1. Келәчәк тоғрилиқ қәйәрдин биләләймиз?

 ЙЕНИ әхбаратларни көргәндә, «Бу дуния немә болуп кетиватқанду?»— дәп әндишә қилидиғансиз. Бүгүнки күндә дуния ечинишлиқ вақиәләргә вә зораванлиқларға толғачқа, адәмләр бу дунияниң ахири йеқинлашти дәп ишиниду. Һәқиқәтән шундақ йеқинлишиватамду? Келәчәктә немә болидиғанлиғини биләләймизму? Шундақ, Йәһва Худа Муқәддәс китап арқилиқ, бизгә келәчигимиз қандақ болидиғанлиғи вә кәлгүсидә йәр йүзидә немә иш йүз беридиғанлиғи тоғрилиқ ейтиду (Йәшая 46:10; Яқуп 4:14).

2, 3. Әйсаниң шагиртлириниң немини билгүси кәлгән вә Әйса уларға қандақ җавап бәргән?

² Муқәддәс китапни оқуғинимизда, бу дунияниң ахири йәр шариниң йоқилиши әмәс, рәзилликләрниң ахирлишиши екәнлигини көрәләймиз. Әйса адәмләргә Худа Падишалиғи пүткүл йәр йүзи үстидин башқуридиғанлиғи һәққидә тәлим бәргән (Луқа 4:43). Әйсаниң шагиртлири Худа Падишалиғиниң келидиған вақтини билгүси келип, униңдин мундақ сориған еди: «Бу вақиәләр қачан йүз бериду? Сениң һазир болушиңни вә заман ахириниң келишини билдүридиған қандақ аламәтләр болиду?» (Мәтта 24:3, ЙД). Әйса вақит-саатини ениқ ейтмисиму, заман ахири болуштин авал қандақ вақиәләр йүз беридиғанлиғини ейтип бәргән еди. Әйсаниң дегән сөзлири бизниң күнлиримиздә орунлиниватиду.

³ Мошу бапта биз дунияниң ахири йеқинлишиватқан вақитта яшаватқанлиғимизни дәлилләйдиған испатларни көрүп чиқимиз. Йәр йүзидә рәзил ишлар немә үчүн көпийип кәткәнлигини  чүшиниш үчүн, авал асманда йүз бәргән уруш һәққидә билишимиз керәк.

4, 5. а) Әйса Падиша болғандин кейин, асманда қандақ вақиә йүз бәргән? ә) Вәһий 12:12гә асасланғанда, Шәйтан асмандин ташланғандин кейин, йәр йүзидә немә иш йүз бериду?

⁴ 8-баптин билгинимиздәк, Әйса 1914-жили асманда Падиша болған (Даниял 7:13, 14). Йүз бәргән шу вақиә Вәһий китавида мундақ тәсвирләнгән: «Асманда җәң башланди: Микаил [Әйса] вә униң пәриштилири әҗдиһаға [Шәйтанға] қарши җәң қилди. Әҗдиһа вә униң пәриштилириму уларға қарши җәң қилди» a. Шәйтан вә униң пәриштилири җәңдә мәғлуп болуп, зиминға ташланди. Асмандики пәриштиләрниң қанчилик хошал болғанлиғини тәсәввур қилиңа! Бирақ йәр йүзидики адәмләрчу? Муқәддәс китап инсанларниң бешиға еғир күнләрниң келидиғанлиғини ейтқан. Немә үчүн? Чүнки Шәйтан «вақтиниң аз қалғанлиғини билип, қаттиқ қәһәр-ғәзәп билән чүшти» (Вәһий 12:7, 9, 12, ЙД).

⁵ Шәйтан қаттиқ ғәзәплинип, күчиниң баричә йәр йүзидә азап-оқубәтләрни пәйда қиливатиду. Чүнки у Худаниң пат арида уни йоқ қилидиғанлиғини ениқ билиду. Әйса ейтқан заманниң ахирида йүз беридиған ишларни көрүп чиқайли (24-изаһәткә қараң).

