ບົດທີ 9
ໂລກໃກ້ຈະເຖິງຈຸດຈົບແລ້ວບໍ?
1. ເຮົາຈະຮູ້ອະນາຄົດໄດ້ຈາກໃສ?
ເມື່ອເຈົ້າເບິ່ງຂ່າວ ເຈົ້າເຄີຍຄິດບໍວ່າ ‘ເປັນຫຍັງໂລກຈຶ່ງເປັນແບບນີ້?’ ໃນທຸກມື້ນີ້ມີແຕ່ການຂ້າຟັນກັນແລະຄວາມໂຫດຮ້າຍຮຸນແຮງ ຫຼາຍຄົນຄິດວ່າໃກ້ຈະຮອດມື້ທີ່ໂລກເຖິງຈຸດຈົບແລ້ວ. ແຕ່ຈະເປັນແບບນັ້ນແທ້ໆບໍ? ເຮົາຈະມີທາງຮູ້ບໍວ່າຕໍ່ໄປອະນາຄົດຂອງເຮົາແລະໂລກຈະເປັນແນວໃດ? ເຖິງແມ່ນມະນຸດບໍ່ຮູ້ວ່າອະນາຄົດຈະເປັນແນວໃດ ແຕ່ພະເຢໂຫວາພະເຈົ້າຮູ້ແລະພະອົງບອກໄວ້ໃນຄຳພີໄບເບິນວ່າອະນາຄົດຂອງເຮົາແລະຂອງໂລກຈະເປັນແນວໃດ.—ເອຊາອີ 46:10; ຢາໂກໂບ 4:14
2, 3. ລູກສິດຂອງພະເຢຊູຢາກຮູ້ເລື່ອງຫຍັງ ແລະພະເຢຊູຕອບພວກເຂົາແນວໃດ?
2 ໃນຄຳພີໄບເບິນເວົ້າເຖິງເລື່ອງຈຸດຈົບຂອງໂລກ ຈຸດຈົບນີ້ບໍ່ໄດ້ໝາຍເຖິງຈຸດຈົບຂອງໜ່ວຍໂລກທີ່ເຮົາຢູ່ ແຕ່ໝາຍເຖິງຈຸດຈົບຂອງຄົນຊົ່ວແລະສິ່ງທີ່ບໍ່ດີ. ຕອນທີ່ພະເຢຊູຢູ່ໃນໂລກ ເພິ່ນສອນພວກລູກສິດວ່າການປົກຄອງຂອງພະເຈົ້າຈະປົກຄອງທົ່ວໂລກ. (ລູກາ 4:43) ພວກລູກສິດຈຶ່ງຢາກຮູ້ວ່າການປົກຄອງຂອງພະເຈົ້າຈະເລີ່ມຕົ້ນຕອນໃດ ພວກເຂົາຈຶ່ງຖາມພະເຢຊູວ່າ: “ເລື່ອງນີ້ຈະເກີດຂຶ້ນຕອນໃດ ແລະຈະມີຫຍັງເປັນສັນຍານບອກໃຫ້ຮູ້ວ່າທ່ານປະທັບຢູ່ແລະບອກໃຫ້ຮູ້ວ່າພວກເຮົາຢູ່ໃນສະໄໝສຸດທ້າຍຂອງໂລກນີ້?” (ມັດທາຍ 24:3) ພະເຢຊູບໍ່ໄດ້ບອກພວກເຂົາວ່າໂລກຈະເຖິງຈຸດຈົບມື້ໃດ ແຕ່ເພິ່ນບອກວ່າຈະມີບາງຢ່າງເກີດຂຶ້ນຕອນໃກ້ຈະຮອດມື້ນັ້ນ ແລະສິ່ງທີ່ພະເຢຊູບອກໄວ້ກໍກຳລັງເກີດຂຶ້ນໃນຕອນນີ້.
