1. Ita bele hatene kona-ba futuru husi neʼebé?

NOTÍSIAS oioin iha televizaun ka jornál halo ita hanoin: ‘Mundu nia situasaun sei sai oinsá?’ Ema balu hanoin katak mundu neʼe besik ona atu lakon mohu. Neʼe tebes ka lae? Ita bele hatene kona-ba buat neʼebé sei akontese iha futuru ka lae? Maski ita ema la iha kbiit atu hatene futuru, maibé liuhusi Bíblia, Maromak Jeová fó-hatene ita kona-ba ita-nia futuru no buat neʼebé sei akontese iha mundu.​—Isaias 46:10; Tiago 4:14.

2, 3. Jesus nia dixípulu sira hakarak hatene saida? Jesus hatán oinsá?

² Bainhira Bíblia koʼalia kona-ba mundu nia rohan, neʼe la dehan katak planeta mundu sei lakon, maibé buat aat oioin iha mundu mak sei lakon. Jesus hanorin katak aban-bainrua Maromak nia governu mak sei ukun mundu tomak. (Lucas 4:43) Ninia dixípulu sira hakarak hatene bainhira loos mak Maromak nia Ukun sei mai, tan neʼe sira husu ba Jesus: “Bainhira mak buat sira-neʼe sei akontese, no sinál saida mak sei hatudu katak Ita toʼo ona mai no mundu neʼe nia rohan mai ona?” (Mateus 24:3) Atu hatán ba pergunta neʼe, Jesus fó sai sinál sira neʼebé sei akontese kuandu mundu nia rohan besik ona. No sinál sira neʼebé Jesus hatete nanis akontese daudauk ohin loron.

 ³ Iha kapítulu neʼe, ita sei haree evidénsia neʼebé hatudu katak mundu neʼe besik ona atu remata. Ulukliu, mai ita aprende kona-ba funu neʼebé akontese iha lalehan atu bele komprende tansá mundu nia situasaun sai aat ba beibeik.

4, 5. (a) Saida mak akontese depois Jesus sai Liurai? (b) Tuir Apokalipse 12:12, bainhira Jesus soe tun tiha Satanás, saida mak akontese ba mundu?

⁴ Iha Kapítulu 8, ita aprende katak Jesus sai Liurai iha lalehan iha tinan 1914. (Daniel 7:13, 14) Kona-ba buat neʼebé akontese iha tempu neʼebá, livru Apokalipse hatete: “Funu mosu iha lalehan: Miguel [katak Jesus] no ninia anju sira halo funu hasoru samea boot [Satanás], no samea boot neʼe no ninia anju sira halo funu hasoru sira.” * Satanás no anju aat sira lakon funu no Jesus soe tun sira ba mundu. Neʼe halo anju diʼak sira iha lalehan haksolok tebes! Maibé oinsá ho ema iha mundu? Bíblia hatete katak sira sei hetan susar boot. Tanbasá? Tanba Diabu “hatene katak ninia tempu hela uitoan deʼit ona” no nia sai hirus makaʼas.​—Apokalipse 12:7, 9, 12.

⁵ Diabu mak lori susar oioin ba mundu neʼe. Nia laran-nakali tebes tanba nia hatene katak lakleur tan Maromak sei kesi metin nia. Mai ita buka-hatene Jesus nia liafuan kona-ba buat neʼebé sei akontese durante loron ikus sira-neʼe.​—Haree Apéndise 24.

6, 7. Oinsá mak Jesus nia liafuan kona-ba funu no hamlaha sai loos ohin loron?

⁶ Funu. Jesus hatete: “Nasaun ida sei kontra nasaun seluk no ukun ida sei kontra ukun seluk.” (Mateus 24:7) Husi tinan 1914 toʼo ohin loron, ema barak mate tanba funu. Relatóriu ida husi organizasaun neʼebé estuda kona-ba istória iha mundu (Worldwatch Institute) fó sai katak, husi apóstolu sira-nia tempu toʼo tinan 1914, maizumenus ema naʼin-30.000.000 mak mate tanba funu. Maibé husi tinan 1914 toʼo 2000, ema naʼin-100.000.000 liu mak mate tanba funu. Funu lori susar boot ba ema rihun ba rihun nia moris!