6, 7. Әйса пәйғәмбәрниң уруш вә ачарчилиқ тоғрисида ейтқан сөзлири бүгүнки күндә қандақ әмәлгә ашмақта?

⁶ Урушлар. Әйса пәйғәмбәр:  «Хәлиқ хәлиқкә қарши чиқиду, падишалиқ падишалиққа»,— дегән (Мәтта 24:7). Тарихтики урушларға қариғанда, бүгүнки күндә адәмләр көпирәк өлүватиду. Бир тәшкилатниң мәлуматида: «1914-жилдин тартип урушта 100 миллиондин ошуқ киши өлгән. 1900-жилдин 2000-жилғичә (1 әсир) урушларда өлгәнләрниң сани, 1900-жил (19 әсир) давамида урушларда өлгәнләрниң санидин үч һәссә көп болған»,— дәп йезилған (Worldwatch Institute). Уруш пәйда қилған азап-оқубәт вә қайғу-һәсрәтләрни тәсәввур қилиш бәкму қийин!

⁷ Ачарчилиқ. Әйса: «Ачарчилиқ... йүз бериду»,— дегән (Мәтта 24:7). Һазир ашлиқтин мол һосул елинсиму, көп адәмләр тойғичә тамақ йәләлмәйду. Немә үчүн? Чүнки уларниң озуқ-түлүк сетивалғидәк пули яки ашлиқ өстүридиған йери йоқ. Бир миллиардтин ошуқ адәмләрниң турмуш хираҗити күнигә бир доллар яки униңдин азирақ болған. Башқа бир тәшкилатниң мәлумати бойичә, һәр жили озуқлуқ йетишмәсликтин миллионлиған балилар ағрип өлүп  кетиватиду (The World Health Organization).

8, 9. Әйсаниң йәр тәврәшләр вә кесәлләр һәққидә ейтқан бәшарәтлири қандақ орунлиниватиду?

⁸ Йәр тәврәшләр. Әйса: «Йәр тәврәшләр болиду»,— дегән (Луқа 21:11). Һәр жили нурғун күчлүк йәр тәврәшләр йүз бериду дәп мөлчәрлиниду. 1900-жилдин та һазирғичә икки миллиондин ошуқ адәм йәр тәврәштә өлүп кәткән. Бүгүн йәр тәврәшләрни алдин-ала ениқлашқа ярдәм беридиған заманивий техника көп болсиму, йәнила нурғун адәмләр өлүватиду.

⁹ Кесәлләр. Әйса жуқумлуқ кесәлләр болидиғанлиғини алдин-ала ейтқан. Улар тез тарқилип, көп адәмләр өлиду (Луқа 21:11). Гәрчә дохтурлар көп кесәлликләрни давалап сақайтсиму, лекин техи даваси тепилмайватқан кесәлликләр көп. Бир мәлуматқа асасланғанда, һәр жили миллионлиған адәмләр сил, бәзгәк вә холера қатарлиқ кесәлликләрниң кесиридин өлүватиду. Униңдин ташқири, дохтурлар ахирқи 40 жилда 30дин ошуқ даваси техи тепилмиған йеңи ағриқларни байқиған.

10. Тимотийға 2-хәт 3:1—5тики сөзләр бүгүн қандақ орунланмақта?

¹⁰ Муқәддәс китапта: «Ахирқи күнләрдә адәттин ташқири қийин вақитлар болиду»,— дейилгән (Тимотийға 2-хәт 3:1—5). Әлчи Паул ахирқи күнләрдә нурғун адәмләрниң әхлақ-пәзилитиниң қандақ болидиғанлиғини тәсвирләп бәргән:

•   өзинила ойлайдиған

•   пулпәрәс

•   ата-анисиниң сөзини аңлимайдиған

•   вапасиз

•   аилисигә көйүнмәйдиған

•   өзини туталмайдиған

•   вәһший һәм җедәлхор

•   Худани әмәс, һузур-һалавәтни яхши көридиған

•   Худани яхши көридиғандәк көрүнсиму, амма Униңға бойсунушни рәт қилидиған

11. Зәбур 92:7дә рәзил адәмләрниң ақивети һәққидә қандақ вәдә берилгән?

