1. Ончыкылык нерген чыным кушеч пален налаш лиеш?

УДА уверым колмеке, те, очыни, тыге шонеда: «Тиде илыш кушко шуэш гын?!» Йырваш шуко осал ышталтеш да орланымаш лиеда, сандене тӱнялан вашке мучаш толеш манын, южо еҥ шона. Но чынжымак туге мо? Ончыкылыкышто мо лийшашым ме иктаж-кузе пален кертына мо? Кертына. Тидым Иегова Юмо мыланна ойлен кертеш. Еҥ дене таҥастарымаште ончыкылык нерген чыным тудо гына пала да мыланна Библий гоч почын палдара (Исаия 46:10; Иаковын 4:14).

2, 3. Тунемшыж-влак Иисус деч мо нерген йодыныт да тудо нунылан мом вашештен?

² Тиде тӱнялан мучаш толеш манын, Библийыште возымо. Тыге возымо гынат, планетна пытарыме лиеш манын, тиде огеш ончыкто. Но тиде, чынжымак, осалым пытарымым ончыкта. Мландым Юмын Кугыжанышыже вуйлаташ тӱҥалеш манын, Иисус Христос ойлен (Лукан 4:43). Тудын тунемшыже-влак тиде Кугыжанышын кунам вуйлаташ тӱҥалмыжым чот палынешт ыле. Сандене нуно Иисус деч  йодыныт: «Кунам тиде лиеш? Тыйын толметым да кызытсе курымын пытымыжым могай палдарыше пале ончыкта?» (Матфейын 24:3). Могай кечын тиде лиеш Иисус каласен огыл. Но мучаш деч ончыч мландыште мо лийшашым тудо каласкален пуэн.

³ Ме лачак мучаш лийме деч ончычрак илена. Молан тидлан ӱшанаш лиеш, айста тиде ужаш гыч пален налына. Но эн ончыч пален налына, могай сар каваште лийын. Тиде мыланна мландыште кызытсе событий-влакын амалжым умылаш полша.

4, 5. а) Иисусын Кугыжа семын вуйлаташ тӱҥалмыж деч вара каваште мо лийын? б) Почмаш 12:12 почеламут дене келшышын, тиде событий мландыште илыше еҥ-влаклан мом конден?

⁴ Тиде книган 8-ше ужаш гыч пален налме дене келшышын, 1914-ше ийыште Иисус каваште Кугыжа семын шогалтыме лийын (Даниил 7:13, 14). Тиддеч вара лийше событий нерген Почмаш книгаште тыге возымо: «Вара пылпомышто сар тӱҥалын: Михаил [Иисус] * да тудын Суксыж-влак дракон [Сатана] ӱмбаке сар дене каеныт. Дракон да тудын суксыж-влак кредалыныт». Сатана ден осал суксо-влакым  сеҥеныт да мландышке сӱмырал шуэныт. Шоналтыза, каваште улшо суксо-влак мыняр чот куаненыт! Но мландыште илыше еҥ-влаклан тиде шуко ойгым конден. Молан? Молан манаш гын Диавол чот ажгынен, вет тудо «жапше шагал улмым пала» (Почмаш 12:7, 9, 12).

⁵ Диавол еҥ-влаклан пеш шуко осалым ышташ тырша. Тудо чот ажгына, вет Юмо тудым пеш вашке пытара. Чынжымак, Диаволын жапше шагал кодын. Библийыште тиде жапым пытартыш кечыла манме. Тиде жапыште мланде ӱмбалне мо лиедаш тӱҥалеш? Айста тидын нерген Иисусын каласымыжым ончен налына. (24-ше ешартыш статьям ончыза.)

6, 7. Сар да шужымаш нерген Иисус Христосын мутшо кузе шукталтеш?

⁶ Сар-влак. Иисус каласен: «Калык ӱмбаке калык кынелеш, кугыжаныш ӱмбаке — кугыжаныш» (Матфейын 24:7). Тачысе сарлаште еҥ-влак ожно годсо деч утларак колат. Тӱняште лиедыше событий-влакым шымлыше ик организацийын отчётшо почеш 1914-ше ий гыч тӱҥалын сарлаште 100 миллион утла еҥ колен. 100 ий жапыште (1900-шӧ ий гыч тӱҥалын), эртыше 19 курым жап дене таҥастарымаште, сарыште кум пачаш утларак еҥ колен. Миллионло  еҥлан сар шуко орланымаш ден ойгым конден.

