1. Isiyani inhala unikavihera ucuwela itthu inhala wiirannya uhoolo?

NYUUVA mweewaka ihapari cinkhumelela ntuninyani, atthunaka nnawiikohaka co: ‘Ila ituninyeela inkoomalela vayi?’ Nlattu wo citthu coohinamaana cotheene cinkhumelela mahukwaala, atthu enci ankupali wiira nihaattamela umala wotuninya. Niireke khweeliini ituninya inaahala umala? Ninhala ucuwela cani isiyani inhala wiirannya uhoolo? Hi khaninkhitiri uhimyaca isiyani inhala wiirannya uhoolo. Masi Yehova Nluku naakhitiri. Ni uyo naanihimyeera mbiiblyani mananna cinhaleehu ukhala uhoolo ni isiyani inhala ukhumelela niila itthayeela.—Isaiya 46:10; Tiyaku 4:14.

2, 3. a) Eetthuci a Yesu isiyani yaapheelaaya ucuwela? b) Yesu aahimyenre isiyani?

² Ibiiblya ineera wiira umala wotuninya khunakhala umala wotthaya. Masi ukhanle umala wo citthu coohinamaana. Yesu ahohimyaca wiira umala wo citthu coohinamaana waahala wiirannya waphiyaka ukati Umwene wa Nluku unhalaaya ulamulela ituninya yotheene. (Luka 4:43) Vano, eetthucyaawe yahopheela ucuwela nihuku naahalaaya uwa Umwene wa Nluku, phimaana ayo yahonkoha: “Cinhala wiirannya yaakhani nnya citthunnya ni isiyani inhala uthoonyera ukhala waa ni umala wo ulumwenku wo citthu?” (Matewus 24:3) Yesu khaahimyacile nihuku. Masi uyo ahaahimyeera citthu caahala wiirannya yahaleelaka mahuku vakaani wiira imalamalihiye ila ituninya yoohinamaaneela. Citthu caahimilyaawe Yesu cineera ceerannyaaka mahukwaala.

³ Nhina ila ikapiittulwiila, ninaahala woopela mwaha citthu cinoonihera wiira niri wuumaleloni mahuku ocitthu coohinamaana cinkhumelela. Masi nihinaaya woopela mwaha nnyo citthu nnyo, nihaana nicuwelaka ikhotto yeerannyeele wiirimu.  Iyo inaahala uhimyaca kontha isiyani cinkhumelelaaya citthu coohinamaana ntuninyani.

4, 5. a) Yesu ukhala wawe Mwene, isiyani yaakhumelenle wiirimu woohipica? b) Makhalelo yaahala ukhala cani watuninyani Sotwani waahalaawe woomoliya wiirimu?

⁴ Nhina ikapiitulu 8, niheetthuca wiira Yesu hokhalihiya Mwene wiirimu ikhumelo mwaakha wo 1914. (Daniele 7:13,14) Ilivuru yo Apokalipise ineera wiira yahokhumelela ikhotto wiirimu: “Mikeli [awula, Yesu] ni malayikhaawe ahowanana ihanasi [awula, Sotwani], ni ihanasi ni malayikhaaya yahowana” * Sotwani ni Maciini yahotthemiya ni yahohakhiya wiirimu yoomoleliyaka watuninyani. Khweeliini, iyo itthwiiyo yahaatteeliha nrima malayikha. Masi isiyani yaahala wiirannya watuninyani? Ibiiblya ineera wiira mu khiivo yaahala uciva. Nlattuni? Kontha Sotwani hooviruwa cinene, ukhala wiira uyo ‘naacuwela wiira ukatyaawe uhonkhuvyaacera.’—Apokalipise 12:7, 9, 12.

⁵ Uhanle ukati vakaani paasi wiira Nluku antthukele Sotwani. Phimaana, Sotwani naapanka yotheene inkhitiryaawe wiira akumihere masakha watuninyani. Iyo inlikanaca ni itthu yaahimilyaawe Yesu wiira yaanaahala wiirannya mahuku ookhicera. Nttwee noone isiyani uyo yaahimilyaawe.—Nwehe Niwehero n.° 24 ipaagina 221.

