1. Citabu cihi cakarhubwira ebyaba omu kasanzi kayisha?

ERHI wakabona emyanzi eri yagera oku televizyo, hali amango erhi onarhanye ntya: “Ebintu bigendekire bya biha!” Hali mahanya manji n’obubi bunji n’okwo kunarhume bantu banji barhanya mpu nkaba lero bukola buzinda bw’igulu. K’obuzinda bw’igulu buli hofi? Ka byanahashikana okumanya ebyaba omu kasanzi kayisha? Neci. Abantu barhakamanya ebyaba omu kasanzi kayisha, cikoki Yehova yehe anabimanya bwinja. Ayerekine oku yehe anamanya ebyaba omu kasanzi kayisha. Ebibliya eganirire ebyaba omu kasanzi kirhu kayisha n’akasanzi kayisha k’igulu.​—Izaya 46:10; Yakobo 4:14.

2, 3. Bici abaganda ba Yezu balonzâgya okumanya? Na gurhi Yezu abashuzîze?

² Erhi Ebibliya eganirira obuzinda bw’igulu, arhali buzinda bw’idaho eganirira, cikwone buzinda bw’obubi. Yezu arhuyigirizîze oku Obwami bwa Nnamahanga bwanarhambule igulu. (Luka 4:43) Abaganda bage balônza okumanya binji okubiyerekire obo Bwami. Na ntyo bamudosa: “Mangaci ebyo byaba, n’ecaba cimanyiso c’okuyisha kwawe n’eca okuhwa kw’igulu?” (Mateyo 24:3) (olole amahugûlo nomero 24 gali oku bukurasa bwa 220) Yezu arhabwirâga abaganda bage olusiku obuzinda bwayisha. Cikwone ababwizîre ebintu byakabîre embere obuzinda buyishe. N’ebyo bintu biri byabonekana mwakano kasanzi kirhu.

 ³ Mw’eci cigabi, rhwabona ebyakarhuyemeza oku rhulamire hofi-hofi n’obuzinda bw’igulu. Cikoki lyorhumanya bulya gurhi igulu liharabisire ntya, bihunyire rhurhang’iganirira ivita lyajirikanâga empingu.

4, 5. (a) Gurhi byabîre empingu erhi Yezu aba Mwami? (b) Bici Amafulûlo 12:12 gadesire okubiyerekire ebyahikîre bene bantu kurhenga amango Shetani ajugucirâgwa ah’igulu?

⁴ Omu cigabi ca 8, rhwayizîre oku Yezu abîre Mwami empingu omu mwaka gwa 1914. (Daniyeli 7:13, 14) Ecitabu c’Amafulûlo ciganirire ebyagezire enyuma z’aho: “Okubundi ivita lyanacizûka empingu: Mikayeli [Yezu] bonabamalahika bage balwîsa enkuba-joka [Shetani], wankuba-joka na bamalahika bage nabo balwa.” Shetani n’abazimu bage bahîmwa banajugucîrwa ah’igulu. Bamalahika bacishînga bwenene! Cikoki gurhi byakaberîre bene bantu? Ebibliya edesire oku bakagwasîrwe n’obuhanya bunji. Bulya gurhi? Bulya Ibilisi akunire bwenene: bulya amanyire oku “hisanzi hisungunu” himusigalire.​—Amafulûlo 12:7, 9, 12 NWT.

⁵ Ibilisi ali alerha ah’igulu amahanya ga ngasi lubero. Akunire bwenene bulya amanyire oku hano hofi-hofi Yehova amuhererekeza. Cikwone rhubonage ebi Yezu adesîre okubiyerekire ensiku za buzinda.

6, 7. Bici biyerekine oku ebi Yezu aderhâga okubiyerekire amavita n’ishali biri byahikirira ene?

⁶ Amavita. Yezu adesîre: “Ishanja lyayish’ilwisa ishanja n’obwami bulwise obwami.” (Mateyo 24:7, NWT) Bantu banji bafîre omw’ivita mwakano kasanzi kirhu kulusha agandi mango goshi. Ecinyabuguma c’abasagasi (Worldwatch Institute) c’adesîre oku kurhangira omwaka  gwa 1914, amavita gayisîre miliyoni 100 y’abantu. Omu myaka 100 ekarhi k’emyaka ya 1900 na 2000, hafîre bantu banji bwenene kulusha kasharhu kw’omw’ivita lyabâga embere z’emyaka ya 1900. Amavita garhumîre emiliyoni y’abantu yalibûka!

⁷ Ecizombo/ishali. Yezu adesîre: ‘Hayish’iba ecizombo/ishali.’ (Mateyo 24:7) Abantu barhasag’iyeza ebiryo nk’oku bali bayeza ene. Cikoki, ene bantu banji barhagwerhi biryo binji by’okulya. Bulya gurhi? Bulya barhagwerhi nsaranga nyinji z’okugula ebiryo erhi ciru ehishwa hy’okuhinga. Muliyari muguma gw’abantu (muntu muguma okubantu nda) banakalama barhanagwerhi ciru n’enusu y’edolare oku lusiku. Ecinyabuguma c’omw’igulu lyoshi cilaba amagala nkana, c’ayerekîne oku ngasi mwaka emiliyoni y’abana eri yalwala n’okufâ bulya barhalibalya bwinja.

