1. Shamuj punllacunapi ima tucunataca ¿maipita yachajui ushapanchi?

TELEVISIONBI, radiopi noticiacunata uyashpaca ¿nachu cai mundoca imashi tucunga nishpa tapurishcangui? Cunanbi jatun llaquicuna, nali ruraicuna tiajpimi huaquingunaca nin, cai mundoca ñallami tucuringa nishpa. ¿Chaica ciertocha can? ¿Shamuj punllacunapi ima tucunata yachai ushanchichu? Ari. Shamuj punllacunapi ima tucunata gentecuna na yachajpipash, Jehová Diosca yachanmi. Diosca Bibliapimi shamuj punllacunapi imashina causanata, cai Alpa ima tucunatapash yachachin (Isaías 46:10; Santiago 4:14).

2, 3. Jesuspa catijcunaca ¿imatata tapurca? Jesusca ¿imata nirca?

² Bibliapi tucuri punlla chayamunga nishpaca cai Alpa tucurinataca na nijunllu. Nali ruraicuna tucurinatami nijun. Chaimandami Jesusca Diospa Reino cai Alpata mandanga nishpa gentecunamanga yachachirca (Lucas 4:43). Jesuspa catijcunaca Diospa Reinoca ima horashi mandai callaringa nishpami cashna tapunajurca: “¿Ima horata chashna ninan llaquicunaca tianga? ¿Ima llaquita ricushpata, can shamuna punlla chayamujujtapash, cai pacha tucurinatapash yachashun?” nishpa (Mateo 24:3). Jesusca chai punlla ima horapacha canataca na villarcachu. Shinapash, tucuri punlla chayamujujpi imacunalla pasanatami villarca. Cunanbimi Jesuspa nishcacunaca pactarijun.

³ Cai capitulopimi yachajushun, tucuri punlla ña chayamuna tiempopi causajushcata. Chaipaca, jahua cielopi shuj guerra tiashcatami yachajushun. Shinami cai Alpapi llaquicuna imamanda mirashcata intindishun.

4, 5. a) Jesús Rey shina mandai callarishca jipaca ¿imata cielopica tucurca? b)  Apocalipsis 12:12​pica cai Alpapi ¿ima tucunatata nirca?

⁴ Capítulo 8​pica yachajurcanchimi, 1914 huatapi Jesús Rey shina jahua cielopi mandai callarishcata (Daniel 7:13, 14). Apocalipsis libropica ninmi: ‘Jahua pachapica jatun macanajuimi tiarca. Miguel shuti angelca [Jesús], paipa angelcunandimi, dragonhuan [o Diablohuan] macanajurca. Shinallata dragonbash, paipa angelcunandimi macanajurca’ nishpa. * Jesús macanajushpaca Diablota mishashpami nali angelcunandi cai Alpaman shitamurca. Chaita ricushpaca jahua cielopi ali angelcunaca ninandami cushijushcanga. Shinapash, cai Alpapi causajcunahuanga ¿imata tucugrijurca? Bibliapi nishca shinaca, gentecunaca ashtaca llaquicunahuanmi causana carca. ‘Diabloca paipa punllacuna tucurijujta yachashpami ninanda fiñarishca’ (Apocalipsis 12:7, 9, 12).

⁵ Diabloca paipa ruraicunata Jehová Dios ñalla tucuchinata yachashpami ninanda culirashpa cai Alpapi gentecunata llaquichijun. Shinaca, tucurimui punllacunapi ima pasanamanda Jesús yachachishcata ricushun. (Página 221​pi nota 24​ta.ricupangui.)

6, 7. Jesuspa nishca shimicunaca ¿imashinata pactarijun?

⁶ Guerracuna. Jesusca nircami: “Shuj llactapi mandajcunahuan, chaishuj llactapi mandajcunahuan, llactacunata jatun mandajpuracunapash macanajungami” nishpa (Mateo 24:7). Cai último huatacunapimi guerracunapi ashtahuan gentecuna huañushca. Mundo enteropi imacunalla  pasajta investigaj organización nishca shinaca, 1914 huatamanda cunangamanga 100 millón yali gentecunami guerracunapi huañushca. 1900 huatamanda 2000 huatacamanga tucui huatacunamanda ashtahuan yalimi gentecunaca huañushca. Guerracuna tiashcamandami ashtaca gentecunaca ninanda sufrishpa causan.

⁷ Yarjaicuna. Jesusca nircami: ‘Ninan yarjaipash tiangami’ nishpa (Mateo 24:7). Cunanbi ashtaca micuna tiajpipash ashtaca gentecunaca imata micungapajpash na charinllu. Ashtaca gentecunaca tarpungapaj alpata, micunata randingapaj culquita na charimandami yarjai yalin. Shujcunacarin punllapa shuj dolartallapash na charinllu. Organización Mundial de la Saludca ninmi, cada huatami ashtaca huahuacuna micuna illajpi, yarjaimanda padicishpa huañun nishpa.

