1. Федӕни ци уодзӕй, уой кӕцӕй ес базонӕн?

НӔУӔГ хабӕрттӕмӕ ку фӕккӕсис, уӕд, ӕвӕдзи, расагъӕс кӕнис: «Амӕй фуддӕр ма ци гъӕуама уа?» Абони уойбӕрцӕ бӕллӕхтӕ ӕма лӕгъуз хабӕрттӕ цӕуй, ӕма беретӕй байрагӕс уй, аци дуйней кӕрон хӕстӕг ке ӕй, е. Цума е ӕцӕгӕйдӕр уотӕ ’й? Федӕни ци уодзӕй, уой нӕ бон ӕй базонун? Адӕни бон нӕй, фал Йегови бон ба ӕй. Ӕма нин Библий фӕрци раргом кодта, федӕни адӕнмӕ ӕма зӕнхӕмӕ ци ӕнгъӕлмӕ кӕсуй, уой (Исай 46:10; Иакови 4:14).

2, 3. Йесой ӕ ахуркӕнуйнӕгтӕ цӕбӕл бафарстонцӕ ӕма син цӕхуӕн дзуапп равардта?

² Библий финст ӕй, аци дуйнейӕн кӕрон ке ’рцӕудзӕй, фал е уобӕл дзорӕг нӕй, ӕма зӕнхӕ фесӕфдзӕй. Исӕфт ӕрцӕудзӕй фуддзийнадӕ. Йесо адӕнӕн дзурдта, зӕнхӕ Хуцауи Паддзахади дӕлбарӕ ке уодзӕй (Лукай 4:43). Ӕ ахуркӕнуйнӕгти фӕндадтӕй базонун, еци Паддзахадӕ кӕд ӕрцӕудзӕй, уой, ӕма ’й бафарстонцӕ: «Кӕд ӕрцӕудзӕнцӕ еци хабӕрттӕ, удта, ке ’рцудтӕ ӕма аци цардӕвӕрдӕн ӕ кӕрон ке ӕрхъӕрдтӕй, е цӕмӕй бӕрӕг уодзӕй?» (Матфеййи 24:3). Йесо син нӕ загъта, аци дуйней кӕрон ци бон ӕрцӕудзӕй, уой, фал син ранимадта, ӕ разӕй ци хабӕрттӕ цӕудзӕй, уони. Ӕма ӕ дзурдтӕ абони ӕнхӕст кӕнунцӕ.

 ³ Аци сӕрӕй базондзиан, аци дуйнейӕн ӕ кӕрон мӕнӕ-мӕнӕ ке кӕнуй, е цӕмӕй бӕрӕг ӕй, уой. Фиццагидӕр базондзиан, уӕлӕрвти тугъд ке адтӕй ӕма е цӕхуӕн тугъд адтӕй, уой. Ӕма ’й уой фӕрци балӕдӕрдзиан, зӕнхӕбӕл уойбӕрцӕ лӕгъуз хабӕрттӕ цӕмӕн цӕуй, уой.

4, 5. а) Йесо Паддзах ку иссӕй, уӕд уомӕй минкъий фӕстӕдӕр уӕлӕрвти ци ’рцудӕй? б) Раргомади 12:12 куд финст ӕй, уомӕ гӕсгӕ, Сайтан уӕлӕрвтӕй зӕнхӕмӕ гӕлст ке ӕрцудӕй, е адӕнбӕл куд фӕббӕрӕг ӕй?

⁴ Ӕстӕймаг сӕрӕй базудтан, 1914 анзи Йесо уӕлӕрвти Паддзах ке иссӕй (Данел 7:13, 14). Уой фӕсте цӕхуӕн хабар ӕрцудӕй, уой туххӕй Раргомади киунуги финст ӕй: «Уӕлӕрвти райдӕдта тугъд: Михаил [гъома Йесо] ӕма ӕ изӕдтӕ исхуӕстӕнцӕ залиаг хелаги [Сайтани] хӕццӕ, ӕма залиаг хелагӕ дӕр ӕ изӕдти хӕццӕ сӕ хӕццӕ хуӕстӕй» *. Еци тугъди Йесо фӕууӕлахез ӕй ӕма Сайтани ӕ лӕгъуз изӕдти хӕццӕ зӕнхӕмӕ ӕргӕлста. Расагъӕс кӕнӕ, уӕлӕрвти изӕдтӕ куд цийнӕ кодтонцӕ! Фал зӕнхӕбӕл цӕрӕг адӕнӕн ба е берӕ бӕллӕхтӕ ӕрхаста. Цӕмӕн? Уомӕн ӕма ’й Сайтан зонуй, «рӕстӕг ин берӕ ке нӕбал байзадӕй» ӕма уой туххӕй мӕстӕй тонуй (Раргомадӕ 12:7, 9, 12).