6, 7. Nincuwela cani wiira inatiri ca Yesu cineera ceerannyaaka: a) Ukhumelelaca ikhotto? b) Uthwa iyoolya?

⁶ Ikhotto. Yesu aheera: “Ilapo inaahala waanihana niilapo ikhwaawe ni umwene nuumwene nkhwaawe.” (Matewus 24:7) Ikhumelo khalayi-khalayi, khaanatoko ukhwa atthu enci nlattu wokhotto uvikana mahukwaala. Mphwinko mmoca  untotha citthu cookhumelelaca ntuninyani, uneera wiira ikhotto cikhumelenle ukhuma mwaakha wo 1.900 mpaka mwaakha wo 2.000, cihowiiva atthu enci uvikana imaara tthaaru nummeru naatthu akhwile nlattu wokhotto caakhumelenle ukhuma ukati wa Yesu mpaka mwaakha wo 1.900. Uhooneneliya wiira ikhumelo mwaakha wo 1914 mpaka mahukwaala, atthu akhwile nlattu wokhotto ahopwaha imiliyau cene 100. Muupuwele inanna cinoonaaya uwerya ni uvelavela unaaphwanya atthu imiliyau cene nlattu wokhotto.

⁷ Itala. Yesu aheera: “Inaahala uthwa iyoolya.” (Matewus 24:7) Mahukwaala unaaruweriya cinene uvikana khalayi. Masi uhookhalaru commo, atthu enci inawaathwa itthu yoolya. Kontha isiyani? Kontha ayo khaarina nipuro noolima awula khaarina nsurukhu wiira athume iyoolya. Atthu enci ntuninyani motheene anaahuva cinene. Mphwinko Woothotokanihiya wo Ntuninyani Unwacera Ukumi uneera wiira asinamwane imiliyau cene anaakhwa khula mwaakha venci-venci nlattu wotala.

8, 9. Utaphulele inanna cineerannyaaya citthu caahimilyaawe Yesu wiira caanaahala ukhumelela a) uttettemelaca ni uparuwaca wotthaya ni b) iretta.

⁸ Uttettemelaca ni uparuwaca wotthaya. Yesu ahohimya: “Unaahala ukhala uttettemelaca ni uparuwaca wotthaya.” (Luka 21:11) Uhooneneliya wiira  khula mwaakha unaahala ukhala uttettemelaca ni uparuwaca wotthaya. Ukhuma mwaakha wo 1.900, atthu oopwahaka imiliyau cene 2 ahokhwa nlattu woottettemelaca ni wooparuwaca itthaya. Mahukwaala uvikana khalayi, itekonologia ineera yakavihera wooneneliya wowaakuvyaaceene mapuro anhala uttettemelaca ni uparuwaca itthaya. Masi uhookharu commo, atthu nanlelo aneera yakhwaaka nlattu woottettemelaca ni wooparuwaca itthaya.

⁹ Iretta. Yesu ahohimya wiira caanaahala ukhumelela ikwerere, awula, iretta cowoopiha coohipica umwaryeela ni coowiiva atthu enci. (Luka 21:11) Nna vaa, mameetiku anaakhitiri utafiti iretta cinci, masi nanlelo cihaavo cihinvoniya. Irelatooriyu imoca iheera wiira khula mwaakha, atthu imiliyau cene anaakhwa nlattu woretta, toko nikotokotho, ikopo ni koolera. Uhiya commo, myaakha 40 civinre, mameetiku ahoonenela iretta conaanaano coopwahaka 30. Nnyo irettannyo, cikinaku nanlelo khacinvoniya.

10. Toko cinhimyaaya 2 Timotiyu 3:1-5, yaphiyaka mahuku ookhicera atthu yaahala ukhalana makhaleloni?

¹⁰ Nhina 2 Timotiyu 3:1-5, Ibiiblya ineera: “Mahuku ookhicera anhala  ukhala mahuku oosuphyaaca, oorikarika uvilela.” Apostolu Paulu aheera wiira apinaatamu:

