1. Nnaanone addi dhego dhinereye osogolo?

WAVURUWANAGA muthenga dhixa, podi wera onowikoha: ‘Elabo ela enere omala?’ Athu owinjhiva enorumedha wi nihifiya omakuthulo wa elabo, mwaha wa obure oliwo ni dhego dhowopiha dhinereya malabo yala a peeno. Eyowa ebaribari? Nnaanone addi dhinereye osogolo? Iyo naathu kannawedha osoriha dhinereye osogolo, mbwenye Yehova onosoriha. Wodhela Bibliya, Yehova ononaddela dhego dhinereye osogolo ni dhinafuna opadduwa ni elabo yela. — Isaías 46:10; Tiago 4:14.

2, 3. (a) Anamahara a Yesu yafuna enone ddi? (b) Ki Yesu awakunle aavi?

² Bibliya kawogile wi omala wa elabo, fuumamalelo wa elabo yavati, mbwenye omamalelo wa obure watene. Yesu ohuwoga wi obure watene onadha obibiddeleye, Omwene wa Mulugu wambela othonga elabo yatene yavati. (Lucas 4:43) Anamahara a Yesu, yafuna enone labo Omwene oyo onafuniiwa odha. Nuwindo aliwa omukoha: ‘Dhego ndha dhinereye alini, yintelelo ya othonga wawo ni omakuthulo wa dhego dhatedhene sivi?’ (Mateus 24:3) Yesu kawaddele labona, mbwenye awaddele dhegodha dhinereyege waddamelaga omakuthulo wa elabo ela yovirigana. Dhatedhene awogile Yesu, peeno dhinna wereya.

³ Muwari mwa musolo ola, nnere woona dhego dhinereya, dhinoniha wi nili omakuthulo. Mbwenye nrajhihe ohudhera koddo ewaniwe odhulu. Eyo enere onikavihera wonelamo mwahaya bwaddi dhigapadduwa dhego dhabure mwilaboni yavati.

4, 5. (a) Yesu ambeliye olamulela, epadduwile ddi odhulu? (b) Ninga munawogela Apocalipse 12:12 elabo yavati yakale aavi Saddana avokeriwa elabo yavati?

⁴ Musolo 8 ohunihudhiha wi Yesu ambelena Omwene yaka ya 1914. (Daniel 7:13, 14) Livuru na Apocalipse, nnawoga wi ehiwaniwa koddo odhulu: ‘Yahitatamuliwa koddo odhulu: Migeli [obe Yesu] nangero aye yahiwana nnowa, nowa [obe Saddana] nangero aye yowaniha koddo.’ * Saddana ni Ademoniyu yahigonjhihiwa, aliwa ovokedhiwa elabo yavati. Mohanganyedha ela yahahagalasa vanlubale angero. Ki yapadduwele ddi athu eelabo yavati? Bibliya onawoga wi makathamiho a mwilaboni yere othabwa. Mwahaya bwaddi? Mwaha Ddiyabo ohunona wi ‘omuhalele mudhidhi mug’onove.’—Apocalipse 12:7, 9, 12.

⁵ Ohanle mudhidhi mug’onove wihina Mulugu anfugele Ddiyabo mukambura. Bumwahaya Ddiyabo agaatotaga makathamiho owinjhiva elabo yavati. Kabeni noone ele owogile Yesu wodhela ndhe dhaapadduwege malabo ookuthula.—Osugwe wonelamo 24.

6, 7. Nnonile aavi wi yovuhulela ya Yesu wodhela koddo ni dala enna wakwanela?

⁶ Koddo. Yesu ahiwoga egihina: ‘Malogo enerege owana malogove, omwene omweneve.’ (Mateus 24:7) Mudhidhi yola nnakalihu athu owinjhiva ehikwa mwaha wa koddo okwaranya mudhidhi wa kale. Nikuru nnalebela dhopadduwa dha elabo yatene, nihiwoga wi koddo dhiwaniwe obajha yaka ya 1900 ofiyedha 2000, dhihatolosa athu owinjhiva okwaranya athu epiwe ni koddo  dhiwaniwe mudhidhi Yesu agari elabo yavati ofiyedha yaka ya 1900. Teto, nikuru nimodhave nihiwoga wi obajha yaka ya 1914 ofiyedha peeno, athu owakwana 100 milhões ehikwa mwaha wa koddo. Vano kubuwela goyi yonile matxikwi ni matxikwi aathu mwaha wa koddo ndha!

⁷ Dala. Yesu ahiwoga egihina: ‘Dhoojha dhinerege orameya.’ (Mateus 24:7) Malabo yala athu enolima okwaranya kale. Mbwenye podi egarive ndo athu owinjhiva kinakanna yojha. Mwahaya bwaddi? Mwaha aliwa, kinna korowa dhogulana dhoojha obe kinna mundda wolimavo. Elabo yatene, athu owinjhiva enna otaabuwa. Nikuru na egumi na elabo yatene nnawoga wi anamwani owinjhiva enookwa yaka dhatedhene, mwaha wa dala.