⁵ Сайтан архайуй, цӕмӕй зӕнхӕбӕл адӕн фулдӕр маст ӕма зиндзийнӕдтӕ ӕвзаронцӕ. Е мӕстӕй тонуй, уомӕн ӕма ин тагъд Хуцау ӕ гъуддӕгтӕн кӕрон искӕндзӕй. Мадта ӕркӕсӕн, Йесо фӕстаг бӕнтти туххӕй ци загъта, уомӕ. (Кӕсӕ 24 уӕлӕнхасӕн.)

6, 7. Йесо тугъдтитӕ ӕма стонг рӕстӕгути туххӕй ци загъта, е абони куд ӕнхӕст кӕнуй?

⁶ Тугъдтитӕ. Йесо загъта: «Еу адӕн исистдзӕй иннӕ адӕни нихмӕ, ӕма еу паддзахадӕ иннӕ паддзахади нихмӕ» (Матфеййи 24:7). 1914-аг анзӕй фӕстӕмӕ тугъдтити цӕйбӕрцӕ адӕн фӕммардӕй, уойбӕрцӕ адӕн уой разӕй цидӕриддӕр тугъдтитӕ адтӕй, уонӕми нӕ фӕммардӕй. Дуйней хабӕрттӕ ка фертасуй, еу уӕхӕн организаций бӕрӕггӕнӕнтӕмӕ гӕсгӕ, 1914-аг анзӕй фӕстӕмӕ тугъдтити фӕммардӕй 100 милиуан адӕймагемӕй фулдӕр. 1900-аг анзӕй 2000-аг анзмӕ тугъдтити ка фӕммардӕй, еци адӕни нимӕдзӕ ӕртӕ хатти фулдӕр ӕй, 1900-аг анзи разӕй тугъдтити ка фӕммардӕй, еци адӕни нимӕдзӕй. Расагъӕс кӕнӕ, милиуангай адӕн тугъдтити туххӕй цӕйбӕрцӕ маст ӕма рист бавзурстонцӕ!

⁷ Стонг рӕстӕгутӕ. Йесо загъта: «Адӕнбӕл ӕркӕндзӕй стонг рӕстӕгутӕ» (Матфеййи 24:7). Нур цӕйбӕрцӕ хуӕруйнаг ес, уойбӕрцӕ раздӕр некӕд адтӕй. Фал уӕддӕр берӕ адӕн ӕнцӕ хуӕруйнаг гъӕуагӕ. Цума уотӕ цӕмӕн ӕй? Уомӕн ӕма хуӕруйнаг цӕмӕй балхӕнонцӕ, е сӕмӕ нӕййес, удта син зӕнхи гӕппӕл дӕр нӕййес, цӕмӕй си ести ниййаразонцӕ. Ӕгас зӕнхӕбӕл еу миллиард адӕймагемӕй фулдӕр хъӕбӕр мӕгур цард кӕнунцӕ. Ӕнӕнездзийнадӕ гъӕуай кӕнуни ӕгасдуйнеуон организаций бӕрӕггӕнӕнтӕмӕ гӕсгӕ алли анз дӕр рамӕлуй цалдӕр милиуан сувӕллони. Ӕма сӕ фулдӕр рамӕлунцӕ, хуӕруйнаг син ке нӕ фӕффагӕ кӕнуй, уой туххӕй.

8, 9. Йесо зӕнхинкъустити ӕма незти туххӕй ци загъта, е куд ӕнхӕст кӕнуй?

 ⁸ Зӕнхинкъуститӕ. «Уодзӕй устур зӕнхинкъуститӕ» (Лукай 21:11). Ахургӕндтӕ куд зӕгъунцӕ, уомӕ гӕсгӕ алли анз дӕр цӕудзӕй берӕ устур зӕнхинкъуститӕ. 1900-аг анзӕй нурмӕ зӕнхинкъустити фӕммардӕй 2 милиуан адӕймагемӕй фулдӕр. Кӕд технологити фӕрци рагацау базонӕн ес, зӕнхинкъуст кӕд ӕма кӕми уодзӕй, уой, уӕддӕр си берӕ адӕн рамӕлуй.

