1. ¿Ken uelis tikmatiskej tlen panos satepan?

IJKUAK tikita noticias xamo timotlajtlania: “¿Tlen okseki tlamantli panos?”. Miakej tlajyouiaj uan oksekimej kichiuaj tlen amo kuali, ik non, sekimej mokuayejyekoaj yipojpoliuis tlaltikpak. ¿Melauak ijkon panos? ¿Uelis tikmatiskej tlen panos satepan? Kema. Maski amikaj uelis kijtos tlen panos, Jehová uelis techiluis. Ika Biblia techiluia tlen panos satepan uan tlen kipanos tlaltikpak (Isaías 46:10; Santiago 4:14).

2, 3. 1) ¿Tlen okinekiayaj kimatiskej imachtijkauan Jesús? 2) ¿Tlen okinmilui Jesús?

² Ijkuak Biblia kijtoa nochi pojpoliuis amo kijtosneki kipojpoloskej tlaltikpak, kijtosneki tlamis nochi tlen amo kuali. Pero ¿ken mochiuas? Jesús otlamachti iTekiuajkayo toTajtsin Dios ualtlanauatis nikan tlaltikpak (Lucas 4:43). Imachtijkauan okinekiayaj kimatiskej keman ualtlanauatis non Tekiuajkayotl, ik non, okitlajtlanijkej: “¿Keman panos nin tlamantli uan tlen kiteititis yitika uan ijkuak yitlamis nochi tlen onka itech tlaltikpak?” (Mateo 24:3, TNM). Jesús amo okinmilui keman pero okinmilui tlen panoskia ijkuak yitlamiskia tlen amo kuali. Axkan yimochijtok tlen okijto (xikita nota 24).

³ Itech nin tlamachtil tikitaskej tlen kiteititia yitlamis nochi tlen amo kuali. Ma timomachtikan itech se guerra tlen opanok iluikak uan ijkon tikajsikamatiskej tleka panotok tlen amo kuali.

4, 5. 1) ¿Tlen opanok satepan ijkuak Jesús opejki tlanauatia? 2) Ijkon ken kijtoa Apocalipsis 12:12, ¿tlen opanok ijkuak Jesús okiualtlamotlak Satanás nikan tlaltikpak?

⁴ Itech tlamachtil 8 otimomachtijkej Jesús opejki tlanauatia iluikak itech xiuitl 1914 (Daniel 7:13, 14). Amochtli Apocalipsis kijtoa tlen opanok satepan: “Omotekilmakalok itech ilwikak. N ángel Miguel iwa iangelwah omotekilmakakeh iwa n dragón”. Miguel ye Jesús uan dragón ye Satanás. * Jesús okitlanili Satanás uan noijki amo kuali ejekamej uan okinualtlamotlak. ¡Ángeles melauak oyolpakej! Pero ¿ken tiyetoskiaj akinmej tichantij nikan tlaltikpak? Biblia kijtoa Diablo sapanoa kualantok uan techtlajyouiltiskia porque “kimatok [amo] ok wejkawitl nentinemis” (Apocalipsis 12:7, 9, 12).

⁵ Axkan Satanás kichijtok miak tlamantli tlen amo kuali nikan tlaltikpak. Sapanoa kualantok porque ayakmo miak poliui uan toTajtsin Dios ayakmo kikauilis ma kichijtinemi tlen amo kuali nikan tlaltikpak. Ma tikitakan tlen okijto Jesús panoskia itlamian tonalmej.

6, 7. ¿Ken mochijtok tlen Jesús okijto itech guerras uan apistli?

⁶ Guerras. Jesús okijto: “Se país momakas iwa n ok se, iwa se altepetl momakas iwa n ok se” (Mateo 24:7). Axkan itech guerras sapanoa miakej kinmiktiaj uan amo keman ijkon opanoaya. Akinmej momachtiaj tlen panoa itech nochi tlaltikpak, kijtoaj desde achto  siglo hasta 1914 yokinmiktijkej kanaj 30 millones itech guerras. Pero desde 1900 hasta 2000 yokinmiktijkej kanaj 100 millones. Miakej sapanoa yotlajyouijkej.

⁷ Apistli. Jesús okijto: “Yetos apisotl” (Mateo 24:7). Maski axkan onka miak tlakuali, miakej apismikij. ¿Tleka? Amo kipiaj tomin tlen ika kikouaskej tlen kikuaskej uan amo kipiaj kanin motlatokiskej. Katej kanaj 1,000 millones tlen amo kipiaj miak tomin uan san tepitsin ika mopanoltiaj sejse tonal. Organización Mundial de la Salud kijtoa sejse xiuitl sapanoa miakej konemej ixpoliuij porque amo kipiaj tlen kikuaskej.

8, 9. 1) ¿Ken mochijtok axkan ijkuak Jesús okijto tlaloliniskia chikauak? 2) ¿Tlen panotok ika kokolistli?