8, 9. Enatonyihedha ddi wi yovuhulela ya Yesu wodhela oddiginyeya wa elabo ni oredda ennana wakwanela?

⁸ Oddiginyeya weelabo. Yesu ahiwoga eraga: ‘Winere okala oddiginyeya weelabo.’ (Lucas 21:11) Siyensiya onowoga wi yaka dhatedhene, winerege opadduwa oddiginyeya weelabo winlubale.  Wambela yaka ya 1900, athu owakwana 2 milhões ehikwa mwaha wa oddiginyeya weelabo. Tekonolojiya enokavihera onona mowaguva winafuna opadduwa oddiginyeya weelabo. Mbwenye podi egarive ndo athu owinjhiva enookwa mwaha wa oddiginyeya weelabo.

⁹ Oredda. Yesu ahiwoga wi dherege okumelela ‘dhiredda dhinavaleya’ ni dhinaapa athu mowaguva. (Lucas 21:11) Amediku enowanda wavulumusa athu enna dhiredda dhohiyana-hiyana, mbwenye dhihikalawo dhimodha dhahinna murombwe. Ohukalawo Relatoriyu onawoga wi yaka dhatedhene athu owinjhiva enookwa mwaha wa oredda ninga, tuberkulose, malariya ni kolera. Ohiya eyo, yaka dhivirile, amediku ehifwanya dhiredda dhixa dhowakwana 30. Dhimodha kadhinna murombwe.

10. Yolebela ya 2 Timóteo 3:1-5 enawoga ddi wodhela ekalelo ya athu malabo ookuthula?

¹⁰ Yolebela ya 2 Timóteo 3:1-5 enawoga: ‘Malabo ookuthula,  onaakale mudhidhi wabure woorusa ovilela.’ Murumiwi Pawulo ahiwoga wi athu:

• Enakalege owidhivela yekiwa

• Odhivela korowa

• Ohawiwelela makolo

• Ohiroromeleya

• Ohikanna odhivela naamudhiwa

• Oohiivanya

• Oowali ni ooporosa

• Oodhiveliwa dhohagalasa omwihiya Mulugu

• Enere okanna ekalelo yofuna omulabela Mulugu mbwenye enere ovanya kopolo yela

11. Ninga munawogela Salmos 92:7, ethu baani enaapadduwele athu abure?

¹¹ We ononelamo wi ekalelo ya athu a peeno eri ndala? Wapela elabo yatene, athu owinjhiva eri ndala. Mbwenye Mulugu onopaganya wi kanahiye obure okalagawove. Teto, oliye onopaganya: ‘Athu abure yinjhivanaga ninga manyahi yarubuwaga, ohufiya mudhidhiya wi egujhuliwe, yahikalewo.’—Salmos 92:7

12, 13. Nnikavihero na Yehova, dhego baani nihudherihu malabo yala ookuthula?

¹² Nihoona wi malabo ookuthula, athu yerege wunlana goyi. Mbwenye Bibliya onowoga wi dherege opadduwa dhego dhapama. Kabeni noone dhego bili dhapama dhereyege malabo ookuthula.

¹³ Adhari a Mulugu yerege omoonelamo pamadhene Bibliya. Namavuhulela Daniyeli ahileba wodhela malabo ookuthula, oliye ahiwoga egihina: ‘Enonelo yeebaribari kinarameye.’ (Daniel 12:4) Mulugu ere wakavihera adhari aye omunonelamo pamadhene Bibliya okwaranya malabo a kale. Yehova Mulugu onna werana dhego nda, thabwathabwa obajha yaka ya 1914 ofiyedha peeno. Motajhiha ohunihudhiha makalelo enna thima ndina naye, ethu baani onafuniye werana elabo yavati, ebaribari wodhela ovenyihiwa wa anookwa, ethu baani enanipadduwela nakwa, ni wodhela yowobola. Nihudhera wi Omwene wa Mulugu bunamarihe makathamiho ehu atene. Ohiya eyo nihudhera ethu baani enahoweleya negi nifwanye ohagalala, wihina nimuhagalase Mulugu. Ki adhari a Mulugu enaparihedha addi mabasa ndhe enahudheriwa? Kabeni none yovuhulela emodha enanivaha yowakulaya.—Osugwe wonelamo 21 ni 25.

14. (a) Muthenga dhapama Dhomwene dhaalaleyiwege wuuvi? (b) Baani onaapara mabasa ala oolaleya?

