1. Κάι μπορίνασα τι σικλιάς για το μέλλον;

ΤΥΧΙΣΑΛΟ ποτές τι ντικχές ο ειδήσεις ντα τι σκεφτίνες: “Κάι τζάλα ανταβά ντουνιάς;” Υπαρχίντιβενα αζόμ προβλήματα κο ντουνιάς ντα ο τζενέ ισί αζόμ άγριοι σο μερικοί πακιάνα ότι ισινάμ μπουτ πασέ κο τέλος. Ισί μπαγιά ανταβά; Μπορίνασα τι σικλιάς σο κα αβέλ-πες κο μέλλον; Βα. Παρόλο σο ο τζενέ να μπορίνενα τι βακερέν σο κα αβέλ-πες, ο Ιεχωβά Ντεβέλ μπορίνελα. Βοβ βακερέλα αμένγκε αντρέ κι Αγία Γραφή σαρ κα αβέλ αμαρό μέλλον ντα σο κα αβέλ-πες ι πφουβιάσαρ.​—Ησαΐας 46:​10· Ιακώβου 4:14.

2, 3. Σο μανγκένας τι σικλιόν ο μαθητές ι Ιησούσκε, ντα σο απάντηση ντινάς-λεν ο Ιησούς;

² Όταν διαβάνασα κι Γραφή για το τέλος ανταλέ ντουνιάσκο, ανταβά να μανγκέλα τι βακερέλ ότι κα καταστραφίντιβελ η πφουβ, αλλά ο πφιρνέ τζενέ. Ο Ιησούς σικλιαρντάς ι τζενέν ότι η Βασιλεία ι Ντεβλέσκι κα κυβερνίνελας ι πφουβ. (Λουκάς 4:​43) Λέσκε μαθητές μανγκένας τι σικλιόν κάνα κα αβέλας η Βασιλεία ι Ντεβλέσκι, ντα οτθάρ πουτσλέ ι Ιησούς: «Κάνα κα αβέν ανταλά, ντα καβά κα αβέλ ο σημείος σο κα σικαβέλ ότι αβιλάν ντα ότι ισί πασέ ο τέλος ανταλέ ντουνιάσκο;» (Ματθαίος 24:3) Ο Ιησούς να βακερντάς λένγκε ακριβώς ο ντιβές σο κα αβέλας ο τέλος, αλλά βακερντάς σο πράγματα κα αβένας-πες χάνικ πριν τι αβέλ ο τέλος ανταλέ ντουνιάσκο. Οντουλά σο βακερντάς ο Ιησούς αβένα-πες ακανά.

³ Ανταλέ κεφαλαιόστε κα ντικχάς πράγματα σο σικαβένα ότι τζουβντιάσα κο ντιβεσά χάνικ πριν τι αβέλ ο τέλος ανταλέ ντουνιάσκο. Πρώτα, πρέπει τι σικλιάς εκχέ τζενγκίσκε  σο αβιλό κο ουρανός, για τι μπορίνας τι αγαβάς σόσκε ισί αζόμ μπέτι ο πράγματα κι πφουβ.

4, 5. (α) Σο αβιλό-πες κο ουρανός όταν ο Ιησούς αβιλό Βασιλιάς; (β) Σαρ βακερέλα ο εδάφιος Αποκάλυψη 12:​12, σο κα αβέλας-πες όταν ο Μπενγκ κα φουρτίντιβελας κι πφουβ;

⁴ Κο Κεφάλαιος 8 σικλιλάμ ότι ο Ιησούς αβιλό Βασιλιάς κο ουρανός κο 1914. (Δανιήλ 7:​13, 14) Ο βιβλίος της Αποκάλυψης βακερέλα αμένγκε σο αβιλό-πες: «Αβιλό τζένγκι κο ουρανός: Ο Μιχαήλ [δηλαδή ο Ιησούς] ντα λέσκε άγγελοι κερντέ τζένγκι ι δρακόσαρ [ι Μπενγκέσαρ], ντα ο δράκος κερντάς τζένγκι ντα λέσκε άγγελοι». * Ο Μπενγκ ντα λέσκε δαίμονες χασαρντέ κο τζένγκι ντα φουρτίντιλε κι πφουβ. Σκέφτινε καζόμ μπαρί χαρά τθερένας ο άγγελοι! Αλλά σο κα αβέλας-πες ι τζενέντζαρ κι πφουβ; Η Αγία Γραφή βακερέλα ότι ο τζενέ κα τθερένας μπουτ προβλήματα. Σόσκε; Επειδή ο Μπενγκ ισί μπουτ χολιαμέ ντα «τζανέλα ότι τθερέλα χάνικ χρόνος ανγκλά-πέστε».​—Αποκάλυψη 12:7, 9, 12.

