1. Pi tu pondola oku lilongisa ovina viatiamẽla kovaso yoloneke?

ECI o yeva asapulo pamue o lipula ndoco: ‘Anga hẽ ovina vĩvi vi pondola oku li vokiya?’ Omo okuti kua siata oku pita ovilunga vialua kuenda ungangala, omanu vamue va tava okuti tu kasi kesulilo lioluali. Anga hẽ olondaka evi viocili? Kuli hẽ onjila yoku kũlĩha ovina vi ka pita kovaso yoloneke? Kuli. Ndaño okuti omanu ka va tẽla oku tukula ovina vi ka pita kovaso yoloneke, pole Yehova Suku o pondola oku ci linga. Lekuatiso Liembimbiliya wa siata oku tu sapuila ovina vi ka pita letu, kuenda eci ci ka pita vongongo kovaso yoloneke.—Isaya 46:10; Tiago 4:14.

2, 3. Nye olondonge via Yesu via yonguile oku kũlĩha, kuenda wa vi tambulula ndati?

² Eci tu tanga Vembimbiliya ovina viatiamẽla kesulilo lioluali lulo, ka ci lomboloka esulilo Liongongo, pole esulilo liolondingaĩvi. Yesu wa longisa omanu hati, Usoma wa Suku wa laikele oku viala oluali luosi. (Luka 4:43) Eci olondonge via Yesu via yonguile oku kũlĩha otembo Usoma wa Suku wa laikele oku iya, vio pula ndoco: “Ovina evi vi pita otembo yipi kuenda yipi yi kala ondimbukiso yoku tukuluka kuove kuenda yesulilo liovina vi kasi voluali?” (Mateo 24:3) Yesu ka vi sapuilile eteke liaco, pole wa tukula ovina via laikele oku tẽlisiwa osimbu esulilo lioluali lulo ka lieyile. Ovina Yesu a popele, vi kasi oku tẽlisiwa koloneke vilo.

³ Vocipama cilo, tu konomuisa ovolandu a lekisa okuti, tu kasi kotembo yesulilo lioluali lulo. Catete, tu sukila oku lilongisa ovina viatiamẽla kuyaki wa pita kilu, oco  tu kuate elomboloko lieci vongongo mua siatela oku pita ovina vĩvi.

4, 5. (a) Nye ca pita kilu eci Yesu a linga Osoma? (b) Ndomo ca lomboluiwa kelivulu Liesituluilo 12:12, nye ca laikele oku pita palo posi noke lioku tundisiwa kua Satana kilu?

⁴ Vocipama 8 tua lilongisa okuti Yesu wa linga Osoma kilu kunyamo wo 1914. (Daniele 7:13, 14) Elivulu Liesituluilo li tu sapuila ovina via pita poku popia ndoco: “Kilu kueya uyaki: Mingeli [okuti Yesu] lovangelo vaye va liyaka locinyoha [okuti Satana] kuenda ocinyoha lovangelo vaye va yakavo.” * Satana kumue lolondele viaye va yuliwa, kuenje va imbiwa palo posi. Sokolola esanju ovangelo va kuata! Pole, nye ci popiwa catiamẽla komanu palo posi? Embimbiliya li popia hati omanu va laikele oku liyaka lohali yalua. Momo lie? Momo Eliapu li kuete onyeño ya lua, “omo lia kũlĩha okuti li kuete otembo yitito.”—Esituluilo 12:7, 9, 12.

⁵ Eliapu lia siata oku koka ovitangi vialua palo posi ndomo li yongola. Osimbu Suku ka li kunduile, li kuete onyeño yalua omo lia limbuka okuti, li kuete otembo yitito. Tu konomuisi ovina Yesu a popele okuti via laikele oku tẽlisiwa vokuenda kuoloneke via sulako.—Tala Etosi 24 kesulilo lielivulu lilo.

6, 7. Koloneke vilo, nye ci popiwa catiamẽla kuyaki kuenda konjala?

⁶ Uyaki. Yesu wa popia hati: “Ofeka yi katukila ofeka kuenda usoma u katukila usoma.” (Mateo 24:7)  Omanu valua va siata oku pondiwa vuyaki vokuenda kuoloneke vilo okuti kosimbu ci sule. Ulandu umue Wocisoko co Worldwatch wa lombolola okuti, tunde kunyamo wo 1914, ovoyaki a ponda eci ci pitahãla 100 kolohuluwa viomanu. Ci pitahãla olonjanja vitatu, omanu valua va pondiwa kuyaki wa lingiwa vokuenda kueci ci soka 100 kanyamo okuti, oku upisa kunyamo wo 1.900, toke wo 2.000. Etendelo liomanu va fa, li sokisiwa letendelo lia vana va fa vokuenda kueci ci soka 1.900 kanyamo a pita. Sokolola uhukũi kuenda ovitangi omanu valua va siata oku liyaka lavio omo liuyaki!