⁷ Шужымаш. Иисус каласен: «Шужымаш... лиеш» (Матфейын 24:7). Тачысе кечылаште кочкыш моло годсо деч утларак ыштен лукталтеш гынат, пеш шуко еҥ шужа. А молан кӧра шужымаш лиеда? Еҥ-влакын але оксашт уке, але иктаж-мом шындашлан мландышт уке. Миллиард утла еҥ пеш йорлын ила. Тӱнямбалысе тазалыкаралтыш организацийын ойлымыжо почеш кажне ийын миллионло йоча шужен кола.

8, 9. Мланде чытырналтмаш да чер-влак нерген Иисус Христосын ончылгоч каласымыже кузе шукталтеш?

⁸ Мланде чытырналтмаш. Мланде чытырналтмаш-влак лийыт манын, Иисус ончылгочак каласен (Лукан 21:11). Кугу мланде чытырналтмаш-влак кажне ийын лиедаш тӱҥалыт манын, учёный-влакат пеҥгыдемден  ойлат. 1900-шӧ ий гыч тӱҥалын мланде чытырналтмылан кӧра кок миллион утла еҥ колен. У технологий мланде чытырналтмын лийшаш вержым ончылгоч пален налаш полша гынат, ончычсо семынак пеш шуко еҥ кола.

⁹ Чер-влак. Иисусын ончылгоч каласымыже почеш «мор шарла». Тиде вашке шарлыше лӱдыкшӧ чер-влак, нунылан кӧра шуко еҥ кола (Лукан 21:11). Врач-влак шуко чер дене кучедалаш тунемыныт гынат, южо чер сеҥаш лийдыме кодеш. Ик отчётышто каласыме почеш кажне ийын миллионло еҥ туберкулёз, малярий да холер чер деч кола. Пытартыш 40 ий жапыште врач-влак 30 утла у черым пален налыныт. Нунын кокла гыч южыжо эмлаш лийдыме улеш.

10. 2 Тимофейлан 3:1—5 таче кузе шукталтеш?

¹⁰ 2 Тимофейлан 3:1—5 почеламутлаште тыге возымо: «Пытартыш кечылаште неле жап толеш». Пытартыш кечылаште еҥ-влак могай лийыт, апостол Павел ойлен:

• шкеныштым йӧратыше

• оксам йӧратыше

• ача-авам колыштдымо

• кугешныше

• йӧратыдыме

• шкем кучен моштыдымо

• торжа да ажгыныше

• Юмым йӧратыме олмеш шке шерыштым темаш йӧратыше

• Юмым йӧратышыла кояш тыршыше, но чынже денак тудым колыштдымо

11. Псалом 91:8 почеламут дене келшышын, осал еҥ-влак дене мо лиеш?

¹¹ Тендан илыме верыштыда тыгай койышан еҥ шуко мо? Уло тӱняште  тыгай койышан еҥ шукын улыт. Но пеш вашке Юмо чылажымат тӧрлата. Тудо сӧра: «Вет курым гыч курымыш йомшаш [але пытарышаш] верч языкан-шамыч шудо гае кушкыт да закондымын ыштыше-шамыч лектыт» (Псалом 91:8).

12, 13. Пытартыш кечылаште Иегова мом умылаш полшен?

¹² Пытартыш кечылаште тӱня орлык дене темеш манын, Библийыште ончылгоч каласыме лийын. Но тушто сайжымат возымо.

¹³ Библийым умылымаш. Даниил пророк пытартыш кечылаште «чын шинчымаш шарла» манын возен (Даниил 12:4). Иегова шке калыкшылан Библийым сайрак умылаш полшымыжо нерген каласен улмаш. Тидым Юмо поснак 1914-ше ий гыч ышташ тӱҥалын. Мутлан, Иегова мыланна тудын лӱмжӧ мом ончыкта умылаш полшен, мланде шотышто тудын шонен пыштымыжым почын палдарен. Тыгак тудо колымаш да ылыжмаш нерген чыным мыланна почын да тӱлен налмаш шотышто умылымашым пуэн. Чыла мемнан нелылыкнам Юмын Кугыжанышыже гына кораҥден кертеш манын, пален налынна. Кузе пиалан лияш да кузе Юмылан келшыше илышым вӱдаш палышна. Библий гыч тыгай шинчымашым пален налын, Юмын служитлышыже-влак мом  ыштат? Тидын нерген эше ик ончылгоч каласымашыште возымо лийын. (21-ше да 25-ше ешартыш статьялам ончыза.)

14. Кугыжаныш нерген поро увер мыняр чот кумдан шаркалалтеш да кӧ тиде пашам ышта?