• yaahala ukhala owiifenta asineennyaaya

• owaaciva nsurukhu

• oohaahisima asithumwanaya

• anamiima

• khayaahala waafenta amucyaaya

• yaahala ukhala atthu ohiivaraca

• yaahala ukhala masene ni atthu owaaciva nkhitto

• oohoolelihera cinene cowaacivela wanrimani unhiya Nluku

• oowiipanka toko ananswalela Nluku masi wooheettela impheelaawe

11. Toko cinhimyaaya Isaalimu 92:7, isiyani inhala uwiirannyeela ale ampanka citthu coohinamaana?

¹¹ Nyuuva woonela winyu, mahukwaala atthwaayo phiryaaya ciicammo? Ntuninyani motheene atthu enci ari ciicammo. Masi Nluku hokhuluveliha wiira khanhala uhiyerera yiirannyaaka iyo mpaka wattayi. Ilivuru yo Isaalimu 92:7 ineera: “Atakhali yaphuwelaka khampa malasi, ni ootakhala  nrima otheene yaphuwaka, anaaciya wiira yatankanyiye wahinhalaaya-tho ukhala.”

12, 13. Nikaviheriyaka ni Yehova, citthuni ciitthucileehu ala mahuku ookhiceraala?

¹² Niheetthuca wiira Ibiiblya ihohimya wiira yaphiyaka mahuku ookhicera atthu yanhala uhuva venci. Masi ciicammo Ibiiblya ihohimya wiira canhala ukhumelela citthu comaana. Nttwee noopele mwaha citthu piili.

¹³ Apoovu a Nluku yanhala wiiweeha sana-saana Ibiiblya. Porofeeta Daniele ciicammo ahantikha citthu caahala wiirannya yaphiyaka mahuku ookhicera. Uyo enre: “Ucuwelaca weekhweeli unaahala winciva.” (Daniele 12:4) Nluku anhala waakavihera apoovwaawe wiiweeha Ibiiblya ni mananna ahinatoko wiirannya. Yehova Nluku neera apankaka iyo venci-venci ikhumelo mwaakha wo 1914 mpaka nna co. Wootakihera: niheetthuca ifayitani nirinaaya ncina na Nluku ni isiyani impheelaawe upanka watuninyani. Ciicammo niheetthuca isiyani khweeliini inwiirannyeela atthu ookhwa, wunwelela waatthu ni niheeweeha inanna coopoliyeehu. Niheettuca wiira Umwene wa Nluku phinhala ukhitiri umalihaca masakha anniphwanya. Kahi iyo paasi, ciicammo Nluku honiitthuciha isiyani inlamuliyeehu upanka wiira nikhale ootteeliya nrima ni wiira nincivelihe uyova. Masi isiyani apoovu a Nluku ineerihelaaya cotheene nnye ciitthucilyaaya? Wiira naakhule nno nikohonno, nttwee noopele mwaha inatiri ikhwaawe. Nwehe Niwehero n.° 21 ipaagina 117 ni n.° 25 ipaagina 221.

14. a) Nipuroni cinlalennyaaya ihapari comaana? b) Phaapani anlalyaa?

¹⁴ Nteko woolalyeera waanaahala uvariya ntuninyani motheene. Nkwaha Yesu wenryaawe wiira “Nnya ihapari comaana nnya co Wuumweneni cinaarwaa ulalennya ntuninyani motheene munkhaliya”, uyo aaca itthu yaahala wiirannya  mahuku ookhicera. (Matewus 24:3, 14) Ihapari comaana co Wuumweneni cineera cilalennyaka ilapo cimphiya 240 ni iluka cimphiya 1000. Masaahiti a Yehova olapo ni okhapila cotheene, khula nipuro, anawaakavihera atthu wiiweeha Umwene wa Nluku isiyani ni isiyani inhalaaya waapankela apinaatamu. (Apokalipise 7:9) Ayo anvara uyo ntekooyo woohiliviha itthu. Masi, khampa Yesu cenryaawe, atthu enci yaanaahala waathanya ni waalupattha attharyaawe. (Luka 21:17) Uhookhalaru commo, khiivo inhala weemesera nteko woolalyeera ihapari comaana.

15. a) Nyuuva nnaakupali wiira niri mahuku ookhicera? Kontha isiyani? b) Isiyani inhala uwiirannyeela ale ahimmwiiwelela Nluku? c) Ni isiyani inhala uwiirannyeela ale ammwiiwelela?