3 ໃນບົດນີ້ເຮົາຈະມາເບິ່ງວ່າມີເຫດການຫຍັງແດ່ທີ່ສະແດງວ່າເຮົາກຳລັງຢູ່ໃນໄລຍະທີ່ໂລກໃກ້ຈະເຖິງຈຸດຈົບ. ກ່ອນອື່ນ ເຮົາຕ້ອງຮູ້ເລື່ອງສົງຄາມທີ່ເກີດຂຶ້ນໃນສະຫວັນເພື່ອຈະຮູ້ວ່າເປັນຫຍັງໂລກຂອງເຮົາຈຶ່ງມີແຕ່ເລື່ອງທີ່ບໍ່ດີຫຼາຍແທ້ໆ.
ສົງຄາມໃນສະຫວັນ
4, 5. (ກ) ເກີດຫຍັງຂຶ້ນໃນສະຫວັນຫຼັງຈາກທີ່ພະເຢຊູຂຶ້ນເປັນກະສັດ? (ຂ) ພະນິມິດ 12:12 ບອກວ່າໂລກຈະເປັນແນວໃດຫຼັງຈາກທີ່ຊາຕານຖືກຖິ້ມລົງມາ?
4 ໃນບົດທີ 8 ເຮົາຮູ້ແລ້ວວ່າປີ 1914 ເປັນປີທີ່ພະເຢຊູເປັນກະສັດໃນສະຫວັນ. (ດານຽນ 7:13, 14) ແລ້ວມີຫຍັງເກີດຂຶ້ນ? ປຶ້ມພະນິມິດບອກວ່າ: “ເກີດສົງຄາມໃນສະຫວັນ ມີຄາເອນ [ໝາຍເຖິງພະເຢຊູ] ກັບພວກທູດສະຫວັນຂອງເພິ່ນໄດ້ສູ້ຮົບກັບພະຍານາກ [ຊາຕານ] ແລະພະຍານາກກັບພວກທູດສະຫວັນຝ່າຍມັນໄດ້ຕອບໂຕ້ຄືນ.” * ຊາຕານກັບປີສາດພັກພວກຂອງມັນແພ້ສົງຄາມແລະຖືກຖິ້ມອອກຈາກສະຫວັນລົງມາໃນໂລກ. ລອງຄິດເບິ່ງວ່າພວກທູດສະຫວັນຈະມີຄວາມສຸກຫຼາຍສ່ຳໃດ! ແຕ່ຜູ້ຄົນທີ່ຢູ່ໃນໂລກເດ? ຄຳພີໄບເບິນບອກວ່າມະນຸດຈະເຈິຄວາມທຸກຍາກລຳບາກຫຼາຍຢ່າງ. ຍ້ອນຫຍັງ? ຍ້ອນຊາຕານໃຈຮ້າຍຫຼາຍ “ມັນຮູ້ວ່າເວລາຂອງມັນເຫຼືອແຕ່ໜ້ອຍດຽວ.”—ພະນິມິດ 12:7, 9, 12
5 ຊາຕານພະຍາຍາມເຮັດໃຫ້ໂລກເກີດຄວາມວຸ່ນວາຍຫຼາຍທີ່ສຸດເທົ່າທີ່ຈະເຮັດໄດ້. ຍ້ອນມັນໃຈຮ້າຍຫຼາຍທີ່ຮູ້ວ່າເວລາຂອງມັນເຫຼືອແຕ່ໜ້ອຍດຽວກ່ອນທີ່ພະເຈົ້າຈະຈັດການກັບມັນ. ໄລຍະເວລາທີ່ເຫຼືອໜ້ອຍນີ້ ຄຳພີໄບເບິນເອີ້ນວ່າສະໄໝສຸດທ້າຍ. ຕອນນີ້ໃຫ້ເຮົາມາເບິ່ງວ່າມີເຫດການຫຍັງແດ່ທີ່ເກີດຂຶ້ນໃນສະໄໝສຸດທ້າຍຕາມທີ່ພະເຢຊູບອກໄວ້.—ເບິ່ງຄຳອະທິບາຍເພີ່ມເຕີມ 24
ເຫດການທີ່ເກີດຂຶ້ນໃນສະໄໝສຸດທ້າຍ
6, 7. ຄຳພະຍາກອນຂອງພະເຢຊູກ່ຽວກັບສົງຄາມແລະການຂາດແຄນອາຫານເກີດຂຶ້ນແທ້ແນວໃດໃນທຸກມື້ນີ້?