¹⁴ Уло тӱня мучко поро уверым шаркалымаш. Пытартыш кечылаште «Кугыжанышын тиде Поро Уверже» уло тӱня мучко шаркалыме лиеш манын, Иисус ойлен (Матфейын 24:3, 14). Кугыжаныш нерген поро увер таче 240 эл ден кундемлаште 900 утла йылме дене каласкалалтеш. Уло тӱня мучко «чыла тӱрлӧ тукым [да] калык» гыч улшо Иегован Таныкше-влак Юмын Кугыжаныш нерген да мом тудо ончыкыжым ышташ тӱҥалеш еҥ-влаклан каласкален коштыт (Почмаш 7:9). Нуно тидым оксам налде ыштат. Шуко еҥ Иегован Таныкше-влакым ужмышудымо улеш, нуным поктылеш. Но тидым ончыде, Иисусын ончылгоч каласымыж почеш, Кугыжаныш нерген поро уверым шаркалымым нимо чарен огеш керт (Лукан 21:17).

15. а) Пытартыш кечылаште илена манын, келшеда мо? Молан? б) Юмым колыштшо да тудым колыштдымо еҥ-влакым мо вуча?

¹⁵ Ме пытартыш кечылаште илена манын, келшеда мо? Чынжымак, пытартыш кече-влак нерген таче шуко ончылгоч каласымаш шукталтеш. Пеш вашке Иегова поро уверым шаркалымым  чара. «Вара мучаш толеш» (Матфейын 24:14). Могай «мучаш» нерген тыште ойлалтеш? Армагеддон сар нерген. Тиде сарыште Юмо чыла осалым пытара. Иегован эрыкше почеш Иисус ден тудын куатле суксыж-влак Юмым колыштдымо еҥ-влакым пытарат (2 Фессалоникысе-влаклан 1:6—9). Сатана ден осал суксо-влак уже нигӧмат ондален огыт керт. Кӧ Юмым колыштнеже да тудын Кугыжаныш вуйлатымыж годым илынеже, Юмын чыла сӧрымашын шукталтмыжым ужеш (Почмаш 20:1—3; 21:3—5).

16. Мучашын вашке толмыжым шотыш налаш гын, мом тыланда ыштыман?

¹⁶ Сатанан тӱняжлан пеш вашке мучаш толеш. Сандене шке деч йодаш кӱлеш: «Мый мом ыштышаш улам?» Иегова Библийым сайрак пален налмыдам вуча. Сандене Библийым тыршен шымлыза (Иоаннын 17:3). Кажне арнян Иегован Таныкше-влак пырля погынен вашлиймашым эртарат. Тушто нуно Библийым келгынрак шымлат. Нине вашлиймашыш эре кошташ тыршыза. (Еврей-влаклан 10:24, 25 лудын лекса.) Шкем вашталташ кӱлмым умыленда гын, тидым ышташ ида лӱд. Тунам Иегова дене кыл кучымашда эше пеҥгыдырак лиеш (Иаковын 4:8).

17. Тиде осал тӱнян мучашыже шуко еҥлан молан вучыдымын толеш?

¹⁷ Шуко еҥлан тиде осал тӱнян мучашыже  вучыдымын, «йӱдым толшо вор семын», толеш манын, апостол Павел возен (1 Фессалоникысе-влаклан 5:2). Шуко еҥын пытартыш кечыла нерген Библийын каласымын шукталтмыжым шотыш налмыже огеш шу. Тидын нерген Иисус ончылгоч ойлен: «Кузе Нойын илыме кечылаштыже лийын, Айдеме Эрге толмо годымат тугак лиеш. Вӱд ташлыме деч ончыч Нойын ковчегыш шичме кечыже марте еҥ-влак кочкыныт, йӱыныт, ӱдырым налыныт, марлан лектыныт. Вӱд ташлымаш тӱҥалмешке да чылаштым пытарымешке, мо лийшашым умылен огытыл. Айдеме Эрге толмо годымат тыгак лиеш» (Матфейын 24:37—39).

18. Иисус мо нерген шижтарен?

¹⁸ Мучаш «вапшла вучыдымын» лиеш, сандене Иисус шижтарен: «Тыгеже, шекланыза, руштмо, чот йӱмӧ, тысе илыш верч тургыжланыме дене шӱмда ынже нелем». Тудо ӱжын: «Чыла тиде лийшашым чытен лекташ да Айдеме Эрге ончыко шогалаш йӧрышӧ лияш манын, эре шекланен шогыза да кумалза» (Лукан 21:34—36). Иисусын каласымыжым молан шотыш налаш кӱлеш? Молан манаш гын Сатанан осал тӱняже пеш вашке пытарыме лиеш. Иеговалан да Иисуслан йӧрышӧ-влак гына утаралтыт да у тӱняште курымеш илен кертыт (Иоаннын 3:16; 2 Петрын 3:13).