1. Tigazvijijira kwapi zvinozoitika kumbeji?

MAKAMBOZWA masoko, perapo morangarira kuti, ‘Zviro zviri kushatisisa here?’ Kuno ngozi zinji no ushati zvo kuti vandhu vamweni vanodavira kuti tiri kumagumo o nyika ino. Ngozvokadi here? Waro kuno zvingatibesera kuvona zvinozoitika kumbejiyo here? Hina. Pikija vandhu vacikakwanisi kuziva zvinozoitika mangwana, Jehovha Mwari angakwanisa. Iyena anotibvunja mu Bhaibheri ngo pamusoro po zvinozoitika kwatiri zve no nyika.—Isaia 46:10; Jakobo 4:14.

2, 3. Cicinyi caida kuziva vajiji va Jesu, zve Jesu wakavadavirisa kudini?

² Patinoverenga mu Bhaibheri ngo pamusoro po kupera ko nyika, azvirevi kupera ko dendenejwa ro Pasi pano, asi kupejwa ko ushati. Jesu wakajijisa vandhu kuti Umambo hwa Mwari hucazotonga nyika. (Luka 4:43, Shanduro yeNyika Itsva) Vajiji vake vaida kuziva kuti Umambo hwa Mwari hwaizoviya rini, zve vakabvunjisa Jesu kuti: “Tibvunjenyi bzinozoitika rini ibzi, nokuti ngocapi citatijo co kuvia kwenyu no kupera ko nyika.” (Mateu 24:3) Jesu aazivi kuvapa njiku yakona kamare, asi wakavabvunja zvaizoitika mugumo wo nyika ucito wapera. Zvakananga Jesu kuti zvaizoitika zviri kuitika wari uno.

³ Mu cipauko cino tinozopopora zvitatijo zvinovonesa kuti tiri kurarama munguva yo kupejisira kamare yo nyika ino. Cokutanga, tinodikana kujija ngo pamusoro po hondo yakaitika kudenga, kuti tikwanise kuzwisisa kuti ngenyi zviro zviri kuva zvecishatisisa maningi pasi pano.

4, 5. (a) Cicinyi cakaitika kudenga, Jesu paakandopera kuva Mambo? (b) mukuzwirana na Apokalipsi 12:12, zvicinyi zvaizoitika pakundopera kukhandihwa ka Sathana pasi pano?

⁴ Mu Cipauko 8 takajija kuti Jesu wakava Mambo kudenga mu gore ro 1914. (Danieli 7:13, 14) Bhuku ra Apokalipsi rinotibvunja zvakaitika: “Kwakava no imbi mudenga. Migeri [Jesu] no ngirozi jake jakarovana no cikara ciya.” * [Sathana] no madhimoni ake vakanyiswa pa hondo zve vakakhandihwa pasi pano. Mudakaro wakadini wakava no ngirozi jakagondeka! Asi tingati kudini ngo vandhu pasi pano? Bhaibheri rinonanga kuti yaizova nguva yo zvineso kuno vandhu. Ngenyi? Ngokuti Dhiabhu wakazara ngo runya,“anoziva kuti nguva yaanayo i doko.”—Apokalipsi 12:7, 9, 12.

⁵ Dhiabhu ari kubara maningi zvineso pasi pano mbhera paanokwanisa. Iyena wakanyangajwa maningi ngokuti wasarihwa no nguva shoma kuti Mwari amubvise. Ngatipopore zvakananga Jesu kuti zvaizoitika mu njiku jo kupejisira.—Vonanyi pa Masoko o Kupejisira civerengo 24.

6, 7. Tinganangenyi ngo pamusoro po hondo nyamasi?

⁶ Hondo. Jesu wakati: “Ngokuti majinja no majinja anozomukirana, umambo no umambo hunozomukirana.” (Mateu 24:7) Vandhu vazinji mazuva ano vari kunyanya kuurawa kupinda zvaimboitika kare. Masoko akabva ku Worldwatch Institute anovonesa kuti kubvira mugore ro 1914, hondo jakauraya mutengo unopindirija 100 ro zviuru zvo vandhu. Tikada kuezanisira  mutengo wo vandhu vakaurawa kubvira mu gore ro 1900, mbhera 2000 wakawanda maningi kupinda mutengo wakaurawa kubvira mu gore ro 1.900 kwenda sure. Rangariranyi kusuruvara no kuhwajihwa kwakava no zviuru no zviuru zvo vandhu ngo pamusoro po hondo!

⁷ Njara. Jesu wakati: “Panozova no njara.” (Mateu 24:7) Pikija wari kweciibva zvo kuha zvakawanda kupinda nguva iri yese hayo, apana mundhu ano zvokuha zvakakwana. Ngenyi? Ngo kuti ivona avana mare inokwana kutenga zvo kuha kana ndau yo kurima. Mutengo unopindirija zviuru no zviuru zvo vandhu, vanorarama ngo dhorari rimwe kwenda pasi pa njiku. Organização Mundial da Saúde (Sangano ro Nyika Yese ro Uhomi) rakananga kuti zviuru zvo vana vadoko zvinofa pa gore ngo gore, maningi-ningi ngo kuti avana zvo kuha zvakakwana zvinovangisa uhomi hwavo.