⁹ Незтӕ. Йесо ма загъта, «фуднезтӕ» ке фӕззиндзӕй, гъома тагъд ка рапурхӕ уй ӕма берӕ адӕн кӕмӕй рамӕлуй, уӕхӕн незтӕ (Лукай 21:11). Кӕд дохтиртӕн берӕ незтӕ сӕ бон ӕй исдзӕбӕх кӕнун, уӕддӕр, хуасӕ кӕмӕн нӕййес, уӕхӕн незтӕ дӕр ес. Алли анз дӕр раккӕй, туберкулезӕй ӕма ӕндӕр уӕхӕн незтӕй милиуангай адӕн рамӕлуй. Уомӕй уӕлдай ма фӕстаг 40 анземӕ фӕззиндтӕй 30 нӕуӕг неземӕй фулдӕр, ӕма си кӕцидӕртӕн хуасӕ дӕр нӕййес.

10. 2 Тимофеймӕ 3:1–5 финст дзурдтӕ абони куд ӕнхӕст кӕнунцӕ?

¹⁰ 2 Тимофеймӕ 3:1–5 финст ӕй: «Фӕстаг бӕнтти искӕндзӕй хъӕбӕр уӕззау рӕстӕг». Адӕн цӕхуӕн исуодзӕнцӕ, уой туххӕй апостол Павел загъта:

• уодзӕнцӕ хеуарзон

• уодзӕнцӕ ӕхцауарзагӕ

• сувӕллӕнттӕ сӕ ниййергутӕмӕ нӕ игъосдзӕнцӕ

• уодзӕнцӕ мӕнгард

• сӕ бийнонти нӕ уарздзӕнцӕ

• хебӕл хуӕцун нӕ зондзӕнцӕ

• уодзӕнцӕ ӕнӕхатир

• ерхӕфсӕнтӕ Хуцауӕй фулдӕр уарздзӕнцӕ

• сӕхе уотӕ ӕвдесдзӕнцӕ, цума Хуцауи уарзунцӕ, фал имӕ игъосгӕ ба нӕ кӕндзӕнцӕ

11. Псаломи 92:7 куд финст ӕй, уомӕ гӕсгӕ лӕгъуз адӕн ци бауодзӕнцӕ?

¹¹ Ӕвӕдзи, ду кӕми цӕрис, уоми дӕр, ес уӕхӕн адӕн. Ӕгас зӕнхӕбӕл дӕр уӕхӕн адӕн берӕ ес. Фал тагъд Хуцау гъуддӕгтӕмӕ ӕркӕсдзӕй. Е зӕрдӕ байвардта: «Фудгӕнгутӕ кӕрдӕги хузӕн ку исзайунцӕ, ӕма,  фудгъуддӕгтӕ ка кӕнуй, етӕ дидинӕг ку ракалунцӕ, уӕд е уой туххӕй фӕууй, цӕмӕй ӕносмӕ фесӕфонцӕ» (Псалом 92:7).

12, 13. Йеговӕ нин ци балӕдӕрун кодта фӕстаг бӕнтти?

¹² Библий финст ӕрцудӕй, фӕстаг бӕнтти адӕн берӕ маст ӕма зиндзийнӕдтӕ ке ӕвзардзӕнцӕ. Фал ма си уомӕй уӕлдай финст ӕй, еци рӕстӕг хуарз хабӕрттӕ дӕр ке цӕудзӕй.

¹³ Библи хуӕздӕр лӕдӕрун райдӕдтан. Фӕстаг бӕнтти туххӕй пахампар Данел ниффинста: «Раст зонундзийнӕдтӕ исберӕ уодзӕнцӕ» (Данел 12:4). Хуцау ӕ адӕнӕн ӕнхус кӕнуй, цӕмӕй Библи лӕдӕронцӕ, раздӕр ӕй куд лӕдӕрдтӕнцӕ, уомӕй хуӕздӕр, уӕлдайдӕр ба 1914-аг анзӕй фӕстӕмӕ. Зӕгъӕн, Йеговӕ нин балӕдӕрун кодта, ӕ ном ци нисан кӕнуй, зӕнхи туххӕй  имӕ ци фӕндӕ ес, Киристей нивонди цӕмӕн ӕрхаста ӕма мӕрдти ести ес ӕви нӕ, уой. Удта ма базудтан, ка рамардӕй, уони ке райгас кӕндзӕй, уой дӕр. Уомӕй уӕлдай ма базудтан, нӕ зиндзийнӕдтӕн кӕрон ӕрмӕстдӕр Хуцауи Паддзахадӕ ке искӕндзӕй. Ба ма зудтан, амондгун цӕй фӕрци уодзиан, удта ни цӕмӕй Хуцауи зӕрдӕ рохс кӕна, уой туххӕй куд гъӕуама цӕрӕн, уой дӕр. Фал Хуцауи лӕггадгӕнгутӕ уӕхӕн гъуддӕгтӕ ке базудтонцӕ, е сӕ цӕмӕ разӕнгард кӕнуй? Аци фарстабӕл ба дзуапп дӕттуй ӕндӕр пахампарадӕ. (Кӕсӕ 21 ӕма 25 уӕлӕнхасӕнтӕ.)

