1. Катар ащи те ахальовас со ка ачшол андо бъдеще?

БИСКАЙ дикхес о новини ки телевизия, дали декхана мислингян: „Со ка ачшол далкхе светоса?“ Лесте иси зомкха бут дукх тай кханилипе, адалкхеске бут мануша мислинен, кай е светоскоро крайос си паше. Дали си чука? Ащи ли те жанас со ка ачшол андо бъдеще? Ва. Въпреки кай о мануша нащи те жанен со ка ачшол, о Йехова жанел. Ов пхенел аменге анди Библия со ка ачшол андо бъдеще аменца тай е пхувяса. (Исаия 46:10; Яков 4:14)

2, 3. Со мангенас те жанен е Исусескере ученикя тай со пхенгяс ленге о Исусес?

² Кана четинас анди Библия, кай ка авел е светоскоро крайос, давкха нанай о крайос е пхувякоро, а е кханилипнаскоро. О Исусес сикавелас е манушен, кай е Девлескоро Тхагарипе ка управлинел упрал и пхув. (Лука 4:43) Лескере ученикя мангенас те жанен кана ка авелас е Девлескоро Тхагарипе тай пучле е Исусес: „Кана ка ачшол давкха тай саво ка овел о знаки, ковато ка сикавел, кай синян атхе тай кай авел о крайос далкхе светоскоро?“ (Матей 24:3) О Исусес на пхенгяс ленге о диес, кана ка авелас о крайос, ама пхенгяс ленге со ка ачшолас точно англал е светоскоро крайос. О букя, колато пхенгяс о Исусес, ачшон акана.

³ Далкхе шересте ка раздикхас десаве букя, колато сикавен, кай живинас ко диеса хари англал те авел е светоскоро крайос. За те ахальовас соске о животос  ки пхув си зомкха пхаро, първо требе те ахальовас сави война ачшили ко небес.

4, 5. а) Со ачшило ко небес, кана о Исусес ачшило Тхагар? б) Според о Откровение 12:12 со ка ачшолас ки пхув, кана о Бенг ка овелас чшивдо лате?

⁴ Таро 8 шеро ахалилям, кай о Исусес ачшило Тхагар андо небес презал о 1914 бреш. (Даниил 7:13, 14) О лил Откровение пхенел аменге со ачшило: „Ачшили война ко небес — о Михаил [о Исусес] тай лескере ангеля маренас пес е змейеса [е Бенгеса], тай о змей тай лескере ангеля също маренас пес, ама нащине те побединен.“ * О Бенг тай о демоня уле победиме ки война тай уле чшивде теле ки пхув. Представине туке кизом лошанде о ангеля! Ама со ка ачшолас е манушенца ки пхув? И Библия пхенел, кай ка авенас пхаре диеса е манушенге. Соске? Соскето о Бенг си бут нервериме, соскето „жанел, кай ачшол лес хари време.“ (Откровение 12:7, 9, 12)

⁵ О Бенг керел кизом ащи по–бут кханилипе ки пхув. Ов си бут нервериме, соскето ачшол лес хари време англал о Дел те махнинел лес. Нека те дикхас со пхенгяс о Исусес, кай ка ачшолас ко последна диеса. (Дикх и 24 бележка ко крайос далкхе лилесте.)

6, 7. Сар изпълнингьол авдиес давкха со пхенгяс о Исусес, кай ка овен войни тай бокхалипе?

⁶ Войни. О Исусес пхенгяс: „Народос ка ухкьел мамуй народосте тай тхагарипе мамуй тхагарипнасте.“ (Матей 24:7) О мануша, колато муле ко войни амаре диесенде, си по–бут далкхендар, колато муле презал  и цело манушикани история. Йекх организация, която изучинел о букя, колато ачшон андо светос, пхенел, кай таро 1914 бреш, декхате 100 милионя мануша муле ко войни. О мануша, колато муле ко войни таро 1900 жи ко 2000 бреш, сине трин дром по–бут таро мануша, колато муле англал о 1900 бреш. Представине туке сави бари дукх ангяс и война буте манушенге!

