1. ¿Jachiʼ kqetaʼmaj wi ri kkʼulmataj na pa ri petinaq?

WENEʼ are chiʼ kawil ri noticias kabʼan wajun pregunta riʼ: «¿La kopan na jun qʼij che kkʼis ri itzelal pa wajun uwach Ulew riʼ?». Rumal ri kʼaxkʼolil xuqujeʼ ri itzelal jujun winaq kkichomaj che ri kʼisbʼal re ri uwach Ulew naqaj chi kʼo wi. ¿La qastzij wariʼ? ¿La kojkunik kqetaʼmaj ri kkʼulmataj na pa ri petinaq? Kojkunik. Paneʼ ri oj winaq kojkun taj kqil apan ri petinaq, Jehová kkunik krilo. Pa ri Biblia, areʼ kubʼij ri kqariq na pa ri petinaq xuqujeʼ ri kubʼan na che ri uwach Ulew (Isaías 46:10; Santiago 4:14).

2, 3. a) ¿Jas xkaj xketaʼmaj ri utijoxelabʼ ri Jesús? b) ¿Jas xubʼij Jesús chke?

² Are chiʼ ri Biblia kchʼaw chrij ri kʼisbʼal re ri uwach Ulew, kraj ta kubʼij che ksachisax uwach ri Ulew che oj kʼo wi, xaneʼ kraj kubʼij usachisaxik uwach ri itzelal. Jesús xukʼutu che ri uQʼatbʼal tzij ri Dios kuqʼat na tzij pa uwiʼ ri uwach Ulew (Lucas 4:43). Ri utijoxelabʼ xkaj xketaʼmaj jampaʼ kumaj ri uQʼatbʼal tzij ri Dios, rumal laʼ xkitaʼ che Jesús: «Bʼij la chqe, ¿jampaʼ kkʼulmax waʼ? ¿Jas ri retal ri petbʼal la? ¿Jas ri retal ri ukʼisbʼalil ri uwach Ulew?» (Mateo 24:3). Jesús xubʼij ta ri fecha chke, are kʼu xubʼij chke ri kkʼulmatajik are chiʼ naqaj chi kʼo wi ri kʼisbʼal re wajun itzel uwach Ulew. Ri xuya kan ubʼixik ri Jesús tajin kbʼantaj pa ri qaqʼij. (Chawilaʼ ri nota 24, «Ri kʼisbʼal taq qʼij»).

³ Pa wajun kʼutunem riʼ kqil na etal che kukʼutu che oj kʼo chi naqaj che ri kʼisbʼal re ri itzelal re wajun uwach Ulew riʼ. Are kʼu, rech kqachʼobʼ ri rumal che kʼo itzelal pa  ri uwach Ulew, nabʼe chojtzijon chrij jun chʼoj che xbʼan pa ri kaj.

4, 5. a) ¿Jas xkʼulmataj pa ri kaj chiʼ Jesús xumaj uqʼatik tzij? b) Junam rukʼ ri kubʼij Apocalipsis 12:12, ¿jas xkʼulmataj cho ri uwach Ulew are chiʼ Jesús xresaj lo ri Satanás pa ri kaj?

⁴ Pa ri kʼutunem 8 xqetaʼmaj che Jesús xumaj uqʼatik tzij pa ri kaj pa ri junabʼ 1914 (Daniel 7:13, 14). Ri wuj re Apocalipsis kubʼij ri xkʼulmatajik: «Xbʼan jun nimalaj chʼoj pa ri kaj. Are ri Miguel xuqujeʼ ri utaqonibʼ ajkaj xechʼojin rukʼ ri dragón. Ri dragón xuqujeʼ ri utaqonibʼ xechʼojinik». Miguel * are Jesús, ri dragón are Satanás. Satanás xuqujeʼ ri demonios xkichʼak ta ri chʼoj rumal laʼ xekʼaq lo cho ri uwach Ulew. ¡Qastzij riʼ che xekikot ri ángeles! Are kʼu ¿jas xkʼulmataj cho ri uwach Ulew? Ri Biblia kubʼij che ri e winaq kkiriq kʼax. ¿Jasche? Rumal che ri Itzel sibʼalaj petinaq royowal xuqujeʼ retaʼm che «xa kebʼ oxibʼ qʼij chik kʼolik» (Apocalipsis 12:7, 9, 12).

