1. Mapa da hānîǁaeb xa a ǁkhāǁkhāsen ǁkhā?

AI-ĪSIǂHÔANA kē tsî ǂâi tama du hâ, ‘nē xūna ǁgaiǂoas ǀguisa i hî tama hâ?’ ǁNāpa i ge ǃnāsa tsūkēǃgân tsî karoǂgaoxasib tsîna hâ ǁnā-amagan ge ǂgui khoena ra ǂâi ǀams nē ǃhūbaib dis go ǀgū ti. ǁNāsa a ama? ǀGau-e hâ-e ǂansa tae-i hānîǁaeb ǃnâ nî īsa? Î. Khoen ge a kēbo ǁoa tae-i nî īsa xaweb ge Jehova Eloba ǁnāsa a dī ǁkhā. ǁÎb ge Elobmîs ǃnâ ra mîba da tae-i hānîǁaeb ǃnâ nî īsa sida tsî ǃhūbaib tsîn ǀkha.—Jesajab 46:10; Jakobub 4:14.

2, 3. Jesub di ǁkhāǁkhāsabega tae-e gere ǂan ǂgao tsî Jesuba mati ge ǃeream gu?

² Elobmîs ǃnâ da ga ǃhūbaib ǀams xa khomai o, o i ge ǁan ai da hâ ǃhūbaiba ǃoa ǁnaeǁgau tama hâ, xawe eloxoresasib di ǀamsa ǃoa ra ǁnaeǁgau. Jesub ge khoena ge ǁkhāǁkhā Elob Gaosib ǃhūbaib ǂama nî ǂgaeǂguisa. (Lukab 4:43) ǁÎb di ǁkhāǁkhāsabegu ge gere ǂan ǂgao mâǁaeb Elob Gaosiba nî hā ǃkhaisa tsî ǁîgu ge Jesuba ge dî: “Mâǁaen nēna nîra īsa, tsî mâs a saos sa hās tsî nē hâ ǁaeb ǀams disa ǃkhaisa.” (Mateub 24:3) Jesub ge ǁîga ǁkhâb tsē-e mā tama hâ xawe ge mîba gu tae-i nî īsa nē ǃhūbaib di ǀams aiǃâ. Jesub ge mîmâin ge nēsi ra ī.

³ Nē danaǃâs ǃnâ da ge nî ǁkhāǁkhāsen ǀams ǃnâ da ûi hâsa. ǂGurose, da ge nî ǁkhāǁkhāsen torob hîna ge  ǀhommi ǃnâ a īb xa, î da ǁnâuǃā tae-i ǃaroman xūna nētsē ǃhūbaib ai a ǁgai ǃkhaisa.

4, 5. (a) Tae-e ge ī Jesub ge ǀhommi ǃnâ Gao-ao kais khaoǃgâ? (b) ǂHaiǂhais 12:12 ǃoagu tae-e ge ī Satanni ge ǃhūbaiba ǃoa aoǁnâhe o?

⁴ ǁKhāǁkhāsen da ge go 8ǁî danaǃâs ǃnâb ge Jesuba ǀhommi ǃnâ 1914ǁî kuri a Gao-ao kaisa. (Danieli 7:13, 14) ǂHaiǂhais di ǂkhanis ge ra mîba da tae-i ge ǁnās khaoǃgâ īsa: “Tsî i ge ǃkhamgu-e ǀhommi ǃnâ ge hā: Mixaeli tsî ǀhomǃgāgu âb ge draka ge ǃkhamū, tsî draki on ge ge ǃkham, tsî ǀhomǃgāgu âb tsîna.” * Satanni tsî ǁîb demongu ge ǁnā toroba ge a ǂoaǃnâ tsî ǃhūbaib ǃoa ge aoǁnâhe. ǂÂi re ǃgâiaǂgaob ǀhomǃgān gere tsâba! Xawe khoen ǃhūbaib ai hân? Elobmîs ge ra mî ǃgom ǁaegu ge nî hā khoen ǂamai. Tae-i ǃaroma? ǁGâuab ge kaise ǁaixa hâ, “ǂkhari ǁaerobab ūhâ ǃkhaisa ǂan tsî.”—ǂHaiǂhais 12:7, 9, 12.

⁵ ǁGâuab ge ǃnāsa tsūba ra ǃaroma ǁkhāb as kōse ǃhūbaib ai. ǁÎb ge ǁaixa hâ ǂkhari ǁaerobab ūhâ amaga tsî a ǂan Elob ǁîba nî ūbēsa. Hā re î da ôaǃnâ Jesub ge mîna ǀuniga tsēdi ǃnâ nî īna.—24ǁÎ ǀArosa ǃgāsasiba mû re.