⁸ Chikauak tlalolinis. Jesús okijto: “Tlalolinis chikawak” (Lucas 21:11). Sejse xiuitl ijkon panoa. Desde xiuitl 1900 kanaj dos millones oixpolikej ijkuak otlalolinki. Maski axkan kitekitiltiaj miak tlamantli para kimatiskej ijkuak tlalolinis ok miakej ixpoliuij.

 ⁹ Kokolistli. Jesús okijto yetoskia kokolistli tlen totoka moxitiniskia uan sapanoa miakej mokokoskiaj uan ixpoliuiskiaj (Lucas 21:11). Maski miakej pajtij, onka okseki kokolistli tlen amo kipia ipajyo. Sejse xiuitl sapanoa miakej ixpoliuij porque kipiaj cáncer, tuberculosis uan okseki kokolistli. Itech saiktlami 40 xiuitl yokajsikej kanaj 30 yankuik kokolistli uan seki amo kipia ipajyo.

10. Ijkon ken kijtoa 2 Timoteo 3:1-5, ¿tlen kichiuaskiaj miakej itech itlamian tonalmej?

¹⁰ Itech 2 Timoteo 3:1-5, Biblia kijtoa: “Itech iksemi tonatijmeh yetos miak tlaijyowílistli”. Tlatitlanil Pablo okijto miakej ijkin kichiuaskiaj:

• Yetoskeh xíkojteh.

• Satlawel kiwilitaskeh tomi.

• [Amo] kintlakitaskeh intajwah.

• [Amo] ok kitlakitaskeh Dios.

• [Amo] kimatiskeh tetlasojtlaskeh.

• Amo kixikoskeh tlan amokuali.

•   Tetlaijyowiltiskeh.

• Moyolpaktijtinemiskeh ika tlan [...] kelewia inkuerpo, iwa ayakmó kitemoskeh Dios.

• Kichiwaskeh kemi yetoskiah de milajka kineltokah Dios, pero [...] amo milák kineltokah.

11. Ijkon ken kijtoa Salmo 92:7, ¿tlen kinpanos akinmej amo yolkualmej?

¹¹ ¿Ijkon kichiuaj sekimej ik kanin tichanti? Itech nochi tlaltikpak miakej ijkon kichiuaj. Pero amo nochipa yetoskej porque toTajtsin Dios okijto: “Ijkuak amo yolkualmej pankisaj ken xiuitl tlen amo kuali uan nochtin tlen kichiuaj tlen amo kuali momiaktiliaj, ijkuakon yejuan sepa kinmixpoloskej” (Salmo 92:7).

12, 13. ¿Tlen yotechmachti Jehová axkan itlamian tonalmej?

¹² Biblia okijto itlamian tonalmej titlajyouiskiaj uan  yetoskia miak ouijkayotl itech nochi tlaltikpak. Pero noijki okijto mochiuaskia tlen kuali.

¹³ Okachi tikajsikamatiskiaj tlen kijtoa Biblia. Ijkuak profeta Daniel otlajto itech itlamian tonalmej, okijto: “Momiaktilis tlamatilistli tlen melauak” (Daniel 12:4). Nin kijtosneki toTajtsin Dios kinpaleuiskia itekipanojkauan okachi kuali ma kajsikamatikan Biblia. Ijkon opejki mochiua itech xiuitl 1914. Jehová yotechmachti tleka miak ipati itoka uan ken kineki ma tiyetokan, yotechmachti itech imikilis Jesús, tlen techpanoa ijkuak tiixpoliuij uan noijki yokijto kinyolitis akinmej yoixpolikej. Noijki yotimomachtijkej san iTekiuajkayo toTajtsin Dios kiyektlalis nochi ouijkayotl, ken uelis tiyolpakiskej uan ken tikchiuaskej tlen toTajtsin Dios kiyolpaktia. ¿Pero tlen kichiuaj iTekipanojkauan toTajtsin Dios ijkuak kajsikamatij Biblia? Okse profecía technankilia (xikita notas 21 uan 25).

14. ¿Kanin motetlapouijtok “kuali tlajtolmej itech Tekiuajkayotl” uan akinmej tetlapouiaj?

¹⁴ Motetlapouiskia itech nochi Tlaltikpak. Ijkuak Jesús otlajto itech itlamian tonalmej okijto: “Ninmej kuali tlajtolmej itech Tekiuajkayotl motetlapouis itech nochi tlaltikpak” (Mateo 24:3, 14, TNM). Kuali tlajtolmej itech Tekiuajkayotl motetlapouijtok itech kanaj 240 altepemej ika kanaj 900 tlajtolmej. ITlaixpantijkauan Jehová “ik nochteh tlalmeh itech nin tlaltíkpaktli, de nochi familiajteh, iwa de nochi altepemeh” kinpaleuijtokej miakej ma kajsikamatikan tlen kijtosneki Tekiuajkayotl uan ken techpaleuis (Apocalipsis 7:9). Ika nochi inyolo tlapaleuiaj uan amikaj kintlaxtlauia. Ijkon ken okijto Jesús, miakej kinkokoliaj uan  kintlajyouiltiaj. Pero amikaj kintsakuilis ayakmo ma tetlapouikan (Lucas 21:17).