⁵ Ri Itzel tajin kukoj uchuqʼabʼ che ubʼanik itzelal cho ri uwach Ulew. Sibʼalaj petinaq royowal rumal che retaʼm che xa jubʼiqʼ chi tiempo yaʼom che rumal ri Jehová rech kubʼan itzelal cho ri uwach Ulew. Chqilaʼ ri xubʼij kan Jesús che kkʼulmataj na pa ri kʼisbʼal taq qʼij.

6, 7. ¿Jas kojkunik kqabʼij chrij ri chʼoj xuqujeʼ ri wiʼjal pa taq ri qʼij kimik?

⁶ Chʼoj. Jesús xubʼij: «Kwalij na jun nim tinamit chrij jun nim tinamit chik. Kwalij na jun ajawbʼal chrij jun ajawbʼal chik» (Mateo 24:7). Kimik más e kʼi winaq e kaminaq  pa taq ri e chʼoj chuwach ri e bʼanom kan ojer. Junam ri kubʼij jun organización che kunikʼoj ri kʼulmatajinaq pa ronojel ri uwach Ulew, más che 100 millones winaq e kaminaq rumal ri chʼoj che umajim lo pa ri 1914. Pa ri junabʼ 1900 kopan pa 2000, kraj kubʼij che xaq xiw pa 100 junabʼ, xekam sibʼalaj e kʼi winaq rumal ri chʼoj chuwach ri junabʼ che e qʼaxinaq kanoq. Chatchoman chrij ri kʼaxkʼolil xuqujeʼ ri bʼis xkiriq e kʼi winaq.

⁷ Wiʼjal. Jesús xubʼij: «Pa jalajoj taq kʼolbʼal kepe na wiʼjal» (Mateo 24:7). Paneʼ kimik kʼo kʼi ktijowik, e kʼi winaq kkiriq numik ronojel taq qʼij. ¿Jasche? Rumal che kʼo ta kirajil che uloqʼik ri kiwa o kʼo ta kulew rech kkitik uwach. Pa ri uwach Ulew 1 chke e 10 winaq sibʼalaj e mebʼaʼ. Xuqujeʼ, ri Organización Mundial de la Salud kubʼij che millones akʼalabʼ kekam ronojel taq junabʼ rumal che qas ta kʼo kkitijo.

8, 9. a) ¿La kʼulmatajinaq ri xubʼij Jesús chrij ri kabʼraqan? b) ¿Jas kojkunik kqabʼij chrij ri e yabʼil?

⁸ Kabʼraqan. Jesús xuya ubʼixik: «Kubʼan na nimaʼq taq kabʼraqan» (Lucas 21:11). Xumaj lo  pa ri junabʼ 1900, e kaminaq más che dos millones winaq rumal ri kabʼraqan. Xuqujeʼ ronojel taq junabʼ kubʼan na nimaʼq taq kabʼraqan. Paneʼ ri tecnología che kʼo kimik kubʼij chiʼ majaʼ kpe jun kabʼraqan, are kʼu amaqʼel e kʼi winaq kekamik.

⁹ Yabʼil. Jesús xubʼij che kriqitaj na «yabʼil», kraj kubʼij, itzel taq yabʼil che chanim kqʼax chke nikʼaj winaq chik xuqujeʼ e kʼi keʼukamisaj (Lucas 21:11). Paneʼ ri e kunanelabʼ kiriqom ukunabʼalil kʼi chke ri e yabʼil, are kʼu kiriqom ta kunabʼal che ronojel uwach yabʼil. Jun kʼutbʼal, jun informe kubʼij che ronojel junabʼ sibʼalaj e kʼi winaq kekam rumal ri tuberculosis, cólera, malaria o (paludismo), cáncer xuqujeʼ yabʼil re ri animaʼ. Xuqujeʼ, pa ri kʼisbʼal taq 40 junabʼ xriqitaj chi más che 30 kʼakʼ taq yabʼil che kʼo ta ukunabʼalil.

