1. Келир үеде бисти чүү манап турарын кайыын билип ап болур бис?

МЕДЭЭЛЕР көрген саныңарда-ла: «Оон артык канчаар баксыраар боор!» — деп чугаалаар чадавас силер. Делегейниң каржы-хажагай апарганын көргеш, ооң төнчүзү удавас кээр деп, чамдык улус санап турар. Ол, шынап-ла, ындыг бе? Келир үеде бисти чүү манап турарын кандыг-бир арга-биле билип ап шыдаар бис бе? Ийе. Ооң дугайында биске Иегова Бурган Боду айтып бээр. Кижилерге бодаарга, Ол келир үеде чүү болурун кончуг эки билир деп Библияда бижээн (Исайя 46:10; Иаков 4:14).

2, 3. Иисустуң өөреникчилери чүнүң дугайында айтырган база ол чүү деп харыылаан?

² Делегейниң төнчүзү кээр деп Библиядан билир бис. Ол дээрге бөмбүрзекти узуткаар дивээн, а каржы-бакты узуткаар дээни ол. Бурганның Чагыргазы черни чагырар деп, Иисус Христос чугаалаан (Лука 4:43). Ооң өөреникчилери ол Чагырганың кажан чагырып эгелээрин билип алыксап турган. Ынчангаш олар Иисустан айтырган: «Ол айыыл-халап кажан боорун биске чугаалаңарам. Силерниң чедип кээриңерни болгаш бо делегейниң төнчүзүн кандыг демдек бадыткаарыл?» (Матфей 24:3). Иисус тода ай-хүнүн айытпаан, ынчалза-даа бо делегейниң  төнчүзүнүң мурнуу чарыында чер кырынга чүү болурун чугаалаан.

³ Бис шак ол үеде, үениң төнчүзүнде, чурттап турар бис. Бадыткалдарны көрүптээлиңер. Баштай амгы үеде чер кырында болуп турар болуушкуннарның дээрге болган дайын-биле харылзаалыын сактып кээлиңер.

4, 5. а) Иисус Хаан апарган соонда дээрге чүү болган? б) Ажыдыышкын 12:12-ден алырга, черде чурттап чоруур кижилерге ол болуушкун кандыг салдар чедирген?

⁴ Иисус 1914 чылда дээрге Хаан апарган деп 8-ки эгеден билип алдывыс (Даниил 7:13, 14). Ооң соонда чүү болганын Ажыдыышкын номунда мынча дээн: «Дээрге ооң соонда дайын эгеледи: Михаил [Иисус] * база дээрниң аңаа чагырткан төлээлери улуга [Эрликке] удур, а улу бодунуң төлээлери-биле оларга удур демисежип үндү». Ол дайынга Иисус тиилээш, Эрликти база буктарны черже дүжүр октапкан. Ол дээш дээрниң төлээлериниң кайы хире өөрүп турганын бодап көрүңер даан! Ынчалза-даа ол болуушкун чер кырында улуска хөй-ле ажыг-шүжүгнү эккелген. Чүге дизе Эрлик «хөлчок килеңнээн... ооң үези көңгүс эвээш артканын билир-дир» (Ажыдыышкын 12:7, 9, 12).

⁵ Эрлик кижилерге хөй-ле бузут-бакты кылырын  бар шаа-биле кызып турар. Бурган удавас ооң чагырар эргезин хавырар деп билгеш, Эрлик килеңнеп турар. Ооң үези, шынап-ла, эвээш арткан. Ол үени Библияда сөөлгү хүннер деп адаан. Иисустуң сөстеринден ол үеде чер кырынга чүү болурун билип алыылыңар. (24 дугаар Капсырылганы көрүңер.)

6, 7. Иисус Христостуң дайын-чаа болгаш аш-чут дугайында сөстери канчаар күүсеттинип турар?

⁶ Дайын-чаа. «Бир чонче өске чон, бир күрүнеже өске күрүне халдай бээр» — деп, Иисус чугаалаан (Матфей 24:7). Амгы үеде дайыннарга ооң мурнундаазындан-даа хөй улус чок болуп турар. «Уорлдуотч» деп институттуң отчёдундан алырга, 1914 чылдан тура дайыннарга 100 миллион ажыг кижи амы-тынындан чарылган. 100 чыл дургузунда (1900 чылдан тура санаар болза) дайын-чаага өлген улустуң саны эрткен 19 чүс чылдарга бодаарга, 3 катап хөй болган. Дайын миллион-миллион улуска чеже аарышкы, хилинчекти эккелбээн дээр!

⁷ Аш-чут. «Аш-чут... болур» — деп, Иисус чугаалаан (Матфей 24:7). Амгы үеде аъш-чемни кажангызындан-даа хөй бүдүрүп турар-даа болза, эңмежок хөй улус аштап-суксап чоруур. Чылдагааны чүдел? Кижилерниң бир болза акшазы чок, бир болза далган-тараа өстүрер чери чок. Миллиард ажыг кижи бир хүнде чаңгыс доллардан-даа  эвээш акша-биле чурттап чоруур. Бүгү делегей чергелиг кадык камгалал организациязының сан-чурагайы-биле алырга, чедир чемненмейн турарындан чыл санында миллион-миллион чаштар өлүп турар.

