1. Kuri šaj te sikljova so ka ovel ko vakti so avela?

KED dikheja o haberija ki televizija šaj pheneja: „Isi lji diso pološno akaljestar? Odoborkha isi pharipa hem lošnipa so disave manuša verujinena so hijam paše ko kraj ando sveto. Da lji tano odova čače adžahar? Da lji šaj te džana so ka ovel ko vakti so avela? Po. O manuša našti te mothoven so ka ovel, ama o Devel, o Jehova, šaj te mothovi. Ov prekalji Biblija vačeri so ka ovel amenca hem e Phuvja ko vakti so avela (Isaija 46:10; Jakoveso 4:14).

2, 3. So e Isusese učenikija manglje te džanen hem so o Isus vačerdža oljendže?

² Ked ki Biblija čitina kotar kraj ando sveto, tegani mislinipe ko kraj ando lošnipe, a na ko kraj e Phuvjako. O Isus sikadža e manušen so e Devljeso Kraljevstvo ka vladini upri Phuv (Luka 4:43). Oljese učenikija manglje te džanen ked ka avel e Devljeso Kraljevstvo hem odoljese pučljelje: „Vačer amendže ked ka ovel odova hem savo znak ka mothovi so tu ka ove odothe hem so ka avel o kraj ando akava sveto?“ (Matej 24:3). O Isus na pheja oljendže ked tačno ka ovel odova dive, ama pheja so ka ovel angljeder te avel o kraj ando akava sveto. Odova so o Isus vačerdža, šaj te dikha so akana čače ovela.

³ Ko akava šero ka vačera ando buča kola mothovena so amen živina ko vakti angljeder te avel o kraj ando akava  sveto. Te šaj te haljova sose isi odoborkha lošna buča ki Phuv, amen najangljeder valjani te sikljova kotar jekh maribe kova hine ko nebo.

4, 5. (a) So ulo ko nebo ked o Isus ulo Kralj? (b) Premalo Pučaribe 12:12 so ulo ked o Beng hine fordimo ki Phuv?

⁴ Ko oftoto šero sikljiljam so o Isus ko 1914. berš ulo Kralj ko nebo (Danijel 7:13, 14). E biblijaki knjiga Pučaribe vačeri amendže so ulo: „A ko nebo ulo maribe: O Mihailo [o Isus] hem oljese anđelija mardžepe protiv o zmaj [o Beng]. A mardžape hem o zmaj hem oljese anđelija“. * O Beng hem oljese demonja našaldže o maribe hem hine fordime telje ki Phuv. Zamislin kobor o anđelija hine bahtalje! Ama, sar ka ovel e manušendže ki Phuv? I Biblija phenela so oljendže ka ovel but pharo sose o Beng tano but holjamo hem „džanela so isilje hari vakti!“ (Pučaribe 12:7, 9, 12).

⁵ O Beng dela sa pestar te čerel but pharipa ki Phuv. Ov tano but holjamo sose isilje hari vakti dži o Devel na cidelalje. Akana ka dikha so o Isus pheja, so ka ovel ko palune dive. Moljinatu dikh o 24. dodatko.

6, 7. Sar e Isuse lafija ando mariba hem bokhaljipa ovena čače?

⁶ Mariba. O Isus pheja: „Ka uštel o narodo upro narodo hem o kraljevstvo upro kraljevstvo“ (Matej 24:7). Pobuter manuša hine mudarde ko amaro vakti ko mariba nego bilo ked angljeder ki istorija. Jekh organizacija koja rodela o buča so ovena ko sveto, mothovi so kotar  1914. berš ko mariba hine mudarde pobuter ando 100 milionja manuša. Ko mariba kola hine ko 20. veko, hine mudarde trin puča pobuter manuša nego ko sa o mariba kola hine kotar jekhto veko dži o 1899. berš. Zamislin kobor muke hem dukha hineljen milionja manuša sebepi o mariba.

⁷ Bokhaljipa. O Isus pheja: „Ka ovel bokhaljipa“ (Matej 24:7). Avdije isi habe sar so niked na hine angljeder, ama palje but manuša tane bokhalje. Sose tano odova adžahar? Odoljese so naneljen pare te činen habe ja naneljen phuv kuri šaj diso te sadinen. Pobuter andi jekh milijarda manuša isiljen pohari ando jekh evro ko dive, te šaj te ačhon dživde. Jekh organizacija so akhari gajlja ando naborme manuša phenela so svako berš pobuter ando jekh milioni čhavore merena. But oljendar merena sebepi so naneljen so te han.