8, 9. Bici biyerekine oku ebi Yezu aderhâga okubiyerekire emisisi y’idaho n’endwala biri byahikirira mwakano kasanzi kirhu?

⁸ Emisisi y’idaho. Yezu alêba: ‘Hanâbè emisisi minene y’idaho.’ (Luka 21:11) Abayiga eby’emasomo  basagîrhe babôna oku ngasi mwaka hali haba emisisi y’idaho minenene. Kurhondera omu mwaka gwa 1900, bantu miliyoni erhalusire ibirhi bali bafâ n’emisisi y’idaho. Ene, kugerera obulenga bw’ebyuma, abantu banamanya mangaci emisisi y’idaho yagera. Cikwone, kurharhuma erhanîga bantu banji.

⁹ Endwala. Yezu âl’idesîre oku hakabîre “endwala z’okuyahukira.” Bantu banji bali bafâ n’endwala mbi z’okuyahukira duba-duba. (Luka 21:11, NWT) Abanganga bayishi okubuka endwala, cikoki arhali zoshi. Ngasi mwaka, emiliyoni y’abantu bali bafâ n’endwala nka tiberekiloze, ishushira likali n’ekolera. Eyi myaka 40 egezire, abanganga bavumbwîre zindi ndwala 30 mpyahya. Nyinji muli ezo ndwala, zirhagwerhi bufûmu.

10. Bulya gurhi rhwakaderha oku olwandiko lwa 2 Timoteyo 3:1-5 luli lwa hikirir’ene?

¹⁰ Olwandiko lwa 2 Timoteyo 3:1-5, ludesire oku omu nsiku za buzinda hayish’iba orhusanzi  “rhuzibu okuhasha.” Entumwa Paolo yahugwîre engeso z’abantu banji. Yadêrha oku abantu . . .

• bayish’ikacilongeza bonene,

• bayish’ikazigira ensaranga,

• bayish’iba bigamba,

• barhabè bishwekerezi,

• barhayish’iba n’obuzigire bwakaburhano,

• barhabè bakucihasha,

• bayish’iba bishungu na bakali,

• bayish’isima olûgasa kulu- sha okusima Nnamahanga,

• bay’ishikaderha mpu bazigîre Nnamahanga, cikoki bakalahîra oku barhakamukenga.

11. Bici Ennanga 92:7, zidesire byayish’igwârha banyankola-maligo?

¹¹ Ah’olamire, ka kw’abantu bayosire ntyo? Omw’igulu lyoshi ntyo kwo bantu banji bayosire. Hano hofi-hofi hali ebi Nnamahanga ajira. Alaganyize oku: “Ababi banajinîrira nka byasi, banyankola-maligo banaminîrira, erhi nakurhemwa bayish’irhemwa, liguma lya lwoshi.”​—Ennanga 92:7, NWT.

12, 13. Bici Yehova arhurhabazîzekwo okuhugûkwa mw’ezi nsiku za buzinda?

¹² Ebibliya yâli erhi yalebîre oku, omu nsiku za buzinda hakabîre mahanya manji na malibûko manji. Cikwone yashib’iderha oku hakabîre n’emyanzi minja.

¹³ Abakozi ba Nnamahanga bakahugûsirwe bwinja Ebibliya. Omulebi Daniyeli ayandisîre okubiyerekire ensiku za buzinda mpu: “Obumanye b’okuli bwakabîre bunji.” (Daniyeli 12:4, NWT) Omu nsiku za buzinda Nnamahanga arhabazîze abakozi bage bahugûkwa Ebibliya bwinja. Ntyo kw’anajijîre kurhondera omu mwaka gwa 1914. Kwa lwiganyo, arhurhabîre rhwamanya bwinja: Obulagirire bw’îzino lyage, omuhigo gwage okubiyerekire igulu, engombôlo byo bici, gurhi biba erhi omuntu afâ n’obulangalire bw’obufûke. (olole amahugûlo nomero 21 na 25 gali oku bukurasa bwa 216 na 221) Rhwayumvîrhe oku Obwami bwa Nnamahanga bone burhegesi bwakarhuyukiza amazibu girhu goshi. Kandi rhwanayûmva gurhi rhwakaba n’omwishingo omu kalamo na gurhi rhwakalama akalamo kasimisize Nnamahanga. Cikwone k’abakozi ba Nnamahanga banaberane bone ebi bali bayiga? Obundi bulebi bw’Ebibliya bushuzize kw’elyo idoso.