⁷ Hamlaha. Jesus hatete: “Rai-hamlaha . . . sei mosu iha fatin oioin.” (Mateus 24:7) Maski mundu tomak iha ai-han barak, maibé ema barak nafatin hamlaha. Tanbasá? Tanba sira la iha osan atu sosa ai-han, ka la iha rai atu halo toʼos. Iha mundu tomak, ema naʼin-1.000.000.000 liu mak moris  kiak no hamlaha. Tuir relatóriu husi Organização Mundial da Saúde, labarik naʼin-5.000.000 liu mak mate tinan-tinan tanba hamlaha ka malnutrisaun.

8, 9. Saida deʼit mak hatudu katak Jesus nia profesia kona-ba rai-nakdoko no moras sai loos daudaun?

⁸ Rai-nakdoko. Jesus hatete nanis: “Sei mosu rai-nakdoko makaʼas.” (Lucas 21:11) Ohin loron rai-nakdoko makaʼas akontese iha fatin oioin. Husi tinan 1900, ema naʼin-2.000.000 liu mate tanba rai-nakdoko. Maski ohin loron ema uza teknolojia oioin atu estuda kona-ba rai-nakdoko, maibé ema barak mate nafatin.

⁹ Moras. Jesus fó-hatene nanis katak sei iha “moras-peste”. Moras aat oioin bele hadaʼet lalais no halo ema barak mate. (Lucas 21:11) Maski doutór sira hetan ona tratamentu ba moras barak, sei iha moras oioin neʼebé labele kura. Tinan-tinan ema rihun ba rihun mate tanba moras aat hanesan TBC, malária no kankru. Laʼós neʼe deʼit, husi tinan 40 liubá toʼo ohin loron, doutór sira hetan ona moras  foun hamutuk 30 liu, no moras balu seidauk iha ai-moruk.

10. Oinsá mak 2 Timóteo 3:1-5 sai loos daudaun?

¹⁰ Eskritura iha 2 Timóteo 3:1-5 hatete: “Iha loron ikus sira sei iha problema barak neʼebé susar atu tahan.” Apóstolu Paulo esplika kona-ba ema barak nia hahalok durante loron ikus sira-neʼe. Nia hatete katak ema sei

• hadomi deʼit sira-nia an

• hadomi osan

• la halo tuir inan-aman

• la hatudu laran-metin

• la hadomi sira-nia família

• la kontrola an

• halo violénsia no siʼak

• hadomi deʼit ksolok duké hadomi Maromak

• finje hadomi Maromak maibé la halo tuir nia

11. Tuir Salmo 92:7, saida mak sei akontese ba ema aat sira?

¹¹ Ema barak hatudu hahalok hanesan neʼe, loos ka lae? Maski mundu tomak nakonu ho hahalok aat, maibé lakleur tan, Maromak  sei hadiʼa situasaun neʼe. Nia promete: “Bainhira ema aat sira sai buras hanesan duʼut no ema hotu neʼebé halo sala sai barak, neʼe akontese atu sira lakon ba nafatin.”​—Salmo 92:7.

12, 13. Saida deʼit mak Jeová hanorin ita durante loron ikus sira?

¹² Bíblia fó-hatene nanis katak iha loron ikus sira, mundu sei nakonu ho susar no terus oioin, maibé buat diʼak mós sei akontese.

¹³ Ema sei komprende Bíblia. Kona-ba loron ikus sira, profeta Daniel hakerek: “Koñesimentu neʼebé loos sei sai barak.” (Daniel 12:4) Maromak sei fó matenek ba ninia povu atu komprende lia-loos husi Bíblia ho klaru liután. Nia kumpre profesia ida-neʼe liuliu husi tinan 1914. Porezemplu, Jeová hanorin ita kona-ba ninia naran, ninia hakarak ba mundu, Jesus nia sakrifísiu, ema mate nia kondisaun no moris-hiʼas. Ita aprende ona katak só Maromak nia Ukun deʼit mak bele rezolve ema nia problema hotu. Ita mós aprende ona atu moris ho kontente no halaʼo ita-nia moris iha dalan neʼebé Maromak simu. Maibé ita sei halo saida ho buat neʼebé ita aprende? Mai ita buka-hatene profesia ida tan.​—Haree Apéndise 21 no 25.

14. Liafuan diʼak kona-ba Maromak nia Ukun habelar daudauk toʼo neʼebé? Sé mak haklaken?

¹⁴ Ema sei haklaken iha mundu tomak. Kona-ba loron ikus sira, Jesus hatete: “Ema sei haklaken liafuan diʼak kona-ba Maromak nia Ukun iha mundu tomak.” (Mateus 24:3, 14) Ohin loron, liafuan diʼak neʼe habelar iha nasaun no rai hamutuk 240 ho língua 900 liu. Testemuña ba Jeová husi ‘nasaun no suku hotu’ ajuda  ema iha mundu tomak atu hatene kona-ba saida mak Maromak nia Ukun no bensaun saida deʼit mak Ukun neʼe sei lori ba ema. (Apokalipse 7:9) Sira nunka husu osan atu halaʼo serbisu haklaken neʼe. Maski ema barak odi no fó susar ba sira hanesan Jesus fó-hatene nanis ona, maibé la iha buat ida mak bele hapara sira-nia haklaken.​—Lucas 21:17.

