1. Gras kèl liv nou pe konèt lavnir ?

KAN ou regard bann zinformasion dann télévizion, èske la finn ariv a ou pansé : « Bann zafèr i sa va vréman pir an pir ! » Néna tèlman bann maleur é mové zafèr ke désèrtin i pans la fin du monn lé proch. Èske la fin du monn lé vréman proch ? Èske lé posib konèt lavnir ? Oui. Bann domoun i pe pa di a lavans sak i sar arivé, mé rienk Jéova i pe fé sa. É sé sa mèm li la fé : la Bib i koz su nout lavnir é lavnir la tèr osi (Izai 46:10 ; Jak 4:14).

2, 3. Kosa bann disip Jézu té i ve konèt ? É kosa Jézu la réponn a zot ?

² Dan la Bib, la fin du monn i ve pa dir ke la Tèr li mèm i sra détrui, mé pluto ke tout sak lé mové nora pu dutou. Jézu la ansénié ke le roiyom Bondieu té sar dirij la tèr (Luk 4:43). Son bann disip té i ve konèt kansa le roiyom Bondieu té i sar arivé. Alor, zot la demann a li : « Kan bann zafèr la va arivé, é kosa i sra le sign de out prézans é la fin se monn la ? » (Matieu 24:3) (regard la not n^o 24). Jézu la pa donn son bann disip la dat la fin du monn. Parkont, li la fé konèt a zot kèl zévènman té i sar arivé jus avan tousala. É bann zafèr li la anonsé i éspas nout lépok.

³ Dann chapit la, nou va voir bann preuv ke nou viv la pèryod jus avan la fin du monn. Mé, pou konprann akoz bann zafèr i anpir su la tèr, avansa nou doi koz su in gèr ke la éspasé dann sièl.

4, 5. a) Apré ke Jézu lé devnu Roi, kosa la éspasé dann sièl ? b) Dapré Révélasion 12:12, kosa i ariv bann zumin depui ke Satan la été jeté su la tèr ?

⁴ Dann chapit 8, nou la aprann ke Jézu lé devnu Roi dann sièl an 1914 (Danièl 7:13, 14). Le liv Révélasion i rakont sak la éspasé aprésa : « In gèr la pété dann sièl : Michèl [Jézu] é son bann zanj la konbat kont le dragon [Satan], é le dragon é son bann zanj la konbat. » Satan é son bann démon la pèrd la gèr é zot la été jeté su la tèr. Bann zanj lété vréman kontan ! Mé kosa té i sar arivé pou bann domoun ? Dapré la Bib, zot té i sar konèt in bonpe maleur. Pou kosa ? Parske le Diab lé vréman an kolèr : li koné i rès « pa li bonpe d’tan » (Révélasion 12:7, 9, 12).

⁵ Le Diab i fé lèv bann maleur an grann kantité su la tèr. Li lé vréman an kolèr parske li koné ke, i amuz pa, Bondieu va détrui a li. Mé asteur, alon voir sak Jézu la di su bann dèrnié jour.

6, 7. Sak Jézu la anonsé su bann gèr é bann faminn i réaliz dan nout tan. Kèl preuv nou néna ?

⁶ Bann gèr. Jézu la di : « Nasion va batay kont nasion é roiyom kont roiyom » (Matieu 24:7). Bann gèr ke néna dan nout tan la tué ankor plus domoun par rapor sak lavé dann tan lontan. Dapré in lorganizasion pou fé rechèrch (Worldwatch Institute), depui 1914, bann gèr la tué plus 100 milion d’moun. Su 100 an, sétadir ant 1900 é 2000, 3 foi plus domoun lé mor akoz bann gèr par rapor 1900 zané avan. Domoun par milion i souf akoz bann gèr !

 ⁷ La faminn. Jézu la di : « Nora bann faminn » (Matieu 24:7). Bann domoun la jamé produi manjé an grann kantité kom néna koméla. Pourtan, néna in bonpe domoun na poin gran choz pou ranpli zot vant. Akoz ? Parske zot la poin asé larjan pou achté manjé oubien inn ti bout la tèr pou zot planté. Plus in miliar d’pèrsonn (1 moun su 7) i viv avèk moin in dolar par jour. Dapré Lorganizasion mondial pou la santé, tou lé zan, néna bann zanfan par milion i tonm malad é i mor, parske zot la poin asé manjé.

