1. Hi kwihi laha hinga djondzaka kona hi wumundzuku?

UTSHAMA u hlalela mahungu u gama u pimisa leswi: ‘Swilo swita ya swi biha?’ Ku ni tinghozi totala ni tihanyi lakakuva vanhu van’wana va kholwa leswaku misava yi kusuhi ni kuhela. Kunga va leswaku swoleswo i ntiyiso? Indje ku ni ndlela yotiva leswingata humelela nkameni lowu taka? Ina. Hambileswi vanhu vangaswi kotiki kutiva leswingata yendleka nkameni lowu taka, Yehovha waswi kota. Ka Bibele, ahi byela hi wumundzuku la hina ni la misava. — Esaya 46:10; Yakobo 4:14.

2, 3. I yini leswi vadjondzisiwa va Yesu vanga lava kuswi tiva naswona Yesu ava hlamulise kuyini?

² Loko hi djondza hi kuhelisiwa ka misava aBibeleni, aswi vuli kuhela ka Misava leyi hi tshamaka ka yona, kambe i kuhela ka wubihi. Yesu a djondzise leswaku Mfumu wa Xikwembu awuta fuma misava. (Luka 4:43) Vadjondzisiwa va yena va lave kutiva leswaku Mfumu wa Xikwembu awuta ta siku muni. Kutani va vutise Yesu va ku: “Xana timhaka leti titahumelela nkarhi wihi ke? Xana xikombiso xa kuvuya ka wena ni xa kuhela ka minkarhi xitava xihi ke?” (Matewu 24:3) Yesu anga va byelanga siku la kona, kambe ava byele leswi aswita yendleka loko kuhela ka misava leyi kuli kusuhi. Leswi Yesu angaswi vula swa yendleka swoswi.

³ Ka ndzima leyi hita bula hi leswi swihi tiyisekisaka leswaku hi hanya ka masiku ya wugamu ya misava leyi. Kambe, leswaku hi twisisa swivangelo leswi yendlaka swilo swi ya swi biha laha misaveni, hi fanele hi sungula hi kudjondza hi nyimpi leyinga humelela atilweni.

4, 5. a) Kuyendleke yini atilweni ndzhaku ka loko Yesu a ve Hosi? b) Hikuya hi Nhlavutelo 12:12, akuta yendleka yini amisaveni hi leswi Sathana anga cukumeteliwa ka yona?

⁴ Ka Ndzima 8 hi djondze leswaku Yesu a ve Hosi atilweni hi 1914. (Daniyele 7:13, 14) Buku la Nhlavutelo lihi byela leswinga yendleka: ‘Kutani kupfuka nyimpi tilweni, ya Mikayele [kunga Yesu] ni tintsumi ta yena loko valwa ni dragona [Sathana]; na yona dragona yilwa na yili ni tintsumi ta yona.’ * Sathana ni madimona ya yena va hluliwile ka nyimpi leyi naswona va cukumeteliwe amisaveni. Pimisa ndlela leyi tintsumi ti tsakeke hi yona! Kambe akuta yendleka yini hi vanhu laha misaveni? Bibele li vula leswaku awuta va nkama wa swikarhato ka vanhu. Hi mhaka muni? Hikusa Diyavulosi a kwate swinene, ‘hi kutiva leswaku nkarhi wa yena wukomile.’ — Nhlavutelo 12:7, 9, 12.

⁵ Diyavulosi a vanga hasahasa hilaha anga kotaka hi kona laha misaveni. A kwate swinene hi leswi a tivaka leswaku Xikwembu xitamu susa kungali khale. Ahi kambisiseni leswi Yesu anga vula leswaku aswita yendleka ka masiku ya wugamu. — Vona Nhlamuselo 24.

6, 7. Li hetisekisa kuyini wuprofeta leli vulavulaka hi ndlala ni tinyimpi namuntlha?