6, 7. Tae-e a mîhe ǁkhā torob tsî ǃâtsūǀkhāgu xa nētsē?

⁶ Torob. Jesub ge ge mî: “Nē ǁaes ge nau ǁaes ǃoagu tsî nē gaosis ge nau gaosis ǃoagu nîra khâima.”  (Mateub 24:7) ǂGui khoen ge sada ǁaeb ǃnâ ge a ǃgamhe torogu ǃnâ, ǃkharu ge ǁaeb xa. ǀGui ǃnurib Worldwatch Institutes dib ge ra ǁgau 1914ǁî kuriba xun ge 100 miliun khoena torogu ǃnâ a ǃgamhesa. ǃNona ǃnādi xa ǃnāsa khoen ge torogu ǃnâ ge a ǃgamhe 100 kurigu ǁaeb ǃnâ 1900 sa xu 2000 kurigu kōse, ǃkharu ge 1900 kurigu ǁaeb ǃnâ. ǂÂis ǀguisa dī re ǂkhîoǃnâsib tsî tsûb miliundi khoen da tsâba torob xa ǃaromahe hâsa!

⁷ ǃÂtsūǀkhāgu. Jesub ge ge mî: “ǃÂtsūǀkhāgu” ge nî hâ. (Mateub 24:7) ǂGui ǂûn ge hâ ǃkharu ge ǁaeb xa xawen ge ǂgui khoena ǂûn nî ǂû-e ūhâ tama hâ. Tae-i ǃaroma? ǁÎn ge mari-e ūhâ tama hâ ǂû-i tamas ka io ǃhū-en nî ǁama-ū-e în ǃhana ǁkhā. Biliuns xa ǃnāsa khoen ge ǀgui dollari ǃnaga ûi hâ. World Health Organizations ge ra mî miliundi ǀgôan ge kurikorobe ra ǁō, dana ǃaromas ge ǁîn ge ǂâusa ǂûna ūhâ tama hâ în ǂuruse hâ.

8, 9. Tae-e ra ǁgau Jesub di kēbodi ǃhūǂgubigu tsî ǂhīǁōgu dis ge a ama kaisa?

 ⁸ ǃHūǂgubigu. Jesub ge ge kēbo: “ǃKharaga ǃkhaidi ain ge ǃhūǂgubigu” tsîna nî hâ. (Lukab 21:11) ǂGui ǀgaisa ǃhūǂgubigu ge mâ kurib hoaba ra ǃâubasen-e. ǁAubexa i ge 1900ǁî kuriba xu 2 miliuns khoena ge ǁō ǃhūǂgubigu xa ǃaromahe hâse. Texnoloxib ge ra hui ǃhūǂgubiga ǁaeb aiǃâ ǂanǂans ǀkha xawes tsînan ge ǂgui khoena noxoba ra ǁō.

⁹ ǂHīǁōgu. Jesub ge ge kēbo “ǂhīǁōgu” nî hâsa. ǁKhōǁkhōsa ǀaegu hîna ǃhaese ra khoraǂui gu tsî ǂgui khoena ǃgam gu tsîn ge hâ. (Lukab 21:11) ǀAedī-aogu ge ge ǁkhāǁkhāsen mati gu ǂgui ǀaega nî ǀaeǃkhō ǀgausa xawen ge noxoba ǀaena hâ sōǀôana hōbahe tamana. Ama as ge ǀgui ǃnurib ge ǁguiǃāsa mâ kurib hoaban miliundi khoena ra ǁōsa tbs, malarias tsî ǃnāba xus tsîna. Xawe ǁnās ǀgui tamas ge ǀaedī-aogu ge 30 ǀasa ǁōga ge hō tsî ǀnîn ge sōǀôana hōbahe tama hâ.

10. 2 Timoteub 3:1-5 sa mati nētsē a ama?

¹⁰ 2 Timoteub 3:1-5 ǃnâs ge Elobmîsa ra mî: “Îts ǂan nēsa, ǀuni tsēdi ǃnâ gu ǃgom ǁaega nîra hā ǃkhaisa.” Apostel Paulub ge ge ǁguiǃā ǂgui khoen mati ī ǀgauga nî ūhâsa ǀuniga tsēdi ǃnâ. ǁÎb ge ge mî khoen nîra

• ǁîǀnamsenxa

• mariǃgunuxa

• ǁgûna ǁnâuǀnamoǃnâ

• ǃanuoǃnâ

• ǀnamoǃnâ

• ǀgauoǃnâ

• ǃkhausa

• turaba Elob ǃgâ-ai ra ǀnamna

• eloǃaoǃgâxasib di īsiga ūhâ, xawe ǀgaib âba ra ǀoana

11. Psalmdi 92:7 ǃoagu tae-e eloxoresa khoen ǀkha nî ī?

¹¹ ǂGui khoena ǁnāti ī ǀgauba ūhâ sadu ra hâba? ǃHūbaib ǂhabasen ge ǂguina di ī. Xawe Elob ge ǀgūǁae xū-e nî dī nēs xa. ǁÎb ge ra mîmâi: “Eloxoresan ra ǁhaon khami ǀomkhâi ǃkhaisa, tsî ǂkhabadī-aon hoan ra ǀom  ǃkhaisa, nēsa ǀamosib kōsen nî hîkākāhese.”—Psalmdi 92:7.