6 ສົງຄາມ. ພະເຢຊູບອກວ່າ: “ຈະມີການສູ້ຮົບກັນລະຫວ່າງປະເທດຕໍ່ປະເທດແລະອານາຈັກຕໍ່ອານາຈັກ.” (ມັດທາຍ 24:7) ໃນສະໄໝຂອງເຮົາມີຄົນຕາຍຍ້ອນສົງຄາມຫຼາຍກວ່າສະໄໝໃດໆໃນປະຫວັດສາດ. ລາຍງານໜຶ່ງຈາກສະຖາບັນວິເຄາະເຫດການຕ່າງໆຂອງໂລກ (Worldwatch Institute) ບອກວ່າ ຕັ້ງແຕ່ປີ 1914 ເປັນຕົ້ນມາ ມີຄົນຕາຍຍ້ອນສົງຄາມຫຼາຍກວ່າ 100 ລ້ານຄົນ. ເມື່ອສົມທຽບແລ້ວຈຳນວນຄົນທີ່ຕາຍໃນສົງຄາມລະຫວ່າງປີ 1900 ເຖິງປີ 2000 (ໄລຍະເວລາ 100 ປີ) ມີຫຼາຍກວ່າ 3 ເທົ່າຂອງຈຳນວນຄົນທີ່ຕາຍໃນສົງຄາມທັງໝົດທີ່ເກີດຂຶ້ນກ່ອນໜ້ານັ້ນ (ໄລຍະເວລາ 1.900 ປີ). ລອງນຶກພາບເບິ່ງວ່າຫຼາຍລ້ານຄົນທີ່ໄດ້ຮັບຜົນກະທົບຈາກສົງຄາມຈະຮູ້ສຶກຢ້ານແລະເປັນທຸກເຈັບປວດຫຼາຍສ່ຳໃດ!
7 ຄວາມອຶດຫິວ. ພະເຢຊູບອກວ່າ: “ຈະເກີດການຂາດແຄນອາຫານ.” (ມັດທາຍ 24:7) ເຖິງວ່າທຸກມື້ນີ້ຈະມີການຜະລິດອາຫານໄດ້ຫຼາຍກວ່າແຕ່ກ່ອນ ແຕ່ຫຼາຍຄົນກໍຍັງມີອາຫານບໍ່ພຽງພໍ. ຍ້ອນຫຍັງ? ຍ້ອນພວກເຂົາມີເງິນບໍ່ພໍທີ່ຈະຊື້ອາຫານຫຼືຊື້ດິນເພື່ອປູກຝັງ. ຫຼາຍກວ່າ 100 ລ້ານຄົນມີລາຍໄດ້ບໍ່ຮອດ 10.000 ກີບຕໍ່ມື້. ອົງການອະນາໄມໂລກບອກວ່າ ແຕ່ລະປີມີເດັກນ້ອຍຫຼາຍລ້ານຄົນຕາຍເຊິ່ງສາເຫດຫຼັກແມ່ນຍ້ອນຂາດອາຫານ.
8, 9. ຄຳພະຍາກອນຂອງພະເຢຊູກ່ຽວກັບແຜ່ນດິນໄຫວແລະໂລກລະບາດເກີດຂຶ້ນແທ້ແນວໃດ?
8 ແຜ່ນດິນໄຫວ. ພະເຢຊູພະຍາກອນວ່າ: “ຈະເກີດແຜ່ນດິນໄຫວໃຫຍ່ໃນບ່ອນຕ່າງໆ.” (ລູກາ 21:11) ທຸກມື້ນີ້ມີການຄາດການວ່າຈະມີແຜ່ນດິນໄຫວໃຫຍ່ເກີດຂຶ້ນຫຼາຍຄັ້ງໃນທຸກໆປີ. ຕັ້ງແຕ່ປີ 1900 ມີຫຼາຍກວ່າ 2 ລ້ານຄົນຕາຍເນື່ອງຈາກແຜ່ນດິນໄຫວ ແລະເຖິງວ່າຕອນນີ້ຈະມີເຕັກໂນໂລຊີທີ່ກ້າວໜ້າຫຼາຍຂຶ້ນແລະສາມາດບອກໃຫ້ຮູ້ລ່ວງໜ້າໄວກວ່າແຕ່ກ່ອນວ່າຈະເກີດແຜ່ນດິນໄຫວຕອນໃດ ແຕ່ກໍຍັງມີຄົນຈຳນວນຫຼາຍຕາຍຍ້ອນແຜ່ນດິນໄຫວ.