⁶ Nyimpi. Yesu a te: ‘Tiko lin’wana litapfukela tiko lin’wanyana, mfumu wun’wanyana wutalwa ni mfumu wun’wanyana’. (Matewu 24:7) Kudlayiwe vanhu votala swinene ka tinyimpi ta masiku ya hina kutlula lavanga dlayiwa ka nkama lowunga hundza. Nhlengeletanu Leyi Kambisisaka Swiyendlakalo swa Misava Hinkwayu yi kombisa leswaku kusukela hi 1914, tinyimpi ti dlaye vanhu  va kutlula 100 wa mamiliyoni. Vanhu lavanga dlayiwa hi tinyimpi ka 100 wa malembe lamanga hundza, kusukela hi 1900 kuya fika 2000, i vanyingi swinene lakakuva va va phindha kanharhu hinkwavu lavanga ndlayiwa ndzeni ka 1900 wa malembe lamanga hundza. Pimisa hi swikarhato ni kuvaviseka lokunga twiwa hi vanhu va mamiliyoni hi mhaka ya tinyimpi!

⁷ Ndlala. Yesu a te: “Kutava ni tindlala”. (Matewu 24:7) Hambileswi kubyaliwaka swakudla swotala kutlula khale, vanhu votala ava na swakudla swa kuyenela. Hi mhaka muni? Hikusa ava na male yoyenela leswaku va xava swakudla kumbe masimu leswaku va byala. Vanhu lava tlulaka mabiliyoni va hanya hi male yitsongo swinene. Nhlengeletanu ya Misava Hinkwayu Leyi Vonelelaka Timhaka ta Lihanyu yi vula leswaku mamiliyoni ya vatsongwana va fa lembe ni lembe hi leswi va pfumalaka swakudla leswi nyikaka lihanyu.

8, 9. I yini lexi kombaka leswaku swiprofeto swa Yesu hi mavabyi ni kutsekatseka ka misava swa hetiseka?

⁸ Kutsekatseka ka misava. Yesu a profete a ku: “Kutava ni kutsekatseka ka misava”. (Luka 21:11)  Swoswi kutshama na kunyimeliwe kutsekatseka lokukulu ka misava lembe ni lembe. Kusukela hi lembe la 1900, vanhu lava tlulaka mamiliyoni mambirhi va fa hi mhaka ya kutsekatseka ka misava. Naswona hambileswi a tekinolojiya li pfunaka kuvona kutsekatseka ka misava na kungese yendleka, vanhu votala vaha fa.

⁹ Mavabyi. Yesu a profete leswaku akuta va ni “mintungu”. Mavabyi yochavisa amata hangalaka hi kuhatlisa ivi ma dlaya vanhu votala swinene. (Luka 21:11) Hambileswi vadokodela vanga djondza kudaha mavabyi yotala, kaha ni mavabyi yotala lamanga dahiwiki. Antiyisweni, muvuli mun’wana wa mahungu a vula leswaku lembe ni lembe, vanhu votala swinene va fa hi mavabyi yofana ni ndere, dzedzedze ni kolera. Kunga li lawa ntsena, vadokodela va tsumbule 30 wa mavabyi man’wana naswona kutala ka wona ama daheki.

10. Yi hetisekisa kuyini buku ya 2 Timotiya 3:1-5 namuntlha?

¹⁰ Ka 2 Timotiya 3:1-5, Bibele li vula leswi: “Masikwini ya  makumu, kutafika minkama ya kukarhata.” Mupostola Pawulo a hlamusele ndlela leyi vanhu avata va xiswona hi masiku ya wugamu. A vule leswaku vanhu avata va