8, 9. Zvicinyi zvinovonesa kuti zvakananga Jesu ngo pamusoro po kuzungunyika ko nyika no ndhendha zviri kuitika?

⁸ Kuzungunyika ko nyika. Jesu wakati: “Kunozova no kuzungunyika kukuru ko nyika.” (Luka  21:11) Gore ngo gore kunovetehwa kuzungunyika ko nyika kwakakura maningi. Kubvira mu gore ro 1900, mbhera pa zviuru zviviri zvo makore vandhu vari kufa ngo ndava yo kuzungunyika ko nyika. Pikija zvo uzivi hwo siensia zvecibesera kukasika kuvona kuti kuri kuviya kuzungunyika ko nyika ikona kuciri ndhambo, vandhu vari kufa.

⁹ Ndhendha. Jesu wainga akananga kuti kunozova no “ndhwaji.” Ndhendha jakashata maningi jiri kundhandhanika ngo kukasika jeciuraya vandhu. (Luka 21:11) Pikija madhokodheya ecijija marapihwe anoithwa ndhendha zinji, kucinondhendha jicikarapiki. Zvokadi, pano masoko amweni akananga kuti gore ngo gore, zviuru zvo vandhu zvinofa ngo ndhendha, jakadari inga cikhosohwa, mararia no korera. Andijopi jega basi, madhokodheya akafumbhura 30 o ndhendha imbza, zve jimweni jakona ajina mutombo.

10. 2 Timoti 3:1-5 iri kukwanirisika kudini nyamasi uno?

¹⁰ Pana 2 Timoti 3:1-5, Bhaibheri rinoti: “Pa njiku jokupejisira, kunozowanika mukuvo wokunesa.” Mupostori Pauro wakadurujira zvaizoithwa ngo vandhu vazinji pa njiku jo kupejisira. Iyena wakananga kuti vandhu vaizova

• vajiitisi

• vanyambata

• vokutama kureremeja majibaba avo

• vanyepi

• vacina rudo no unyaxa

• voupombo

• vacina usizi

• kudisisa bzinodakaja muviri kupinda bzinodakaja Mwari

• vanozovoneka inga vano unyaxa, kaveta vanozoramba simba rahwo

11. Mukuzwirana na Nduyo 92:8, zvicinyi zvinozoitika ku vandhu vakashata?

¹¹ Vandhu vazinji kwamunoraramaro vanoita zvondhozvo here? Mu nyika yese, vazinji vari kuzviita. Sambi-sambi Mwari anozoita zviri zvese ngo pamusoro pazvo. Iyena anogondesa kuti: “Nokunyati vakaxata  vanoreba inga uswa, vaxaixi vese vanovikitira, vanozopejwa mbhera narini.”—Nduyo 92:8.

12, 13. Jehovha ari kutijijisenyi mu njiku jo kupejisira jino?

¹² Bhaibheri rainga rakananga kuti mu njiku jo kupejisira, nyika yaizozara ngo kusuruvara no matambujiko. Asi Bhaibheri rinonangavo kuti kunozoitikavo zviro zvakanaka.

¹³ Kuzwisisa Bhaibheri. Muporofita Danieri wakatara ngo pamusoro po mazuva o kupejisira. Iyena wakati: “Uzivi hwavo hunozoengejeka.” (Danieli 12:4) Mwari anozoitisa kuti vandhu vake vanase kuzwisisa Bhaibheri kupinda kare. Jehovha ari kuita izvi maningi-ningi kubvira mu gore ro 1914. Inga muezaniso, iyena ari kutijijisa kusisira kunoita zina rake no cidisiso cake ngo pasi pano, cokwadi ngo pamusoro po muripo, zvinoitika patinofa, pomwe no rumuko. Takajija kuti Umambo hwa Mwari basi ndihwona hunozopeja zvineso zvedu zvese. Takajijazve kuti tingaitisa kudini kuti tive vanodakara zve tingararamisa kudini mu njira inodakajisa Mwari. Asi zvicinyi zvinoithwa ngo vashandiri va Mwari ngo pamusoro po zvavanojija? Ciporofita cimweni cinotipekeja mupinguro.—Vonanyi Masoko o Kupejisira civerengo 21 no 25.

