1. I fe ka fakaako e tautolu hagaao ke he vahā i mua?

KUA kitekite nakai a koe ke he tau tala tutupu ti manatu, ‘To holo ki mua ni kia e kelea?’ Kua lahi mahaki e matematekelea mo e favale ati talitonu falu tagata kua tata lahi a tautolu ke he fakaotiaga he lalolagi. Mooli nakai e mena ia? Fai puhala nakai ke iloa ko e heigoa ka tupu he vahā i mua? Ē. Pete kua nakai maeke e tau tagata ke talahau tuai e mena ka tupu, kua maeke a Iehova ko e Atua. Tala mai e ia he Tohi Tapu hagaao ke he vahā i mua ha tautolu mo e tuaga he lalolagi anoiha.​—Isaia 46:10; Iakopo 4:14.

2, 3. Ko e heigoa ne manako e tau tutaki ha Iesu ke iloa, ti tali fēfē e Iesu a lautolu?

² Ka totou a tautolu he Tohi Tapu hagaao ke he fakaotiaga he lalolagi, kua nakai kakano ko e fakaotiaga he fua Lalolagi palaneta, ka ko e fakaotiaga he mahani kelea. Fakaako e Iesu e tau tagata ko e Kautu he Atua ka pule ke he lalolagi. (Luka 4:43) Ne manako e tau tutaki haana ke iloa e magaaho ka hoko mai e Kautu he Atua, ti hūhū a lautolu ki a Iesu: “Po ke hoko a fe e tau mena ia? po ke heigoa foki e fakamailoga he hāu a haele mai, mo e fakaotiaga he lalolagi?” (Mataio 24:3) Nakai tala age e Iesu e aho tonu, ka e tala age e ia e tau mena ka tutupu ato hoko mai e fakaotiaga he lalolagi nei. Ko e tau mena ne talahau e Iesu to tutupu kua tutupu mooli he magaaho nei.

³ He veveheaga nei to fakatutala a tautolu ke he tau fakamooliaga nukua nonofo a tautolu he magaaho kua teitei ke fakaoti e lalolagi. Fakamua, lata a tautolu ke fakaako  hagaao ke he tauaga ne fakahoko he lagi ke maeke a tautolu ke maama e kakano ne kelea lahi e tau mena he lalolagi nei.

4, 5. (a) Ko e heigoa ne fakahoko he lagi he mole laia he eke a Iesu mo Patuiki? (e) Hagaao ke he Fakakiteaga 12:12, ko e heigoa ka tupu he lalolagi he mole e liti hifo a Satani ki ai?

⁴ He Veveheaga 8 ne iloa e tautolu kua eke a Iesu mo Patuiki he lagi he 1914. (Tanielu 7:13, 14) Tala mai he tohi ha Fakakiteaga ki a tautolu e mena ne tupu: “Kua tau foki a lautolu he lagi; ko Mekaeli [kakano, Iesu] mo e hana tau agelu kua tau ke he tarako [Satani], ko e tarako foki kua tau a ia mo e hana tau agelu.” * Ne kaumahala a Satani mo e tau temoni haana ti tolo hifo ke he lalolagi. Manamanatu la ke he fiafia lahi he tau agelu! Ka e kua e tau tagata he lalolagi? Talahau he Tohi Tapu ko e magaaho matematekelea ma e tau tagata. Ko e ha? Kakano kua ita lahi e Tiapolo, “ha kua iloa e ia kua tote hana vaha.”​—Fakakiteaga 12:7, 9, 12.

⁵ Kua fakatupu lahi he Tiapolo e matematekelea ke he lalolagi. Ita lahi mahaki a ia ha kua tote haana magaaho ne toe ato utakehe he Atua a ia. Kumikumi la tautolu ke he talahauaga ha Iesu ke he mena ka hoko he tau aho fakamui.​—Kikite Tala he Matahiku 23.

6, 7. Ko e heigoa ka talahau hagaao ke he felakutaki mo e hoge he vahā nei?

⁶ Felakutaki. Pehē a Iesu: “To laga [po ke, fakalagalaga] e taha motu ke he taha motu, ko e taha kautu ke he taha kautu.” (Mataio 24:7) Mua atu e tokologa he tau tagata  ne mamate he tau felakutaki he vahā ha tautolu ke he ha fakamauaga tuai tali mai. Taha e hokotaki he Worldwatch Institute ne fakakite he tali mai he 1914 ne kua molea e 100 e miliona tagata ne mamate he tau felakutaki. Molea e fakalahi tolu e tokologa he tau tagata ne mamate he tau felakutaki he 100 tau mai he 1900 ke he 2000 ka fakatatai ke he numera he tau tagata ne mamate he 1,900 tau fakamua atu. Manamanatu la ke he matematekelea mo e mamahi ne logona hifo he tau tagata tokologa ha ko e felakutaki!

