1. Singafundza kuphi ngelikusasa?

KUKE kwenteka yini nawubukela tindzaba utikhandze socabanga kutsi, ‘Ngabe tintfo titawuchubeka tibe timbi kakhulu yini kunaloku?’ Lamuhla kugcwele bubi kanye netinhlekelele letinyenti lokwenta batfu baphetse ngekutsi vele kuphela kwalelive sekusedvute. Kuliciniso yini loko? Ikhona yini indlela lesingati ngayo kutsi kutakwentekani esikhatsini lesitako? Yebo, ikhona. Bantfu abakhoni kubona kutsi kutawukwentekani ngelikusasa, kepha Jehova yena uyakhona kubona. EBhayibhelini usitjela lokutakwenteka kitsi nakulomhlaba.​—Isaya 46:10; Jakobe 4:14.

2, 3. Babuta kutsini bafundzi baJesu, futsi Jesu wabaphendvula watsini?

² LiBhayibheli nalikhuluma ngekuphela kwalelive lisuke lingakhulumi ngekubhujiswa kwemhlaba, kodvwa lisuke likhuluma ngekuphela kwebubi lobusemhlabeni. Jesu wafundzisa bantfu kutsi uMbuso waNkulunkulu ngiwo lotawubusa emhlabeni. (Lukha 4:43) Bafundzi bakhe bebafuna kwati kutsi uMbuso waNkulunkulu utawufika nini, babese babuta Jesu kutsi: “Tiyawukwenteka nini letintfo, futsi siyawuba yini sibonakaliso sekuba khona kwakho nesekuphela kwalelive?” (Matewu 24:3) Jesu akabatjelanga lilanga kodvwa wabatjela kutsi yini lebeyitakwenteka ngaphambi nje kwekuphela kwalelive. Letintfo Jesu latsi titakwenteka setivele tiyenteka.

³ Kulesehluko sitawufundza ngebufakazi bekutsi siphila  emalangeni ekugcina, kuphela kwalelive sekusondzele. Kwekucala nje, kute sicondze kutsi yini leyenta tintfo tibe timbi kangaka lamhlabeni sitawufundza ngemphi leyabakhona ezulwini.

4, 5. (a) Kwentekani ezulwini Jesu nakabekwa aba yiNkhosi? (b) Sembulo12:12, sitsi bekuyokwentekani ngemuva kwekujikijelwa kwaSathane emhlabeni?

⁴ KuSehluko 8 sifundze kutsi nga-1914 Jesu waba yiNkhosi ezulwini. (Danyela 7:13, 14) Incwadzi yeSembulo isitjela ngaloko lokwenteka ezulwini, itsi: “Kwesuka imphi ezulwini: Mikhayeli [Jesu] netingilosi takhe balwa nadrago [Sathane], drago anetingilosi takhe naye walwa.” * Sathane nemadimoni behlulwa kulemphi futsi bajikijelwa phansi emhlabeni. Cabanga nje kutsi tingilosi tajabula kangakanani nakwenteka loku! Bantfu bona batsintseka kanjani? LiBhayibheli lisitjela kutsi bekutawuba sikhatsi lesimatima kubantfu. Leni? Njengobe Develi “ati kutsi unesikhatsi lesincane,” utfukutsele ugane lunwabu.​—Sembulo 12:7, 9, 12.

⁵ Develi akatibeki phansi ngekwenta lokubi emhlabeni, uchubeka kakhulu kunakucala. Utfukutsele ngobe uyati kutsi Nkulunkulu utambhubhisa masinyane. Asesihlole kutsi Jesu watsi kutawentekani emalangeni ekugcina.​—Fundza liphuzu 24 ngephasi kwesihloko lesitsi Imininingwane Lesekugcineni.

6, 7. Yini lesingayisho ngetimphi nangendlala lamuhla?

⁶ Timphi. Jesu watsi: “Sive siyawuvukela lesinye sive,  nembuso uvukele lomunye umbuso.” (Matewu 24:7) Timphi letiliwa lamuhla tibulele bantfu labanyenti kakhulu kunaleto letake taliwa kadzeni. Umbiko we-Worldwatch Institute ubika kutsi kusukela nga-1914 timphi tibulele bantfu labangetulu kwetigidzi letingu-100. Bantfu labafa etimphini kusukela emnyakeni wa-1900 kuya ku-2000, banyenti ngalokuphindwe katsatfu nakucatsaniswa nebantfu labafa etimphini eminyakeni lengu-1 900 leyendlulile. Cabanga nje ngelusizi nangebuhlungu lobuviwe tigidzi tebantfu ngenca yaletimphi!