10. Junam ri kubʼij 2 Timoteo 3:1-5, ¿jas kibʼantajik ri winaq pa ri kʼisbʼal taq qʼij?

¹⁰ Ri Biblia kubʼij pa 2 Timoteo 3:1-5: «Pa ri kʼisbʼal taq qʼijol, kepe na kʼaxalaj taq qʼij». Ri  apóstol Pablo xubʼij che ri winaq pa ri kʼisbʼal taq qʼij jeʼ kibʼantajik wariʼ:

• Kkiloqʼoqʼej kibʼ chbʼil kibʼ.

• Kkiloqʼoqʼej ri pwaq.

• Keniman ta chke ri kitat kinan.

• Chʼajchʼoj ta ri kikʼaslemal.

• Kʼo ta loqʼoqʼebʼal kikʼuʼx.

• Kkijikʼ ta kibʼ.

• E kʼanalaj taq winaq xuqujeʼ sibʼalaj kechʼayanik.

• Más kkiloqʼoqʼej ri kirayibʼal chuwach ri uloqʼoqʼexik ri Dios.

• Kkibʼij che kkiloqʼoqʼej ri Dios, are kʼu kkinimaj taj.

11. Junam rukʼ ri kubʼij Salmo 92:7, ¿jas kkʼulmataj na kukʼ ri itzel taq winaq?

¹¹ ¿La jeʼ kibʼantajik ri e winaq che e kʼo pa ri tinamit jachiʼ at kʼo wi? E kʼo kʼi winaq jeʼ kibʼantajik. Are kʼu xa jubʼiqʼ chi kraj ri Dios kusukʼumaj na wariʼ. Areʼ kutzujuj: «We ri e bʼanal taq itzelal xuqujeʼ ri e itzel taq winaq kekʼiyik e jachaʼ ri qʼayes, utz  kʼu keʼelik, xa che usachisaxik kiwach chbʼe qʼij saq». Wariʼ kraj kubʼij che ri e itzel taq winaq ksachisax na kiwach (Salmo 92:7).

12, 13. ¿Jas ukʼutum ri Jehová chqawach pa ri e kʼisbʼal taq qʼij?

¹² Bʼim kan pa ri Biblia che pa ri kʼisbʼal taq qʼij kriqitaj na qʼoxom xuqujeʼ kʼaxkʼolil cho ri uwach Ulew. Are kʼu xuqujeʼ kriqitaj na kʼi utzalaj taq jastaq.

¹³ Kchʼobʼtaj ri kubʼij ri Biblia. Are chiʼ ri profeta Daniel xutzʼibʼaj chrij ri kʼisbʼal taq qʼij, xubʼij: «Ukʼiyirisaxik taq ri ketaʼmanik» (Daniel 12:4). Wariʼ kraj kubʼij che ri Dios kuya tobʼanik che ri utinamit rech qas kuchʼobʼ ri kubʼij ri Biblia. Pa 1914 xmajix lo utzʼaqatisaxik ri e tzij riʼ. Jun kʼutbʼal, Dios ukʼutum chqawach ri ubʼiʼ xuqujeʼ ri kraj kubʼan che ri uwach Ulew. Xuqujeʼ ukʼutum chqawach ri qastzij chrij ri ukamikal ri Jesús che xutoj ri qamak, ri kkʼulmatajik are chiʼ kojkamik xuqujeʼ ri eyebʼal re ri kʼastajibʼal. Qetaʼm chik che xaq xiw ri uQʼatbʼal tzij ri Dios kkunik kusukʼumaj ronojel ri e kʼax che kqariqo. Xuqujeʼ qetaʼm chi ri kqabʼano rech kojkikotik xuqujeʼ kqabʼan pa qakʼaslemal ri utz kril ri Dios. Are kʼu ¿jas kkibʼan ri upatanelabʼ ri Dios rukʼ ri kketaʼmaj? Jun chi profecía kuya ri respuesta. (Chawilaʼ ri nota 21, «Ri tojbʼal mak», y 25, «Ri kʼastajibʼal»).

