1. ¿Kani uelis tikmatiskej toni panos satepan?

TEJUATSIN tikonitani ke itech nochi taltikpak mochiua miak taman tein amo kuali. Miakej semi kintajyouiltiaj oksekin. Uan amo tikmatij toni okseki taman mochiuatiok (Santiago 4:14). Sayoj ke, maski tejuan amo ueli tikmatij, Jiova kemaj kimati toni panos satepan (Isaías 46:10). Itech Biblia, yejuatsin kijtoj toni panoskia achto ke ejkoskia ixpoliuilis uan keniuj tinemiskiaj satepan.

2, 3. 1) ¿Toni kinekiaj kimatiskej imomachtijkauan Jesús? 2) ¿Toni kinnankilij Jesús?

² Keman Biblia ika tajtoua ixpoliuilis, amo kijtosneki ke ixpoliuis taltikpak, ta kijtosneki ke ixpoliuis tein amo kuali. Sayoj ke ¿keniuj mochiuas nejon? Jesús tamachtij ke iTekiuajyo Dios taixyekanas itech nochi taltikpak (Lucas 4:43, TNM). Imomachtijkauan Jesús kinekiaj kimatiskej kemanian peuaskia taixyekanaskia, yejua ika kitajtanijkej: “¿Kemanian mochiuas nejin, uan keniuj tikmatiskej ke touan tiyetok uan keman motokijtosya itamilis tein onkak itech taltikpak?” (Mateo 24:3, TNM). Jesús amo kiniluij kemanian peuaskia, sayoj ke kiniluij toni panoskia tepitsin achto ke ixpoliuiskia tein amo kuali. Uan tein Jesús kijtojka ke panoskia, mochiujtokya.

³ Itech nejin tamachtilis tikitaskej miak taman tein kinextia ke amo uejkaua ixpoliuisya tein amo kuali. Sayoj ke, komo tiknekij tikajsikamatiskej keyej okachi mochiua tein amo kuali, yekinika maj ika titajtokan se neteuilis tein mochiuak ne iluikak.

4, 5. 1) ¿Toni panok ompa iluikak tepitsin satepan ke Jesús peuak tekiuajti? 2) Kemej kijtoua Apocalipsis 12:12, ¿toni panoskia nikan taltikpak satepan ke Jesús kiualpantamotaskia Satanás?

⁴ Itech tamachtilis 8 timomachtijkej ke Jesús peuak tekiuajti iluikak itech xiuit 1914 (Daniel 7:13, 14). Amatajkuilol Apocalipsis techiluia tein panok tepitsin satepan: “Peuak ne teuilis ne eluiyaktsinko. Uan Miguel [...] iuan iángelikniuan kiteuiayaj ne amokuali tekuani [...] iuan itekitikaikniuan”. Miguel * yejua Jesús, uan “amokuali tekuani” yejua Satanás. Satanás uan iamokuali ejekauan tapolojkej uan kinpantamotkej nikan taltikpak. ¡Maj tiknemilikan keniuj ángeles semi yolpakkej! Sayoj ke ¿toni kinpanoskia taltikpakneminij? Biblia kijtoua ke semi tajyouiskiaj porin “mokualantijtinemi in amokuali Satanás porin kuali kimati ke amo kipia ok miak tonalme” (Apocalipsis 12:7, 9, 12).

⁵ Satanás kichiujtok miak taman tein amo kuali nikan taltikpak. Semi kualantok porin kimati ke amo uejkaua Jiova amo kikauasok maj kisentoka tetajyouilti. Maj tikitakan tein Jesús kijtoj ke panoskia achto ke Jiova kichiuas nejon, tein moixmati kemej “itamian tonalmej”. (Xikonita tajtolmelaualis 23.)

6, 7. ¿Keniuj mochiujtokya neteuilismej uan mayan ijkon kemej Jesús kijtojka?

⁶ Neteuilismej. Jesús kijtoj: “Moteuiske se uan okse pueblojuani, uan [...] se uan okse tagayot” (Mateo 24:7). Itech xiuit 1914 hasta axkan, semi miakej kinmiktianij itech neteuilismej kemej amo keman panotoya. Itech yekinika  siglo hasta xiuit 1914, panoua 1900 xiujmej, kinmiktijkej kemej 30 millones. Sayoj ke itech xiuit 1914 hasta xiuit 2000, nion ajsik 100 xiujmej, kinmiktijkej panoua 100 millones. Xikonnemili keniuj neteuilismej kinualkuiliani tayokol uan tajyouilis semi miakej.

⁷ Mayan. Jesús kijtoj: “Onkas [...] miak mayanti” (Mateo 24:7). Tein kijtoj Jesús mochiujtok. Miakej amo kipiaj toni kikuaskej. Amo kipiaj tomin tein ika kikouaskej nion kipiaj kani tatokaskej. Panoua 1,000 millones kipanouaj tatasojtilis uan tekit kiajxitiaj tomin tein ika kikouaskej tein kikuaskej. Uan no, xijxiujtika momikiliaj panoua makuil millones konemej porin amo semi kipiaj toni kikuaskej.