¹⁴ Muthenga wapama womwene werege olaleyiwa elabo yatene yavati. Awogagave wodhela ndhe dhaapadduwege malabo ookuthula, Yesu ahenjhedhedha egihina: ‘Muthenga wapama womwene ommadha olaleyiwe mwilaboni yatene yavati, wengo winafwanyeya athu.’ (Mateus 24:3, 14) Muthenga dhapama Dhomwene dhinna olaleyiwa dhilabo dhowakwana  230 ni dhiwogelo 700. Anamona a Yehova a ‘malogo ohiyana-hiyana’, enna wakavihera athu ononelamo omwene wa Mulugu ddi, ni ethu baani omwene oyo onafuniiwa wera. (Apocalipse 7:9) Mbwenye mabasa ala enaapara mwebewene, kinaakela korowa. Ninga Yesu awogiliye athu owinjhiva yerege wawidda ni waharahara. Podive egari ndo, kaavo ethu enaamalihe mabasa yala oolaleya.—Lucas 21:17.

15. (a) We onorumedha wi nnakala malabo ookuthula? Mwahaya bwaddi? (b) Enaapadduwele ddi, ale yahinamwiwelela Yehova ni ale enamwiwelela?

¹⁵ We onorumedha wi ninkala malabo ookuthula? Dhovuhulela dhowinjhiva dha mBibliyani dhinasoriha wodhela malabo ookuthula dhinnana wakwanela. Mohilegela mabasa oolaleya enere omala, vano ‘omakuthulo ofiye.’ (Mateus 24:14) Omakuthulo entapulela ddi? Omakuthulo enagiwana koddo ya Armagedom, Yehova anafuniye amarihena obure watewene. Yehova onaamulabihedhe mwanaye Yesu ni angero aye akopolo wi yaagujhule athu ehinafuna omwiwelela Yehova ni mwanaye Yesu. (2 Tessalonicenses 1:6-9) Egereye ndo, Saddana vamodha ni ademoniyu enere oselela waleketha athu. Vano, athu enamwiwelela Yehova ni enarumedha olamuleliwa ni omwene wa Mulugu, enere woona dhego dhatedhene apaganyile Mulugu dhereyaga.—Apocalipse 20:1-3; 21:3-5.

16. Woona wi omakuthulo wa elabo winowaddamela, onere ddi?

¹⁶ Woona wi elabo ela enathongiwa ni Saddana, mohilegela enere ogujhuliwa. Yere okala yapama wikoha: Ginere ddi?’ Vobajha, kuhiye wi ethu-sithu evunganyedhe ohudhera wawo. Yehova onafuna wi odhowegenave omuhudheraga Bibliya. (João 17:3) Yanabili, wilibihere  otugumana vamodha ni Anamona a Yehova. Aliwa enotugumana sumana dhatedhene wi emuhudhere Bibliya. (Omwileri Hebreus 10:24, 25.) Yanatharu, kulegele osaddula egumi yawo akala wi enohoweleya. Werana ele enamuhagalasa Yehova wandana wawo nuliye onere oliba.—Tiago 4:8.

17. Ogujhuliwa wathu owinjhiva winaakale worurumusa. Mwahaya bwaddi?

¹⁷ Murumiwi Pawulo ahiwoga wi ogujhuliwa wa athu abure, winadha wikale worurumusa. Oliye wera, winaakale: ‘Ninga mbava onadha ni mahiyu.’ (1 Tessalonicenses 5:2) Teto, Yesu ahiwoga wi athu owinjhiva kiyapwathege dhintelelo dhinoniha wi ninkala malabo ookuthula. Oliye wera: ‘Ninga malabo a Nowe, mowindala winaakale odha wa Mwana muthu mwaha wi malabo ale mutokora ohunathi ofiya athu yojha, yong’wa, alobwana yootela, ahiyana yooteliwa ofiyedha nlabo Nowe ovolowa mmwanddeyani, aliwa kiyapwathile ofiyedha mutokora waxela aatene, mowindo winaakale odha wa Mwana Muthu.’—Mateus 24:37-39.

18. Yesu ovahile yoxagiha baani?

¹⁸ Yesu ahiwoga wi nlabo nookuthula naafiye morurumusa ‘ninga murako’ ni ‘nnadhele athu atene enakala elabo yavati.’ Nuwindo ahenjhedhedha wera: ‘Mukale mento muhuselele olobela [obe olobela ni murima watene] wihina muvuluwe mwadhatedhene dhinafuna opadduwa, ni mwande wimela vamentoni va Mwana muthu.’ (Lucas 21:34-36) Mwahaya bwaddi sathima ovuruwana yoxagiha ya Yesu? Mwaha wi ohanle mudhidhi vag’no wi elabo ya Saddana egujhuliwe. Mbwenye ale enamwiwelela Yehova binaavuluwe ni binakalegewo malabo amatene mwilaboni exa.—João 3:16; 2 Pedro 3:13.