¹¹ Сиз яшаватқан жутта шундақ адәмләрни учраттиңизму? Дунияниң һәммә җайлирида шундақ адәмләр көп. Бирақ Худа шундақ адәмләрни пат арида йоқ қилиду. У: «Гәрчә рәзилләр от-чөптәк көкләп  кәтсиму, яманлиқ қилғучилар гүлләп яшнисиму, амма уларниң һәммиси мәңгү һалак болуп кетәр»,— дәп вәдә бериду (Зәбур 92:7, ЙД).

12, 13. Заманниң ахирида Йәһва бизгә қандақ тәлим бериватиду?

¹² Муқәддәс китапта ахирқи заманда, дуния җапа-мәшәққәт вә азап-оқубәтләргә толупла кәтмәстин, йәнә яхши иш-вақиәләрму йүз беридиғанлиғи йезилған.

¹³ Муқәддәс китапни чүшиниш. Заманниң ахирида һәқиқий билимниң ешип, мол болуши һәққидә Даниял пәйғәмбәр бәшарәт ейтқан (Даниял 12:4). Худа Өз хәлқиниң Муқәддәс китапни бурунқидинму ениғирақ чүшинишигә ярдәм бәрмәктә. Болупму 1914-жилдин тартип шундақ қиливатиду. Мәсилән, У бизгә Өз исминиң муһимлиғи, йәр йүзигә болған ирадиси, өлүм һәқиқити, төләм вә тирилиш һәққидә тәлим бәрмәктә. Пәқәт Худа Падишалиғила һәммә қийинчилиқларни һәл қилалайдиғанлиғини биливалдуқ. Худани хурсән қилип, бәхитлик һаят кәчүрүш үчүн немә қилиш керәклигини билдуқ. Ундақта, Худаниң хизмәтчилири алған билимләрни қандақ қоллиниши керәк? Буниңға башқа бир бәшарәт җавап бериду (21, 25 - изаһәткә қараң).

14. Кимләр Падишалиқ һәққидә хуш хәвәрни вәз қиливатиду вә қәйәрдә?

¹⁴ Дуниявий вәз қилиш паалийити. Әйса ахирқи заман һәққидә ейтқанда, мундақ дегән еди: «Падишалиқ һәққидики мошу хуш хәвәр пүткүл йәр йүзи бойичә барлиқ хәлиқләргә гувалиқ үчүн вәз қилиниду» (Мәтта 24:3, 14). Бу Падишалиқ һәққидики хуш хәвәр 240 дөләттә вә 900дин ошуқ тилларда вәз қилиниватиду. Шундақ қилип, пүткүл йәр йүзидә һәр милләт вә хәлиқләрдин чиққан Йәһва гувачилири адәмләргә Падишалиқ дегән немә вә у адәмләр үчүн немә  қилмақчи екәнлигини чүшинишкә ярдәм бериватиду (Вәһий 7:9). Улар бу ишни һәқсиз қилиду. Нурғун адәмләр уларни өч көрүп, зиянкәшлик қилсиму, Әйса алдин-ала ейтқандәк, һечнәрсә вәз ишини тохтиталмайду (Луқа 21:17).

15. а) Биз заманниң ахирида яшаватқанлиғимизға ишинәмсиз вә немә үчүн? ә) Йәһва Худаға бойсунидиған вә бойсунмайдиғанларға немә болиду?