9 ໂລກລະບາດ. ພະເຢຊູບອກລ່ວງໜ້າວ່າຈະເກີດ “ໂລກລະບາດ” ເຊິ່ງເປັນພະຍາດຮ້າຍແຮງທີ່ແພ່ລະບາດຢ່າງໄວວາແລະເຮັດໃຫ້ຄົນຈຳນວນຫຼາຍເສຍຊີວິດ. (ລູກາ 21:11) ເຖິງວ່າທ່ານໝໍຮູ້ວິທີປິ່ນປົວພະຍາດຫຼາຍຊະນິດ ແຕ່ກໍຍັງມີອີກຫຼາຍພະຍາດທີ່ປິ່ນປົວໃຫ້ເຊົາບໍ່ໄດ້. ທີ່ຈິງ ລາຍງານໜຶ່ງບອກວ່າໃນແຕ່ລະປີ ມີຫຼາຍລ້ານຄົນຕາຍຍ້ອນເຈັບປ່ວຍ ເຊັ່ນ: ເປັນວັນນະໂລກ ໄຂ້ມາລາເລຍ ອະຫິວາ ແລະບໍ່ພຽງແຕ່ເທົ່ານັ້ນ ໃນໄລຍະ 40 ປີມານີ້ທ່ານໝໍພົບວ່າມີພະຍາດໃໝ່ໆເກີດຂຶ້ນອີກຫຼາຍກວ່າ 30 ພະຍາດ ແລະບາງພະຍາດກໍຍັງບໍ່ມີວິທີປິ່ນປົວ.
ຄົນໃນສະໄໝສຸດທ້າຍເປັນແນວໃດ
10. ສິ່ງທີ່ບອກໄວ້ໃນ 2 ຕີໂມທຽວ 3:1-5 ເປັນຈິງແນວໃດໃນທຸກມື້ນີ້?
10 ໃນຄຳພີໄບເບິນຢູ່ 2 ຕີໂມທຽວ 3:1-5 ໄດ້ບອກໄວ້ວ່າ: “ໃນສະໄໝສຸດທ້າຍຈະເປັນໄລຍະທີ່ມີແຕ່ຄວາມຫຍຸ້ງຍາກລຳບາກ.” ໃນພະຄຳພີຂໍ້ນີ້ ອັກຄະສາວົກໂປໂລບອກຊັດເຈນກ່ຽວກັບນິດໄສໃຈຄໍຂອງຄົນໃນສະໄໝສຸດທ້າຍວ່າ:
-
ເຫັນແກ່ຕົວ
-
ເຫັນແກ່ເງິນ
-
ບໍ່ເຊື່ອຟັງພໍ່ແມ່
-
ບໍ່ພັກດີ
-
ບໍ່ຮັກຍາດພີ່ນ້ອງ
-
ບໍ່ຄວບຄຸມຕົວເອງ
-
ຮຸນແຮງແລະໂຫດຮ້າຍ
-
ຮັກຄວາມສະໜຸກສະໜານແທນທີ່ຈະຮັກພະເຈົ້າ
-
ເຄັ່ງສາສະໜາແຕ່ພາຍນອກ
11. ຄົນຊົ່ວຈະເປັນແນວໃດຕາມທີ່ບອກໄວ້ໃນຄຳເພງ 92:7?