14. ¿Jachiʼ tajin ktzijox wi ri «utzalaj taq tzij riʼ re ri rajawbʼal ri Dios», xuqujeʼ e jachin tajin kebʼanow wajun chak riʼ?

¹⁴ Ktzijox ri utzij ri Dios pa ronojel uwach Ulew. Chiʼ xchʼaw chrij ri e kʼisbʼal taq qʼij, Jesús xubʼij: «We utzalaj taq tzij riʼ re ri rajawbʼal ri Dios ktzijox na pa ronojel ri uwach Ulew» (Mateo 24:3, 14). Ri e utzalaj taq tzij re ri uQʼatbʼal tzij ri Dios tajin kyaʼ ubʼixik pa más che 240 nimaʼq taq tinamit xuqujeʼ alaj taq tinamit, xuqujeʼ pa más che 1.000 chʼabʼal. Pa ronojel uwach Ulew, ri testigos rech Jehová re  «ronojel kiwach taq tinamit, amaqʼ, winaqil, chʼabʼal» tajin kekitoʼ ri winaq che uchʼobʼik ri uQʼatbʼal tzij ri Dios xuqujeʼ ri kubʼan na pa kiwiʼ ri winaq (Apocalipsis 7:9). Ri Testigos xa ta ketojik chiʼ kkibʼan wariʼ. Junam ri xubʼij kan ri Jesús, e kʼi winaq itzel kkilo xuqujeʼ kbʼan kʼax chke. Are kʼu kʼo ta kqʼaten utzijoxik utzij ri Dios (Lucas 21:17).

15. a) ¿La kakojo che oj kʼo chi pa ri kʼisbʼal taq qʼij, xuqujeʼ jasche jeʼ kachomaj? b) ¿Jas kkʼulmataj kukʼ ri winaq che keniman ta che ri Dios, xuqujeʼ kukʼ ri kenimanik?

¹⁵ ¿La kakojo che oj kʼo chi pa ri kʼisbʼal taq qʼij? Tajin ketzʼaqat kʼi profecías che kʼo pa ri Biblia chrij ri kʼisbʼal taq qʼij. Pa kebʼ oxibʼ qʼij, Jehová kubʼij che ktzijox ta chi ri utzalaj taq tzij, «kʼateʼ riʼ, kpe ri kʼisbʼal» (Mateo 24:14). ¿Jas riʼ ri kʼisbʼal? Are ri nimalaj chʼoj ubʼiʼ Armagedón, pa wajun chʼoj riʼ ri Dios kusachisaj uwach ronojel ri kʼaxkʼolil. Jehová kukoj ri Jesús xuqujeʼ ri ángeles rech kkisachisaj kiwach ri keniman ta che areʼ xuqujeʼ che ri uKʼojol (2 Tesalonicenses 1:6-9). Are chiʼ qʼaxinaq chi ri Armagedón, Satanás xuqujeʼ ri udemonios kekun ta chik kekisubʼ ri e winaq. Konojel ri keniman che ri Dios xuqujeʼ ri keʼux sukʼ che ri uQʼatbʼal tzij kkil na ri kubʼan ri Dios che utzʼaqatisaxik ri utzujum (Apocalipsis 20:1-3; 21:3-5).