14. Bandi bali bayalagaza omwanzi mwinja gw’Obwami, na ngahi bali baguyalagaziza?

¹⁴ Abakozi ba Nnamahanga bakayalagazîze emyanzi minja y’Obwami omw’igulu lyoshi. Yezu adesîre ntya okubiyerekire ensiku za buzinda: “Eyi myanzi minja y’Obwami yayish’iyalagazibwa omu igulu lyoshi.” (Mateyo 24:3, 14, NWT) Emyanzi minja y’Obwami eri yayalagazibwa omu ndimi zilushire 700 n’omu bihugo birhalusire 230 n’amateritware. Abakozi ba Yehova babà omu ngasi “ishanja na ngasi bûko,” n’omu ntyo banahash’iyalagaza emyanzi minja y’Obwami omw’igulu  lyoshi. Banarhabaze abandi bamanye Obwami bwa Nnamahanga byo bici na bici bwayish’irhujirira. (Amafulûlo 7:9) Barhahûna kantu koshi koshi. Nk’oku Yezu aderhâga, bantu banji bakabashombire n’oku balibuza. Cikoki ciru akaba ntyo, ntaco cakabahanza okujira og’omukolo.​—Luka 21:17.

15. (a) K’orhanyize oku rhulamire omu nsiku za buzinda? Bulya gurhi? (b) Bici byahikira balya boshi barharhumikira Yehova? (c) Bici byahikira balya boshi barhumikira Yehova?

¹⁵ K’orhanyize oku rhulamire omu nsiku za buzinda? Ngasi byoshi amalebi g’Ebibliya gâl’ilebire okubiyerekire ensiku za buzinda biri byahikirira ene. Hano hofi-hofi, Yehova ahiga oku omwanzi mwinja g’Obwami gurhaciyalagazibagwa. Ako kasanzi “ly’obuzinda” bway’isha. (Mateyo 24:14) “Obuzinda” byo bici? “Obuzinda” ye Armagedoni. Kwo kasanzi Yehova ashereza banyankola-maligo n’amaligo gabo goshi. Anakolêse Yezu na bamalahika lyo bashereza balya boshi balahîre okurhumikira Nnamahanga na Yezu. (2 Abatesalonika 1:6-9) Enyuma z’aho, Shetani n’abazimu barhakacirheba ndi. Balya boshi balonzize okurhumikira Nnamahanga n’abalonzize okurhambulwa n’obo Bwami banabône ebiragane bya Nnamahanga okubyahikirira.​—Amafulûlo 20:1-3; 21:3-5.

16. Bulya obuzinda bukola buli hofi, bici okwanine ojire?

¹⁶ Er’igulu lirhegesirwe na Shetani lyasherezibwa hano hofi-hofi. Kuli kwa bulagirire bwenene okucidosa ntya: “Bici ngwasirwe njire?” Yehova alonzize omanye binji omu kuyiga Ebibliya. Oyiyige n’obushiru boshi. (Yowane 17:3) Abahamirizi ba Yehova banajir’entimanano za ngasi mugobe, lyo barhabala abandi bahugûkwe Ebibliya. Ojire okwawe koshi okaba mw’ezo ntimanano. (Osome Abahabraniya 10:24, 25) Okaciyumva oku hali  empindûlo okwanine okujira, orharhindiraga okuzijira: Jira zo. Erhi wakajira ntyo obwira bwawe haguma na Yehova bwagendekera bwazibuha.​—Yakobo 4:8.

17. Bulya gurhi bantu banji bayish’ikanguka han’obuzinda buyisha?

¹⁷ Entumwa Paolo yadesîre oku obushereze bwa banyankola-maligo bwash’iyisha “nka cishambo c’omu budufu.” (1 Abatesalonika 5:2) Okwo kuli kuderha oku bantu banji barhay’ishibe bacirheganyize kw’olo lusiku. Yezu adesîre oku bantu banji bayish’ikalahira ebimanyiso byoshi birhuyemezize oku rhulamire omu nsiku za buzinda. Adêrha ntya okubiyerekire ensiku nzinda: “Nka kulya omu mango ga Nuhu, ntyo kwo mwene-omuntu ayish’iyisha. Muli ezo nsiku za shokolerâga ecihonzi, bakag’ilya bananywe, bakag’isheba banashebwe kuhika olusiku Nuhu ajâga omu bwarho. Abantu barhakengerâga bici, kuhika ecihonzi cayisha, cabahêka boshi.”​—Mateyo 24:37-39.

18. Gurhi Yezu arhurhonzire?

¹⁸ Yezu arhurhonzîre oku: rhumanye rhwafukwa amasu “n’amasima g’omubiri, endalwe n’okucirhanya oku by’en’igulu.” Ahugûla oku obuzinda bwakayishire “nka murhego,” kw’okuderha oku bwashiy’isha buzira kulalira. Acib’iyushula oku: “lwayish’iyishira abantu boshi [. . .] b’igulu.” Buzinda ash’ibiderha ntya: ‘Kuziga mube masu, munashenge ngasi mango, lyo mukwanana okuyish’ifûma ebyo byayishe byoshi n’okuyish’iyimanga embere za Mwene-omuntu buzira bwoba.’ (Luka 21:34-36) Bulya gurhi rhukwanine okuyumva oko Yezu arhurhondâga? Bulya er’igulu lya Shetani likola liri hofi lisherezibwe. Abantu Yehova na Yezu bayemire bone bayish’ifûlumuka olo lusiku. Bayish’ilama emyaka n’emyaka omw’igulu lihyahya.​—Yowane 3:16; 2 Petro 3:13.