trade. Jiova dɔn du dis mɔ frɔm 1914. Fɔ ɛgzampul, i dɔn tich wi bɔt aw in nem impɔtant, wetin i want fɔ du, di tru tin bɔt Jizɔs in day, wetin de apin we wi day, ɛn we i go gi layf bak to di wan dɛn we dɔn day. Wi dɔn lan se na Gɔd in Kiŋdɔm nɔmɔ go sɔlv wi prɔblɛm dɛn. Wi dɔn lan bak aw wi go gɛt gladi at ɛn di we aw wi fɔ liv wi layf fɔ mek Gɔd gladi. Bɔt wetin Gɔd in savant dɛn de du wit wetin dɛn dɔn lan? Di ɔda tin we di Baybul tɔk gi wi di ansa.—Luk Ɛndnot 21 na pej 216 ɛn Ɛndnot 25 na pej 221.

14. Usay dɛn de prich di gud nyuz bɔt di Kiŋdɔm? Udat dɛn de prich am?

¹⁴ Dɛn go prich di gud nyuz ɔlsay na di wɔl. We Jizɔs de tɔk bɔt di las dez, i bin se: “Pipul go tɛl ɔlman na [di] wɔl di Gud Nyuz bɔt wɛn Gɔd go rul di wɔl.” (Matyu 24:​3, 14) I dɔn pas lɛk 230 kɔntri dɛn ɛn 700 langwej dɛn we dɛn dɔn prich di gud nyuz bɔt Gɔd in Kiŋdɔm. Fɔ tru, ɔlsay na di wɔl, Jiova Witnɛs dɛn we kɔmɔt na “ɔl dɛn trayb ɛn ɔl dɛn neshɔn,” de ɛp pipul  dɛn fɔ ɔndastand wetin na Gɔd in Kiŋdɔm ɛn wetin i go du fɔ mɔtalman. (Rɛvɛleshɔn 7:​9) Dɛn de du dis fɔ fri. Pan ɔl we bɔku pipul dɛn et dɛn ɛn dɛn de du bad tin to dɛn, natin nɔ de stɔp di prichin wok, jɔs lɛk wetin Jizɔs bin tɔk.—Lyuk 21:​17.

15. (a) Yu biliv se wi de na di las dez? Wetin mek? (b) Wetin go apin to di wan dɛn we de obe Jiova ɛn di wan dɛn we nɔ de obe am?

¹⁵ Yu biliv se wi de na di las dez? Bɔku tin we di Baybul tɔk bɔt di las dez de apin. I nɔ go te igen, Jiova go disayd fɔ stɔp di prichin wok ɛn “di wɔl go dɔn.” (Matyu 24:​14) Aw dis go bi? I go bi insay wan wɔ we dɛn kɔl Amagɛdɔn, we Gɔd go yuz fɔ pul ɔl di bad bad tin dɛn we de apin na di wɔl. Jiova go yuz Jizɔs ɛn in pawaful enjɛl dɛn fɔ dɔnawe wit ɛnibɔdi we nɔ gri fɔ obe In ɛn in Pikin. (Sɛkɛn Lɛta Fɔ Tɛsalonayka 1:​6-9) Afta dat, Setan ɛn in dɛbul dɛn nɔ go de ful pipul dɛn igen. Ɔl di wan dɛn we want fɔ obe Gɔd ɛn we want fɔ mek in Kiŋdɔm rul dɛn, go si se ɔl di prɔmis dɛn we Gɔd bin dɔn mek de kam tru.—Rɛvɛleshɔn 20:​1-3; 21:​3-5.

16. Wetin yu nid fɔ du naw we di wɔl want fɔ dɔn?

¹⁶ I nɔ go te igen, dis wɔl we Setan de rul go dɔn. So i rili impɔtant fɔ mek wi aks wisɛf dis kwɛstyɔn, ‘Wetin a nid fɔ du?’ Jiova want yu fɔ du ɔl wetin yu ebul fɔ lan mɔ frɔm di Baybul. Yu nid fɔ tek yu stɔdi siriɔs. (Jɔn 17:​3) Jiova Witnɛs dɛn kin gɛt mitin dɛn ɛvri wik fɔ ɛp pipul dɛn fɔ ɔndastand di Baybul. Tray fɔ de atɛnd dɛn mitin ya ɔltɛm. (Rid Di Ibru Pipul Dɛn 10:​24, 25.) If yu lan se yu nid fɔ du sɔm tin dɛn fɔ chenj di we aw yu de liv yu layf, nɔ fred fɔ du dɛn.  If yu du dat, yu padi biznɛs wit Jiova go tayt mɔ ɛn mɔ.—Jems 4:​8.

17. Wetin mek bɔku pipul dɛn go sɔprayz di tɛm we di wɔl go dɔn?

¹⁷ Di apɔsul Pɔl bin ɛksplen se bɔku pipul dɛn go sɔprayz we Gɔd go dɔnawe wit dis wɔl, bikɔs i go apin “lɛkɛ aw tifman kin kam na nɛt.” (Fɔs Lɛta Fɔ Tɛsalonayka 5:​2) Jizɔs bin tɔk se bɔku pipul dɛn go disayd nɔ fɔ pe atɛnshɔn to di tin dɛn we de sho se wi de na di las dez. I bin se: “Di tɛm we Mɔtalman Pikin de kam [ɔ, di las dez], pipul go de du lɛkɛ aw dɛn bin de du da tɛm we Noa bin de. Bifo wata bin kɔba di wɔl, ɔlman bin de it ɛn drink; pipul bin de mared. Na dat dɛn bin de pan sote di tɛm we Noa go insay di big bot we i bil, ɛn dɛn nɔ bin no se ren go kam we go mek wata kɔba di wan ol wɔl, pas we di ren kam ɛn wata kam kɔba ɛn kil dɛn ɔl. Na so i go bi we Mɔtalman Pikin go kam.”—Matyu 24:​37-39.

18. Us wɔnin Jizɔs bin gi wi?

¹⁸ Jizɔs bin wɔn wi se wi nɔ fɔ alaw pasmak it, fɔ drink pasmak, ɛn di tin dɛn we de mek wi de wɔri fɔ tek wi atɛnshɔn. I bin se di wɔl go dɔn wantɛm wantɛm, “lɛk aw trap kin kech bif.” I bin se bak “da de de go kam pan ɔlman ɔlɔbɔt na [di] wɔl.” Dɔn i bin tɔk bak se: “Una fɔ waydawek ɛn una fɔ de pre ɔltɛm so dat una go gɛt trɛnk fɔ bia ɔl dɛn tin we go bi na dis wɔl ɛn una go ebul fɔ tinap bifo Mɔtalman Pikin.” (Lyuk 21:​34-36) Wetin mek i impɔtant fɔ lisin to Jizɔs in wɔnin? Na bikɔs i nɔ go te igen, dɛn go dɔnawe wit Setan in wikɛd wɔl. Na di wan dɛn nɔmɔ we de obe Jiova ɛn Jizɔs go sev di tɛm we di wɔl go dɔn ɛn dɛn go de sote go na dis wɔl.—Jɔn 3:​16; Pita In Sɛkɛn Lɛta 3:​13.