8, 9. Sak Jézu la anonsé su bann tranbleman d’tèr é su bann maladi i éspas vréman dan nout tan. Kèl preuv nou néna ?

⁸ Bann tranbleman d’tèr. Jézu la anonsé : « Nora bann gran tranbleman d’tèr » (Luk 21:11). Bann siantifik i di ke nora tou lé zan bann gran tranbleman d’tèr. Depui 1900, néna plus 2 milion d’pèrsonn lé mor akoz bann tranbleman d’tèr. Par rapor avan, koméla lé  posib di a lavans kansa bann tranbleman d’tèr i sar arivé, é sa, gras bann progré téknik. Kan mèm sa, néna ankor in bonpe domoun i mor akoz bann tranbleman d’tèr.

⁹ Bann maladi. Jézu la anonsé ke noré bann « maladi ki propaj vit ». In bonpe domoun i mor akoz bann maladi grav ki propaj vitman (Luk 21:11). Bann dokteur i gingn soign in paké maladi, mé pa tout. Domoun par milion i mor tou lé zan akoz bann maladi kom la tubèrkuloz, le paludis é le koléra. Kan i regard lé 40 zané i vièn pasé, bann dokteur la dékouv ankor 30 nouvo maladi. É pou désèrtin na poin okin trètman.

10. Pou kosa nou pe di ke 2 Timoté 3:1 juska 5 i éspas vréman ojourdui ?

¹⁰ Dapré 2 Timoté 3:1 juska 5, dann tan dèrnié jour, noré bann pèryod « difisil pou suporté ». Lapot Pol la éspliké  koman in bonpe domoun va konport a zot. Li la di ke bann domoun...

• noré rod rienk zot prop zintéré,

• noré été kamarad èk larjan,

• noré dézobéi zot paran,

• noré pa été fidèl,

• noré poin laféksion pou zot fami,

• noré pa kontrol a zot,

• noré été brutal é batayeur,

• noré èm plus bann lamuzman ke Bondieu,

• noré di zot i ièm Bondieu, mé zot va refuz obéi a li.

11. Dapré Psom 92:7, kosa va ariv bann mové moun ?

¹¹ Èske ousa ou abit bann domoun lé komsa osi ? Dan le monn, néna in bonpe domoun i konport a zot komsa. Mé i tard pa, Bondieu va fé kékchoz. Li promèt : « Kan bann mové moun i pous kom mové zèrb é ke sak i fé le mal i fleuri, sé ke zot va èt détrui pou toultan » (Psom 92:7).

12, 13. Pandan bann dèrnié jour, kosa Jéova la èd a nou konprann ?

¹² La Bib la anonsé ke, dan bann dèrnié jour, noré in bonpe maleur é bann soufrans. Mé li la di osi ke noré bann gayar zafèr ke va arivé.

¹³ Bann sèrviteur Bondieu va mieu konprann la Bib. Par rapor bann dèrnié jour, le profèt Danièl la ékri : « La vré konésans nora an grann kantité » (Danièl 12:4). Dan bann dèrnié jour, Bondieu va èd son bann sèrviteur mieu konprann la Bib. É sé sa mèm li la fé, surtou depui 1914. Par égzanp, li la èd a nou mieu konprann koman son non lé inportan, le projé li néna pou la tèr, kosa i lé la ranson, sak i éspas apré la mor é léspoir la rézuréksion (regard bann not n^o 21 é 25). Nou la konpri ke le roiyom Bondieu lé le seul gouvèrnman ki pe règ tout nout bann problèm. Nou la konpri osi kosa i fo fé pou èt ereu é kosa i fo fé pou viv in fason ki kontant le keur Bondieu. Mé èske bann sèrviteur Bondieu i gard pou zot sak zot i aprann ? Néna in not profési i donn la répons pou késtion la.