11 ຄົນທີ່ຢູ່ອ້ອມຂ້າງເຈົ້າມີນິດໄສແບບນີ້ບໍ? ຄົນຢູ່ທົ່ວໂລກມີນິດໄສແບບນີ້. ແຕ່ອີກບໍ່ດົນພະເຈົ້າຈະລົງມືຈັດການ. ພະອົງສັນຍາວ່າ: “ຄົນຮ້າຍທັງຫຼາຍງອກຂຶ້ນຄືຫຍ້າແລະເມື່ອຄົນທັງປວງທີ່ເຮັດການອະທຳຊື່ນບານຈຳເລີນຂຶ້ນແມ່ນເພື່ອເຂົາຈະຈິບຫາຍໄປເປັນນິດ.”—ຄຳເພງ 92:7
ສິ່ງດີໆທີ່ເກີດຂຶ້ນໃນສະໄໝສຸດທ້າຍ
12, 13. ໃນສະໄໝສຸດທ້າຍພະເຢໂຫວາສອນຫຍັງເຮົາແດ່?
12 ເຖິງແມ່ນຄຳພີໄບເບິນບອກລ່ວງໜ້າວ່າໃນສະໄໝສຸດທ້າຍຈະມີແຕ່ຄວາມເຈັບປວດແລະຄວາມທຸກຫຼາຍຢ່າງ ແຕ່ຄຳພີໄບເບິນຍັງເວົ້າເຖິງສິ່ງດີໆທີ່ຈະເກີດຂຶ້ນ. ສິ່ງດີໆເຫຼົ່ານີ້ມີຫຍັງແດ່?
“ຈະມີການປະກາດຂ່າວດີເລື່ອງການປົກຄອງຂອງພະເຈົ້າໄປທົ່ວໂລກ.”—ມັດທາຍ 24:14
13 ເຂົ້າໃຈເລື່ອງໃນຄຳພີໄບເບິນ. ຜູ້ພະຍາກອນດານີເອນຂຽນກ່ຽວກັບສະໄໝສຸດທ້າຍວ່າ: “ຄວາມຮູ້ [ແທ້] ຈະມາກທະວີຂຶ້ນ.” (ດານຽນ 12:4) ນີ້ໝາຍຄວາມວ່າພະເຈົ້າຈະຊ່ວຍປະຊາຊົນຂອງພະອົງໃນສະໄໝສຸດທ້າຍໃຫ້ເຂົ້າໃຈຄຳພີໄບເບິນຊັດເຈນຫຼາຍກວ່າສະໄໝທີ່ຜ່ານມາ. ພະເຢໂຫວາເຮັດແບບນີ້ຕັ້ງແຕ່ປີ 1914 ເປັນຕົ້ນມາ. ຕົວຢ່າງເຊັ່ນ: ພະອົງສອນເຮົາໃຫ້ຮູ້ວ່າຊື່ຂອງພະອົງສຳຄັນ ສອນວ່າພະອົງຢາກໃຫ້ໂລກເປັນແນວໃດ ສອນເລື່ອງຄ່າໄຖ່ ເລື່ອງຕາຍແລ້ວເປັນແນວໃດ ເລື່ອງການຄືນມາຈາກຕາຍ. ເຮົາຍັງໄດ້ຮຽນວ່າມີແຕ່ການປົກຄອງຂອງພະເຈົ້າເທົ່ານັ້ນທີ່ຈະແກ້ໄຂບັນຫາທັງໝົດຂອງເຮົາໄດ້. ນອກຈາກນັ້ນ ເຮົາຍັງໄດ້ຮຽນຮູ້ອີກວ່າຈະເຮັດແນວໃດຈຶ່ງຈະມີຄວາມສຸກ ແລະຈະໃຊ້ຊີວິດແບບໃດພະເຈົ້າຈຶ່ງຈະພໍໃຈ. ຫຼັງຈາກທີ່ປະຊາຊົນຂອງພະເຈົ້າໄດ້ຮຽນຮູ້ເລື່ອງເຫຼົ່ານີ້ແລ້ວ ພວກເຂົາເຮັດຫຍັງ? ຄຳພະຍາກອນໃນຂໍ້ອື່ນຈະຕອບຄຳຖາມນີ້.—ເບິ່ງຄຳອະທິບາຍເພີ່ມເຕີມ 21 ແລະ 25
14. ໃນສະໄໝສຸດທ້າຍມີການປະກາດຂ່າວດີເລື່ອງການປົກຄອງຂອງພະເຈົ້າກວ້າງຂວາງຂະໜາດໃດ ແລະໃຜກຳລັງເຮັດວຽກນີ້?
