1. ¿Pillan willawanchis jamuq tiempopi imachus pasananta?

NOTICIATA uyarispaqa tapukurankichá: “¿Imapin kay pacha tukunqa?”, nispa. Imaymanan pasashan millay kausaypas astawanmi yapakushan. Chaymi askha runakuna piensanku kay pachaq tukukuynin cercapiña kashasqanta. ¿Cheqaqchu chay kanman? ¿Pin willawasunman jamuq tiempopi imachus pasananta? Jehová Diosllan Bibliapi willawanchis, runaqa manan chay ruwayta atisunmanchu (Isaías 46:10; Santiago 4:14).

2, 3. a) ¿Imatan Jesuspa discipulonkuna yachayta munaranku? b) ¿Ima nispan Jesús kutichiran?

² Bibliapi kay pachaq tukupunanmanta rimaspaqa manan kay allpa thunisqa kananmantachu riman, aswanpas millay ruwaykunaq tukupunanmantan. Jesusmi willaran Diospa gobiernon kay allpata kamachinanta (Lucas 4:43). Jayk’aqchus chay gobierno chayamunanta yachayta munaspan discipulokunaqa Jesusta tapuranku: “Niwayku, ¿jayk’aqmi chaykuna kanqa? ¿Ima señalmi kanqa chayamusqayki tiempoña kashaqtin, kay tiempopas tukukapunanpaqña kashaqtin?”, nispa (Mateo 24:3). Jesusqa manan willaranchu ima fechapi chayamunanta, ichaqa willaranmi manaraq chayamushaqtin imakuna pasananmanta. Chayqa kay tiempopin junt’akushan (qhaway 24 willakuyta).

³ Kashanmi pruebakuna tukukuy tiempopi kashasqanchismanta, chaytan kunan yachasun. Ñaupaqta yachasun  janaq pachapi jatun guerra kasqanmanta, chayta yachaspan entiendesun imarayku sinchi millay kausay kashasqanta.

4, 5. a) ¿Iman pasaran janaq pachapi Jesús kamachiyta qallarisqan qhepaman? b) Apocalipsis 12:12 nisqanman jina, ¿iman kay allpapi pasaran Satanasta wijch’uykamuqtinku?

⁴ Jesusqa 1914 watapin janaq pachapi kamachiyta qallariran, chaytan 8 capitulopi yacharanchis (Daniel 7:13, 14). Apocalipsis libron nin: “Janaq pachapitaq juj guerra qallariran, Miguelmi angelninkunapiwan dragonwan maqanakuran, dragontaq angelninkunapiwan paykunawan maqanakuran”, nispa. Miguelqa Jesusmi, * dragontaq Satanás. Atipachikuspankun Satanaspas angelninkunapas allpaman wijch’uykamusqa karanku. ¡Janaq pachapi angelkunaqa anchatan kusikuranku! Runakunan ichaqa sinchi problemakunapi tarikunanku karan Satanás sinchi phiñasqa uraykamusqanrayku, ‘tiempon pisillaña kasqanrayku’ ima (Apocalipsis 12:7, 9, 12).

⁵ Satanasqa tukuytan ruwashan runata sufrichinanpaq. Diosmi ichaqa pisi tiempollaña permitinqa, chaymi Satanasqa sinchi phiñasqa kashan. Jesusqa willaranñan tukukuy p’unchaykunapi imachus pasananta, chaytan qatimuqpi yachasun.

6, 7. ¿Imaynatan kay tiemponchispi junt’akushan guerrakunamanta yarqaymanta Jesuspa willasqan profeciakuna?

⁶ Guerrakuna. Jesusmi niran: “Juj nacionmi juj nación contra jatarinqa”, nispa (Mateo 24:7). Kay tiempopin aswan askha runakuna guerrakunapi wañuranku.  Primer siglomanta 1914 watakamaqa 1.900 watakunan pasaran, chay watakunapin 30 millón runakuna wañuranku. 1914 watamanta 2000 watakamataq yaqa 100 wata pasaran, chaypin ichaqa 100 millón runakuna wañuranku, chayqa nishupunin. ¡Imaynataraqchá runakunaqa sufriranku chay guerrakunaq kasqanwan!

⁷ Yarqay. Jesusmi niran: “Kayneqpi chayneqpin kanqa yarqaypas”, nispa (Mateo 24:7). Jesuspa nisqanqa junt’akushanmi, askha runakunan yarqaypi kashanku. Wakinpaqqa manan qolqenku kanchu mijuyta rantinankupaq otaq mana allpanku kanchu chajrapi llank’anankupaq. Mundontinpiqa waranqa millón más runakunan pobre kanku. Jinaspapas sapa watanmi millonninpi wawakuna yarqaymanta wañunku.

