1. Kathar zhanas so avla?

SHAJKE vi tusa sas kade, kana nasulimo dikhlan, shajke pe kodo gindindan, ke kadalestar majnasul aba nashtig avel e luma. But tragediji, thaj nasulimo si, anda kado but manusha kodo gindinen, ke kathej la lumako agor. Chachoj kado? Shaj zhanas so avla? Ova. Le manusha chi zhanen te phenen kodo, so avla, de o Jehova Del zhanel te phenel so avla amenca. E Biblia vorbil vi pal amare dyesa, thaj vi pe kodo, so avla la phuvasa (Izaiash 46:10; Jakab 4:14).

2–3. So pushle kathar o Jezush leske sityarde, thaj so phendas lenge?

² Kana e Biblia pal la lumako agor iskiril, atunchi na pe kodo gindil, ke pustilape e phuv, feder pa kodo, ke nachola o nasulimo. O Jezush kodo sityardas le manushenge, ke le Devlesko krajipo rajila pe phuv (Lukach 4:43). Leske sityarde kamenas te zhanen, kana putrela pesko rajimo le Devlesko krajipo, anda kado kado pushle kathar o Jezush: „Kana avna kadala, thaj so avla so sikavel, ke aba kathe san, thaj kathej la lumako agor?” (Mate 24:3). O Jezush chi phendas kadalaki vrama, de kodo phendas, ke so perela angla kodo, kana avla la lumako agor. Vorta kado dikhas, ande amare dyesa, so phendas.

³ Ande kado kotor opre shaj pinzharas, ke vorta angla kodo tordyuvas, kana avla la lumako agor. Te hatyaras, sostar si but nasulipo pe phuv, pasha kodo anglunes vorbinas pe jekh baro maripe, so ando cheri sas.

4–5. a) So pelaspe ando cheri pala kodo, kana o Jezush kraj kerdyilas? b) So phenel e Sikadyimaski 12:12, so pelaspe pe phuv, kana le Benges tele shude?

⁴ Andar o 8. kotor aba zhanas, ke o Jezush ando 1914 aba kraj kerdyilas ando cheri (Daniel 7:13, 14). E Sikadyimaski ginadyi tele iskiril, so pelas: „baro maripe maladas avri ando cheri: o Michael [o Jezush] thaj peske andyala mardepe le sapesa [o Beng]. Vi o sap mardaspe peske andyalonca kethane”. * O Beng thaj leske demonura xasarde o maripe, thaj tele shude len pe phuv. Gindin andre, soske vojake shaj sas le andyala! De so shaj phenas pa le manusha pe phuv? E Biblia kodo phenel, ke le manushenge kadi jekh chorri vrama avla. Sostar? Ke o Beng „zhanel, ke cerra vrama si les”, thaj anda kado bari xoji si ande leste (Sikadyimaski 12:7, 9, 12).

⁵ O Beng kattyi nasulimo kerel pe phuv, sode feri zhanel. Zurales xojakoj, ke zhanel, ke feri cerra vrama ashilas les, zhi kaj o Del rigate chi shol les. Dikhas vi kodo, ke so phendas o Jezush, so perela ande palune dyesa. (Dikh: Informaciovo 24, Palune dyesa.)

6–7. So shaj phenas po meripe thaj pe bokh?

⁶ Maripe. O Jezush kado phendas: „nipo zhala niposke, thaj krajipe krajipeske” (Mate 24:7). Majbut manusha mule ando maripe ande amare dyesa, sar ande historjia, ande dulmutani vrami. Jekh organizacija, so e luma dikhel, kodo phenel, ke kathar o 1914, majbut,  sar 100 milliovura manushen mudarde ande maripe. Mashkar o 1900 thaj mashkar o 2000 so sas maripe, majbut, sar trival kattyi manushen mudarde, sar angla kodo tela 1900 bersha. Gindin andre, soski bari dukh thaj briga kerde le manushenge le maripe.

⁷ Bokh. O Jezush kado phendas: „avla bokh” (Mate 24:7). Inke nas kattyi xamasko pe phuv, sar akanak, butzhenen inke naj so te xan. Sostar? Ke naj len love pe leste, thaj chi zhanen phuv te kinen, te beshajaren andre variso. Majbut sar jekh milliardura manusha majcerra, sar andar jekh dollari trajin sako dyes. La Lumaki Organizacija po Sastyipe kodo phenel, ke ande sako bersh but milliovura shavora meren anda kodo, ke chi zhanen kattyi te xan, saste t’aven.