14 ການປະກາດທົ່ວໂລກ. ພະເຢຊູເວົ້າເຖິງສະໄໝສຸດທ້າຍວ່າ: “ຈະມີການປະກາດຂ່າວດີເລື່ອງການປົກຄອງຂອງພະເຈົ້າໄປທົ່ວໂລກ.” (ມັດທາຍ 24:3, 14) ມີການປະກາດຂ່າວດີເລື່ອງການປົກຄອງຂອງພະເຈົ້າໃນ 240 ດິນແດນແລະຫຼາຍກວ່າ 900 ພາສາ. ພະຍານພະເຢໂຫວາຈາກ ‘ທຸກປະເທດ ທຸກຊົນຊາດ’ ໃນທົ່ວໂລກກຳລັງຊ່ວຍຜູ້ຄົນໃຫ້ເຂົ້າໃຈວ່າການປົກຄອງຂອງພະເຈົ້າແມ່ນຫຍັງ ແລະການປົກຄອງນີ້ຈະເຮັດຫຍັງເພື່ອມະນຸດ. (ພະນິມິດ 7:9) ພະຍານພະເຢໂຫວາສອນຄຳພີໄບເບິນໃຫ້ລ້າໆ. ເຖິງວ່າຈະມີຫຼາຍຄົນກຽດຊັງແລະຂົ່ມເຫງພວກເຂົາຄືກັບທີ່ພະເຢຊູບອກໄວ້ລ່ວງໜ້າ ແຕ່ກໍບໍ່ມີສິ່ງໃດເຮັດໃຫ້ພວກເຂົາເຊົາເຮັດວຽກປະກາດ.—ລູກາ 21:17
ເຈົ້າຈະເຮັດຫຍັງ?
15. (ກ) ເຈົ້າເຊື່ອບໍວ່າເຮົາກຳລັງຢູ່ໃນສະໄໝສຸດທ້າຍ ແລະເປັນຫຍັງເຈົ້າຈຶ່ງເຊື່ອແບບນັ້ນ? (ຂ) ຈະເກີດຫຍັງຂຶ້ນກັບຄົນທີ່ເຊື່ອຟັງພະເຢໂຫວາແລະຄົນທີ່ບໍ່ເຊື່ອຟັງ?
15 ເຈົ້າເຊື່ອບໍວ່າເຮົາກຳລັງຢູ່ໃນສະໄໝສຸດທ້າຍ? ຄຳພະຍາກອນຫຼາຍຂໍ້ໃນຄຳພີໄບເບິນກ່ຽວກັບສະໄໝສຸດທ້າຍກຳລັງເກີດຂຶ້ນແທ້ ແລະອີກບໍ່ດົນພະເຢໂຫວາຈະສັ່ງໃຫ້ເຊົາເຮັດວຽກປະກາດຂ່າວດີ ແລ້ວ “ຈຸດຈົບ” ກໍຈະມາເຖິງ. (ມັດທາຍ 24:14) ຈຸດຈົບທີ່ເວົ້າເຖິງນີ້ຈະເກີດຂຶ້ນຕອນໃດ? ຕອນທີ່ພະເຈົ້າທຳລາຍຄົນຊົ່ວໃນສົງຄາມອາມາເຄໂດນ. ພະເຢໂຫວາຈະໃຊ້ພະເຢຊູພ້ອມກັບພວກທູດສະຫວັນທີ່ມີລິດເດດໃຫ້ທຳລາຍຜູ້ໃດກໍຕາມທີ່ບໍ່ເຊື່ອຟັງພະອົງແລະລູກຊາຍຂອງພະອົງ. (2 ເທຊະໂລນິກ 1:6-9) ຫຼັງຈາກນັ້ນ ຊາຕານກັບພວກປີສາດຈະລໍ້ລວງຜູ້ຄົນບໍ່ໄດ້ອີກ. ສ່ວນຄົນທີ່ເຕັມໃຈເຊື່ອຟັງພະເຈົ້າແລະການປົກຄອງຂອງພະອົງກໍຈະໄດ້ເຫັນທຸກສິ່ງເກີດຂຶ້ນແທ້ຕາມທີ່ພະເຈົ້າສັນຍາໄວ້.—ພະນິມິດ 20:1-3; 21:3-5
16. ເຈົ້າຕ້ອງເຮັດຫຍັງເມື່ອເຫັນວ່າຈຸດຈົບໃກ້ເຂົ້າມາແລ້ວ?