8, 9. ¿Imatata terremotocunamanda, ungüicunamanda Jesusca nirca?

⁸ Terremotocuna. Jesusca nircami: ‘Alpa mama chujchuipash tiangami’ nishpa (Lucas 21:11). Cunanbica cada huatami ashtahuan  terremotocuna tian. 1900 huatamanda cunangamanga ushashcata alpa mama cuyujpimi 2 millón yali gentecuna huañushca. Cunan punllacunapi terremotocuna ima hora tianata yachangapaj tecnología tiajpipash, gentecunaca terremotocunapi huañushpa catinrami.

⁹ Ungüicuna. Jesusca nircami: “Millai ungüicunapash” tiangami nishpa. Millai ungüicuna ñapash mirajpimi ashtaca gentecuna huañun (Lucas 21:11). Doctorcuna ashtaca ungüicunata imashina jambinata yachajpipash, huaquin ungüicunapaca jambi illanmi. Shuj investigacionda rurashpaca nircami, cada huatami ashtaca gentecuna tuberculosis, cólera, cáncer ungüihuan huañun nishpa. Cai último 40 huatacunapica, doctorcunaca 30 yali mushuj ungüicuna tiajtami yachaj chayashca. Huaquin ungüicunapaca jambi na tianllu.

10. ¿Imashinata 2 Timoteo 3:1-5​pi shimicunaca cunanbi pactarijun?

¹⁰ Bibliapi 2 Timoteo 3:1-5​pica  ninmi: “Tucurimui punllacunapica, jatun llaquicunami shamunga” nishpa. Apóstol Pabloca tucurimui punllacunapi imashina gentecuna tianatami escribirca. Paica nircami:

• paicunalla ali cangapaj munajcuna

• charijyangapaj munajcuna

• taitamamata na cazujcuna

• Diosta na manllajcuna

• familiata na juyajcuna

• ima munashcata rurajcuna

• nali, millai gentecuna

• Diosta na juyashpa, yanga causaita juyajcuna

• Diosta juyanshnalla ricurishpapash, Diosta na cazujcuna

11. Salmo 92:7​pi shimicunaca ¿imashinata pactarijun?

¹¹ Shina nali gentecuna tiajtaca ¿nachu quiquinbash ricushcangui? Tucui ladocunapimi shina gentecunaca tian. Shinapash, Taita Diosca ñallami nali ruraicunataca tucuchinga. Paica ninmi: ‘Na manllajcunaca jihuashna viñashca cashpapash, nalita tucui rurajcunaca sisanshna cashpapash, causaita causaicamanmi tucuchi tucunga’ nishpa (Salmo 92:7).

12, 13. Tucurimui punllacunamandaca ¿imatata Jehová Diosca yachachishca?

¹² Bibliapica nircami, tucurimui punllacunapica ashtaca llaquicuna, nali cosascunami mundo enteropi tianga nishpa. Shinapash, Bibliapica tucurimui punllacunapi ali villaicuna tianatapashmi villan.

¹³ Bibliata ali intindina. Profeta Daniel tucurimui punllacunamanda escribishpaca nircami: ‘Diosmanda yachajunapash ninandami miranga’ nishpa (Daniel 12:4). Jehová Diosca paipa sirvijcuna Bibliata ashtahuan ali intindichunmi ayudagrijurca. Chaica, 1914 huatamandami pactari callarishca. Chaimandami Diospa shutimanda, paipa munai ima cashcata, Jesús imamanda huañushcata, huañushca jipa ima tucujta, huañushcacuna causarinamandapash ali intindi ushashcanchi. Ashtahuanbash Diospa Reinolla tucui llaquicunata tucuchinata, ñucanchi ali causanata, Jehovata cushichingapaj imashina causanatapashmi yachajushcanchi. Diosta sirvijcunaca paicuna yachajushcahuanga ¿imatata ruran? Chaipaca, shuj profeciamanda yachajushun. (Página 217​pi nota 21​ta, página 221​pi nota 25​ta ricupangui.)