¹⁵ Заман ахирида яшаватқанлиғимизға ишинәмсиз? Заманниң ахири һәққидә Муқәддәс китапта ейтилған бәшарәтләр орунлиниватиду. Йеқин арида Йәһва Худа вәз қилиш ишини тохтитиду, шу чағда бу заманниң ахири келиду (Мәтта 24:14). Бу немини билдүриду? Худа рәзил адәмләрни йоқ қилидиған Армагедон уруши башланғанда, заманниң ахири келиду. Йәһва Худа билән Әйса Мәсиһкә бойсунмиғанларни йоқ қилишни Худа Өз Оғлиға вә пәриштиләргә тапшурған (Салоникилиқларға 2-хәт 1:6—9). Андин кейин Шәйтан вә җинлар адәмләрни езиқтуралмайду. Худаға итаәт қилишни халайдиғанлар вә Униң Падишалиғини қоллиғанлар Худаниң һәммә вәдилириниң әмәлгә ашқанлиғини өз көзи билән көриду (Вәһий 20:1—3; 21:3—5).

16. Заманниң ахирлишиш вақти йеқинлашқансири немә қилишиңиз керәк?

¹⁶ Пат йеқинда Шәйтан башқуриватқан мошу заманниң ахирлишиш вақти келиду. Шуңа өзүмиздин: «Мән немә қилишим керәк?»— дәп сораш бәк муһим. Йәһва Худа сизниң Муқәддәс китаптин тиришип көпирәк билим елишиңизни халайду. Муқәддәс китапни көңүл қоюп оқуп-үгинишиңиз керәк (Йоһан 17:3). Адәмләргә Муқәддәс китапни чүшинишкә ярдәм бериш үчүн Йәһва гувачилири һәр һәптидә учришишларни өткүзиду. Шу учришишларға дайим берип турушқа тиришиң  (Ибранийларға 10:24, 25ни оқуң). Әгәр һаятиңизда қандақту бир өзгиришләрни қилиш керәклигини чүшәнсиңиз, өзгиришләрни қилиштин қорқмаң. Шундақ қилсиңиз, Йәһва билән болған мунасивитиңиз мәһкәм болиду (Яқуп 4:8).

17. Бу заман ахирлашқанда, немә үчүн көплигән адәмләр һәйран қалиду?

¹⁷ Әлчи Паул Йәһваниң күни көпчилик күтмигән вақитта келидиғанлиғини, оғриниң кечидә келиши билән селиштуруп чүшәндүргән (Салоникилиқларға 1-хәт 5:2). Ахирқи күнләрдә яшаватқанлиғимизниң дәлиллиригә көплигән адәмләрниң пәрвасиз жүридиғанлиғини Әйса алдин-ала ейтип, мундақ дегән: «Бирақ Нуһ пәйғәмбәр күнлиридә қандақ болса, инсан Оғлиниң һазирлиниш вақтидиму шундақ болиду. Нуһ кемигә киргичә, топан алдидики күнләрдә кишиләр йәп-ичкән, өйләнгән һәм турмушқа чиққан еди вә топан бесип, һәммисини елип кәткичә ойланмиған еди» (Мәтта 24:37—39).

18. Әйса немә һәққидә агаһландурған?

¹⁸ Әйса шу күнниң туюқсиз «тордәк» келидиғанлиғини ейтип, көңлүңлар «йәп-ичиш, шарапхорлуқ һәм турмушниң ғәм-әндишилиригә» берилип кәтмисун, дәп бизни агаһландурған. Әйса йәнә шу күн һәққидә: «Йәр йүзидә яшайдиғанларниң һәммисиниң бешиға чүшиду. Шуңлашқа йүз беридиған бу вақиәләрдин аман қелишиңлар вә инсан Оғлиниң алдида туралишиңлар үчүн, һошияр болуп, һемишәм дуа қилиңлар»,— дегән (Луқа 21:34—36, ЙД). Әйсаниң агаһландурушиға қулақ селиш немә үчүн шунчә муһим? Сәвәви пат арида Шәйтанниң бу рәзил дунияси йоқ қилиниду. Йәһваниң вә Әйсаниң қобул қилишиға еришкән адәмләрла аман қелип, йәрдә мәңгү яшайду (Йоһан 3:16; Петрусниң 2-хети 3:13).