14. Хуцауи Паддзахади туххӕй хуарз хабар игъустгонд кӕми цӕуй, ӕма ’й ка игъосун кӕнуй?

¹⁴ Ӕгас дуйнебӕл дӕр хуарз хабар игъустгонд цӕуй. Фӕстаг бӕнтти кой кӕнгӕй Йесо загъта: «Хуцауи Паддзахади туххӕй аци хуарз хабар игъустгонд ӕрцӕудзӕй ӕгас зӕнхи цъарӕбӕл дӕр» (Матфеййи 24:3, 14). Абони хуарз хабар игъустгонд цӕуй 240 бӕстеми, 900 ӕвзагемӕй фулдӕрбӕл. Йегови Ӕвдесӕнтӕ ӕнцӕ «ӕгас адӕнихӕттитӕй» дӕр ӕма ӕгас зӕнхӕбӕл дӕр адӕнӕн ӕнхус кӕнунцӕ, Хуцауи Паддзахадӕ ци ӕй ӕма нин ци хуарздзийнӕдтӕ искӕндзӕй, уой базонунмӕ (Раргомадӕ 7:9). Ӕма еци куст кӕнунцӕ лӕвар. Йесо куд дзурдта, уомӕ гӕсгӕ беретӕ ӕ фӕдбӕлдзӕугутӕй се ’сӕфт уинунцӕ ӕма сӕ фӕдбӕл зелунцӕ. Фал кудфӕнди ма уа, уӕддӕр игъосун кӕнуни гъуддаг неци бауорамдзӕй (Лукай 21:17).

15. а) Фӕстаг бӕнтти ке цӕрӕн, е ди ӕруагӕс кӕнуй? Кӕд гъо, уӕд цӕмӕн? б) Хуцаумӕ ка игъосуй ӕма имӕ ка нӕ игъосуй, уонӕмӕ ци ӕнгъӕлмӕ кӕсуй?

¹⁵ Фӕстаг бӕнтти ке цӕрӕн, е ди ӕруагӕс кӕнуй?  Библий фӕстаг бӕнтти туххӕй ци пахампарӕдтӕ ес, уонӕй беретӕ абони ӕцӕгӕйдӕр ӕнхӕст кӕнунцӕ. Тагъд Йеговӕ зӕгъдзӕй хуарз, хабар игъосун кӕнуни рӕстӕг ке фӕцӕй, ӕма уӕд ӕрцӕудзӕй «кӕрон» (Матфеййи 24:14). Еци кӕрон ци ӕй? Е ӕй Армагеддон. Хуцау Армагеддони фуддзийнадӕн кӕрон искӕндзӕй. Йеговӕ, Йесой ӕма ӕ хъаурӕгин изӕдти фӕрци фесафдзӕй, ӕхемӕ ӕма ӕ Фуртмӕ игъосун ке нӕ фӕндуй, уони ӕгасейдӕр (2 Фессалоникӕгтӕмӕ 1:6–9). Уой фӕсте Сайтан ӕма ӕ лӕгъуз изӕдтӕ адӕни нӕбал сайдзӕнцӕ. Хуцаумӕ игъосун ӕма ӕ Паддзахади дӕлбарӕ цӕрун ке фӕндуй, етӕ сӕхе цӕститӕй фӕууиндзӕнцӕ, Хуцау ӕ зӕрдӕвӕрдтӕ куд исӕнхӕст кӕндзӕй, уой (Раргомадӕ 20:1–3; 21:3–5).

16. Аци дуйней кӕрон хӕстӕг ке ӕй, уомӕ гӕсгӕ дӕ ци кӕнун гъӕуй?