⁷ Hoge. Pehē a Iesu: “To ha ha i ai e tau hoge.” (Mataio 24:7) Pete kua mua atu e loga e mena kai kua moua mogonei, tokologa e tagata ne nakai lahi e mena ke kai. Ko e ha? Kakano kua nakai lahi e tupe ha lautolu ke fakatau e tau mena kai po ke fonua ke tō aki ai. Molea e piliona tagata ne nakai katoa e taha e talā ke moui aki he taha e aho. Pehē e World Health Organization kua totou miliona e tau fanau ne mamate he tau tau takitaha, mua atu ha kua nakai lahi e mena kai ke kai a lautolu ke malolō e tau tino.

8, 9. Ko e heigoa ne fakakite kua fakamooli e tau perofetaaga ha Iesu hagaao ke he tau mafuike mo e gagao?

 ⁸ Tau mafuike. Ne talahau tuai e Iesu: “To ha i ai e tau mafuike lalahi.” (Luka 21:11) Loga e mafuike malolō lahi ne amanaki mogonei he tau tau takitaha. Tali mai he tau 1900, molea e ua e miliona tagata ne mamate ha ko e tau mafuike. Pete foki kua lagomatai he tau matini foou ke iloa tuai e tau mafuike ato hohoko ai, tokologa agaia e tagata ne mamate.

⁹ Gagao. Talahau tuai e Iesu to ha ha ai e “tau tatalu.” Ko e tau gagao hagahaga kelea kua maeke ke holofa mafiti ti tokologa kua mamate. (Luka 21:11) Pete foki kua fakaako e tau ekekafo ke tului e loga he tau gagao, kua fai gagao agaia ne nakai maeke ke tului. Taha e hokotaki ne fakamaama he tau tau takitaha, totou miliona e tau tagata ne mamate ha ko e tau gagao tuga e māmā pala, malaria, mo e cholera. Nakai koenaia, ka kua moua foki laia he tau ekekafo e tau gagao foou ne 30 he katoa ti falu kua nakai fai tuluiaga.

10. Hane fakamooli fēfē e 2 Timoteo 3:1-5 he vahā nei?

¹⁰ He 2 Timoteo 3:1-5, pehē e Tohi Tapu: “Ko e tau aho fakamui to hohoko mai ai e tau aho uka.” Fakamaama he aposetolo ko Paulo e tau mahani he tau tagata tokologa he tau aho fakamui. Pehē a ia ko e tau tagata to

• lotokai

• velevele koloa

• faliuliu ke he tau matua

• nakai mahani fakamooli

• nakai fakaalofa ke he magafaoa

• nakai mahani fakalatalata

• mahani vale mo e ita

• manako lahi ke he tau mena ke fiafia ai ka e manako tote ke he Atua

• fakatupua ke fakaalofa ke he Atua ka e nakai talia ke omaoma ki a ia

11. Hagaao ke he Salamo 92:7, ko e heigoa ka tupu ke he tau tagata mahani kelea?

¹¹ Tokologa nakai e tagata ne mahani pihia he matakavi ne nofo ai a koe? Tokologa ne mahani pihia he lalolagi katoa. Ka e nakai leva to fai tauteaga e Atua hagaao ke he mena ia. Mavehe e Ia: “Ka tupu hake e  tau tagata mahani kelea tuga ne tau vao ikiiki, ka fiti mai foki a lautolu oti kua eke mena kelea, kua pihia ni kia mahaikava [po ke, moumou] a lautolu tukulagi tukumuitea.”​—Salamo 92:7.

12, 13. Ko e heigoa ha Iehova kua fakaako ki a tautolu hagaao ke he tau aho fakamui?

¹² Talahau tuai he Tohi Tapu hagaao ke he tau aho fakamui, to puke e lalolagi he mamahi mo e matematekelea. Ka e pehē foki e Tohi Tapu to tutupu e tau mena mitaki.

¹³ Maamaaga ke he Tohi Tapu. Ne tohi he perofeta ko Tanielu hagaao ke he tau aho fakamui. Pehē a ia: “To tupu lahi ai foki e mahani iloilo.” (Tanielu 12:4) To foaki he Atua ke he tau tagata haana e lotomatala ke maama lahi e Tohi Tapu. Taute e Iehova e mena nei tali mai he 1914. Ma e fakatai, fakaako e ia a tautolu ke he aoga he higoa haana mo e finagalo haana ma e lalolagi ti pihia foki mo e tala mooli ke he lukutoto, mena ka tupu ki a tautolu ka mamate, mo e liu tu mai. Fakaako foki e tautolu ko e Kautu he Atua ni ka fakamafola e tau lekua oti kana ha tautolu. Fakaako foki e tautolu e puhala ke fiafia mo e ke momoui he puhala kua fakafiafia e Atua. Ka e fakaaoga fēfē he tau fekafekau he Atua e tau mena ne fakaako e lautolu? Kua foaki mai he taha perofetaaga e tali ki a tautolu.​—Kikite Tala he Matahiku 20 mo e 24.