16 ອີກບໍ່ດົນ ໂລກທີ່ຊາຕານປົກຄອງຈະເຖິງຈຸດຈົບ. ດັ່ງນັ້ນຈຶ່ງສຳຄັນຫຼາຍທີ່ເຮົາຄວນຖາມຕົວເອງວ່າ ‘ຂ້ອຍຕ້ອງເຮັດຫຍັງ?’ ພະເຢໂຫວາຢາກໃຫ້ເຈົ້າຮຽນຄຳພີໄບເບິນແລະເຂົ້າໃຈຄຳພີໄບເບິນໃຫ້ຫຼາຍທີ່ສຸດ. ເຈົ້າຕ້ອງຮຽນຄຳພີໄບເບິນຢ່າງເອົາຈິງເອົາຈັງ. (ໂຢຮັນ 17:3) ພະຍານພະເຢໂຫວາປະຊຸມກັນທຸກໆອາທິດເພື່ອຊ່ວຍຜູ້ຄົນໃຫ້ເຂົ້າໃຈຄຳພີໄບເບິນ. ຂໍໃຫ້ເຈົ້າເຂົ້າຮ່ວມການປະຊຸມນີ້ເປັນປະຈຳ. (ອ່ານເຮັບເຣີ 10:24, 25) ຫຼັງຈາກທີ່ເຈົ້າໄດ້ຮຽນຄຳພີໄບເບິນແລ້ວເຫັນວ່າມີບາງຢ່າງທີ່ເຈົ້າຕ້ອງປ່ຽນແປງ ຢ່າຢ້ານທີ່ຈະປ່ຽນ. ຖ້າເຈົ້າເຕັມໃຈທີ່ຈະປ່ຽນແປງສິ່ງເຫຼົ່ານີ້ ແນ່ນອນວ່າພະເຢໂຫວາຈະຊ່ວຍເຈົ້າແລະເຈົ້າຈະໃກ້ຊິດກັບພະອົງຫຼາຍຂຶ້ນ.—ຢາໂກໂບ 4:8
17. ເປັນຫຍັງຄົນສ່ວນຫຼາຍຈະຕົກໃຈເມື່ອຈຸດຈົບຂອງໂລກມາເຖິງ?
17 ອັກຄະສາວົກໂປໂລບອກວ່າການທຳລາຍຄົນຊົ່ວຈະເກີດຂຶ້ນຕອນທີ່ຜູ້ຄົນບໍ່ທັນຕັ້ງຕົວ “ຄືກັບຂີ້ລັກທີ່ມາຕອນກາງຄືນ.” (1 ເທຊະໂລນິກ 5:2) ພະເຢຊູພະຍາກອນວ່າຜູ້ຄົນຈຳນວນຫຼາຍເລືອກທີ່ຈະບໍ່ສົນໃຈຫຼັກຖານທີ່ວ່າພວກເຮົາກຳລັງຢູ່ໃນສະໄໝສຸດທ້າຍຫຼືໄລຍະການປະທັບຂອງລູກມະນຸດ. ເພິ່ນບອກວ່າ: “ສະໄໝຂອງໂນອາເປັນແນວໃດ ການປະທັບຂອງ ‘ລູກມະນຸດ’ ກໍຈະເປັນແນວນັ້ນ. ຍ້ອນໃນໄລຍະກ່ອນນ້ຳຖ້ວມ ຜູ້ຄົນກິນດື່ມ ແຕ່ງດອງເປັນຜົວເມຍກັນ ຈົນຮອດມື້ທີ່ໂນອາເຂົ້າໄປໃນເຮືອ ພວກນັ້ນບໍ່ສົນໃຈຫຍັງຈົນນ້ຳມາຖ້ວມແລະກວາດພວກເຂົາໄປຈົນໝົດ ການປະທັບຂອງ ‘ລູກມະນຸດ’ ກໍຈະເປັນແບບນັ້ນແຫຼະ.”—ມັດທາຍ 24:37-39
18. ພະເຢຊູເຕືອນເຮົາເລື່ອງຫຍັງ?
