1. Кытысь тодыны быгатомы, мар луоз азьланяз?

ИВОРЪЁСТЫ учкемды бере тӥ трос пол малпаськиды, дыр: «Кытчы та дунне питыра?» Дунне вылын туж трос курадӟонъёс но лек ужъёс, соин ик куд-ог адямиос малпало, ӝоген пум вуоз ини шуыса. Озьы-а со? Быгатомы-а ми тодыны, мар милемыз азьланяз возьма? Быгатомы. Адямиос уг тодо, мар луоз азьланяз, нош Инмар тодэ. Со сярысь со милемлы Библия пыр вера (Исаия 46:10; Иаков 4:14).

2, 3. Мар сярысь юазы Иисуслэсь дышетскисьёсыз но мар со соослы вераз?

² Куке ми Библиысь дунне бырон сярысь лыдӟиськомы, со уг возьматы, Музъем быдтэмын луоз шуыса. Со возьматэ, вань уродэз быдтэмын луоз шуыса. Иисус Христос вера вал, музъемен Инмарлэн Эксэйлыкез кивалтоз шуыса (Лука 4:43). Солэн дышетскисьёсызлэн туж тодэмзы потэ вал, ку со Эксэйлык кивалтыны кутскоз. Соин ик соос Иисуслэсь юазы: «Ку та луоз? Тынад лыктонэдлэн но дунне быронлэн кыӵе тодметэз луоз?»  (Матфей 24:3). Иисус ӧз вера, кыӵе нуналэ со луоз, нош вераз, мар луоз дунне бырон азьын.

³ Ми ӵапак со вакытэ, дунне бырон азьын, улӥськомы. Та люкетысь ми адӟомы, малы озьы вераны луоз. Нош нырысь тодамы ваёмы, кызьы дунне вылын кылдэм югдуръёс инмын ортчем ожмаськонэн герӟаськемын.

4, 5. а) Мар луиз инмын Иисус Эксэй луэм бере ик? б) Усьтӥськон 12:12 верамъя, мар вайиз адямиослы Шайтанэз музъем вылэ сэрпалтон?

⁴ Та книгалэн 8-тӥ люкетысьтыз ми тодӥмы, Иисус 1914-тӥ арын инмын Эксэй луиз шуыса (Даниил 7:13, 14). Тани мар вера Усьтӥськон книга со сярысь, мар луиз собере: «Инмын ожмаськон потӥз: Михаил [Иисус] * аслаз Кылчинъёсыныз лобась кыйлы пумит ожмаськизы, нош лобась кый аслаз кылчинъёсыныз соослы пумит ожмаськизы». Со ожмаськонын Иисус вормиз. Со Шайтанэз но периосты музъем вылэ сэрпалтӥз. Пуктэ син азяды, макем шумпотӥзы инмысь кылчинъёс! Нош адямиослы со трос куректон-кайгу вайиз. Малы? Малы ке шуоно Шайтан  туж бадӟым йыркурен улэ, «со тодэ уго, солы ӧжыт дыр кылемын ни шуыса» (Усьтӥськон 12:7, 9, 12).

⁵ Шайтан адямиослы трос лек ужъёс лэсьтыны тырше. Со вожомемын, малы ке шуоно ӝоген Инмар солы кивалтыны уз лэзьы ни. Шайтанлэн зэмзэ ик туж ӧжыт дырыз. Библиын со вакыт берпум аръёс шуыса нимамын. Ойдолэ тодомы, мар вераз Иисус со сярысь, кыӵе улон луоз берпум аръёсы. (Учке 24-тӥ ватсам валэктонэз.)

6, 7. Кызьы быдэсмо Иисус Христослэн ожъёс но сютэм улон сярысь верам кылъёсыз?

⁶ Ожъёс. Иисус вераз: «Калык калыклы, эксэйлык эксэйлыклы ваче пумит султозы» (Матфей 24:7). Азьло дыръёсын ӵошатыса, асьме вакытэ ожъёсын адямиос тросгес быро. Ог 1900 ар ӵоже, 1-тӥ даурысен 1914-тӥ арозь, ожъёсын 30 миллион пала адямиос быризы. Нош ог 100 ар ӵоже, 1914-тӥ арысен 2000-тӥ арозь, ожъёсын 100 миллионлэсь тросгес адямиос быризы. Макем трос вӧсь луон но курадӟон вайизы ожъёс трос миллион адямиослы!

⁷ Сютэм улон. Иисус вераз: «Сютэм аръёс... луозы» (Матфей 24:7). Асьме дыръёсы сиён-юон  азьвыллэсь тросгес ке но, трос адямиос сютэм уло. Малы? Малы ке шуоно соослэн яке коньдонзы ӧвӧл, яке музъемзы, кытын мае ке но будэтыны луысал. Миллиардлэсь тросгес адямиос нуналаз одӥг долларлэсь но ӧжытгес коньдонэн уло. Дуннеысь тазалыкез утёнъя огазеяськон ивортэмъя, сиён тырмымтэен, арлы быдэ вить миллионлэсь тросгес нылпиос куло.