⁵ Ο Μπενγκ κερέλα σο νακχέλα λέσκε βαστέσταρ για τι ανέλ προβλήματα κι πφουβ. Ισί πφερντό χολί επειδή ατσσιλό-λες χάνικ χρόνος μέχρι τι σταματίνελ-λες ο Ντεβέλ. Για τι ντικχάς ακανά σο βακερντάς ο Ιησούς ότι κα αβέλας-πες κο τελευταία ντιβεσά.​—Ντικχ ι Σημείωση 24 κο παλαϊνέ σελίδες.

6, 7. Σαρ νικιόνα μπαγιά αντιβές οντουλά σο βακερντάς ο Ιησούς για το τζένγκια ντα για την μποκχ;

⁶ Τζένγκια. Ο Ιησούς βακερντάς: «Κα τζαν κόντρα τθεμά γιαβερέ τθεμέντζαρ ντα βασιλείες γιαβερέ βασιλειέντζαρ». (Ματθαίος 24:7) Αμαρέ ντιβεσέντε μουλέ κο  τζένγκια πιο μπουτ τζενέ από ό,τι κο γιαβερά μπρεσά σο νακχλέ. Σε πιο μπουτ από 1.900 μπρεσά, κατά πρώτος αιώνας μέχρι κο 1914, μουλέ κο τζένγκια περίπου 30 εκατομμύρια τζενέ. Αλλά σε πιο χάνικ από 100 μπρεσά, κατά 1914 μέχρι κο 2000, πιο μπουτ από 100 εκατομμύρια τζενέ μουλέ κο τζένγκια. Σκέφτινε καζόμ δυστυχία ντα ντουκχ τσσιντιντέ ο τζενέ κατά τζένγκια!

⁷ Μποκχ. Ο Ιησούς βακερντάς: «Κα αβέλ μποκχ». (Ματθαίος 24:7) Παρόλο σο αμαρέ ντιβεσέντε υπαρχίντιβελα πιο μπουτ χαμπέ από ό,τι πριν, μπουτ τζενέ να τθερένα τι χαν. Σόσκε; Επειδή νανέ-λεν λοβέ για τι κινέν χαμπέ ή χωράφια για τι καλλιεργίνεν-λεν. Πιο μπουτ από εκ δισεκατομμύριος τζενέ τζουβντιόνα με μπουτ χάνικ λοβέ κάθε ντιβές. Η Παγκόσμια Οργάνωση Υγείας βακερέλα ότι εκατομμύρια χουρντέ μερένα κάθε μπρες, ντα ανταβά αβέλα-πες πιο μπουτ επειδή νανέ-λεν ο χαμπέ σο χρειαζίντιβενα για τι τθερέν λατσσί υγεία.

8, 9. Σαρ αγαβάσα ότι οντουλά σο βακερντάς ο Ιησούς ι σεισμόνγκε ντα ι νασφαλιματένγκε νικιόνα μπαγιά;

⁸ Σεισμοί. Ο Ιησούς βακερντάας: «Κα αβέν μπουτ μπαρέ σεισμοί». (Λουκάς 21:​11) Κο ντιβεσά  σο τζουβντιάσα αβένα-πες κάθε μπρες μπαρέ σεισμοί. Κατά μπρες 1900, μουλέ κατά σεισμοί πιο μπουτ από ντούι εκατομμύρια τζενέ. Παρόλο σο αντιβές ο επιστήμονες μπορίνενα τι αγαβέν αμέσως κάνα αβέλα εκ σεισμός, μπουτ τζενέ μερένα κατά σεισμοί.