8, 9. a) ¿Imaynatan junt’akuran terremotokunamanta Jesuspa willasqan profecía? b) ¿Imaynatan junt’akuran onqoykunamanta Jesuspa willasqan profecía?

⁸ Terremotokuna. Jesusmi niran: “Kallanqataqmi jatun terremotokunapas”,  nispa (Lucas 21:11). Sapa watanmi kashan jatun terremotokuna. 1900 watamantapachan iskay millón más runakuna jatun terremotokunapi wañuranku. Aparatokunawanña terremotokunata detectanku chaypas, askha runakunan terremotokunapi wañushanku.

⁹ Onqoykuna. Jesusmi willaran “millay onqoykuna” mast’arikuspa askha runakunata wañuchinanta (Lucas 21:11). Askha onqoypaqña doctorkuna jampita tarinku chaypas wakin onqoykunapaqqa manan jampi kanchu. Sapa watanmi askha runakuna wañunku cáncer, tuberculosis, juj onqoykunawanpas. Jinaspapas 30 onqoykunan rijurimuran, chay onqoykunamanta wakinpaqqa manan jampi kanchu.

10. 2 Timoteo 3:1-5 nisqanman jina, ¿imaynan runakuna tukukuy p’unchaykunapi kananku karan?

¹⁰ Bibliapin 2 Timoteo 3:1-5 textopi nin: “Tukukuy p’unchaykunataqa  manchakuy sinchi sasa tiempokunan chayamunqa”, nispa. Apóstol Pablon willaran runakuna imayna kanankuta, niranmi runakunaqa kanqaku:

• Paykuna kikinkuta munakuqkuna.

• Qolqe sonqokuna.

• Tayta-mamankuta mana kasukuqkuna.

• Jujkunapaq mana junt’aq kaqkuna.

• Familiankuta mana munakuqkuna.

• Cuerponkuta mana kamachiqkuna.

• K’araq sonqokuna.

• Diosta kusichinankumantaqa aycha kusichiyllapi puriyta munaqkuna.

• Dios sonqo runaman rijch’akuqkuna.

11. Salmos 92:7 textopi nisqanman jina, ¿iman pasanqa millay runakunawan?

¹¹ ¿Chhaynachu runakuna kay tiempopi kanku? Arí. Mundontinpin askha runakuna chhayna kanku, Diosmi ichaqa mana jinallatachu qhawanqa. Paymi nin: ‘Millay runakunachus qora  jina phutumunku chayqa, tukuy mana chaninta ruwaqkunachus llanllarinku chayqa, wiñaypaq ch’usaqyachisqan kanqaku’, nispa (Salmos 92:7).

12, 13. ¿Imatan Jehová Dios yachachiwaranchis tukukuy p’unchaykunapi?

¹² Bibliaqa willaranñan tukukuy p’unchaykunapi sufrimientopas nanaypas kananta, ichaqa allin ruwaykunapas kananmi karan.

¹³ Bibliaq nisqantan entiendekunan karan. Profeta Danielmi willaran tukukuy p’unchaykunapi yachayniyoqkuna cheqaq kaqta ‘entiendenanku’ kasqanta (Daniel 12:9, 10). Tukukuy p’unchaykunapin Diosqa llaqtanta yanapanan karan Bibliaq nisqanta entiendenankupaq. Chayqa 1914 watamantapachan junt’akushan. Ejemplopaq, yachachiwaranchismi imarayku Diospa sutinta utilizananchis kasqanta, imata kay allpapaq munasqanta, Jesuspa wañusqanmanta, wañuqkunawan ima pasasqanta, kausarimpuymanta, problemanchiskunata Diospa gobiernon allichananmanta, imaynata kusi kausayta tarinamanta, imaynata Diospa munasqanman jina kausanamantawan. Ichaqa, ¿imatan ruwanchis yachasqanchiswan? Juj profecian chayta kutichiwasun (21, 25 willakuykunata qhaway).

14. ¿Jayk’a nacionpin “Diospa gobiernonmanta allin willakuykunata” predicakushan? ¿Pikunan chayta ruwashanku?