⁷ Onjala. Yesu wa popia hati: “Ku kala onjala.” (Mateo 24:7) Ndaño okuti cilo voluali mua siata oku kala okulia kualua okuti kosimbu ci sule, pole, omanu valua ka va kuete okulia va sukila. Momo lie? Momo ka va kuete olombongo vialua vioku landa okulia, kuenda ka va kuetevo ovapia oku lima. Pole, ci pitahãla olohuluwa viomanu, va pondola lika oku kuata olombongo vi soka ondolale yimosi veteke, oco va lande okulia. Ocisoko Cuhayele Voluali ca lekisa okuti, omãla valua unyamo lunyamo va siata oku fa. Momo, ka va kuete okulia ku pondola oku va kuatisa oco va kuate uhayele.

8, 9. Nye ci lekisa okuti ovitumasuku Yesu a tukula viatiamẽla kovilemawe kuenda kovovei vi kasi oku tẽlisiwa?

 ⁸ Ovilemawe. Yesu wa popia hati: “Ku kala ovilemawe.” (Luka 21:11) Unyamo lunyamo omanu va siata oku lavoka okuti, ku ka pita ocilemawe cimue cinene. Tunde kunyamo wo 1.900, ci pitahãla olohuluwa vivali viomanu va siata oku fa omo liovilemawe. Ndaño okuti ovoloño a siata oku situlula ovilemawe osimbu ka via pitile, pole omanu valua toke cilo va siata oku fa.

⁹ Ovovei. Yesu wa popia hati, kua laikele oku kala ‘afengi.’ Ovovei alua a laikele oku lisandula lonjanga kuenda oku ponda omanu valua. (Luka 21:11) Ndaño okuti olondotolo via siata oku lilongisa ndomo vi pondola oku sakula ovovei alua, pole, kuli handi ovovei amue okuti ka a kuete ovihemba. Ulandu umue wa lombolola okuti, unyamo lunyamo omanu valua va siata oku fa omo liovovei amue ndeci: Otumbe, o malalia kuenda o kolela. Handi vali, olondotolo via limbuka eci ci soka 30 kovovei okaliye, kuenda amue pokati kovovei aco ka a kuate ovihemba vioku a sakula.

10. Koloneke vilo ukanda 2 Timoteo 3:1-5, u kasi oku tẽlisiwa ndati?

¹⁰ Embimbiliya vukanda 2 Timoteo 3:1-5, li popia hati: “Koloneke via sulako kuiya ohali yalua.” Upostolo Paulu wa lombolola ovituwa omanu va laikele oku lekisa vokuenda kuoloneke via sulako. Eye wa popia hati omanu va laikele oku linga

• vakuakulisola ovo muẽle

• vakuakusola olombongo

• vakuakusinila olonjali

• havakuaciliko

• ka va kuete ocisola la vangadiavo

• ka va tẽla oku likandangiya

• olongangala

• vakuakusola ayele okuti Suku ci sule

• va lilekisa ndu okuti va sumbila Suku, pole, va likala unene waye

11. Nye ci ka pita lolondingaĩvi ndomo ca lekisiwa Vosamo 92:7?

¹¹ Anga hẽ vimbo o kasi omanu valua va siata oku lekisa ovituwa ndevi via tukuiwa ndeti? Omanu valua voluali va siata oku lekisa ovituwa viaco. Pole, Suku ndopo o ka linga ocina cimue catiamẽla kekalo liaco. Eye wa likuminya ndoco: “Ndaño olondingaĩvi vi yova ndowangu,  lolondingakandu vi pama, haimo efulilo liavio oku nyõlẽha [ale oku kunduiwa] olumue.”—Osamo 92:7.

12, 13. Ovina vipi Yehova a siata oku tu longisa vokuenda kuoloneke via sulako?

¹² Embimbiliya lia popele okuti, vokuenda kuoloneke via sulako, voluali mu ka kala ohali yalua. Pole, li popiavo okuti, ku ka pita ovina viwa.

¹³ Oku kuata elomboloko Liembimbiliya. Uprofeto Daniele wa soneha ovina viatiamẽla koloneke via sulako. Eye wa popia hati: “Ukũlĩhĩso u lua.” (Daniele 12:4) Yehova Suku wa laikele oku eca komanu uloño woku kuata elomboloko lia suapo Liembimbiliya lonjila yimue ya leluka okuti kosimbu ci sule. Eye wa siata oku linga ovina viaco tunde kunyamo wo 1914. Yehova wa tu longisa esilivilo lionduko yaye, ocipango caye catiamẽla kongongo, ocili catiamẽla kocisembi, eci ci pita letu eci tu fa, kuenda epinduko. Tua lilongisa okuti Usoma wa Suku owo lika u pondola oku tetulula ovitangi vietu viosi. Tua siatavo oku lilongisa ndomo tu pondola oku kuata esanju, kuenda ndomo tu kuata ekalo li sanjuisa Suku. Pole, nye afendeli va Suku va siata oku linga lovina va lilongisa? Ocitumasuku cikuavo ci tu ĩha etambululo.—Tala Etosi 21 kuenda 25 kesulilo lielivulu lilo.