12, 13. Jehovaba tae-e ǀuniga tsēdi ǃnâ ge ǁkhāǁkhā da?

¹² Elobmîs ge ge kēbo ǀuniga tsēdi ǃnâb ǃhūbaiba tsûb tsî ǃgomsigu xa nî ǀoahesa. Xawe Elobmîs tsîn ge ge mî ǃgâi xūn nî ī ǃkhaisa.

¹³ Elobmîsa ǁnâuǃās. Kēbo-aob Danieli ge ǀuni tsēdi xa ge a xoa. ǁÎb ge ge mî: “ǂAns ge nîra ǂguiǂguihe.” (Danieli 12:4) Elob ge ǁîb khoena ǁkhāsiba nî mā în Elobmîsa ǃgāsase ǁnâuǃā ǂguros xa. Jehovab ge nēsa ǀō-aisase 1914ǁî kuriba xu ge ī ǁkhā kai. Aiǁgause, ǁîb ge ǂhâǂhâsasib ǁîb ǀons dis tsî ǁîb ǂâibasens ǃhūbaib ǀkhab ūhâs, amab xoremarib dis, tae-i ra ī ǁō da ga o tsî khâis xas tsîna ge a ǁkhāǁkhā da. ǁKhāǁkhāsen da ge go Elob Gaosib ǀguib sada di ǃgomsina a ǀam kai ǁkhā ǃkhaisa. ǁKhāǁkhāsens tsîna da ge go dī mati da nî ǂkhîba ūhâsa tsî mati da Eloba nî ǂkhîǂkhî ǀgaus tsîna. Xawe tae-en Elob di ǃoaba-aona ra dī ǁkhāǁkhāsen ân ra xūn ǀkha? Nē ǃereams ge ǀnî hâ kēbos ǃnâ nî māhe.—21 Tsî 25ǁî ǀArosa ǃgāsasiba mû re.

14. ǃGâiǂhôas Gaosib disa mapa ra aoǁnâhe tsî hamna ǁî-e ra aoǁnâ?

¹⁴ ǃHūbaib ǂhabase ra dīhe aoǁnâ sîsenni. Jesub ge ǀuniga tsēdi xa ge mî: “Tsî ǃgâiǂhôas gaosib dis ge ǃhūbaib hoab ai nîra aoǁnâhe.” (Mateub 24:3, 14) Nē ǃgâiǂhôas Gaosib dis ge 230 xa ǃnāsa ǃhūgu ǃnâ ra aoǁnâhe tsî 700 xa ǃnāsa gowagu ǃnâs tsîna. Î, ǃhūbaib ǂhabasen ge Jehovab di ǀHûǀguitimî-aona “ǀūbeǁaedi tsî ǃhaodi” hoana xu hâ, ǁîn ge khoena ra hui  ǁnâuǃāsa Gaosib a taesa tsî tae-eb khoesiba nî dības tsîna. (ǂHaiǂhais 7:9) Tsî ǁîn ge nēsa marioǃnâse ra dī. ǁKhanhen hâ tsî ra tsūdīhe ǂgui khoen xa xawe i ge xū-e aoǁnâ sîsenna ǁkhae ǁoa, Jesub ge kēbo khami.—Lukab 21:17.

15. (a) ǂGom î du ra ǀuni tsēdi ǃnâ da ûi hâsa tsî tae-i ǃaroma? (b) Tae-e nî ī ǁnān hîna Jehovaba ra ǁnâuǀnam ân tsî ǁnān hîna ǁnâuǀnam taman ǀkha?