⁹ Νασφαλίματα. Ο Ιησούς βακερντάς ότι κα υπαρχίντιβενας «νασφαλίματα». Κα αβένας μπαρέ νασφαλίματα σαρί κι πφουβ ντα κα μερένας μπουτ τζενέ. (Λουκάς 21:​11) Παρόλο σο ο γιατροί αρακχλέ θεραπεία μπουτέ νασφαλιματένγκε, υπαρχίντιβενα νασφαλίματα σο ναστί αντιμετωπίνενα-λεν. Κάποιοι επιστήμονες βακερντέ ότι κάθε μπρες εκατομμύρια τζενέ μερένα νασφαλιματένταρ, σαρ για παράδειγμας κατά φυματίωση, κατά ελονοσία ντα κατά χολέρα. Επίσης, ο γιατροί αρακχλέ 30 νεβέ νασφαλίματα, ντα για μερικά ανταλένταρ να αρακχένα θεραπεία.

10. Σαρ νικιόνα μπαγιά αντιβές ο εδάφια 2 Τιμόθεο 3:​1-5;

¹⁰ Κο εδάφια 2 Τιμόθεο 3:​1-5, η Γραφή βακερέλα: «Κο τελευταία ντιβεσά ο πράγματα κα αβέν μπουτ δύσκολα, να κα αβέλ εύκολος τι ντες-λεν πέρα». Ο απόστολος  Παύλος βακερντάς σαρ κα αβένας μπουτ τζενέ κο τελευταία ντιβεσά. Βακερντάς ότι ο τζενέ

• κα μανγκένας σάντε πουμαρό νεαυτός

• κα μανγκένας μπουτ ο λοβέ

• να κα ντένας καν πουμαρέ νταντές ντα πουμαρέ νταγιά

• να κα τθερένας πίστη

• να κα μανγκένας πουμαρί φαμιλί

• να κα ατσσικιαρένας πουμαρό νεαυτός

• κα αβένας άγριοι

• κα μανγκένας τι ευχαριστίνεν πιο μπουτ πουμαρό νεαυτός ντα όχι ι Ντεβλές

• κα βακερένας ότι μανγκένα ι Ντεβλές, αλλά να κα ντένας-λες καν

11. Σαρ βακερέλα ο εδάφιος Ψαλμός 92:7, σο κα αβέλ-πες κο πφιρνέ τζενέ;

¹¹ Οτθέ σο μπεσέσα τούι, ισί ο τζενέ αντικάς; Σαρό κο ντουνιάς, μπουτ τζενέ ισί αντικάς. Αλλά μπουτ σουγκό ο Ντεβέλ κα κερέλ κάτι ανταλέσκε. Ντέλα πο λάφι: «Όταν ο πφιρνέ μπαριόνα σαρ η τσαρ ντα σαρέ οντουλά σο κερένα μπέτι πράγματα νακχένα λατσσές,  ανταβά αβέλα-πες για τι καταστραφίντιβεν για πάντα».​—Ψαλμός 92:7.

12, 13. Σο σικλιαρντάς-αμέν ο Ιεχωβά κο τελευταία ντιβεσά;

¹² Η Γραφή βακερντάς ότι, κο τελευταία ντιβεσά, ο ντουνιάς κα αβέλας πφερντό ντουκχ ντα βάσανα. Αλλά η Γραφή βακερέλα ότι κα αβέν-πες λατσσέ-ντα πράγματα.

¹³ Μπουτ τζενέ αγαβένα ι Γραφή. Ο προφήτης Δανιήλ γραφιντάς ι τελευταίε ντιβεσένγκε ντα βακερντάς: «Μπουτ τζενέ κα σικλιόν ι αλήθεια». (Δανιήλ 12:4) Ο Ντεβέλ κα βοηθίνελας πι υπηρετόν τι αγαβέν ι Γραφή πιο λατσσές από πριν. Ο Ιεχωβά κερντάς-λες ανταβά πιο μπουτ κατά μπρες 1914 ντα σοράν. Για παράδειγμας, σικλιαρντάς-αμέν καζόμ σημαντικός ισί λέσκο ναβ ντα σο σκοπός τθερέλα ι πφουβιάκε. Επίσης, σικλιαρντάς-αμέν ι αλήθεια για το λύτρος, σο αβέλα-πες όταν μεράσα ντα ότι κα αβέλ ανάσταση. Σικλιλάμ ότι σάντε η Βασιλεία ι Ντεβλέσκι μπορίνελα τι ντελ λύση σαρέ αμαρέ προβληματέντε. Επίσης, σικλιλάμ σαρ τι αβάς ευτυχισμέ ντα σαρ τι τζουβντιάς με τρόπος σο ευχαριστίνελα ι Ντεβλές. Αλλά σο κερένα ο υπηρέτες ι Ντεβλέσκε οντουλέ πραγματέντζαρ σο σικλιλέ; Εκ γιαβέρ προφητεία ντέλα-αμέν ι απάντηση.​—Ντικχ ο Σημειώσεις 21 ντα 25 κο παλαϊνέ σελίδες.