⁷ Indlala. Jesu watsi: “Kuyawuba khona indlala.” (Matewu 24:7) Kukhicitwa kudla lokunyenti nyalo kunakadzeni, kodvwa solo banyenti bantfu labakweswele. Kwentiwa yini loko? Kwentiwa kutsi bete imali yekutsenga kudla nobe indzawo labangalima khona. Ngelilanga tigidzigidzi tebantu tiphila ngemali lengephansi kwelidola linye laseMelika. Inhlangano yetemphilo emhlabeni ibika kutsi ngemnyaka kufa bantfwana labatigidzi ngesizatfu sekutsi bete kudla.

8, 9. Yini lekhombisa kutsi lokwashiwo nguJesu ngekutamatama kwemhlaba kanye netifo sekuvele kuyenteka?

 ⁸ Kutamatama kwemhlaba. Jesu watsi: “Kuyawuba khona kutamatama lokukhulu kwemhlaba.” (Lukha 21:11) Akwenteki kuphele umnyaka kungakabi nekutamatama kwemhlaba lokukhulu. Kusukela emyakeni wanga-1900, bantfu labangetulu kwetigidzi letimbili babulewe kutamatama kwemhlaba. Nanobe tebuchwepheshe setizamile kutsi kutamatama kwemhlaba kusheshe kubonakale kusengakefiki, kepha solo banyenti bantfu labafako.

⁹ Tifo. Jesu washo nekutsi bekuyoba “netifo letingumshayabhuce.” Tifo letiyingoti kakhulu betitawutsatselwana ngelizinga lelisetulu tibulale bantfu labanyenti. (Lukha 21:11) Tisetinyenti tifo letingelapheki nanobe bodokotela sebakhona kwelapha tifo letinyenti. Lomunye umbiko uchaza kutsi kufa tigidzi tebantfu tibulawe tifo letifaka ekhatsi sifo sesifuba sengati, samalaleveva, kanye nesifo semsheko. Lombiko uveta nekutsi bodokotela sebatfole letinye tifo letingu-30, letinye tato atelapheki.

10. Tintfo letishiwo ngumBhalo wa-2 Thimothi 3:1-5 tiyenteka yini lamuhla?

¹⁰ UmBhalo wa-2 Thimothi 3:1-5, utsi: “Emalangeni ekugcina kutawuba netikhatsi letibucayi lokumatima kubhekana nato.” Umphotsoli Pawula uchaza kutsi bantfu bebatawuba njani emalangeni ekugcina. Watsi bantfu

• batawutitsandza bona

• batsandze imali

• bangalaleli batali

• bangetsembeki

• babe bete lutsandvo ngemindeni yabo

• bangatibambi

• babe nelulaka, babe nenkhani

• batsandze injabulo kunekutsandza Nkulunkulu

• babonakale shengatsi bayamtsandza Nkulunkulu kodvwa babe bangamhloniphi

11. Tihlabelelo 92:7 titsi kutawentekani kubantfu lababi?

¹¹ Banjalo yini bantfu basendzaweni yangakini? Linyenti lebantfu lamuhla linjalo. Kukhona Nkulunkulu latawukwenta kute alungise lesimo. Naku lasetsembisa kona: “Nome lababi bangahluma  njengetjani, nato tonkhe tigilamkhuba tichuma, noko tiyawubhujiswa phakadze naphakadze.”​—Tihlabelelo 92:7.

12, 13. Usifundziseni Jehova kulamalanga ekugcina?

¹² LiBhayibheli lasho kutsi ngemalanga ekugcina emhlabeni bekuyogcwala buhlungu kanye nekuhlupheka. Kepha liBhayibheli liphindze litsi kunetintfo letinhle lebetiyokwenteka ngemalanga ekugcina.

¹³ Kuvisisa imiBhalo. Umphrofethi Danyela watsi ‘ngulabahlakaniphile labayawulivisisa kahle’ liciniso ngemalanga ekugcina. (Danyela 12:9, 10) Nkulunkulu abetawusita bantfu balivisise kahle liBhayibheli kwendlula kadzeni. Kusukela nga-1914 Jehova abesolo akwenta loko. Sibonelo saloko kutsi, usifundzisile ngekubaluleka kweligama lakhe kanye nenjongo yakhe ngemhlaba, usifundzise nangeliciniso ngenhlawulo nekutsi kwentekani kulabafile kanye nangekuvuswa kwalabafile. Sesifundzile kutsi nguMbuso waNkulunkulu lotawucedza tonkhe tinkinga tetfu. Siphindze safundza kutsi yini lesingayenta kute sijabule futsi siphile ngendlela lejabulisa Nkulunkulu. Kepha yini leyentiwa tinceku taNkulunkulu ngalesetikufundzile? Imphendvulo siyitfola kulesinye siphrofetho.​—Fundza liphuzu 21 na-25 ngephasi kwesihloko lesitsi Imininingwane Lesekugcineni.