14. Ousa la bonn nouvèl le Roiyom lé préché, é par kisa ?

¹⁴ Bann sèrviteur Bondieu va prèch dan le monn antié. Kan li la koz su bann dèrnié jour, Jézu la di : « Bonn nouvèl roiyom la i sra préché su tout la tèr » (Matieu 24:3, 14). La bonn nouvèl le Roiyom lé préché an plus 700 lang é dan plus 230 péi é téritoir. Bann Témoin Jéova, ki sort dann « tout nasion é tribu », i prèch su tout la tèr. Zot i èd bann domoun konprann kosa i lé le roiyom Bondieu é sak li sar fé pou bann domoun (Révélasion 7:9). Zot i fé  sa gratuitman. Kom Jézu lavé di, mèm si in bonpe domoun i détès a zot oubien i maltrèt a zot, na poin rien i pe arèt a zot (Luk 21:17).

15. a) Èske ou pans ke nou viv bann dèrnié jour ? Pou kosa ? b) Kosa va éspasé pou sak i obéi pa Jéova ? c) Kosa va éspasé pou sak i obéi Jéova ?

¹⁵ Èske ou pans ke nou viv bann dèrnié jour ? In bonpe profési la Bib su bann dèrnié jour lé antrèn réalizé koméla. I tard pa, Jéova va désidé ke la bonn nouvèl i doi pu èt préché. Lèrla, la « fin » va arivé (Matieu 24:14). Kosa i lé la « fin » ? La « fin », sé Armagédon. Sé le jour ousa Jéova va détrui tout sak lé mové. Li va utiliz Jézu é son bann zanj puisan pou détrui sak i ve pa obéi a li é Jézu (2 Tésalonisien 1:6-9). Aprésa, Satan é son bann démon nora pu lokazion tronp pèrsonn. Alor, sak i ve obéi Bondieu é èt dirijé par son roiyom va voir tout son bann promès réalizé (Révélasion 20:1-3 ; 21:3-5).

16. Kom la fin i tard pa pou arivé, kosa ou doi fèr ?

¹⁶ I tard pa, se monn ke lé dirijé par Satan i sra détrui. Pousa mèm, lé vréman inportan nou demann a nou : « Kosa mi doi fé ? » Jéova i ve ou aprann le plus posib su la Bib. Étudié liv la avèk sèryeu (Jan 17:3). Pou èd domoun konprann la Bib, bann Témoin Jéova néna bann rénion chak semèn. Fé tout out posib pou alé bann rénion la (lir Ébreu 10:24, 25). Si ou konpran ke ou néna bann chanjman pou fé, pa bezoin ou la peur : fé a li. Alor out lamitié avèk Jéova va ranfors plus ankor (Jak 4:8).

17. Akoz bonpe domoun i sra surpri kan la fin va arivé ?

 ¹⁷ Lapot Pol la di ke la déstruksion bann mové moun va arivé « kom in voleur dan la nuit » (1 Tésalonisien 5:2). Sa i ve dir ke la déstruksion va arivé in leur ousa in bonpe domoun i atann pa sa dutou. Jézu la anonsé ke in paké d’moun noré refuz voir bann preuv ke nou viv bann dèrnié jour. Li la di : « Pandan la prézans le Garson lom, bann zafèr va éspasé kom dann tan Noé. Avan Déluj i ariv, domoun té manj é té boir, bann zom té maryé é bann domoun té fé maryé zot fiy, juskatank le jour la arivé pou Noé rant dann larch ; é zot la pa fé atansion, juskatank le Déluj i ariv é i ral zot tout » (Matieu 24:37-39).

18. Kèl lavèrtisman Jézu la donn a nou ?

¹⁸ Jézu la prévien a nou : nou doi pa lès a nou détourné par bann zabitud kom « tro manjé é boir plus ki fo é bann zinkiétud la vi ». Li la éspliké ke la fin té i sar arivé « kom in pièj », sétadir in lèr ousa nou atann pa dutou. Li la di osi ke la fin « noré ariv su tout bann zabitan tout la tèr ». Pou fini, li la di : « Sé pousa, kontinué fé atansion é supli toultan pou ke zot i gingn chapé tout bann zafèr i doi arivé é pou ke zot i tienbo debout devan le Garson lom » (Luk 21:34-36). Pou kosa lé tèlman inportan ékout lavèrtisman Jézu ? Parske le monn Satan va èt détrui dann pa lontan. Rienk bann domoun ki sra aprouvé par Jéova é Jézu va rès vivan. Zot va viv pou toultan dan le monn nouvo (Jan 3:16 ; 2 Pièr 3:13).