8, 9. Sar e Isuse lafija ando zemljotresija hem nabormipa ovena čače?

⁸ Zemljotresija. O Isus vačerdža: „Ka oven bare zemljotresija“  (Luka 21:11). Svako berš adžičerenape te oven sa pobare zemljotresija. Kotar 1900. berš prekalo duj milionja manuša mulje sebepi o zemljotresija. I tehnologija ko amaro vakti pomožini angljeder te džanelpe kuri ka oven o zemljotresija, ama palje but manuša merena.

⁹ Nabormipa. O Isus pheja so ka oven „bare nabormipa“. Odola bare nabormipa but sigate ka aven upro manuša hem but džene ka meren oljendar (Luka 21:11). Avdije o doktorija sikljilje sar te sačaren but nabormipa, ama pana isi nabormipa koljendže nane iljači. Svako berš but manuša merena ando rak, tuberkuloza hem ando avera nabormipa. Nane samo odola nabormipa, o doktorija arakhlje pana 30 neve nabormipa, a disave oljendar naneljen iljači.

10. Sar o lafija ando 2. Timotejese 3:1-5 avdije ovena čače?

¹⁰ Ko 2. Timotejese 3:1-5 pisini: „Ko palune dive ka ovel but pharo vakti“. O apostol Pavle  vačerdža save ka oven o manuša ko palune dive. Ov pheja so o manuša:

• ka mangen kokri pes

• ka mangen samo o pare

• na ka šunen pe dade hem pe daja

• na te oven verna

• na te oveljen mangipe premalo pi familjija

• ka oven bizo kontrola

• ka oven but holjame

• pobuter ka mangen peklje želje nego e Devlje

• ka čerenpe so mangena e Devlje, ama odova na te dičhol ko oljengo dživdipe

11. Premalo Psalam 92:7, so ka ovel e lošno manušenca?

¹¹ Da lji isi asavke manuša odothe kuri tu živineja? Asavke manuša isi ko celo sveto. Ama, o Devel pana hari ka čerel diso. Ov dija po lafi: „Ked o lošna barjona sar čar hem cvetinena sa okola so čerena lošnipe, odova tano te šaj te oven večno uništime“ (Psalam 92:7).

12, 13. So sikadžamen o Jehova ko akala palune dive?

¹² Ki Biblija hine vačerdo so ko palune dive ko sveto ka oven bare muke hem dukha. Ama, isto adžahar i Biblija vačerdža so ka oven hem šukar buča.

¹³ Pošukar ka haljolpe i Biblija. O prorok Danijel pisija kotar palune dive. Ov pheja: „O čačutno pendžaribe ka barjol“ (Danijel 12:4). O Devel ka čerel oljeso narodo pošukar te haljol i Biblija sar niked angljeder. Odova o Jehova čerdža pana pobuter kotar 1914. berš. Na primer, ov sikadžamen kobor tano važno oljeso nav hem so mangela te čerel ki Phuv. Isto adžahar, sikadžamen o čačipe ando odova so o Isus dija po dživdipe amendže, haljiljam so ovela amenca ked mera hem so o mulje ka oven irime ko dživdipe. Amen sikljiljam so samo e Devljeso Kraljevstvo šaj te cidel sa amare problemija. Isto adžahar, sikljiljam sar te ova bahtalje hem sar te živina sar so o Devel mangela. Ama, so e Devljese sluge čerena odoljeja so sikljilje? O odgovor ko akava pučibe delamen jekh aver proročanstvo. Moljinatu dikh o 21. dodatko hem o 25. dodatko.

14. Kuri sa vačeripe o šukar haberi ando Kraljevstvo hem ko čerela odova?

¹⁴ Ki celo Phuv ka vačeripe o šukar haberi. Ked o Isus vačerdža kotar palune dive, ov pheja: „Akava šukar haberi ando kraljevstvo ka vačeripe ko celo sveto“ (Matej 24:3, 14). O šukar haberi ando kraljevstvo vačeripe ko pobuter ando 230 phuvja hem thana, ko prekalo 900 čhibja. Čače, ki celo Phuv e Jehovase svedokija „ando sa o narodija hem miljetija“ pomožinena e manušendže te haljoven soj tano e Devljeso Kraljevstvo hem so ov ka  čerel oljendže (Pučaribe 7:9). On odova čerena biparengo. Disave manuša mrzinena oljen hem čerena oljendže pharipa, ama ni odova na čhinaviljen te vačeren o šukar haberi, sar so pheja o Isus (Luka 21:17).