14. Diospa Reinomanda ali villaicunataca ¿maicunapillata villachinajun? ¿Picunata villachinajun?

¹⁴ Mundo enteropi villachina. Tucurimui punllacunamandaca Jesusca nircami: “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga” nishpa (Mateo 24:3, 14). Cunan punllacunapi Diospa Reinomanda ali villaicunataca 230 yali llactacunapi, 700 yali shimicunapimi villachinajun. ‘Tucui llactacunamanda, aillupuramanda’ testigo de Jehovacunaca, mundo enteropi gentecuna Diospa Reino ima cajta, imata ruragrijta yachachunmi ayudanajun  (Apocalipsis 7:9). Bibliamandaca gratismi yachachin. Jesús nishca shinaca, gentecuna na ricunayachijpi, llaquichijpipash testigo de Jehovacunaca villachishpami catin (Lucas 21:17).

15. a) ¿Imamandata tucurimui punllacunapi causajushcata cringui? b)  Diosta cazujcunahuan, na cazujcunahuanga ¿imata tucunga?

¹⁵ ¿Tucurimui punllacunapi causajushcata cringuichu? Cunanmi, tucurimui punllacunamanda ashtaca profeciacunaca pactarijun. Jehová Diosca paita sirvijcunataca ñallami ninga ali villaicunataca ñana villachinachu canguichi nishpa. Chai jipami tucuri punllaca chayamunga (Mateo 24:14). Tucuri punllaca ¿imata can? Armagedonmi can. Armagedonbimi Jehová Diosca tucui nali cosascunata tucuchinga. Shinallata Jehovata, Jesusta na cazuj gentecunata tucuchingapaca paipa Churita, ali angelcunatapashmi agllashca (2 Tesalonicenses 1:6-9). Chai jipaca, Diablopash paipa ayacunapash gentecunataca ñana umachingachu. Taita Diosta cazushpa paipa Reinota apoyajcunaca, Diospa nishcacuna tucui pactarijtami ricunga (Apocalipsis 20:1-3; 21:3-5).

16. Diablopa mundo ñalla tucurinata yachashpaca ¿imatata rurana capangui?

¹⁶ Diablopa mundoca ñallami tucuringa. Chaimandami tapurinchi ¿imatata rurana cani? nishpa. Jehová Diosca Bibliamanda ashtahuan yachajuchunmi munan. Chaimandami Bibliata ali yachajuna cangui (Juan 17:3). Testigo de Jehovacunaca gentecuna Bibliata ali intindichunmi cada semana tandanajuicunata charin. Chai tandanajuicunamanga na faltanachu cangui (Hebreos 10:24, 25, liipangui). Quiquin cambiana cashcata cuenta japishpaca, cambiangapami esforzarina cangui. Shina esforzarishpaca,  Jehová Dioshuanmi ashtahuan ali amigo tucungui (Santiago 4:8).

17. Tucuri punllapica ¿imamandata gentecunaca manllarinajunga?

¹⁷ Apóstol Pabloca nircami, nali gentecunata tucuchina punllaca, shuhua shamunshnami na yashcapi shamunga nishpa (1 Tesalonicenses 5:2, NM). Jesús nishca shinaca, ashtaca gentecunaca tucurimui punllacunapi causajushcataca na cringachu. Jesusca nircami: ‘Runa Aichayu tucushca ñuca shamui punllapica, Noepa punllacunapishnami canga. Chai punllacunapica micushpa, ufiashpa, cazarashpa, cazarachishpami gentecunaca causanajurca. Yacuhuan Dios nara tucuchijpica, jatun huambuna huasiman Noé yaicungacamanmi, chashna causanajurca. Chaimandami, yacuhuan tucuilla tucuchina punlla chayamungacaman, gentecunaca imatapash na yarirca. Chashnallatami, Runa Aichayu tucushca ñuca shamuna punllapipash canga’ nishpa (Mateo 24:37-39).

18. Jesusca ¿imatata advirtirca?

¹⁸ Jesusca advirtircami: ‘Aliguta yarishpami causana canguichi. Ninanda micushpa, machashpa, cai causaipilla imatapash ninandapacha rurashpa charijyangapaca napacha munanachu canguichi’. Tucuri punllaca, tucui cai pachapi causanajuj gentecunataca, ‘tuglla japinshnami’ cungashcapi japinga nishpa. Shinallata Jesusca nircapashmi: “Cangunaca na puñushpami, Diostaca mañariana canguichi. Shina causashpami, chai tucui llaquicuna japij shamujujmandaca, canguna quishpirishpa Runa Aichayu tucushca ñucapa ñaupajpi shayarimui ushanguichi” nishpa (Lucas 21:34-36). Jesuspa nishcacunataca ¿imamandata yaipi charina canchi? Diablopa nali mundoca ñallami tucuringa. Shinapash Jehovapa, Jesuspa ñaupajpi ali ricurijcunallami tucuri punllapi salvarishpa, cai Alpa shuj paraíso tucujpi para siempre causaita ushanga (Juan 3:16; 2 Pedro 3:13).