8, 9. 1) Jesús kijtojka ke onkaskia talolinilis, ¿keniuj mochiujtok nejon? 2) Jesús kijtojka ke onkaskia kokolismej, ¿keniuj mochiujtok nejon?

⁸ Talolinilis. Jesús kijtojka: “Miakkan talolinis” (Lucas 21:11). Xijxiujtika taltikpakneminij kinemiliaj ke chikauak talolinis, uan ijkuak semi miakej momikiliaj. Itech xiuit 1900 hasta axkan, panoua ome millones momikilianij keman talolini.

 ⁹ Kokolismej oso kokoxkayot. Jesús kijtojka ke onkaskia “tetsaukakokolisti”. Nejon uejueyi kokolismej miakej ijsiujka kinkuiskia uan ika momikiliskiaj (Lucas 21:11). Maski tapajtianij kimatij keniuj kinpajtiskej miakej, ayamo kimatij keniuj kinpajtiskej oksekin. Xijxiujtika miakej momikiliaj porin kinkui cáncer, diabetes uan okseki kokolismej. Uan no, itech 40 xiujmej tein panouanij nesinij panoua 30 kokolismej, uan seki nejin kokolismej amo kipiaj pajti.

10. Kemej kijtoua 2 Timoteo 3:1-5, ¿keniuj yeskiaj akin nemiskiaj itech itamian tonalmej?

¹⁰ Biblia kijtoua itech 2 Timoteo 3:1-5: “Tech ne takuitapan [oso itamian] tonalme topan uetsikiu ne ueyi tajyouilis”. Tatitanil Pablo kijtoj ke akin nemiskiaj itech itamian tonalmej ijkon yeskiaj:

• Sayoj yejuan motasojtaskiaj.

• Semi kitemoskiaj motomintiskej.

• Amo kintakamatiskiaj inintatuan.

• Amo motasojkamatiskiaj.

• Amo kintasojtaskiaj ininchankauan.

•   Amo teikneliskiaj.

• Tateuiskiaj uan tetajyouiltiskiaj.

• Kitemoskiaj sayoj moyolpaktiskej uan amo kitasojtaskiaj Dios.

• Kijtoskiaj ke kitasojtaj Dios, sayoj ke amo kitakamatiskiaj.

11. Kemej kijtoua Salmo 92:7, ¿toni kinpanos akin amo yolkualmej?

¹¹ ¿Ijkon kichiuaj akin nemij kampa tionnemi? Itech nochi taltikpak moajsij miakej akin ijkon kichiuaj. Sayoj ke Dios amo uejkaua kipatas nejon. Yejuatsin kijtoua: “Keman akin amo yolkualmej ixuaj kemej amo kuali xiuit uan nochin akin kichiuaj tein amo kuali xochiyouaj, ijkuakya senkis kinixpoloskej” (Salmo 92:7).

12, 13. ¿Toni techmachtiani Jiova itech itamian tonalmej?

¹² Biblia kijtojka ke itech itamian tonalmej mochiuaskia miak taman tein techualkuiliskia tayokol uan tajyouilis. Sayoj ke no kijtoj ke mochiuaskia seki taman tein kuali.

 ¹³ Okachi kuali moajsikamatiskia tein tamachtia Biblia. Keman Daniel, se itekitikauj Dios, kijkuiloj tein panoskia itech itamian tonalmej, kijtoj: “Momiakilis tein yekmelauj taixmatilis” (Daniel 12:4). Nejin kijtosneki ke Dios kinpaleuiskia itekitikauan maj okachi kuali kiajsikamatikan tein tamachtia Biblia. Jiova okachi peuak kichiua nejin itech xiuit 1914. Kemej neskayot, yejuatsin techmachtiani keyej moneki maj tikteixmatiltikan itokay uan toni kineki kichiuas itech taltikpak. No techmachtiani ke Jesús toka momikilij, toni techpanoua keman timomikiliaj uan ke mikemej oksepa nemiskej. Timomachtianij ke sayoj iTekiuajyo Dios uelis kiyektalis nochi tokuejmoluan. No timomachtianij keniuj uelis tiyolpakiskej uan keniuj tinemiskej kemej kiyolpaktis Dios. Sayoj ke ¿toni kichiuaj itekitikauan Dios ika tein momachtiaj? Okse taman tein no moijtojka ke mochiuaskia kinankilia nejin netajtanil. (Xikonita tajtolmelaualis 20 uan 24.)

14. ¿Kani moteixmatiltijtok “kuali Tajtoltsin de Dios”, uan akonimej kichiujtokej?

¹⁴ Moteixmatiltiskia iTajtol Dios itech nochi taltikpak. Keman Jesús ika tajtoj itamian tonalmej, kijtoj: “Moneki ma mojmoyaua in kuali Tajtoltsin de Dios [...] senmanauak” (Marcos 13:3, 4, 10). Tein kichiuas iTekiuajyo Dios moteixmatiltijtok itech panoua 240 uejueyi altepemej, uan kemej itech 1,000 tataman tajtolmej. Itech nochi taltikpak, itaixpantijkauan Jiova “de nochi tataman paísme uan de nochi tataman tagayot, uan [...] de nochi tataman pueblojme” kinpaleuijtokej taltikpakneminij maj kiajsikamatikan toni iTekiuajyo Dios uan keniuj techpaleuis (Apocalipsis 7:9). Keman kichiuaj nejon, amo tajtanij maj kintaxtauikan. Kemej Jesús  kijtojka, miakej kintauelitaj uan kintajyouiltiaj. Sayoj ke nion teyi uelis kichiuas maj amo kiteixmatiltikanok iTajtol Dios (Lucas 21:17).