¹⁴ Pachantinpin predicakunan karan. Tukukuy p’unchaykunamanta rimaspan Jesús niran: “Diospa gobiernonmanta allin willakuykunan pachantinpi willasqa kanqa”, nispa (Mateo 24:3, 14). Allin willakuykunaqa 230 más nacionkunapin predicakushan 700 más  simikunapi. Diospa testigonkunaqa ‘lliu nacionkunamanta, ayllukunamantan’ kanku, chaymi runakunata yanapashanku imas Diospa gobiernon imatas chay gobierno ruwanqa chayta entiendenankupaq (Apocalipsis 7:9). Chaytaqa gratisllan ruwanku, cheqnisqaña qatikachasqaña kaspapas predicashallankun (Lucas 21:17).

15. a) ¿Imaraykun seguro kashanki tukukuy p’unchaykunapi kausashasqanchista? b) ¿Iman pasanqa Diosta mana kasukuq runakunawan? ¿Kasukuq runakunawanri?

¹⁵ Qhawarisqaykiman jina, ¿tukukuy p’unchaykunapiñachu kausashanchis? Askha profeciakunañan junt’akushan. Pisi tiempollamantan Diosqa ninqa amaña predicanankupaq, “jinan tukukuyqa chayamunqa” (Mateo 24:14). ¿Imataq chay tukukuyri? Chayqa Diospa jatun guerranmi, chay guerratan “Armagedón” nispa nikun. Jesusmi angelninkunawan llapa mana kasukuq runakunata wañuchipunqa (2 Tesalonicenses 1:6-9). Chay qhepamanqa manañan Satanaspas supayninkunapas runakunata engañanqakuchu. Diosta kasukuspa gobiernonta apoyaq runakunan ichaqa rikunqaku promesankunata Dios junt’asqanta (Apocalipsis 20:1-3; 21:3-5).

16. ¿Imatan ruwanayki kay pachaq tukukuynin cercapiña kashasqanta yachaspa?

¹⁶ Satanaspa kamachisqan pachaqa tukupunqañan. Noqanchisqa manan munanchischu wañuyta. Chhaynaqa kallpachakunaykin Diosta reqsinaykipaq, payqa munanmi Bibliamanta allinta yachanaykita (Juan 17:3). Jehová Diospa testigonkunaqa sapa semananmi juñunakunku. Chaymi runakunata yanapan Bibliata allinta entiendenankupaq. Kallpachakuy juñunakuykunaman rinaykipaq (leey Hebreos 10:24, 25). Sichus  vidaykipi cambianayki kasqanta reparanki chayqa kallpachakuy cambianaykipaq. Chayta ruwanki chayqa astawanmi Jehová Dioswan amigontin kanki (Santiago 4:8).

17. ¿Imaynatan kay millay pachaq tukukuynin chayamunqa?

¹⁷ Apóstol Pablon willaran millay runakunaq tukukuyninqa ‘suwa jina qonqaylla chayamunanta’ (1 Tesalonicenses 5:2). Jesusmi willaranña runakunaqa tukukuy p’unchaymanta pruebakunata rikushaspapas mana kasukunankuchu kasqanta. Niranmi: “Imaynan Noepa p’unchayninkunapi karan chhaynallataqmi runaq Churinpa chayamusqan tiempopipas kanqa. Chay p’unchaykunapin manaraq jatun para chayamushaqtin runakuna mijusharanku, ujasharanku, qharikunapas warmikunapas casarakusharanku Noepa arcaman jaykusqan p’unchaykama, manataq imatapas repararankuchu jatun para chayamuspa llapankuta millp’unankama”, nispa (Mateo 24:37-39).

18. ¿Imatan Jesús kamachiwaranchis?

¹⁸ Jesusmi kamachiran ama sinchi mijuypi, sinchi ujaypi, kay kausaypa llakipakuyninkunawan afanasqa kananchista. Payqa willaranñan tukukuy ‘qonqaylla chayamunanta’. Chaymantapas niranmi: “Rijch’ashaqlla kashaychis Diosmanta tukuy tiempo rogakuspa, chhaynapi llapa chaykuna pasananmanta salvasqa kanaykichispaq, runaq Churinpa ñaupanpi sayanaykichispaqwan”, nispa (Lucas 21:34-36). Pisillamantan Satanaspa kamachisqan pachaqa chinkachisqa kanqa, chaymi Jesuspa nisqanta kasunanchis. Diosta Jesustawan kasukuq runakunallan salvasqa kanqaku, paraisopitaq wiñaypaq tiyanqaku (Juan 3:16; 2 Pedro 3:13).