¹⁵ Niireke nyuuva nnaakupali wiira niri mahuku ookhicera? Inatiri co mbiiblyani cinooluma mahuku ookhicera cineera ceerannyaaka. Woohipica, Yehova naahala uhimya wiira uhinnye nteko woolalyeera ni vano unaahala uwa “umala wo ulumwenku wotuninya.” (Matewus 24:14) Umala wo ulumwenku wotuninya ukhanle uwa Harmacetom, ikhotto ya Yehova inhalaawe uvarela nteko wiira amalamalihe citthu coohinamaana. Yesu ni malayikhaawe okuru, anaahala waamalamaliha atthu ahintthuna umwiiwelela Yehova ni uyova. (2 Atesalonika 1:6-9) Sotwani ni maciini anaahala utthukeliya ni khaavo anhalaaya-tho unthepya. Atthu ammwiiwelela Nluku ni anaamini ulamuleliya ni Umwennyaawe, anaahala woona ceerannyaaka inatiri cawe.—Apokalipise 20:1-3; 21:3-5.

16. Ukhala wiira umala wo ulumwenku wotuninya uhaattamela, isiyani inlamuliyeenyu upanka?

¹⁶ Ukhala wiira umala wo ulumwenku wotuninya uhaattamela, unaareera khula ntthu wiikoha: ‘Isiyani kinlamuliyaaka upanka?’ Yoopacera, nhihiye hataa itthu ikukuvyaanihacaka usoma winyu Ibiiblya. Yehova nopheela wiira nyuuva nhihiyerere wiitthuca. (Joau 17:3) Yonayeeli, mwiikurumice wiira nhihaleele mikutthaano co Masaahiti a Yehova. Ayo anaathukumana  khula isumana wiira asome Ibiiblya.(Usome Maberewu 10:24, 25.) Yoneeraru, moonaka wiira unaareerana upanka marukunuso muukumini winyu, mpanke wowaakuvya. Mwapankaka ile inoncivela Yehova, upatthaniinyu nuuyo unaahala uvira utepaka ulipa.—Tiyaku 4:8.

17. Kontha isiyani atthu enci anhalaaya waaca ututhuwela umala wo ulumwenku wotuninya?

¹⁷ Apostolu Paulu ahottonkaca wiira umalamalihiya waatthu ootakhala nrima unhala uwa, atthu enci anhala waaca ututhuwela. Uyo enre wiira nno nihukunno ninhala uwa “khampa latarawu nowaawe uhiyu.” (1 Atesalonika 5:2) Yesu ahohimyaca wiira atthu enci khanhala uwacera citthu cinthoonyera wiira niri mahuku ookhicera. Uyo eerale wiira mahuku ookhicera yaahala ukhala toko mahuku a Nowe. Uyo enre: “Kontha uhinatthi uwa ucara wo maaci menci, atthu yaanaalya, uwurya, alopwana yaanaathela ni athiyana yaanaatheliya mpaka nihuku Nowee naakenlyaawe nkalawani, ni khayaawacenre, mpaka nihuku naawilyaaya ucara wo maaci ni yahokhupiya otheene caya.”—Matewus 24:37-39.

18. Isiyani yaahimilyaawe Yesu?

¹⁸ Yesu ahohimya wiira umala wo ula ulumwenkuula unhala uwa woohicuwannyaaca “khampa ntapha” ni wiira ‘unhala waaweela otheene ale ankhala nlaponi motheene.’ Uyo ciicammo ahaahimyacera attharyaawe wiira ahiitthaale yavaresesaka ‘ulya ni uwurya cinene ni nlattu wo masukhuli o muukumini.’ Uyo aawiirenle wiira yahaana ‘ahiitthaalaka ni ulompa khula ukati wiira akhitiri woopwa citthu cotheene nnya cinlamuliya ukhumelela ni akhitiri weemela uhoolo wa Mwaana a Pinaatamu,’ awula, Yesu. (Luka 21:34-36) Kontha isiyani nihaana niiwelelaka itthu ihimilyaawe Yesu? Kontha uhanle ukati vakaani paasi wiira ituninya ya Sotwani ikwanyulaciye. Ale ammwiiwelela Yehova ni Yesu, khanhala ukwanyulaciya ni anaahala ukhala ituninya yonaanaano mpaka.—Joau 3:16; 2 Peturu 3:13.