1. Akapeea tatou e kite ei eaa te ka tupu a te tuatau ki mua?

ME AKARA koe i te nuti, e manako ana rai koe e ‘Me ka maata ua atu te kino?’ Maata te tumatetenga e te takinga kino, irinaki tetai aronga e kua vaitata te openga o teia ao. E tika ainei tera? E mataara ainei tetai e kite ei tatou i te ka tupu a te tuatau ki mua? Ae. Kare te tangata i kite, kua kite ra te Atua. Te akakite maira Aia eaa te ka tupu kia tatou e te enua a te tuatau ki mua.​—Isaia 46:10; Iakobo 4:14.

2, 3. Eaa ta te au pipi a Iesu i inangaro kia kite, e eaa ta Iesu i akakite kia ratou?

² Me tuatua te Pipiria no runga i te openga o teia ao, te tuatua ra i te openga o te kino, kare i te openga o te Enua. Apii a Iesu e ka tutara mai te Patireia o te Atua i te enua. (Luka 4:43) Inangaro tana au pipi kia kite aea te Patireia o te Atua e tae mai ei, e kua ui ratou kiaia: “E akakite mai koe ia matou i te tupu anga o taua au mea nei, e te akairo o toou aerenga mai, e te openga o teianei ao.” (Mataio 24:3) Kare a Iesu i akakite ana i te rā, akakite ra aia i te ka tupu i mua ake i te openga o teia ao. Ta Iesu i akakite e ka tupu, te tupu nei ïa i teia tuatau.

³ Roto i teia pene ka uriuri tatou eaa te akapapuanga e tei roto tatou i te tuatau openga. Mea mua, ka  inangaroia tatou kia kite no runga i te tamaki tei tupu i te rangi, kia mārama tatou i te tumu i tupu ei te kino i te enua nei.

4, 5. (a) Eaa tei tupu i te rangi i muri ake te riro anga a Iesu ei Ariki? (e) Roto ia Apokalupo 12:12, eaa te ka tupu a muri ake te uriia mai anga a Satani ki runga i te enua?

⁴ I te Pene 8 kua riro a Iesu ei Ariki i te rangi i te 1914. (Daniela 7:13, 14) Akakite a Apokalupo e: “E tamaki tei runga i te rangi: ko Mikaela [Iesu] e tana au angela, tamaki atura i te taae [Satani]; e kua tamaki maira te taae e tana au angela.” * Kare a Satani e tana au temoni i re, kua uriia mai ratou ki te enua nei. Akamanako ana i te rekareka o te au angera! Akapeea ra te tangata i te enua nei? Akakite te Pipiria e e tuatau manamanata tikai no te tangata. Eaa te tumu? No te mea e riri maata to te Tiaporo, “kua kite aia e e manga tuatau poto ua tona e toe nei.”​—Apokalupo 12:7, 9, 12.

⁵ Maata te kino a te Tiaporo e akatupu nei. E riri tikai tona no te mea e “manga tuatau poto ua tona” e toe nei, i mua ake ka takore ei te Atua iaia. Ka akara ana tatou i ta Iesu i akakite e ka tupu i te au rā openga.​—Akara i te Au Manako Poto 24.

6, 7. Eaa te tupu nei no runga i te tamaki e te onge i teia tuatau?

⁶ Tamaki. Karanga a Iesu: “E tu mai tetai enua e tamaki mai ki tetai enua, e tetai basileia e tamaki  mai ki tetai basileia.” (Mataio 24:7) Maata atu tei mate i roto i te tamaki i to tatou tuatau i tetai ua atu taime. Akakite te Worldwatch Institute e mei te 1914 mai, e 100 mirioni tuma tei tamateia. Te au tangata i mate i roto i te tamaki mei te mataiti 1900 ki te 2000, e maata atu i te aronga i mate i mua ake i te mataiti 1900. Akamanako ana i te taitaia maata e te mamae ta te tamaki i akatupu ki te mirioni ua atu!

⁷ Onge. Karanga a Iesu: “E onge oki.” (Mataio 24:7) Noatu e maata atu te kai i to mua ana, kare rai e rava ana te kai na te manganui. Eaa te tumu? No te mea kare e rava ana te moni ei oko i te kai me kore me kore kare e rava ana te enua ei tanu kai. Manganui ua atu te tangata kare e rava ana te moni ei oko kai no te rā okotai. Karanga te World Health Organization e e mirioni ua atu tamariki e mate nei i te mataiti okotai no te mea kare e rava ana te kai.