¹⁶ Тагъд Сайтани дуйнейӕн ӕ кӕрон ӕрцӕудзӕй. Ӕма нӕ кӕд фӕндуй фӕййервӕзун, уӕд гъӕуама архайӕн, цӕмӕй Хуцауи туххӕй фулдӕр базонӕн. Йегови фӕндуй, цӕмӕй Библи хуӕздӕр базонай (Иоанни 17:3). Йегови Ӕвдесӕнтӕн алли къуӕре дӕр ци ӕмбурдтӕ фӕууй, етӕ адӕнӕн Библи хуӕздӕр балӕдӕрунмӕ ӕнхус кӕнунцӕ. Архайӕ, цӕмӕй алли ӕмбурдмӕ дӕр цӕуай. (Бакӕсӕ Дзиуиттӕгтӕмӕ 10:24, 25.) Дӕ царди дӕ цидӕртӕ раййевун ке гъӕуй, уой ку балӕдӕрай, уӕд уомӕй ма фӕттӕрсӕ. Еци ӕййивддзийнӕдти фӕрци Йеговӕмӕ хӕстӕгдӕр кӕндзӕнӕ (Иакови 4:8).

17. Кӕрон ку ’рцӕуа, уӕд е адӕнӕн сӕ фулдӕрӕн ӕнӕнгъӕлти цӕмӕн уодзӕй?

¹⁷ Апостол Павел балӕдӕрун кодта, фудгӕнгутӕн  сӕ исӕфт ку ’рцӕуа, уӕд е адӕнӕн сӕ фулдӕрӕн ӕнӕнгъӕлти ке уодзӕй – «давӕг ӕхсӕвӕ» куд ӕрбацӕуй, уотӕ (1 Фессалоникӕгтӕмӕ 5:2). Йесо ма дзурдта, беретӕ фӕстаг бӕнтти бӕрӕггӕнӕнтӕ ке нецӕмӕ ӕрдардзӕнцӕ. Ӕма загъта уӕхӕн дзурдтӕ: «Ноййи рӕстӕги куд адтӕй, уотӕ уодзӕй, Адӕймаги Фурт ку ’рцӕуа, еци рӕстӕг дӕр [гъома фӕстаг бӕнтти]. Дони хъиамӕти разӕй адӕн хуардтонцӕ ӕма ниуазтонцӕ, уоститӕ курдтонцӕ ӕма киндзи цудӕнцӕ, цалинмӕ Ной науӕмӕ нӕ бацудӕй, уӕдмӕ. Ӕма сӕмӕ нимади дӕр неци адтӕй, цалинмӕ дони хъиамӕт нӕ райдӕдта ӕма се ’гасейдӕр нӕ фӕлласта» (Матфеййи 24:37–39).

18. Йесо нӕ цӕмӕй бафӕдзахста?

¹⁸ Йесо фӕдзахста, зӕгъгӕ, уӕхемӕ кӕсетӕ, цӕмӕй уӕ зӕрдитӕ фурхуӕрдӕ, фурниуӕзтӕ ӕма царди сагъӕстӕй ма ӕруӕззау уонцӕ ӕма уӕ кӕрон ӕнӕнгъӕлти ма ӕрӕййафа, ӕма цӕмӕй «хизи бахауӕги» хузӕн ма фӕууайтӕ. Загъта ма: «Еци бон, зӕнхи цъарӕбӕл ци адӕн цӕруй, уони се ’гасейдӕр ӕрӕййафдзӕй». Ӕма уой фӕсте ӕ дзурдтӕбӕл бафтудта: «Мадта ма бафунӕй уотӕ. Алкӕддӕр зӕрдиагӕй коветӕ, цӕмӕй уӕ бон уа, ӕрцӕуйнаг ци ӕй, уони сӕрти рахезун ӕмӕ Адӕймаги Фурти рази ӕрлӕуун» (Лукай 21:34–36). Йесой фӕдзӕхстмӕ игъосун ӕхсидзгӕ цӕмӕн ӕй? Уомӕн ӕма Сайтани фуддуйнейӕн тагъд е ’сӕфт ӕрцӕудзӕй, Йегови ӕма Йесой зӕрдӕ ка рохс кӕна, етӕ ба фӕййервӕздзӕнцӕ ӕма нӕуӕг дуйней ӕносмӕ цӕрдзӕнцӕ (Иоанни 3:16; 2 Петури 3:13).