15. 1) ¿Tikneltoka yitikatej itlamian tonalmej, tleka ijkon tikijtoa? 2) ¿Tlen kinpanos akinmej amo tetlakamatij uan akinmej tetlakamatij?

¹⁵ ¿Tikneltoka yitikatej itlamian tonalmej? Yimochijtokej miakej profecías tlen omoijto mochiuaskiaj itlamian tonalmej. Ayakmo miak poliui Jehová kijtos ayakmo ma titetlapouikan kuali tlajtolmej uan “ijkuakon nochi tlamis” (Mateo 24:14, TNM). ¿Tlen kijtosneki nochi tlamis? Kijtosneki ijkuak mochiuas iguerra toTajtsin Dios tlen itoka Armagedón, ijkuakon kitlajtlamis nochi tlen amo kuali. Jehová kitekitiltis Jesús uan ángeles para kinmixpolos akinmej amo kinekij kitlakamatiskej ye uan iKone (2 Tesalonicenses 1:6-9). Ijkuak tlamis Armagedón, Satanás uan amo kuali ejekamej ayakmo uelis tlakajkayauaskej. Nochtin akinmej kitlakamatiskej toTajtsin Dios uan kipaleuiskej iTekiuajkayo, kitaskej ijkuak kichiuas nochi tlen yokijto (Apocalipsis 20:1-3; 21:3-5).

16. ¿Tlen moneki tikchiuas?

¹⁶ Ayakmo miak poliui tlamis nochi tlen kinauatijtok Satanás. Axkan, moneki ximokuayejyeko tlen tikchiuas. Jehová kineki xikmati tlen kijtoa Biblia, ik non, moneki timomachtis (Juan 17:3). TiiTlaixpantijkauan Jehová timonechikoaj sejse semana uan ompa techpaleuiaj ma tikajsikamatikan tlen kijtoa Biblia. Ximochijchikaua nochipa touan ximonechiko (xiktlajtolti Hebreos 10:24, 25). Tla tikita moneki tikyektlalis monemilis,  ximochijchikaua san niman xikchiua uan ijkon okachi kuali timouikas iuan toTajtsin Dios (Santiago 4:8).

17. ¿Tleka miakej kintlajtlachialtis ijkuak kinmixpoloskej akinmej amo yolkualmej?

¹⁷ Tlatitlanil Pablo okijto ijkuak kinmixpoloskej akinmej amo yolkualmej yetos “kemi se yuali ijkuak se tlachtek walkalaki” (1 Tesalonicenses 5:2). Jesús okijto miakej amo tlaneltokaskiaj maski kitaskiaj mochijtok tlen omoijto panoskia itlamian tonalmej. Noijki okijto: “Iwa ijkó kemi opanok ijkuak onemia n Noé, ijkó yetos noiwa ijkuak niwits Ne Non onimochi ni tlakatl. Itech nekateh tonatijmeh ijkuak ayamó owalaya n chikawak kiawitl, n tlakah otlakuayah, okoniah, omonamiktiayah iwa okinmijtlaniah ichpokameh, asta n tonati ijkuak Noé okalak kan weyi arka. [Amo] okajsikamatkeh asta ijkuak okinmajsiko non kiawitl temojti iwa nochteh okinwík. Ijkó noiwa tlamochiwas ijkuak [nikteititis yinikaj], Ne Non onimochi ni tlakatl” (Mateo 24:37-39).

18. ¿Tlen okijto Jesús?

¹⁸ Jesús otechnejmachti uan okijto timotlapololtiskej tla ‘san titlakuajtinemiskeh, titlawantinemiskeh’ uan tla ‘tikkawiliskeh matechtekipacho tlan onka itech nin tlaltíkpaktli’. Okijto tonal ijkuak tlamis nochi tlen amo kuali san ‘kisaki’. Noijki okijto: “Xiijsatokah, iwa nochipa ximotiotsajtsilijtokah para weletis nonmakisaskeh de nochi tlan panos, iwa ijkó nonweletiskeh nonmoketoskeh nonawak Ne Non onimochi ni tlakatl” (Lucas 21:34-36). ¿Tleka moneki ma tikilnamiktokan tlen okijto Jesús? Porque ayakmo miak poliui tlamis nochi tlen Satanás kinauatijtok. San akinmej Jehová uan Jesús kinseliaj, kinmakixtiskej uan nochipa chantiskej itech xochitlali (Juan 3:16; 2 Pedro 3:13).