• lava kalaka vanga na mhaka ni vanhu van’wana

• lava rhandzaka male

• lavanga yingisiki vapsali

• lava kalaka kutshembeka

• lava pfumalaka lirhandzu hi maxaka ya vona

• lavanga tikhomiki

• lavanga ni tihanyi ni kurhandza madzolonga

• lava rhandzaka kutitsakisa kutlula kurhandza Xikwembu

• lava yendlaka ingi va rhandza Xikwembu kambe va yala kuxi yingisa

11. Hikuya hi Tipisalema 92:7, kuta humelela yini hi vanhu vobiha?

¹¹ Vanhu lava tshamaka amugangeni wa wena va hanya hi ndlela leyi? Amisaveni hinkwayu, vanhu votala va hanya hi ndlela leyi. Kambe kungali khale Xikwembu xita yendla swokarhi hi mhaka leyi. Xi tshembisa leswi: “Loko lava vobiha va mila kufana ni byanyi ni  hinkwavu lava yendlaka leswo biha va hluka, va yendlela leswaku va helisiwa hilaha kunga heliki.” — Tipisalema 92:7.

12, 13. I yini leswi Yehovha angahi djondzisa swona ka masiku lawa ya wugamu?

¹² Bibele li profete leswaku ka masiku ya wugamu, misava ayita tala hi kuvaviseka ni kuhlupheka. Kambe Bibele li tlhele li vula leswaku akuta yendleka swilo swotsakisa.

¹³ Kutwisisa Bibele. Muprofeta Daniyele a tsale swokarhi hi masiku ya wugamu. A te: “Wutivi la ntiyiso lita tala ngopfu.” (Daniyele 12:4) Xikwembu axita nyika vanhu va xona wuswikoti lotwisisa Bibele kuyampsa kutlula minkama hinkwayu. Yehovha a yendle leswo hi ndlela yohlawuleka kusukela hi 1914. Hi xikombiso, ahi djondzise lisima la vito la yena, makungu ya yena hi misava, ntiyiso hi nkutsulu, leswi yendlekaka loko hi fa ni kupfuxiwa ka vafi. Hi djondze leswaku i Mfumu wa Xikwembu ntsena lowungata lulamisa swikarhato swa hina. Hi tlhele hi djondza hi ndlela yokuma ntsaku ni kuhanya hi ndlela leyi tsakisaka Xikwembu. Kambe i yini leswi vagandzeli va Xikwembu vaswi yendlaka hi leswi vaswi djondzeke? Nhlamulu yi kumeka ka wuprofeta lin’wana. — Vona Nhlamuselo 21 ni 25.

14. Hi kwihi laha mahungu yotsakisa ma chumayeliwaka kona naswona i vamani lavama chumayelaka?

¹⁴ Ntirho wochumayela amisaveni hinkwayu. Loko Yesu a vulavula hi masiku ya wugamu, a te: “Kutani Evhangeli leyi yita chumayeliwa misaveni hinkwayu, tani hi vumboni ka vanhu va matiko hinkwawu”. (Matewu 24:3, 14) Mahungu yotsakisa ya Mfumu ma chumayeliwa ka 240 wa matiko hi tirimi ta kolomu ka 1.000. Hakunene, Timboni ta Yehovha leti humaka “matikweni hinkwawu,  ni le tinxakeni hinkwatu” ti pfuna vanhu kuva va twisisa leswaku i yini Mfumu ni leswaku wutava yendlela yini vanhu. (Nhlavutelo 7:9) Kambe ati hakelisi nchumu hi ntirho lowu tiwu yendlaka. Hambileswi ti nyenyiwaka ni kutlhela ti hluphiwa hi vanhu votala, aku na nchumu lexingati tshikisaka kuchumayela, hilaha Yesu anga profeta hi kona. — Luka 21:17.

15. a) Hi mhaka muni u kholwa leswaku hi hanya ka masiku ya wugamu? b) Kuta yendleka yini hi lava yingisaka Yehovha ni lava kalaka vangamu yingisi?