¹⁵ ǂGom î du ra ǀuniga tsēdi ǃnâ da ûi hâsa? ǂGui Elobmîs kēbodi ǀuniga tsēdi din ge ra ama kai. ǀGūǁaeb ge Jehovaba nî mîǁgui ǃgâiǂhôasa aoǁnâs nî ǀam ǃkhaisa tsîs ge “ǀamsa” nî hā. (Mateub 24:14) ǀAmsa a tae? Armagedons ǃnâ-ūb ge Eloba hoa eloxoresasiba nî ūbē. Jehovab ge Jesub tsî ǁîb ǀgaisa ǀhomǃgāgu tsîna nî sîsenū î gu ǁÎb tsî ǁîb ǀgôaba ǁnâuǀnam tama khoena dīkākā. (2 Tesalonikaǁîn 1:6-9) ǁNās khaoǃgâb ge Satanni tsî ǁîb demongu tsîna khoena ǁkhawa ǂgaeǂhabu tide. Tsî ǁnān hîna Eloba ra ǁnâuǀnam tsî Gaosiba ūǃoan ge nî mû Elob mîmâidi mati ra ama kai ǀgausa.—ǂHaiǂhais 20:1-3; 21:3-5.

16. ǀAms go nētikōse ǀgū o, tae-e du nî dī?

¹⁶ Nē ǃhūbaib Satanni xa ra ǂgaeǂguiheb ge ǀgūǁae nî ǀam. ǁNā-amaga i ge kaise a ǂhâǂhâsa dîsen da nîsa, ‘Tae-e ta nî dī?’ Jehovab ge ra ǂhâba î du ǃnāsase Elobmîsa xu ǁkhāǁkhāsen ǁkhā du as kōse. Sadu Elobmîs ǁkhāǁkhāsen sadu ge ǂhâǂhâsase nî ǃgôa. (Johaneb 17:3) Jehovab di ǀHûǀguitimî-aon ge mâ wekheb hoaba ǀhaode ūhâ khoena ra huide în Elobmîsa ǁnâuǃā. Dītsâ re nē ǀhaode hoaǁae hâǃnâsa. (Khomai re Hebreǁîn 10:24, 25.) ǁKhāǁkhāsen du ga  ra o ǀkharaǀkharana dīsa, tā du ǃao re ǁîna dīsa. ǁÎna du ra dī khami du ge nî mû sadu ǀhōsasis Jehovab ǀkha ra ǀgai ǀgausa.—Jakobub 4:8.

17. Tae-i ǃaroman ǂgui khoena nî buru ǀams ga hā o?

¹⁷ Apostel Paulub ge ge ǁguiǃā eloxoresan di dīkākāhes ge ǂgui khoen ǃâubasen tama hâ hîna nî ī, “ǃnari-ao-i tsuxub ǃnâ ra hās ǁkhās khami.” (1 Tesalonikaǁîn 5:2) Jesub ge ge kēbo ǂgui khoen ǀuni tsēdi ǃnâ da ûi hâ ǁgauǁgaude ǂgom tamasa. ǁÎb ge ge mî: “Tsî Noaxi di tsēdi ǃnâ i ge ī khami, ǁnāti i ge ǁkhāti Khoen Ôab di hās ǃnâ nîra ī. Tsî kai ǁgammi di tsēdi ǃnâ i ge ī khami, ǂû tsî ra āǃâ, ǃgame tsî ǃgameb ǃoa ra māǂuiǃâ, Noaxi ge arki ǃnâ ǂgâ tsēs kōse. Tsîn ge mûǂan tama i, kai ǁgammi hā tsî hoana ge ūbēs kōse; ǁnāti i ge ǁkhāti nîra ī Khoen Ôab di hās ǃnâ.”—Mateub 24:37-39.

18. Jesuba tae-i ǃkhâikhomsa ge mā?

¹⁸ Jesub ge ge ǃkhâikhom î da tā “ōs tsî ākhanus tsî nē ǃhūbaib di ǂhansenaidi tsîn ǀkha” ǁaeǁaesen. ǁÎb ge ge mî ǀams ǀūǃgâse da hā hîna nî hâsa, “ǁnoa-i xase.” ǁÎb tsîn ge ge mî “ǃhūbaib ai ǁan hân hoan ǂamab nîra hā xuige.” Tsîb ge ǁnāpaxū ge a ǀaro: “ǂKhaikari ǁnâi hâ re, mâ ǁaeb hoaba, î ǀgore re, ī nîra xūn hoana ǁhâxū, tsî du nî Khoen Ôab di ais aiǃâ mâ ǁkhāga.” (Lukab 21:34-36) Tae-i ǃaroma i a ǂhâǂhâsa Jesub di ǃkhâikhomsa ǃgâsa? ǀGūǁaeb ǁGâuab ti eloxoresa ǃhūbaiba nî dīkākāhe amaga. ǁNān hîna Jehovab tsî Jesub di mā-amsa ūhân ǀguin ge nî ûiǃkharu tsî ǀamosib kōse ǀasa ǃhūbaib ai nî ûi.—Johaneb 3:16; 2 Petrub 3:13.