16. Rumal che ri kʼisbʼal naqaj chi kʼo wi, ¿jas rajawaxik kabʼano?

¹⁶ Ri ukʼistajik ri kʼax re wajun uwach Ulew che kʼo pa uqʼabʼ ri Satanás naqaj chi kʼo wi. Rumal laʼ sibʼalaj nim ubʼanik che katchoman chrij ri rajawaxik kabʼano. Jehová kraj che kakoj achuqʼabʼ che retaʼmaxik ronojel chrij ri Biblia. Rumal laʼ, kaya ta kan retaʼmaxik chrij ri Biblia (Juan 17:3). Xuqujeʼ, ri testigos rech Jehová kkimulij kibʼ ronojel taq semanas. Pa ri kiriqbʼal ibʼ, kekitoʼ ri winaq rech kkichʼobʼ ri kukʼut ri Biblia. Chakojoʼ achuqʼabʼ rech amaqʼel katkʼojiʼ kukʼ pa ri e riqbʼal ibʼ (chasikʼij uwach Hebreos  10:24, 25). We kawilo che rajawaxik kakʼex jujun jastaq pa ri akʼaslemal, kubʼan ta kebʼ akʼuʼx che ubʼanik. Are chiʼ kakʼex ri e jastaq riʼ, ri awachilanik rukʼ ri Dios kubʼan más nim (Santiago 4:8).

17. ¿Jasche e kʼi winaq kkixibʼij kibʼ are chiʼ kopan ri kʼisbʼal?

¹⁷ Ri apóstol Pablo xubʼij che ri usachisaxik kiwach ri itzel taq winaq «jeʼ upetik jas ri elaqʼom chaqʼabʼ», are chiʼ kʼo ta jun winaq reyem (1 Tesalonicenses 5:2). Jesús xubʼij kanoq che e kʼi winaq kkikoj taj che oj kʼo chi pa ri kʼisbʼal taq qʼij. Xchʼaw chrij ri e qʼij kimik, Jesús xubʼij: «Jeʼ jas pa taq ri uqʼijol ri Noé, jeriʼ ri upetik ri Rijaʼl winaq. Jeʼ jas pa taq ri qʼij riʼ, kʼa majoq ri nimalaj qʼeqal jabʼ, ri winaq katajin kewaʼik, katajin keʼukʼiʼanik, katajin kekʼuliʼk, katajin kekikʼulbʼaʼ ri kalkʼwal, kʼa pa ri qʼij are taq ri Noé xok pa ri nim jukubʼ. Man ketaʼm taj kʼa xpe na ri nimalaj qʼeqal jabʼ, konojel kʼut xekʼam bʼik rumal ri jaʼ. Jeriʼ xuqujeʼ ri upetik ri Rijaʼl winaq» (Mateo 24:37-39).

18. ¿Jas pixabʼ xuya Jesús chqe?

¹⁸ Jesús xuya ubʼixik «miwalobʼisaj ri iwanimaʼ chupam ri munil, mixqʼabʼarik» o «mixok il che ri jastaq re we kʼaslemal riʼ», rumal che kubʼano che kojchoman ta chi chrij ri qakojonik. Xubʼij che ri kʼisbʼal «xaq kʼatetal» kpe pa kiwiʼ konojel ri winaq pa ri uwach Ulew. Xuqujeʼ xubʼij: «Xaq bʼaʼ chixkʼol sukʼumatalik, chibʼanaʼ chʼawem rukʼ Dios ronojel joqʼotaj, rech kixkunik kixtoʼtajik man keʼiqajbʼej ta kʼut we jastaq riʼ ri kekʼulmataj na kixkun kʼu riʼ kitakʼabʼa iwibʼ chuwach ri Rijaʼl Winaq» (Lucas 21:34-36). ¿Jasche nim ubʼanik qas kqanimaj ri e pixabʼ xuya ri Jesús? Rumal che xa pa kebʼ oxibʼ qʼij chik ksachisax kiwach ri itzel taq winaq che e kʼo pa uqʼabʼ ri Satanás. Xaq xiw ri e winaq che keqaj chuwach ri Jehová xuqujeʼ ri Jesús kekʼasiʼ kan pa ri kʼisbʼal xuqujeʼ kkʼojiʼ na kikʼaslemal che kʼo ta ukʼisik pa ri kʼakʼ uwach Ulew (Juan 3:16; 2 Pedro 3:13).