¹⁵ Wa kholwa leswaku hi hanya ka masiku ya wugamu? Swiprofeto swotala hi masiku ya wugamu swa hetiseka. Kungali khale, Yehovha ata nyimisa ntirho wochumayela kutani “makumu” mata fika. (Matewu 24:14) I yini Makumu? I Armajedoni, laha Xikwembu xingata helisa wubihi hinkwalu. Yehovha ata tirhisa Yesu ni tintsumi ta yena letinga ni matimba leswaku va helisa hinkwavu lava yalaka kuyingisa Yena ni N’wana wa yena. (2 Vatesalonika 1:6-9) Ndzhaku ka leswo, Sathana ni madimona ya yena avangahata kanganyisa munhu. Kutani hinkwavu lava yingisaka Xikwembu ni kuyamukela Mfumu wa xona, vata vona kuhetiseka ka swiprofeto hinkwaswu. — Nhlavutelo 20:1-3; 21:3-5.

16. Leswi magamu manga kusuhi, i yini leswi u faneleke uswi yendla?

¹⁶ Misava leyi fumiwaka hi Sathana yita hela kungali khale. I swa lisima swinene kuva hi tivutisa leswi: ‘Se ni fanele ni yendla yini?’ Yehovha a lava leswaku uti karhatela kudjondza Bibele hilaha unga kotaka hi kona. U fanele uyi nyika lisima djondzo ya wena ya Bibele. (Yohane 17:3) Vhiki ni vhiki Timboni ta Yehovha ti ni minhlanganu leyi pfunaka vanhu leswaku va twisisa Bibele. U fanele u va kona ka minhlanganu leyo nkama ni nkama. (Lerha Vaheveru  10:24, 25.) Loko u djondza leswaku u fanele u cinca swokarhi, unga chavi kuswi yendla leswo. Loko u ya u cinca mahanyelo ya wena, wuxaka la wena na Yehovha lita ya li kula. — Yakobo 4:8.

17. Hi mhaka muni vanhu votala vata hlamala loko siku la Yehovha li fika?

¹⁷ Mupostola Pawulo a hlamusele leswaku vanhu vobiha vata lovisiwa hi nkama lowu votala va kalaka vangaswi nyimelanga, “kufana ni muyivi lweyi ataka nivusiku.” (1 Vatesalonika 5:2) Yesu a profete leswaku vanhu votala avata langa kukala vanga na mhaka ni swikombiso swa masiku ya wugamu. A te: ‘Kuvuya ka N’wana-wa-Munhu kutafana ni leswi swihumeleleke masikwini ya Nowa. Hikuva masikwini wolawo, loko ndhambhi yingasiva kona, vanhu avali kudleni, vanwa, vachada ni kuchadisiwa, kukondza kufika siku leli Nowa angheneke ngalaveni ha lona; avangatwisisi nchumu kukondza ndhambi yifika, kutani yivakhukhuza hinkwavu. Switava tano ni le kuvuyeni ka N’wana-wa-Munhu.’ — Matewu 24:37-39.

18. I yini leswi Yesu ahi byelaka leswaku hi tivonela ka swona?

¹⁸ Yesu ahi be ndleve leswaku hinga kavanyetiwi hi ‘makolo ni vudakwa, ni kuvilela hi swa vutomi leli’. A vule leswaku magamu mata fika hi xitshuketa, “kukotisa ntlhamu”. Naswona a vule leswaku ‘matawela hinkwavu lavayakeke misaveni hinkwayu.’ A tlhele a yengetela a ku: ‘Hitekani ke, mikhongela minkarhi hinkwayu, leswaku mikuma matimba ya kupona ka swilo hinkwaswu leswi swingatahumelela, ni kuyima na mitiyile mahlweni ka N’wana-wa-Munhu.’ (Luka 21:34-36) Hi mhaka muni hi fanele hi yingisa leswi Yesu angaswi vula? Hikusa kungali khale misava leyi yobiha ya Sathana yita helisiwa. Kuta pona ntsena lava yamukeliwaka hi Yehovha na Yesu naswona vata hanya hilaha kunga heliki ka misava leyimpsha. — Yohane 3:16; 2 Petro 3:13.