8, 9. Мар возьматэ, Иисус Христослэн музъем зурканъёс но висёнъёс сярысь верам азьпалзэ ивортонэз быдэсме шуыса?

⁸ Музъем зурканъёс. Иисус азьло ик вераз: «Интыен-интыен музъем кужмо зуркалоз» (Лука 21:11). Тодосчиос верамъя, арлы быдэ кужмо музъем зурканъёсты возьмано. 1900-тӥ арысен музъем зурканъёсын 2 миллионлэсь тросгес адямиос быризы. Туала  технологиос азьло ик тодыны юртто ке но, кытын луоз музъем зуркан, туж трос адямиос бырыны шедё.

⁹ Висёнъёс. Иисус азьло ик вераз, «урод черъёс... луозы» шуыса — кышкыт висёнъёс, кудъёсыз ӝог вӧлмозы но кудъёсыз сэрен трос адямиос кулозы (Лука 21:11). Эмъясьёс троссэ висёнъёсты эмъяны дышетскизы ке но, вань на висёнъёс, кудъёссэ эмъяны уг луы. Одӥг отчётын верамын, котькуд аре трос миллион адямиос пӧртэм висёнъёслэсь куло шуыса, кылсярысь, раклэсь, сюлэм висёнъёслэсь, туберкулёзлэсь, маляриялэсь но холералэсь. Со сяна, берпум 40 аръёс ӵоже эмъясьёс 30-лэсь тросгес выль висёнъёс шедьтӥзы, куд-огъёссэ соос пӧлысь эмъяны уг луы.

10. Кызьы 2 Тимофейлы 3:1—5 гожтэм кылъёс быдэсмо?

¹⁰ 2 Тимофейлы 3:1—5 верамын: «Берпум аръёсы секыт дыръёс вуозы». Апостол Павел гожтӥз, кыӵе адямиос луозы берпум аръёсы:

• асьсэды гинэ яратӥсесь

• коньдонэз яратӥсесь

• анай-атайлэсь кылзӥськисьтэмесь

• вылтӥяськисесь

• тау карисьтэмесь

• чидасьтэмесь

• уродэсь-лекесь

• Инмарез яратон сярысь, золгес каньылэн, эзылыса улонэз яратозы

• Инмарез яратэмъяськозы, нош асьсэос солэсь уз кылзӥське

11. Псалтирь 91:8 верамъя, мар луоз лек адямиосын?

¹¹ Тӥ соглаш луоды, дыр, куд-ог адямиослэн гинэ ӧвӧл, вань адямиослэн таӵе сямъёссы шӧдӥсько шуыса. Но ӝоген Инмар ваньзэ  тупатоз. Со вера: «Сьӧлыклэсь кышкасьтэмъёс, законлы пумит улӥсьёс турын кадь ӝужало, сяськаясько пырак ӵожелы бырон понна» (Псалтирь 91:8).

12, 13. Мае Иегова юрттӥз валаны милемлы берпум аръёсы?

¹² Библиын верамын вал ке но, берпум аръёсы дунне вылын трос шуг-секытъёс но курадӟонъёс луозы шуыса, озьы ик отын верамын на вал, умоез но луоз шуыса.

¹³ Библиез валан. Даниил пророк гожъяз, берпум аръёсы тросэзлэн «тодонзы будоз» шуыса, яке Инмар аслаз ужась-тыршисьёсызлы Библиез умойгес валаны юрттоз (Даниил 12:4). Со тужгес но шӧдӥськиз 1914-тӥ арысен кутскыса. Кылсярысь, Иегова валэктӥз милемлы, мае возьматэ солэн нимыз, кыӵе солэн малпанэз музъем пумысен, малы дун тыроно вал, мар луэ адямиен кулэм бераз. Озьы ик со вераз, улӟыса султон луоз шуыса. Ми тодӥмы, Инмарлэн Эксэйлыкез гинэ милесьтым вань шуг-секытъёсмес сэрттоз-пертчоз шуыса. Ми тодӥмы, кызьы шудо луоно но кызьы улоно, Инмарлы ярамон луон понна. Нош мар каро Иеговалэн Адӟись-Ивортӥсьёсыз, сыӵе тодон-валан басьтыса? Со сярысь милемлы вера мукетыз азьпалзэ ивортон.  (Учке 21-тӥ ватсам валэктонэз но 25-тӥ ватсам валэктонэз.)

14. Макем вӧлмемын Эксэйлык сярысь ӟеч иворез тодытон уж но кин сое быдэстэ?