14. Masoko akanaka ari kucumaehwa kwapi, zve ndiyani ari kumacumaera?

¹⁴ Basa ro nyika yese ro kujijisa. Jesu ecibhuya ngo pamusoro po mazuva o kupejisira wakati: “Vangeri iri ro Umambo rinozotokoteswa pasi pese.” (Mateu 24:3, 14) Masoko akanaka o Umambo ari kutokoteswa mu nyika jinodarika 230 zve mu ndumi jinodarika 700. Hina, pasi pano pese Zvapupu zva Jehovha  zvinobva mu “mabvumbo, majinja” ese zviri kubesera vandhu kuti vazwisise Bhaibheri. (Apokalipsi 7:9) Zve ivona avapagahwi ngo basa iri. Pikija vecitozondhwa no kuteverehwa ngo vazinji, apana cinokamisa basa ro kucumaera iri, inga zvainga zvakanangwa ndi Jesu.—Luka 21:17.

15. (a) Munodavira kuti tiri kurarama mu njiku jo kupejisira here, zve ngenyi? (b) Zvicinyi zvinozoitika kuno vanozwira Jehovha no vacikamuzwiri?

¹⁵ Munodavira kuti tiri kurarama mu njiku jo kupejisira here? Zviporofita zvizinji zvo Bhaibheri zviri kukwanirisika. Sambi-sambi Jehovha anozokamisa basa ro kucumaera masoko akanaka, perapo “kupejwa ko bzese” koviya. (Mateu 24:14) Kupejwa ko zvese icinyi? I Armagedhoni, Mwari paanozobvisa vakashata. Jehovha anozoshandisa Jesu no ngirozi jake jinosimba maningi kuti jiparaje ari wese anoramba Iyena no Mwana wake. (2 VaTesalònika 1:6-9) Perapo, Sathana no madhimoni ake avazopausizve vandhu. Zve vese vanoda kuzwira Mwari no kudavira Umambo hwake vanozovona zvigondiso zvake zvese zvecikwanirisika.—Apokalipsi 20:1-3; 21:3-5.

16. Zvecivoneka kuti mugumo uri phedo maningi, munodikana kuitenyi?

¹⁶ Nyika iri kutongwari ndi Sathana inopera wari uno. Waro zvinosisira maningi kujiita mubvunjo wakadari, ‘Ndinodikana kuitenyi?’ Jehovha anoda kuti mujije maningi Bhaibheri mbhera pamunokwanisa. Jijo yenyu ngaive inosisira kamare. (Johani 17:3) Zvapupu zva Jehovha zvino musongano bviki ngo bviki kuti zvibesere vandhu kuzwisisa Bhaibheri. Ejanyi kwendeyo mucikashwi. (Verenganyi Vaheberi 10:24, 25.) Kudari  mukajija kuti munodikana kuita cinjo, cinjanyi ngo kukasika. Mukaita kudaro, ushamwari hwenyu na Jehovha hunozokura.—Jakobo 4:8.

17. Ngenyi vandhu vazinji vanozokahamara pakuviya ko mugumo?

¹⁷ Mupostori Pauro wakadurujira kuti kuparajwa ko ushati kunozoitika pa nguva icikavetehwi ngo vandhu vazinji, “inga magumiro o inoita mbava, usiku.” (1 VaTesalònika 5:2) Jesu wakananga kuti vazinji avacaizodavirepi zvitatijo zvaizovonesa kuti tiri kurarama mu njiku jo kupejisira. Iyena wakati: “Kudari inga bzakaitika mu njiku ja Noa, ngo bzinozoitikabze pa kuvia ko Mwana wo Mundhu [kana njiku jo kupejisira]. Kudari inga mazuva ao, usore hucito hwakaza, vandhu vaiha, vaimwira, vairovorana ngocavo, mbhera njiku ya Noa yaakanghwina mu ngarava huru, ivona avazivi kubziziva mbhera kuguma ko usore hwakakukuta vese: ngo maitiro o bzinozoita pa kuvia ko Mwana wo Mundhu.”—Mateu 24:37-39.

18. Ingwajo yapi yatakapuwa ndi Jesu?

¹⁸ Jesu wakatingwaja kuti atidikani kukangaijwa ngo “kuhisa, kurejera no kuthimwa-thimwa” ngo upenyu. Iyena wakananga kuti mugumo unozoviya ngo cibvumbu, “inga murau.” Iyena wakanangazve kuti iyona “inozogumira vandhu vo nyika” yese. Zve wakaengejera eciti: “Rindanyi mukuvo wese no kunamata [kana kuita mukumbiro], kuti muwane simba ro kutiza bzese bzinozoza, mukwanise kuguma panyasi po Mwana wo mundhu.” (Luka 21:34-36) Ngenyi zvecisisira maningi kuzwira ngwajo ya Jesu? Ngo kuti sambi-sambi kamare nyika yakashata ya Sathana inozoparajwa. Mugumo ukaviya, vayani basi vanodavihwa ndi Jehovha na Jesu vanozosara vecirarama mbhera na rini mu nyika imbza.—Johani 3:16; 2 Pedru 3:13.