15. 1) ¿Tikonnemilia ke tinemij itech itamian tonalmej? Xikonmelaua. 2) ¿Toni kinpanos akin amo kitakamatij Dios, uan akin kemaj kitakamatij?

¹⁵ ¿Tikonnemilia ke tinemij itech itamian tonalmej? Mochiujtokya miak taman tein moijtojka itech Biblia ke mochiuaskia itech itamian tonalmej. Amo uejkaua, Jiova tanauatis maj amo moteixmatiltiok tein tamachtia iTajtol, “uan de ompa ejkos ya in tamilis” (Marcos 13:10). Nejin “tamilis” yejua ueyi neteuilis tein moixmati kemej Armagedón, keman Dios kiixpolos nochi tein amo kuali. Itechkopa Jesús uan iángeles akin semi chikaujkej, Jiova kinixpolos nochin akin amo kitakamatij yejuatsin nion iKonetsin (2 Tesalonicenses 1:6-9). Satepan ke tamis Armagedón, Satanás uan iamokuali ejekauan amo uelisok takajkayauaskej. Nochin akin kitakamatiskej Dios uan mokauaskej maj kinixyekana iTekiuajyo kiitaskej keniuj yejuatsin kichiua nochi tein kijtoj (Apocalipsis 20:1-3; 21:3-5).

16. Kemej amo uejkaua ixpoliuis tein amo kuali, ¿toni moneki tikonchiuas?

¹⁶ Amo uejkaua ixpoliuis nochi tein Satanás kiixyekantok. Uan komo amo tiknekij tiixpoliuiskej, moneki timochikauaskej tikixmatiskej Dios. Yejuatsin kineki maj tiktemokan okachi tikmatiskej tein tamachtia Biblia (Juan 17:3). Uan no, itaixpantijkauan Jiova kipiaj nechikolmej nochi semanas tein ika kinpaleuiaj oksekin maj kiajsikamatikan Biblia. Xionmochikaua nochipa tionyas nejon nechikolmej (xikonixtajtolti Hebreos 10:24, 25). Komo tikonita ke seki taman tein tikonchiujtok amo kuali yetok, niman  xikonpata. Ijkon kemej tikonpatatiyas, okachi kuali tionmouikas iuan Dios (Santiago 4:8).

17. ¿Keyej miakej kinichtakauis ixpoliuilis?

¹⁷ Tatitanil Pablo kijtoj ke akin amo yolkualmej ixpoliuiskej “keme mochiua kuak se tachtekke kistiuetsiki de youal”, keman miakej amo kimattoskej (1 Tesalonicenses 5:2). Jesús kijtojka ke miakej amo kineltokaskiaj ke tinentokej itech itamian tonalmej maski miak taman kinextiskia ke kemaj. Yejua kijtoj: “Keme ne tonal kuak nemiko in tanauatijke Noé, no ijkon mochiuas kuak Nejuatsin nimoualuikas ni Yektagatsin. Uan [...] achtopa ke ualaskia ne ueyi tetsaukakiouit, ijkuakon nochi in tagayot tatakuajtoyaj san, uan oksekin motauantijtoyaj san. Uan in oksekin tetatme uan tenanme kinijtantoyaj san ne teichpochuan para ma monamiktikan. Uan ijkon mochiutiualaya hasta kuak Noé kalayik tech [...] arca. Uan in tagayot amo kineltokakke de ke ualaskia ne tetsaukakiouat [...], ijkuakon nochi kinuiyak uan moaelsimijke” (Mateo 24:37-39).

18. ¿Toni technejmachtij Jesús?

¹⁸ Jesús technejmachtij: “Amo xikneltatakuajtinemikan uan amo xitauantinemikan. Uan amo xiyoltanemilijtinemikan den namonemilis”. Yejua kimatia ke nejin ueliskia techtapololtis. No kijtoj ke ixpoliuilis kinichtakauiskia taltikpakneminij “ijkon keme se trampa”. Ompa kijtoj: “Xiyekkuatamatinemikan [...]. Uan nachipa ximotatatautilikan iuan Dios para ke Dios namechpaleuis xikcholouilikan nochi nijin tajyouilis ten mochiuakiu. Uan [...] nanmotenextiliske noixpan” (Lucas 21:34-36). ¿Keyej moneki tiktakamatiskej tein Jesús technejmachtij? Porin amo uejkaua ixpoliuis nochi tein Satanás kiixyekana. Sayoj akin kiyolpaktiskej Jiova uan Jesús makisaskej uan nemiskej nochipaya itech taltikpak (Juan 3:16; 2 Pedro 3:13).