14. Κάι βακέρντιβενα ο λατσσέ αμπέρια ι Βασιλειάκε, ντα κον βακερένα-λεν;

¹⁴ Ο έργος ι Ντεβλέσκο αβέλα-πες σαρί κι πφουβ. Όταν κερέλας λάφι ι τελευταίε ντιβεσένγκε, ο Ιησούς βακερντάς: «Ανταλά λατσσέ αμπέρια ι βασιλειάκε κα βακέρντιβεν σαρί κι πφουβ». (Ματθαίος 24:3, 14) Ο λατσσέ αμπέρια ι Βασιλειάκε βακέρντιβενα σε πιο μπουτ από 230 τθεμά ντα σε πιο μπουτ από 700 τσσιμπά. Βα, σαρί κι πφουβ, Μάρτυρες του Ιεχωβά «σαρέ κατά τθεμά [ντα] κατά φυλές» βοηθίνενα ι τζενέν τι αγαβέν σο ισί η Βασιλεία ντα σο κα κερέλ ι τζενένγκε. (Αποκάλυψη 7:9) Ντα  ανταβά κερένα-λες χωρίς τι λεν λοβέ. Παρόλο σο μπουτ τζενέ μισίνενα-λεν ντα τζάνα λέντζαρ κόντρα, τίποτα να μπορίνελα τι τσσιναβέλ ο έργος, ακριβώς σαρ βακερντάας ο Ιησούς.​—Λουκάς 21:17.

15. (α) Πακιάσα τούι ότι τζουβντιάσα κο τελευταία ντιβεσά, ντα σόσκε; (β) Σο κα αβέλ-πες οντουλέντζαρ σο ασουνένα ι Ιεχωβάς ντα οντουλέντζαρ σο να ασουνένα-λες;

¹⁵ Πακιάσα ότι τζουβντιάσα κο τελευταία ντιβεσά; Μπουτ προφητείες ι Γραφιάκε σο βακερένα ι τελευταίε ντιβεσένγκε νικιόνα μπαγιά. Ατζεχάνικ, ο Ιεχωβά κα αποφασίνελ τι σταματίνελ ο έργος σο αβέλα-πες για τι βακέρντιβεν ο λατσσέ αμπέρια, ντα αζομάν κα αβέλ «ο τέλος». (Ματθαίος 24:​14) Σο ισί ο τέλος; Ισί ο Αρμαγεδδώνας, ο τζένγκι σο κα κερέλ ο Ντεβέλ για τι νασκιαρέλ σαρό ο πφιρνιπέ. Ο Ιεχωβά κα τσσουβέλ ι Ιησούς ντα λέσκε ζουρανέ αγγελόν για τι καταστραφίνελ οντουλέν σο να μανγκένα τι ασουνέν Λες ντα λέσκε Τσσαβές. (2 Θεσσαλονικείς 1:​6-9) Μετά ανταλέσταρ, ο Μπενγκ ντα λέσκε δαίμονες να κα χουχαβέν πάλι ι τζενέν. Ντα σαρέ οντουλά σο μανγκένα τι ντεν καν ι Ντεβλές ντα δεχτίνενα τι κυβερνίνελ-λεν λέσκι Βασιλεία κα ντικχέν τι νικιόν μπαγιά σαρέ οντουλά σο ντινάς πο λάφι τι κερέλ ο Ντεβέλ.​—Αποκάλυψη 20:​1-3· 21:​3-5.