15. (a) Da lji verujineja so amen živina ko palune dive hem sose? (b) So ka ovel okoljenca so šunena e Jehova, a so ka ovel okoljenca so na šunena olje?

¹⁵ Da lji verujineja so amen živina ko palune dive? But biblijake proročanstvija kola vačerena kotar palune dive ovena čače. O Jehova pana hari ka čhinavi te vačeripe o šukar haberi hem tegani ka avel „o kraj“ (Matej 24:14). Soj tano o kraj? Odova tano o dive ked o Devel ka cidel sa o lošnipe, a odova dive vičinipe Armagedon. O Jehova ka bičhalji e Isuse hem peklje zoralje anđelen te uništinen sa okoljen so na mangena te šunen Olje hem oljese Čhave (2. Solunskonendže 1:6-9). Palo odova, o Beng hem oljese demonja više na ka hovaven e manušen. Sa kola mangena te šunen e Devlje hem verujinena ko Devljeso Kraljevstvo, ka dikhen so sa o lafija kola ov pheja ovena čače (Pučaribe 20:1-3; 21:3-5).

16. Sebepi soj tano o kraj but paše, so valjani te čere?

¹⁶ Akava sveto kuri vladini o Beng, pana hari ka ovel uništimo. Odoljese tano but važno te pučamen „So me valjani te čerav?“ O Jehova mangela sa pobuter te sikljove andi Biblija. Dikh ko odova so sikljoveja andi Biblija sar diso soj tano but važno (Jovan 17:3). E Jehovase svedokija isiljen sastankija svako kurko kola pomožinena e manušendže te haljoven i Biblija. De sa tutar te dža ko svako sastanko (Čitinen Jevrejendže 10:24, 25). Ked sikljoveja so diso valjani te promine ko to dživdipe, tegani  ma dara te čere odova. Dži čereja odova, toklo amaljipe e Jehova ka ovel sa pozoralo (Jakoveso 4:8).

17. Sose but manuša na te adžičeren odova so ka avel o kraj?

¹⁷ O apostol Pavle pheja so o uništenje ando lošna manuša ka avel „sar o manuš kova čorela račate“, ked but džene na te adžičeren odova (1. Solunskonendže 5:2). O Isus mothodža so but manuša na ka mangen te verujinen so živina ko palune dive. Ov pheja: „Sar so hine ko Nojese dive, adžahar ka ovel i prisutnost ando manušeso Čhavo [ja o palune dive]. Sar so hine ko odola dive angljeder o potop, o manuša halje, pilje, ženisalje hem dijepe ko rom, sa dži na alo o dive ked o Noje khudža ki arka, hem hič na marije sa dži na alo o potop hem sa uništijaljen, adžahar ka ovel i prisutnost ando manušeso Čhavo“ (Matej 24:37-39).

18. Sar so vačerdža o Isus, ko so valjani te pazina?

¹⁸ O Isus vačerdža so valjani te pazina te na oven amendže ko jekhto than o buča, sar soj tane o habe, o pibe hem o gajlje so isimen ko amaro dživdipe. Ov pheja so o kraj ka avel „sar zamka“ bizo te adžičeralje. Isto adžahar, ov vačerdža so odova ka avel „upro sa kola živinena ki celo Phuv“. O Isus pana pheja: „Odoljese ačhoven džangavde hem sa odova vakti moljinen tumen ando vilo, te šaj te našen kotar akala buča so valjani te oven hem te terdžoven anglo manušeso Čhavo“ (Luka 21:34-36). Sose tano odoborkha važno te šuna e Isusese lafija? Sose e Bengeso lošno sveto pana hari ka ovel uništimo. Samo o manuša kola tane pravedna anglo Jehova hem o Isus, ka ačhon dživde ked ka avel o kraj hem ka oveljen večno dživdipe ko nevo sveto (Jovan 3:16; 2. Petareso 3:13).