14. Pi olondaka viwa Viusoma vi kasi oku kundiwila, kuenda velie va kasi oku vi kunda?

¹⁴ Upange woku kundila voluali luosi. Catiamẽla koloneke via sulako Yesu wa popia hati: “Olondaka evi viwa Viusoma vi kundilua koluali luosi.” (Mateo 24:3, 14) Olondaka viwa Viusoma vi kasi oku kundiwila kueci ci pitahãla 230 kolofeka, kuenda eci ci pitahãla 700 kalimi.  Voluali luosi Olombangi Via Yehova vi tunda “kolofeka viosi [kuenda] kapata osi,” via siata oku kuatisa omanu oco va kuate elomboloko Liusoma, kuenda eci u ka lingila omanu. (Esituluilo 7:9) Upange waco u lingiwa ocali. Ndaño okuti via siata oku suvukiwa loku lambalaliwa lomanu valua, pole lacimue ci pondola oku tateka upange woku kunda, ndomo Yesu a ci popele.—Luka 21:17.

15. (a) O tava hẽ okuti tu kasi koloneke via sulako, kuenda momo lie? (b) Nye ci ka pita lomanu va pokola ku Yehova, kuenda vana ka va pokola?

¹⁵ O tava hẽ okuti tu kasi koloneke via sulako? Ovitumasuku vialua Viembimbiliya viatiamẽla koloneke via sulako, vi kasi oku tẽlisiwa. Ndopo Yehova o ka nõlapo okuti afendeli vaye va liwekapo oku kunda olondaka viwa, kuenje ku keya “esulilo.” (Mateo 24:14) Esulilo lioluali li lomboloka nye? Li lomboloka uyaki wo Harmagedo, eci Yehova Suku a ka malako evĩho liosi. Eye o ka tuma Yesu kumue lovangelo vaye vakuonene oco va kundule omanu vosi ka va pokola Kokuaye kuenda Komõlaye. (2 Va Tesalonike 1:6-9) Noke Satana kumue lolondele viaye, ka va ka yapuisa vali omanu. Kuenje, omanu vana va yongola oku pokola ku Suku loku tava Kusoma waye, va ka mola oku tẽlisiwa kuolohuminyo viosi viaye.—Esituluilo 20:1-3; 21:3-5.

16. Omo okuti esulilo li kasi ocipepi, nye o sukila oku linga?

¹⁶ Oluali lulo lua vialiwa la Satana, ndopo lu pitĩla kesulilo. Omo liaco, ci kuete esilivilo lia velapo oku lipula ndoco: ‘Nye ndi sukila oku linga?’ Yehova o yongola okuti o likolisilako oku lilongisa ovina vialua vi sangiwa Vembimbiliya. O sukila oku kapako elilongiso liove Liembimbiliya. (Yoano 17:3) Olombangi Via Yehova via siata oku linga olohongele viavo olosemana viosi, oco vi kuatise omanu oku kuata elomboloko Liembimbiliya. Seteka oku enda kolohongele viaco olonjanja viosi. (Tanga Va Heveru 10:24, 25.) Nda wa lilongisa okuti o sukila oku linga apongoloko amue, ku ka kuate usumba, sanda onjila yoku ci linga.  Osimbu amamako oku linga apongoloko aco, ukamba wove la Yehova u pamisiwa.—Tiago 4:8.

17. Momo lie omanu valua va ka komõhela eci esulilo li keya?

¹⁷ Upostolo Paulu wa lombolola hati, esulilo liolondingaĩvi li keya vepuluvi lina omanu ka va lavokaile, “ndocimunu kuteke.” (1 Va Tesalonike 5:2) Yesu wa popia hati, omanu valua ka va ka tava kolondimbukiso vieca uvangi wokuti tu kasi koloneke via sulako. Eye wa popia ndoco: “Ndeci ca kala koloneke via Noha, haico ci kala ketukuluko lia Mõlomunu [ale koloneke via sulako]. Momo koloneke viaco osimbu Etande ka lieyile, omanu va lia lia, va nyua nyua, alume va kuela kuenda akãi va kueliwa toke keteke Noha a iñila vocimbaluku, ka va limbukile cimue toke eci Etande lieya kuenje lia va nyõla vosi, haico ci kala ketukuluko lia Mõlomunu.”—Mateo 24:37-39.

18. Elungulo lipi Yesu a tu ĩha?

¹⁸ Yesu wa tu lungula oco ka tu ka yapuisiwe ‘loku lia calua, oku nyua calua, kuenda oku sakalala lomuenyo.’ Eye wa popia hati, esulilo li keya ocipikipiki “ndulivi.” Noke wa popiavo hati, “liya komanu vosi va tunga kilu lieve.” Handi vali wa amisako ndoco: “Lavululi, likutilili olonjanja viosi okuti vu puluka kovina evi viosi vi laika oku iya kuenda oku talama kovaso a Mõlomunu.” (Luka 21:34-36) Momo lie oku kapako elungulo lia Yesu ci kuetele esilivilo? Momo oluali lulo lua vĩha lua Satana ndopo lu ka kunduiwa. Omanu vana va taviwa la Yehova kuenda la Yesu, kesulilo ovo lika va ka kala voluali luokaliye palo posi otembo ka yi pui.—Yoano 3:16; 2 Petulu 3:13.