⁷ Бокхалипе. О Исусес пхенгяс: „Ка овел бокхалипе.“ (Матей 24:7) Нисар жи акана на сине зомкха бут хабе, ама въпреки далкхесте буте манушен нанай со те хан. Соске? Соскето нанай лен парес те кинен песке хабе или пхув, кате те садинен варесо хамнаске. Декхате йекх милиарди мануша живинен декхате до левиенца е диесеске. И Световно организация е састипнаске пхенел, кай милионя чшаве мерен секо бреш, соскето нанай лен достатъчно хабе.

8, 9. Со сикавел, кай авдиес изпълнингьол давкха со пхенгяс о Исусес, кай ка овен земетресения тай насвалипе?

⁸ Земетресения. О Исусес пхенгяс: „Ка овен баре земетресения.“  (Лука 21:11) Вече ачшон баре земетресения секо бреш. Таро 1900 бреш декхате дуй милионя мануша муле таро земетресения. Въпреки кай и техника помагинел по–рано те ахальовел пес, кай ка ачшол земетресение, панда мерен бут мануша.

⁹ Насвалипе. О Исусес пхенгяс, кай ка овенас „пхаре болескя“, колато ка овенас разпространиме сиго, тай бут мануша ка меренас лендар. (Лука 21:11) Въпреки кай о лекаря сиклиле сар те саскярен е манушен буте болескиендар, панда иси болескя, коленге нанай лекос. Йекх изследване сикавгяс, кай секо бреш милионя мануша мерен болескиендар, сарто и туберкулоза, и малария тай и холера. Освен далкхесте о докторя аракхле 30 неве болескя, а десавенге лендар нанай лекос.

10. Сар изпълнингьол авдиес давкха со четинас андо 2 Тимотей 3:1–5?

¹⁰ Андо 2 Тимотей 3:1–5 и Библия пхенел: „Андо последна  диеса ка авен бут пхаре времена.“ О апостол Павел пхенгяс саве ка овенас о мануша андо последна диеса. Пхенгяс, кай о мануша...

• ка дехен само пес

• ка дехен о парес

• нанай те шунен пе родителен

• нанай те овен верна

• нанай те сикавен дехиба кариг пе семействосте

• нанай те овел лен самоконтрол

• ка овен марисчидес тай чингарале

• ка дехен о удоволствия, а ма е Девлес

• ка керен пес, кай дехен е Девлес, а нанай те шунен лес

11. Со пхенел о Псалм 92:7, кай ка ачшол е кханиле манушенца?

¹¹ Иси ли салка мануша отхе, кате ту бешес? О светос си пхердо салке манушенца. Ама о Дел сиго ка оправинел о букя. Ов обещинел: „Кана о кханиле барьон сар чар тай саворе, колато керен кханилипе, цъфтинен, давкха си, за те овен унищожиме завинаги.“ (Псалм 92:7)

12, 13. Со сикавгяс амен о Йехова презал о последна диеса?

¹² Анди Библия си предскажиме, кай ко последна диеса, андо светос ка овенас бут страдания тай дукх. Ама лате пишинел, кай ка ачшонас лачше–да букя.

¹³ О мануша ка ахальовен и Библия по–лачшес. О пророки Даниил пишингяс е последноне диесенге. Ов пхенгяс: „О истинско познание ка барьол.“ (Даниил 12:4) О Дел ка помагинелас пе служителенге те ахальовен и Библия по–лачшес, отколкото преди. О Йехова кергяс давкха особено таро 1914 бреш. Например помагингяс аменге те ахальовас кизом си важно лескоро алав, со мангел е пхувяке, со си о откупи, со ачшол аменца, кана мерас тай давкха, кай ка овел възкресение. Ахалилям, кай само е Девлескоро Тхагарипе ащи те решинел саворе амаре проблемя. Сиклилям сар те овас щастлива тай сар те лошанкярас е Девлес амаре животоса. Ама со керен е Девлескере служителя далкхеса со сиклиле? За те ахальовас, нека те раздикхас авер пророчество тари Библия. (Дикх и 21 тай и 25 бележка ко крайос далкхе лилесте.)

14. Кате проповедингьол и лачши новина е Тхагарипнаске тай кола мануша проповединен ла?