15. (a) Ita fiar katak ita moris daudaun iha loron ikus sira ka lae? Tanbasá? (b) Saida mak sei akontese ba ema neʼebé halo tuir Jeová no ema neʼebé lakohi halo tuir?

¹⁵ Ita fiar duni katak ita moris daudaun iha loron ikus sira ka lae? Bíblia nia profesia barak kona-ba loron ikus sira sai loos daudaun. Lakleur tan, Jeová sei hapara serbisu haklaken no “mundu nia rohan” sei mai. (Mateus 24:14) Saida mak sei akontese? Maromak sei halo funu Armagedon atu halakon buat aat hotu. Jeová sei uza Jesus no anju sira atu halakon ema hotu neʼebé lakohi halo tuir Nia no Ninia Oan. (2 Tesalónika 1:6-9) Depois neʼe, Satanás no ninia anju aat sira sei la tenta tan ema. No ema hotu neʼebé hakarak halo tuir Maromak no apoia Ninia Ukun sei haree Ninia promesa hotu sai loos.​—Apokalipse 20:1-3; 21:3-5.

16. Tanba mundu nia rohan besik ona, saida mak Ita presiza halo?

¹⁶ Loos duni, Satanás nia mundu neʼe besik ona atu lakon. Tan neʼe, importante atu husu ba Ita-nia an: ‘Saida mak haʼu presiza halo?’ Jeová hakarak Ita atu aprende liután kona-ba nia. Tan neʼe, hakaʼas an atu estuda Bíblia. (João 17:3) Testemuña ba Jeová halaʼo reuniaun semana-semana atu ajuda ema komprende Bíblia. Koko atu tuir beibeik reuniaun sira-neʼe. (Lee Ebreu 10:24, 25.) Se Ita presiza halo mudansa ruma ba  Ita-nia moris, keta taʼuk atu halo neʼe. Bainhira Ita halo buat hirak-neʼe, Ita-nia relasaun ho Jeová sei sai metin liután.​—Tiago 4:8.

17. Tanbasá ema sei hakfodak kuandu mundu nia rohan toʼo mai?

¹⁷ Apóstolu Paulo esplika katak mundu aat neʼe sei lakon derrepente deʼit, hanesan “naʼok-teen iha kalan”. (1 Tesalónika 5:2) Jesus fó-hatene nanis katak ema barak sei la tau atensaun ba evidénsia neʼebé hatudu katak ita moris iha loron ikus sira. Nia hatete: “Hanesan iha Noé nia tempu, nuneʼe mós ho tempu neʼebé Oan-Mane husi Ema toʼo ona mai [ka, loron ikus sira]. Iha tempu antes rai-nabeen, ema han-hemu, mane no feto sira kaben, toʼo loron neʼebé Noé tama ba ró laran. Sira la tau atensaun toʼo rai-nabeen akontese no halakon sira hotu.”​—Mateus 24:37-39.

18. Jesus fó avizu saida mai ita?

¹⁸ Jesus fó avizu mai ita atu la husik buat seluk dada ita-nia atensaun hanesan “han demais no hemu barak, no hanoin resin kona-ba moris neʼe”. Nia hatete katak mundu nia rohan sei mai derrepente deʼit “hanesan lasu ida” ba ema neʼebé la matan-moris. Jesus mós hatete katak loron neʼe “sei toʼo ba ema hotu neʼebé hela iha mundu tomak”. Tuirmai, nia dehan: “Tan neʼe, matan-moris nafatin bá, no harohan bá iha tempu hotu, atu nuneʼe imi bele halai sees husi buat sira-neʼe hotu neʼebé atu akontese, no atu Oan-Mane husi Ema bele simu imi.” (Lucas 21:34-36) Tanbasá mak importante tebes atu rona ba Jesus nia avizu neʼe? Tanba lakleur tan, Satanás nia mundu aat neʼe sei lakon. Só ema neʼebé Jeová no Jesus simu mak bele hetan salvasaun no moris ba nafatin iha mundu foun.​—João 3:16; 2 Pedro 3:13.