¹⁴ Быдэс дунне вылын тодытон уж. Иисус вераз, берпум аръёсы Эксэйлык сярысь ӟеч ивор быдэс дунне вылын тодытэмын луоз шуыса (Матфей 24:3, 14). Туннэ ӟеч иворез тодыто 900-лэсь тросгес кылъёсын 240 шаеръёсын но интыосын. Быдэс музъем вылын Иеговалэн Адӟись-Ивортӥсьёсыз «вань выжыос, калыкъёс» пӧлысь адямиослы верало Инмарлэн Эксэйлыкез сярысь но со сярысь, мар кароз со Эксэйлык адямиос понна (Усьтӥськон 7:9). Со понна соос коньдон уг басьто. Тросэз адямиос Адӟись-Ивортӥсьёсты адӟемпотостэм каро но уйыло-улляло, озьы ке но, кызьы Иисус вераз вал, номыр но тодытон ужез дугдытыны уз быгаты (Лука 21:17).

15. а) Соглаш-а тӥ, ми берпум аръёсы улӥськомы шуыса, но малы? б) Мар луоз соосын, кинъёс Инмарлэсь кылзӥськозы, но мар луоз соосын, кинъёс уз кылзӥське?

¹⁵ Соглаш-а тӥ, ми берпум аръёсы улӥськомы шуыса? Туннэ берпум аръёс сярысь трос азьпалзэ ивортонъёс быдэсмо. Ӝоген Иегова ӟеч ивор веран ужез дугдытоз. «Собере пум вуоз» (Матфей 24:14). «Пум» — со Армагеддон. Со ож, кудаз Инмар ваньзэ уродзэ быдтоз.  Иеговалэн эрикезъя, Иисус но солэн кужмо кылчинъёсыз быдтозы ваньзэс, кинъёс Инмарлэсь кылзӥськыны пумит луо (2 Фессалоникаослы 1:6—9). Шайтан но периос нокинэ но пӧяны уз быгатэ ни. Адямиос, кудъёсыз мылкыд карозы Инмарлэсь кылзӥськыны но солэн Эксэйлыкезлэн кивалтэмез улсын улыны, адӟозы, кызьы Инмарлэн котькуд сётэм кылыз быдэсме (Усьтӥськон 20:1—3; 21:3—5).

16. Та дуннелы ӝоген пум вуоз ини бере, мар тӥледлы карыны кулэ?

¹⁶ Та дуннелы, кудӥныз Шайтан кивалтэ, ӝоген пум вуоз. Соин ик юано аслэсьтыд: «Мар мон карыны кулэ?» Иеговалэн потэ, тӥ Библиысь тросгес тодон-валан мед басьтоды шуыса. Соин ик Библиез умой-умой дышетэ (Иоанн 17:3). Котькуд арняе, Библиез умойгес тодон понна, Иеговалэн Адӟись-Ивортӥсьёсыз ӵош люкасько. Тӥ но сыӵе пумиськонъёсы ялан ветлыны тырше. (Лыдӟе Еврейёслы 10:24, 25.) Тӥ шӧдӥды ке, тӥледлы мае ке воштоно шуыса, эн кышкалэ воштӥськыны. Соку тӥляд Иеговаен кусыпъёсты эшшо но юнмалозы (Иаков 4:8).

17. Малы тросэз адямиос понна та лек дуннелэн пумыз малпамтэ шорысь вуоз?

¹⁷ Апостол Павел гожтӥз, тросэз адямиос понна та лек дуннелэн пумыз малпамтэ шорысь  вуоз шуыса — «уйин лушкаськись кадь» (1 Фессалоникаослы 5:2). Иисус азьло ик вераз, тросэз адямиос саклык уз висъялэ шуыса тодметъёслы, кудъёсыз возьмато, ми берпум аръёсы улӥськомы шуыса. Со валэктӥз: «Ной улон нуналъёсы кызьы луэм, озьы ик луоз Адями Пилэн лыктонэз но: кызьы дуннеез ву нюртон нуналъёс азьын, Ной пыжаз пырытозь, сииллям, юиллям, кышнояськиллям, бызиллям, малпаллямтэ но, бадӟым ву лыктыса ваньзэс быдтытозь,— озьы ик луоз Адями Пилэн лыктонэз но» (Матфей 24:37—39).

18. Малэсь чакласькыны косӥз Иисус?

¹⁸ Пум «шӧдтэк шорысь... калтон кадь кутыны лыктоз». Соин ик Иисус вераз: «Асьтэдыз асьтэос чаклалэ: мултэс сиыса, вина юыса, та улонлэн сюлмаськонъёсынызы сэрен сюлэмъёсты секыт медаз улы». Со ӧтиз: «Котькыӵе дыре но сак улэ, вӧсяське, вань шугадӟонъёслэсь утиськыны но Адями Пи азе султыны мед быгатоды» (Лука 21:34—36). Малы Иисуслэсь кылъёссэ санэ пононо? Малы ке шуоно Шайтанлэн лек дуннеез ӝоген быдтэмын луоз. Утиськыны но выль дуннеын пырак улыны быгатозы соос гинэ, кинъёс Иеговалы но Иисуслы ярамон луо (Иоанн 3:16; 2 Пётр 3:13).