¹⁴ Ка проповедингьол ко цело светос. Кана хоратинелас е последноне диесенге, о Исусес пхенгяс: „Дайкха лачши новина е тхагарипнаске ка овел проповедиме ки цело пхув.“ (Матей 24:3, 14) И лачши новина е Тхагарипнаске проповедингьол 240 държавенде тай декхате 900 чшибенде. Ва, ки цело пхув, е Йеховаскере Свидетеля „саворе народовиендар“ помагинен околенге те ахальовен со си о Тхагарипе тай со ка керел е манушенге. (Откровение 7:9)  Он керен давкха бипаренгоро. Въпреки кай бут мануша мразинен тай гонинен лен, нищо нащи те спиринел лен те проповединен, сарто предскажингяс о Исусес. (Лука 21:17)

15. а) Верувинес ли, кай живинас андо последна диеса тай соске? б) Со ка ачшол далкхенца, колато шунен е Йеховас тай далкхенца, колато на шунен лес?

¹⁵ Верувинес ли, кай живинас ко последна диеса? Бут пророчества тари Библия е последноне диесенге изпълнингьон. Сиго о Йехова ка решинел те на проповедингьол по–бут и лачши новина тай тогава ка авел „о крайос“. (Матей 24:14) Кана ка авел о крайос? Ко Армагедон, кана о Дел ка махнинел о кханилипе. О Йехова ка използвинел е Исусес тай пе зорале ангелен, за те унищожинел саворен, колато на шунен лес тай лескере Чшавес. (2 Солунци 1:6–9) Палал далкхесте о Бенг тай о демоня нанай те хохавен е манушен по–бут. Тай саворе, колато манген те шунен е Девлес тай приеминен лескоро Тхагарипе, ка дикхен саворе букя, колато обещингяс о Дел, те ачшон. (Откровение 20:1–3; 21:3–5)

16. Щом о крайос си зомкха паше, со требе те керес?

¹⁶ Давкха светос, колесте управлинел о Бенг, сиго ка овел унищожиме. Ако на мангас те овас унищожиме, требе те стараинас амен те сикльовас е Девлеске. О Дел мангел амендар те сикльовас кизом ащи по–бут тари Библия. (Йоан 17:3) Е Йеховаскере Свидетеля киден пес секо курко, за те помагинен е манушенге те ахальовен и Библия. Стараине тут те жас далкхе събраниенде редовно. (Четине Евреи 10:24, 25.) Ако ахальовес, кай требе те керес променес тере животосте, ма дара те керес лен. Ако керес давкха, торо амалипе е Йеховаса ка барьол. (Яков 4:8)

17. Соске кана ка авел о крайос, по–бут таро мануша нанай те очаквинен давкха?

 ¹⁷ О апостол Павел пхенгяс, кай о кханиле ка овен унищожиме, кана по–бут таро мануша на очаквинен давкха, „сар чор презал и рат“. (1 Солунци 5:2) О Исусес предскажингяс, кай бут мануша нанаяс те иринен внимание е букиенге, колато сикавен, кай живинас ко последна диеса. Ов пхенгяс: „Сарто уле е Нойескере диеса, ачука ка овел о присъствие е Манушикане чшавескоро–да [или о последна диеса]. Далкхе диесенде англал о потопи, о мануша ханас тай пиенас, о мруша ленас песке ромниен тай о жувля прандененас, жи ко диес, кана о Ной диняс андо ковчеги. Он на ириненас внимание далкхеске со ачшолас, бискай на ало о потопи тай на мударгяс саворен, ачука ка овел о присъствие е Манушикане чшавескоро–да.“ (Матей 24:37–39)

18. Саво предупреждение диняс амен о Исусес?

¹⁸ О Исусес предупредингяс амен те на мукас „о преяждане, о препиване тай е животоскере грижес“ те отклонинен амаро внимание. Ов пхенгяс, кай о крайос ка авел неочаквано, „сар примка“. Също пхенгяс, кай о крайос „ка авел упрал саворенде, колато бешен ки цело пхув“. Палал далкхесте пхенгяс: „Ачшовен жангале тай постоянно молинен тумен вогиестар [или бут искренно], за те успеинен те избегнинен саворе букя, колато требе те ачшон тай те заачшовен англал о Манушикано чшаво.“ (Лука 21:34–36) Соске си зомкха важно те шунас е Исусескоро предупреждение? Соскето бут сиго е Бенгескоро кханило светос ка овел унищожиме. Само далкха, колен ка одобринен о Йехова тай о Исусес, ка преживинен о крайос тай ка живинен вечно ки пхув. (Йоан 3:16; 2 Петър 3:13)