8–9. So sikavel, ke andre pherdyon le Jezusheske vorbi pe kodo, ke mishkilpe e phuv, thaj pe nasvalimata?

⁸ Mishkilpe e phuv. O Jezush kado phendas: „mishkilape e phuv” (Lukach 21:11). Akanak, aba ande sako bersh shaj zhukaras pe kodo, ke majbut  mishkilape zurales e phuv. Zhi kathar o 1900 majbut, sar duj milliovura manusha mule, ke mishkindaspe e phuv. Thaj inke vi kade, ke e technika aba majsigo sikavel, e phuv kana mishkilpe, inke vi atunchi butzhene meren.

⁹ Nasvalimata. O Jezush pe kodo vorbindas, ke avna „pe jekh than po kaver nasvalimata”. Le bare nasvalimata sigo zhan perdal pe le manusha, thaj butzhene meren ande lende (Lukach 21:11). Le sastyara aba zhanen, so te keren but nasvalimasa, de chi zhanen sakofelo te sastyaren. Jekh lil kodo phenel, ke ande sako bersh but milliovura manusha meren ande kasave nasvalimata, sar o tbc, e malaria, e kolera. Pasha kado le sastyara majbut, sar 30 nyevo nasvalimo rakhle, mashkar soste si, so nashtig sastyaren.

10. Sar pherdyol andre ande amare dyesa o 2Timoteus 3:1–5?

¹⁰ Ando 2Timoteus 3:1–5 kado shaj ginavas: „ande le palune  dyesa phare vrami avna.” O Pal aposhtol phendas, ke soske avna le majbut manusha ande palune dyesa:

• pen kamena;

• le love kamena;

• chi patyana le dadengo, thaj le dejango muj;

• chi avna patyivale;

• chi kamena penga familija;

• chi zhanena palpale te xutyilenpe;

• zorake avna, thaj azbana kaveren;

• o shukaripe thaj e voja kamena, na le Devles;

• kade mezila, ke kamen le Devles, de chachikanes na kade trajin.

11. So avla le nasulenca, sar o Asharimata 92:7 iskiril?

¹¹ Vi majbutzhene kasavej pasha tute? But manusha kasavej sako karing. De o Del na butara kerela variso pe kado. Kado shinavel: „kana le nasula avri baron,  sar e char, thaj sako nasul luludyi anel – feri anda kodo si kado, te pustitin len” (Asharimata 92:7).

12–13. Pe soste sityardas amen o Jehova ande palune dyesa?

¹² E Biblia anglal phendas, ke ande palune dyesa pherdo avla e luma dukhasa, thaj brigasa. Vi kodo zhanas anda late, ke avna vi lashe butya.

¹³ La Bibliako hatyarimo. O Daniel profeta kado iskirindas pa le palune dyesa: „but avla o chacho pinzharimo” (Daniel 12:4). O Del zhutila peske niposke, ke inke majuzhes te hatyarel e Biblia, sar dulmut. Kado majfeder kathar o 1914 kerel. Sityardas amenge kodo, sosko baroj lesko anav; so kamel la phuvasa; so si o chachimo pa parujimo; so avla amenca, kana meras; thaj kodo, ke avla opre ushtyimo. Vi kodo zhanglam, ke feri le Devlesko krajipo zhanel te lasharel amaro pharipe, so si e chachi voja, thaj sar zhanas kade te trajinas, lossh te keras le Devleske. De so keren le Devleske slugi kodolesa, so aba sityile? Jekh kaver profecija del palpale vorba pe kado. (Dikh: Informaciovo 21, O parujimo thaj o Informaciovo 25, Opre ushtyimo.)