14. Fakamatala i fe e tala mitaki he Kautu, ti ko hai kua fakamatala ai?

¹⁴ Gahua fakamatala he lalolagi katoa. He tutala hagaao ke he tau aho fakamui, pehē a Iesu: “To fakamatala atu foki e tala mitaki nai he kautu ke he lalolagi oti.” (Mataio 24:3, 14) Ko e tala mitaki he Kautu kua fakamatala ke he molea e 230 e motu mo e molea e 700 e vagahau. Ē, ke he lalolagi katoa ko e Tau Fakamoli a Iehova mai he “tau motu oti, mo e tau faoa” kua lagomatai e tau tagata ke  maama e kakano he Kautu mo e mena ka taute ai ma e tau tagata. (Fakakiteaga 7:9) Ti taute e lautolu e mena nei mo e nakai fai totogi. Pete kua fakavihia mo e favale e tokologa ki a lautolu, nakai fai mena ka taofi e gahua fakamatala, tuga ni he talahau tuai e Iesu.​—Luka 21:17.

15. (a) Talitonu nakai a koe kua nonofo a tautolu he tau aho fakamui, mo e ko e ha? (e) Ko e heigoa ka tupu ki a lautolu ne omaoma ki a Iehova mo lautolu ne nakai omaoma?

¹⁵ Talitonu nakai a koe kua nonofo a tautolu he tau aho fakamui? Loga e perofetaaga he Tohi Tapu hagaao ke he tau aho fakamui kua fakamooli. Nakai leva to fifili e Iehova ke fakaoti e fakamatala he tala mitaki ti hoko mai e “fakaotiaga.” (Mataio 24:14) Ko e heigoa e fakaotiaga? Ko Amaketo, ko e magaaho ka utakehe he Atua e tau mahani kelea oti kana. To fakaaoga e Iehova a Iesu mo e tau agelu malolō haana ke fakaotioti ha tagata kua nakai talia ke omaoma ki a Ia mo e haana Tama. (2 Tesalonia 1:6-9) Ka mole ia, to nakai fakahehē e Satani mo e tau temoni haana e tau tagata. Ko lautolu oti mogoia ne manako ke omaoma ke he Atua mo e talia e Kautu haana ka kitia e tau maveheaga takitaha he Atua kua fakamooli.​—Fakakiteaga 20:1-3; 21:3-5.

16. Ha kua tata lahi e fakaotiaga, ko e heigoa haau kua lata ke taute?

¹⁶ Ko e lalolagi nei ne pule a Satani ki ai to nakai leva ti fakaoti. Kua aoga lahi mogoia ke hūhū hifo a tautolu, ‘Ko e heigoa haaku kua lata ke taute?’ Manako a Iehova ki a koe ke fakaako fakalahi mai he Tohi Tapu. Lata a koe ke fakamakutu he fakaako haau. (Ioane 17:3) Kua taute he Tau Fakamoli a Iehova e tau feleveiaaga he tau faahi tapu takitaha ke lagomatai e tau tagata ke maama e Tohi Tapu. Lali ke fina atu tumau he tau feleveiaaga ia. (Totou Heperu 10:24, 25.) Ka iloa e koe kua lata a koe ke taute e  tau hikihikiaga, ua matakutaku ke taute ai. He taute e koe e tau hikihikiaga, to malolō fakahaga e kapitiga haau mo Iehova.​—Iakopo 4:8.

17. Ko e ha kua ofo e tau tagata tokologa ka hoko mai e fakaotiaga?

¹⁷ Fakamaama he aposetolo ko Paulo to fakaotioti e tau tagata mahani kelea he magaaho ka nakai amanaki e tau tagata tokologa ki ai, “ke tuga e kaiha ke he po.” (1 Tesalonia 5:2) Talahau tuai e Iesu to tokologa ka fifili ke fakaheu e tau fakamooliaga kua nonofo a tautolu he tau aho fakamui. Pehē a ia: “Ka e tuga e vaha kia Noa, to eke pihia foki ka hau e Tama he tagata [po ke, tau aho fakamui]. Ha ko e mena tuga ne eke ke he vaha ka e nakaila hoko e fakapuke, ne kai a lautolu mo e inu, ti fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, Ti nakai [“fanogonogo a,” NW] lautolu ato hoko mai e fakapuke, mo e uta kehe a lautolu oti; to pihia foki ka hau e Tama he tagata.”​—Mataio 24:37-39.

18. Ko e heigoa e hatakiaga ne foaki e Iesu ki a tautolu?

¹⁸ Hataki e Iesu kua nakai lata a tautolu ke fakatauhele “he fakaniniko [po ke, kai lahi], mo e konahia, mo e fakaatukehe he tau mena he mouiaga nai.” Pehē a ia ko e fakaotiaga to amanaki ni ti hoko mai, “tuga ne matahele.” Pehē foki a ia to “hoko mai ai kia lautolu oti kana kua nonofo ke he lalolagi oti.” Ti lafi e ia: “Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai, ke tutu foki ki mua he Tama he tagata.” (Luka 21:34-36) Ko e ha kua aoga lahi ke fanogonogo ke he hatakiaga ha Iesu? Kakano to nakai leva ti fakaotioti e lalolagi kelea ha Satani. Ko lautolu ni ne talia e Iehova mo Iesu ka fakahao he fakaotiaga mo e moui tukulagi he lalolagi foou.​—Ioane 3:16; 2 Peteru 3:13.