18 ພະເຢຊູເຕືອນເຮົາວ່າ “ຢ່າໝົກມຸ້ນກັບການກິນການດື່ມຫຼາຍໂພດ ຫຼືອຸກໃຈກັບຊີວິດ.” ຍ້ອນການເຮັດແບບນີ້ຈະເຮັດໃຫ້ເຮົາບໍ່ຈົດຈໍ່ແລະບໍ່ສົນໃຈຫຼັກຖານທີ່ວ່າເຮົາກຳລັງຢູ່ໃນສະໄໝສຸດທ້າຍ. ເພິ່ນບອກວ່າຈຸດຈົບ “ຈະມາຢ່າງກະທັນຫັນໂດຍທີ່ພວກເຈົ້າບໍ່ທັນຮູ້ຕົວຄືກັບແຮ້ວຈັບສັດ” ແລະຍັງບອກວ່າ “ທຸກຄົນທົ່ວໂລກຈະຕ້ອງເຈິກັບວັນນັ້ນ.” ແລ້ວພະເຢຊູບອກຕື່ມອີກວ່າ: “ໃຫ້ເຈົ້າຕື່ນຕົວຢູ່ສະເໝີແລະອະທິດຖານອ້ອນວອນຢູ່ເລື້ອຍໆ ເພື່ອເຈົ້າຈະລອດຈາກເຫດການທັງໝົດທີ່ຈະເກີດຂຶ້ນແລະຢືນຢູ່ຕໍ່ໜ້າ ‘ລູກມະນຸດ’ ໄດ້.” (ລູກາ 21:34-36) ເປັນຫຍັງເຮົາຕ້ອງຟັງຄຳເຕືອນຂອງພະເຢຊູ? ຍ້ອນວ່າອີກບໍ່ດົນໂລກຊົ່ວຂອງຊາຕານຈະຖືກທຳລາຍ. ສະເພາະຄົນທີ່ພະເຢໂຫວາແລະພະເຢຊູຍອມຮັບເທົ່ານັ້ນຈຶ່ງຈະລອດຈາກຈຸດຈົບນີ້ແລະມີຊີວິດຕະຫຼອດໄປໃນໂລກ.—ໂຢຮັນ 3:16; 2 ເປໂຕ 3:13
^ ຂໍ້ 4 ມີຄາເອນເປັນອີກຊື່ໜຶ່ງຂອງພະເຢຊູຄລິດ. ເບິ່ງຂໍ້ມູນໄດ້ໃນຄຳອະທິບາຍເພີ່ມເຕີມ 23.
ເລື່ອງທີ່ເຈົ້າອາດຈະມັກ
DOCUMENTARIES
ພະຍານພະເຢໂຫວາຈັດຕັ້ງເປັນອົງການເພື່ອປະກາດຂ່າວດີ
ພະຍານພະເຢໂຫວາເປັນທີ່ຮູ້ຈັກກັນດີເລື່ອງວຽກງານການໃຫ້ການສຶກສາຄຳພີໄບເບິນໄປທົ່ວໂລກ. ໂດຍວິທີໃດທີ່ວຽກງານຕ່າງໆຂອງເຂົາເຈົ້າໄດ້ຮັບການຊີ້ນຳ ການຈັດຕັ້ງ ແລະການສະໜັບສະໜູນທາງການເງິນ