14. Kaj phenen le krajipeski lashi vorba, thaj kon keren kadi butyi?

¹⁴ Ingren e lashi vorba pe intrego luma. O Jezush kado phendas pal le palune dyesa: „le krajipeski lashi vorba phenena pe intrego phuv” (Mate 24:3, 14). Kadi lashi vorba ande 240 thema thaj thana, majbut sar pe 900 shiba phenen. Le Jehovaske Chache Manusha kon ande sako nipo si, pe intrego phuv zhutin le manushenge te hatyaren, so si o krajipe, thaj so kerela anda le manusha (Sikadyimaski 7:9). Kado jive keren.  Nashaven len thaj xojajven pe lende, de sar o Jezush anglal phendas, khanchi chi zhanel ande lengo drom te tordyol, te phenen e lashi vorba (Lukach 21:17).

15. a) Patyas ke ande palune dyesa trajinas? Sostar? b) So perel kodolenca, kon mukhenpe le Jehovaske, thaj so avla kodolenca, kon nichi?

¹⁵ Patyas, ke ande palune dyesa trajinas? But Bibliake profeciji, so pe palune dyesa sikaven, akanak pherdyon andre. O Jehova na butara tele tordyarela te phenen e lashi vorba, thaj atunchi avela o agor (Mate 24:14). So te hatyaras, kana pal la lumako agor vorbinas? O Armageddono hatyaras, kana o Del nacharel sako nasulimo. Le Jezushesa, thaj leske bare andyalonca o Jehova pustitil kodolen, kon chi mukhenpe leske, thaj leske Shaveske (2Tessalonika 1:6–9). Pala kado o Beng, thaj leske demonura aba chi ingrena rigate le manushen. Kodol pale, kon mukhenpe le Devleske, patyivin o krajipe, thaj anda pengo jilo tordyon pasha leste, shaj dikhena, ke le Devlesko sako shinaipe andre pherdyol (Sikadyimaski 20:1–3; 21:3–5).

16. So trubul te keres, ke pashal si o agor?

¹⁶ Pashal si kadala lumako agor, pa soste o Beng rajil. Anda kado amaro trajo tordyol pe kodo, te pushas amendar: „So trubul te kerav?” O Jehova kodo kamel, ke majfeder te pinzhares e Biblia. Zurales sityuv e Biblia (Janosh 17:3). Le Jehovaske Chache Manusha pe sako kurko kethane aven, te zhutin le manushenge te hatyaren e Biblia. Ker sakofelo ande kodo, ke mindig t’aves kothe pe kadala. (Ginav: Heberenge 10:24, 25!) Opre te pinzharesa, ke si te boldes pe varisoste, na dara te keres  les. Kade inke majzuralo amal avla tuke o Jehova (Jakab 4:8).

17. Sostar chi le na sama, kana aveltar o agor?

¹⁷ O Pal kodo phendas, ke atunchi pustitina le nasulen, kana chi zhukarena, „kade aveltar, sar pe ratyate o chor” (1Tessalonika 5:2). O Jezush anglal phendas, ke butzhene chi kamena sama te len, so pe kodola sikaven, ke ande palune dyesa trajinas. Kado phendas: „soske le Noeske dyesa sas, kasavo avla vi atunchi, kana le Manushesko Shavo [le palune dyesa] kathe avla. Ke soske sas le dyesa angla o shordyimasko paji – le manusha xanas thaj penas, colaxarenas thaj romeste zhanas, zhi kaj kodo dyes, kana o Noe andre gelas ande barka, thaj khanchi chi line sama, zhi kaj chi avilastar o shordyimasko paji, thaj chi mudardas savorazhenen –, kasavo avla vi atunchi, kana kathe avla le Manushesko Shavo” (Mate 24:37–39).

18. So phendas amenge o Jezush?

¹⁸ O Jezush pe kodo sityardas amen, „te na xan but, te na pen but, thaj la lumake gindura te na phanden tume tele”. Kodo phendas, ke o agor sigo resel amen, „kana chi zhukaren, sar kana chirikja xutyilen” thaj ke „aveltar kodo pe sakoneste, kon pe phuv beshen”. Pala kodo kado phendas: „Te na soventar, mindig rudyinen, te zhanen te muntun tume kathar kodo, so trubul t’avel, thaj te shaj tordyon angla le Manushesko Shavo” (Lukach 21:34–36). Sostar trubul te shunas pe le Jezusheski vorba? Ke pashal si kodi vrama, kana le Bengeski luma nachola. Feri kodola muntunape, thaj shaj trajin ande nyevi luma, kon kade trajin, sar o Jehova thaj o Jezush zhukarel (Janosh 3:16; 2Peter 3:13).