14. Tishunyayelwa kuphi tindzaba letimnandzi teMbuso, futsi tishunyayelwa bobani?

¹⁴ Kushumayela lokwentiwa emhlabeni wonkhe. Akhuluma ngemalanga ekugcina Jesu watsi: “Letindzaba letimnandzi teMbuso tiyawushunyayelwa emhlabeni wonkhe.” (Matewu 24:3, 14) Tindzaba letimnandzi teMbuso tishunyayelwa emaveni langetulu kwa-230 nangetilwimi  letingetulu kwa-700. BoFakazi BaJehova labaphuma kuto tonkhe ‘tive netinhlanga’ basita bantfu kutsi bacondze kutsi uyini uMbuso waNkulunkulu nekutsi yini lotawubentela yona. (Sembulo 7:9) Bafundzisa mahhala, awubhadali ngisho senti. Njengoba Jesu aphrofetha, kute lokungabayekelisa kushumayela ngisho noma bashushiswa futsi benyanywa bantu labanyenti.​—Lukha 21:17.

15. (a) Uyakholwa yini kutsi vele siphila emalangeni ekugcina, futsi yini lekwenta ukholwe? (b) Kutakwentekani kulabo labalalela Jehova nakulabo labangamlaleli?

¹⁵ Uyakholelwa yini kutsi siphila emalangeni ekugcina? Tintfo letashiwo liBhayibheli mayelana nemalanga ekugcina setivele tiyenteka. Sekusedvute kutsi Jehova amise umsebenti wekushumayela bese “kuphela” kuyefika. (Matewu 24:14) Kuyini kuphela? Kuphela sikhatsi lapho Nkulunkulu atawususa bonkhe bubi nge-Amagedoni. Jehova utawusebentisa Jesu kanye netingilosi kute abhubhise bonkhe labangamhloniphi yena nendvodzana yakhe. (2 Thesalonika 1:6-9) Ngemuva kwaloko, Sathane nemadimoni ngeke basabadukisa bantfu. Bonkhe labalalela Nkulunkulu nalabafuna uMbuso wakhe batawubona konkhe lakwetsembisile kwenteka.​—Sembulo 20:1-3; 21:3-5.

16. Yini lokufanele uyente njengobe kuphela kusondzela?

¹⁶ Sekusedvute kutsi lelive lelibuswa nguSathane liphele. Kubaluleke kakhulu kutsi utibute kutsi; ‘Yini lokufanele ngiyente?’ Jehova ufuna ufundze tintfo letinyenti eBhayibhelini futsi utimisele nawufundza. (Johane 17:3) BoFakazi BaJehova bahlangana liviki ngeliviki kute basite bantfu bafundze liBhayibheli. Sicela kutsi wetame kuba khona njalo kulemihlangano. (Fundza Hebheru 10:24, 25.) Nawubona kutsi kunelushintjo lokufanele ulwente  ekuphileni kwakho, ungesabi kuvele wente njalo. Buhlobo bakho naJehova butawucina njengobe uchubeka wenta leto tingucuko ekuphileni kwakho.​—Jakobe 4:8.

17. Yini letakwenta bantfu bamangale nakufika kuphela?

¹⁷ Umphostoli Pawula watsi kubhujiswa kwalababi kutawufika ngalesikhatsi bantfu labanyenti bangakakugadzi, kufane ‘ncamashi nelisela ebusuku.’ (1 Thesalonika 5:2) Jesu washo kutsi bantfu labanyenti bebatawukhetsa kungabunaki bufakazi bekutsi siphila emalangeni ekugcina. Watsi: “Njengobe kwakunjalo ngesikhatsi saNowa, kuyawuba njalo nekuba khona kweNdvodzana yemuntfu [noma ngemalanga ekugcina]. Ngobe ngesikhatsi usengakefiki Zamcolo, bantfu bebadla, banatsa, labadvuna batsatsa, labasikati bendza, kwadzimate kwaba lilanga Nowa langena ngalo emkhunjini, futsi abazange banake kwate kwefika Zamcolo wabakhukhula bonkhe, kuyawuba njalo nekuba khona kweNdvodzana yemuntfu.”​—Matewu 24:37-39.

18. Wasecwayisa watsini Jesu?

¹⁸ Jesu wasecwayisa kutsi ‘singasindvwa kumita, kudzakwa kanye netinkhatsato tekuphila.’ Watsi kuphela kutawufika ‘kunitfole ningakalindzeli.’ Waphindze washo kutsi ‘kutawufika kubo bonkhe labasemhlabeni.’ Wachubeka watsi: “Hlalani niphapheme, nincuse [noma nithantaze nijule] ngaso sonkhe sikhatsi kute nikhone kubalekela tonkhe letintfo letihlelelwe kwenteka, nekuma embikweNdvodzana yemuntfu.” (Lukha 21:34-36) Kubaluleke ngani kulalela lesecwayiso saJesu? Kubalulekile ngoba sekusedvute kutsi lelive lelibi laSathane Develi libhujiswe. Ngulabemukelwa nguJehova naJesu kuphela labatawusindza nakuphela lelive futsi baphile phakadze emhlabeni lomusha.​—Johane 3:16; 2 Phetro 3:13.