8, 9. Eaa te akaari maira e te tupu nei ta Iesu au totou no runga i te ngaruerue enua e te maki?

 ⁸ Ngaruerue enua. Totou a Iesu e ka tupu: “Te ngaruerue maata i te enua.” (Luka 21:11) Maata te ngaruerue enua ririnui e tapapaia nei i te au mataiti ravarai. Mei te 1900 mai, e rua tuma mirioni tei mate no te ngaruerue enua. Noatu te au ravenga ou kia kite vaveia i mua ake ka tupu ei tetai ngaruerue enua, e manganui rai te mate nei.

⁹ Maki. Totou a Iesu e ka tupu “te maki-mate.” Ka totoa viviki ua te au maki kino, e maata te ka mate. (Luka 21:11) Noatu e maata te maki ka kite te au taote i te rapakau, te vai nei rai tetai au maki kare e rauka i te akaora. Akamārama mai tetai ripoti e e mirioni ua atu tangata e mate nei no te maki maro, malaria e te cholera. E 30 katoa maki ou tei kitea mai e te au taote, tetai papaki o teia au maki kare e vairakau.

10. Peea a 2 Timoteo 3:1-5 te akatupu angaia i teia tuatau?

¹⁰ Roto ia 2 Timoteo 3:1-5, karanga te Pipiria e: ‘Ka tupu te kino maata i taua tuatau openga ra.’ Akataka mai a Paulo e mei teaa to te tangata tu i te au tuatau openga. Akakite aia e ka riro te tangata

• ei akaperepere ia ratou uaorai

• ei noinoi

• ei akarongo kore ki te metua

• kare e tiratiratu

• ei aroa kore i te ngutuare tangata

• ei mako kore

• ei rotoriri e te akakino

• anoano i te au mea e navenave ei ra, kare i anoano i te Atua

• e tutu akono ua i te Atua kare ra e akarongo iaia

11. Kia tau kia Salamo 92:7, eaa te ka tupu ki te aronga kino?

¹¹ E maata ainei te tangata mei tera te tu i toou ngai? Mei tera rai te manganui i teia ao. Kare e roa atu ka taui te Atua i te reira. Taputou aia: “Me  tupu te aronga kino mei te ngangaere, e me ruperupe katoa te aronga i rave i te kino ra; i ruperupe ïa, kia tipu akaruke takiri roaia.”​—Salamo 92:7.

12, 13. Eaa ta Iehova i apii mai ia tatou i teia au rā openga?

¹² Kua totou te Pipiria e i te au rā openga, ka maata te mamae ngakau e te taitaia i teia ao. Ka tupu katoa te au mea memeitaki i akakite ei te Pipiria.

¹³ Mārama i te Pipiria. No te au rā openga, tata te peroveta a Daniela: “E tupu atura te kite i te maata anga.” (Daniela 12:4) Ka oronga mai te Atua i te kite kia mārama tona iti tangata i te Pipiria. Rave a Iehova i teia mei te 1914 mai. Ei akaraanga, apii mai aia i te puapinga o tona ingoa e tona akakoroanga no te enua, te tika no runga i te oko, eaa te ka tupu me mate tatou, e no te tuakaouanga. Kua apii tatou e ko te Patireia ua rai o te Atua te ka rauka i te akatikatika i to tatou manamanata. Apii katoa tatou akapeea e mataora ai e eaa te tu oraanga ka mareka mai te Atua. Inara ka akapeea te au tavini o Iehova i te akapuapinga anga i ta ratou i apii mai? Tei roto te pauanga i tetai totou ke mai.​—Akara i te Au Manako Poto 21 e te 25.

14. Te tutu aereia nei te tuatua meitaki o te Patireia kiea, e koai ma te rave ra i te reira?

¹⁴ Te angaanga tutu evangeria i te ao katoa. No te au rā openga, akakite a Iesu: “E tutu aereia te evangelia o te basileia nei, e kako rava ake te ao katoa nei.” (Mataio 24:3, 14) Te tutu aereia nei te tuatua meitaki o te Patireia i roto i te 230 tuma enua e i roto  i te 700 tuma reo. Pouroa te Au Kite o Iehova no “te pa enua ravarai,” te tauturu nei i te tangata kia mārama eaa te Patireia e ta te reira ka rave no ratou. (Apokalupo 7:9) Rave ratou i teia kare e tutaki. Noatu te makitakitaia maira ratou, kare e rauka kia tāpu i te angaanga tutu evangeria mei ta Iesu i totou.​—Luka 21:17.