8, 9. Чер шимчээшкиннериниң болгаш аарыг-аржыктың дугайында Иисус Христостуң баш удур сөглээн сөстери канчаар күүсеттинип турар?

⁸ Чер шимчээшкиннери. «Күштүг чер шимчээшкиннери» болур деп, Иисус баш бурунгаар чугаалаан (Лука 21:11). Эртемденнер ону бадыткап, күштүг чер шимчээшкиннери чыл санында болуп турар деп чугаалап турар. 1900 чылдан тура чер шимчээшкиннериниң түңнелинде ийи миллион ажыг кижи өлген. Чер шимчээшкининиң каяа болурун амгы шагның технологиялары баш удур тодарадып турар-даа болза, ам-даа дыка хөй улус ооң хайындан өлүп турар хевээр.

 ⁹ Аарыг-аржык. «Аарыг-аржык» болур деп, Иисус баш бурунгаар чугаалаан. Ол дээрге дүргени аажок тарай бээр болгаш ооң уржуундан дыка хөй улус өлүр коргунчуг аарыглар-дыр (Лука 21:11). Эмчилер хөй-ле аарыгларга удур туржуп өөренип алган-даа болза, чамдык аарыглар эмнеттинмес хевээр артпышаан. Бир отчётта мынча деп бижээн: чыл санында миллион-миллион улус өкпе аарыындан, маляриядан болгаш холерадан аарааш, өлүп турар. Оон ыңай сөөлгү 40 чыл иштинде эмчилер 30 ажыг чаа аарыгларны тодарадып тыпкан, оларның чамдыктары эмнеттинмес.

10. 2 Тимофейге 3:1—5-тен сөстер канчаар күүсеттинип турарыл?

¹⁰ 2 Тимофейге 3:1—5-те мынча дээн: «Сөөлгү хүннерде аар-берге үе чедип кээрин  билип ал». Ол хүннерде кижилерниң мөзү-шынарының кандыг апаарын Павел элчин мынчаар бижээн:

• боттарын бодаар

• акша-мөңгүнге ынак

• ада-иезин дыңнавас

• ыдыктыг чүүлдерден ойталаар

• өг-бүлезинге тоомча чок

• бодун туттунуп билбес

• каржы-хажагай

• боттарының күзээшкиннерин хандырарынга Бургандан артык ынак

• Бурганны хүндүлээриниң чүгле даштыкы хевиринден туттунар, ынчалза-даа херек кырында Аңаа дыңнангыр эвес

11. Ырлар 91:8-тен алырга, каржы улус-биле чүү болур?

¹¹ Амгы үеде чүгле каш санныг улус эвес, а бүдүн делегейде ынчаар алдынып чоруур кижилер бар деп чөпшээрежир чадавас силер. Ынчалзажок Бурган бо бүгүнү удавас шиитпирлептер. «Бузуттуг улус оът-сиген дег  өзүп үнүп, бачыт үүлгедикчилери чечектелип турар-даа болза, кезээ мөңгеде узуткаттырар» — деп, Ол аазап турар (Ырлар 91:8).

12, 13. Иегова сөөлгү хүннерде биске чүнү билип алырынга дузалаан?

¹² Сөөлгү хүннерде делегей аарышкы болгаш хилинчек-биле долар деп Библияда баш бурунгаар бижээн-даа болза, оон ыңай эки чүүлдер болур деп база аазаан.

¹³ Библияны эки билири. Сөөлгү хүннерде «билиг көвүдеп кээр», азы Бурган бараалгакчыларынга Библияны эки билип алырынга дузалаар деп Даниил медээчи бижээн (Даниил 12:4). Ол чүүл ылаңгыя 1914 чылдан тура илдең апарган. Чижээ, Иегова Бодунуң адының болгаш черге хамаарыштыр күзел-бодалының чугулазын, оон ыңай төлевирниң, өлүмнүң болгаш диргизиишкинниң дугайында алыс шынны биске айтып берген. Бистиң шупту бергелеривисти чүгле Бурганның Чагыргазы шиитпирлеп шыдаар деп база аас-кежикти канчаар чедип алырывысты, Бурганның сеткилинге кирер кылдыр канчаар амыдыраарывысты билип алдывыс. Ол билиглерин Бурганның бараалгакчылары канчаар ажыглап турарыл? Аңаа харыыны дараазында өттүр билген медеглелден көрүптээлиңер. (21, 25 дугаар Капсырылгаларны көрүңер.)

14. Чагырга дугайында буянныг медээни суртаалдаар ажыл кайы хире нептерээнил база ону кым кылып турарыл?