16. Αφού ο τέλος ισί αζόμ πασέ, σο χρειαζίντιβελα τι κερές;

¹⁶ Ανταβά ντουνιάς σο κυβερνίνελα-λες ο Μπενγκ μπουτ σουγκό κα καταστραφίντιβελ. Οτθάρ, ισί μπουτ σημαντικός τι σκεφτίνας: “Σο πρέπει τι κεράβ με;” Ο Ιεχωβά μανγκέλα τι σικλιός κατά Αγία Γραφή καζόμ πιο μπουτ πράγματα μπορίνεσα. Πρέπει τι αγαβές ότι η μελέτη σο κερέσα ισί κάτι μπουτ σημαντικός. (Ιωάννης 17:3) Ο Μάρτυρες του Ιεχωβά κερένα συναθροίσεις κάθε εβδομάδα για τι βοηθίνεν ι τζενέν τι αγαβέν ι Γραφή. Προσπάθινε τι τζας κο συναθροίσεις. (Διάβανε Εβραίους 10:​24, 25) Άμα κα σικλιός ότι χρειαζίντιβελα τι κερές αλλαγές τι ζωγιάτε, μα  τι νταρές τι κερές-λεν. Καζόμ κα κερές-λεν, τι φιλία ι Ιεχωβάσαρ κα αβέλ πιο ζουρανί.​—Ιακώβου 4:8.

17. Όταν κα αβέλ ο τέλος, σόσκε ο πιο μπουτ τζενέ να κα μπεκλεντίνεν-λες;

¹⁷ Ο απόστολος Παύλος βακερντάς ότι η καταστροφή ι πφιρνένγκι κα αβέλ όταν ο πιο μπουτ τζενέ να κα μπεκλεντίνεν-λες, «σαρ εκ τσορ αντρέ κι ιράτ». (1 Θεσσαλονικείς 5:2) Ο Ιησούς βακερντάς ότι μπουτ τζενέ κα τραμπίνενας μα τι ντεν σημασία κο πράγματα σο σικαβένα ότι τζουβντιάσα κο τελευταία ντιβεσά. Βακερντάς: «Σαρ ισινέ κο ντιβεσά σο τζουβντιόλας ο Νώε, αντικάς κα αβέν ο πράγματα όταν κα αβέλ ι τζενέσκο Τσσαβό [δηλαδή κο τελευταία ντιβεσά]. Επειδή σαρ ισινέ ο τζενέ οντουλά ντιβεσά πριν τι αβέλ ο κατακλυσμός, σο χάνας ντα πίνας, ντα ο μουρσά ντα ο τζουβλιά παντρίνενας, μέχρι οντουβά ντιβές σο ο Νώε τσσουντάς-πες κι κιβωτός, ντα να ντινέ σημασία μέχρι σο αβιλό ο κατακλυσμός ντα καταστραφιντάς-λεν σαριλέν, αντικάς κα αβέν ο πράγματα όταν κα αβέλ ι τζενέσκο Τσσαβό».​—Ματθαίος 24:​37-39.

18. Σο βακερντάς αμένγκε ο Ιησούς τι προσοχίνας;

¹⁸ Ο Ιησούς βακερντάς αμένγκε τι προσοχίνας για μα τι ταρτίνεν αμαρί προσοχή “ο μπουτ χαμπέ ντα η μπουτ μολ ντα ο ανησυχίες ι ζωγιάκε”. Βακερντάς ότι ο τέλος κα αβέλ χωρίς τι μπεκλεντίνεν-λες ο τζενέ, «σαρ παγίδα». Βακερντάς επίσης ότι «κα αβέλ σαρέ οντουλέντε σο μπεσένα οπράλ κι πφουβ». Σοράν βακερντάς: «Οτθάρ, τι αβέν τζανγκαντέ, πάντα τι προσευχίντιβεν αντράλ τουμαρέ γκίσταρ για τι μπορίνεν τι σώντιβεν σαρέ οντουλένταρ σο κα αβέν-πες ντα τι ατσσόν ανγκλάλ κι τζενέσκο Τσσαβό». (Λουκάς 21:​34-36) Σόσκε ισί αζόμ σημαντικός τι ντας προσοχή ανταλέ λαφίντε σο βακερντάς ο Ιησούς; Επειδή μπουτ σουγκό ι Μπενγκέσκο πφιρνό ντουνιάς κα καταστραφίντιβελ. Σάντε οντουλά σο τθερένα ι ευλογία ι Ιεχωβάσκι ντα ι Ιησούσκι κα σώντιβεν όταν κα αβέλ ο τέλος ντα κα τζουβντιόν για πάντα κο νεβό ντουνιάς.​—Ιωάννης 3:​16· 2 Πέτρου 3:13.