15. (a) Irinaki ainei koe e te noo nei tatou i te au rā openga, e eaa te tumu? (e) Eaa te ka tupu ki te aronga tei akarongo ia Iehova, e te aronga tei kore i akarongo?

¹⁵ Irinaki ainei koe e te noo nei tatou i te au rā openga? Maata te totou e akatupuia nei no te au rā openga. Kare e roa ka akamutu te angaanga tutu evangeria e ko “te openga iora.” (Mataio 24:14) Eaa te openga? Ko Aramagido, me takore a Iehova i te kino. Ka tuku a Iehova ia Iesu e tana au angera ririnui kia takore i tetai ua atu kare e akarongo Iaia e tana Tamaiti. (2 Tesalonia 1:6-9) Kare a Satani e tana au temoni e pikikaa akaou i te tangata. Te aronga pouroa tei iki kia akarongo i te Atua e kia āriki i Tona Patireia, ka kite ratou me akatupu a Iehova i tana au taputou.​—Apokalupo 20:1-3; 21:3-5.

16. Te vaitata roa nei te openga, eaa ra taau ka rave?

¹⁶ Kare e roa ka kore teia ao e akatere nei a Satani. E ui kia tatou uaorai, ‘Eaa te ka anoanoia kia rave au?’ Inangaro a Iehova kia apii koe i taau ka rauka i roto i te Pipiria. Tamou marie e kia akono i taau apii. (Ioane 17:3) E uipaanga ta te Au Kite o Iehova i te au epetoma ei tauturu i te tangata kia mārama i te Pipiria. Tauta kia tae ki teia au uipaanga. (E tatau ia Ebera 10: 24, 25.) Me te anoanoia ra te au tauianga i roto i toou oraanga, auraka e mataku i te rave i te reira. Ka matutu roa atu toou pirianga oa kia Iehova.​—Iakobo 4:8.

17. No teaa te maataanga ka poitirere ei me tae mai te openga?

¹⁷ Akakite te apotetoro a Paulo e i te ora manako koreia, ka rokoia mai te aronga kino e te mate “mei te keia i te po.” (1 Tesalonia 5:2) Totou a Iesu e e maata te kare e āriki e tei roto tatou i te au rā openga. Akakite aia: “E mei te tuatau ia Noa ra, koia katoa te aerenga mai o te Tamaiti a te tangata nei. Mei tei te tuatau i muao i te diluvi ra, te kaikai ra ratou e te inu ra, te akaipoipo ra, e te orongaia ra kia akaipoipoia, e tae rava atu ki te rā i tomo ei a Noa ki roto i te araka, kare rava i kite, e rokoia iora ratou e te diluvi, e ope takiri akera ratou i te mate; koia katoa te aerenga mai o te Tamaiti a te tangata nei.”​—Mataio 24:37-39.

18. Eaa te akamatakiteanga ta Iesu i oronga mai no tatou?

¹⁸ Kua akamatakite mai a Iesu e eiaa tatou kia varenga ua i “te maata o te kai e te kona, e te pekapeka o teianei ao.” Ka tupu poitirere ua mai te openga i nana ai, “mei te ereere.” E ka “rokoia mai oki tei noo i te ao katoa nei i te reira.” Akakite katoa mai aia: “E tenana, e ara kotou, e tamou tikai i te pure, kia tau ia kotou te ora i teianei au mea katoa e vaitata mai nei, e kia tu kotou ki mua i te aroaro o te Tamaiti a te tangata.” (Luka 21:34-36) No teaa i puapinga ai kia ariu ki te akamatakiteanga a Iesu? No te mea kare e roa atu ka takoreia teia ao kino o Satani. Ko te aronga ua ta Iehova e ta Iesu i āriki te ka ora i te openga e ka noo e tuatau ua atu i te ao ou.​—Ioane 3:16; 2 Petero 3:13.