 ¹⁴ Бүгү делегейде суртаал ажылы. Сөөлгү хүннерде «Дээрниң Чагыргазының дугайында бо Буянныг Медээни бүгү делегейге... медеглээн турар» деп, Иисус чугаалаан (Матфей 24:3, 14). Амгы үеде Чагырга дугайында буянныг медээни 230 ажыг чурттарда болгаш девискээрлерде база 700 ажыг дылдарда суртаалдап турар. Бүгү чер кырында «янзы-бүрү дылдарлыг сөөк-язы, аймак» чоннардан Иегованың Херечилери Бурганның Чагыргазының дугайында база ол Чагырга кижилерге чүнү кылыптарын халас суртаалдап турар (Ажыдыышкын 7:9). Хөй-ле улус Иегованың Херечилерин көөр хөңнү чок база оларны истеп-сүрүп турар-даа болза, Иисустуң баш бурунгаар чугаалааны ёзугаар Чагырга дугайында буянныг медээни суртаалдаар ажылды чүү-даа соксадып шыдавас (Лука 21:17).

15. а) Сөөлгү хүннерде чурттап турар бис деп чөпшээрежир силер бе база чүге? б) Бурганга дыңнангыр база дыңнангыр эвес улус-биле чүү болурул?

¹⁵ Сөөлгү хүннерде чурттап турар бис деп чөпшээрежир силер бе? Шынап-ла, сөөлгү хүннер дугайында хөй өттүр билген медеглелдер амгы үеде күүсеттинип турар. Удавас Иегова буянныг медээни суртаалдаарын соксадыптар. Ынчан «бүгү чүвениң төнчүзү... кээр» (Матфей 24:14). Төнчүзүнде Армагеддон деп дайын болур.  Аңаа Бурган каржы-бакты узуткаар. Иегованың күзел-соруу ёзугаар Иисус болгаш ооң күчүлүг төлээлери Бурганга дыңнангыр болурундан ойталап турар шупту улусту узуткаар (2 Фессалоникчилерге 1:6—9). Эрлик болгаш ооң буктары моон соңгаар кымны-даа мегелеп шыдавас апаар. Бурганга дыңнангыр болурун база Чагырганың адаанга чурттаарын күзээн улус Бурганның бүгү аазаашкыннарының канчаар күүсеттинерин көөрлер (Ажыдыышкын 20:1—3; 21:3—5).

16. Төнчүнүң мырыңай чоокшулаанын көргеш, чүнү кылыр ужурлуг силер?

¹⁶ Эрликтиң чагырып турар делегейиниң төнчүзү удавас кээр. Ынчангаш кижи бодундан: «Чүнү кылыр ужурлуг мен?» деп айтырары чугула. Библияны дыка эки билип алырыңарны Иегова күзеп турар. Ынчангаш Библияны өөрениринге шыңгыы хамаарылгалыг болуру чугула (Иоанн 17:3). Неделя санында Иегованың Херечилериниң ужуражылгалары эртип турар. Аңаа Библияны эки билип ап болур силер, ынаар доктаамал баарын кызыдыңар. (Номчуптуңар: Еврейлерге 10:24, 25.) «Өскерлир ужурлуг-дур мен» деп билип кагзыңарза, ону кылырындан кортпаңар. Ынчан Иегова-биле найыралыңар оон-даа быжыгар (Иаков 4:8).

17. Бо каржы делегейниң төнчүзү кижилерниң хөй кезиинге чүге хенертен кээр?

¹⁷ Бо каржы делегейниң төнчүзү кижилерниң хөй кезиинге «дүне када оор дег» хенертен кээр  деп, Павел элчин бижээн (1 Фессалоникчилерге 5:2). Сөөлгү хүннерде чурттап турарывыстың демдектерин хөй улус херекке албас деп, Иисус баш бурунгаар чугаалаан. «Нойнуң үезинде болуп турганы дег, Кижи амытан Оглунуң чедип кээр хүнүнде база ындыг боор. Ол хүннерде, суг халавының мурнуу чарыында, Нойнуң бажың-хемезинге олурупканы хүнге чедир, улус-чон ижип-чип, кадай ап база ашакка барып келген болгай. Суг халап келгеш, оларның шуптузун узуткап каггыжеге чедир, олар чүнү-даа угаап бодавааннар. Кижи амытан Оглу чедип кээрге, база шак ындыг боор» — деп, ол тайылбырлаан (Матфей 24:37—39).

18. Иисус чүнүң дугайында сагындырганыл?

¹⁸ Төнчү «хенертен, какпа дег» кээр болганда, Иисус сагындырган: «Оваарымчалыг болуңар: силерниң чүректериңер үен-даян хөглээшкинге, арагалаашкынга болгаш амыдыралдың сагышсыралдарынга алзып, дашталбазын». Ол мынча деп кыйгырган: «Ынчангаш бо бүгү кел чыдар айыыл-халаптардан чайлай бээр харыктыг болур дээш база Кижи амытан Оглунуң мурнунга бараалгаар дээш, үргүлчү серемчилелдиг болуңар, а ол ышкаш мөргүңер» (Лука 21:34—36). Иисустуң сөстерин херекке алыры чүге чугула? Чүге дээрге Эрликтиң каржы делегейи удавас узуткаттырар, а камгалалды база чаа делегейге мөңге чурттаар арганы чүгле Иегова биле Иисустуң ээ көрген улузу алыр (Иоанн 3:16; 2 Пётр 3:13).