1. Ndove podemo imparar sora el futuro?

QUANDO te sì drio vardar le notìssie, gheto belche domandà: ‘Sarà che le robe le va restar ancora pedo?’ L’è drio suceder tanti disastri e robe rugne che arquanti i crede che semo pròpio darente del fin del mondo. Elo pròpio vera? Come podemo saver cossa sucederà nel futuro? I umani no i pol saver cossa sucederà, ma Geovà Dio el pol. Ntela Bìblia, Lu el ne dise el nostro futuro e el futuro dela Tera. —Isaías 46:10; Tiago 4:14.

2, 3. (a) Cossa i dissìpoli de Gesù i volea saver? (b) Cossa Gesù el ga rispondesto?

² Quando lesemo ntela Bìblia sora el fin del mondo, questo no vol mia dir el fin del pianeta Tera, ma vol dir el fin dele robe rugne. Gesù el ga insegnà che el Re­gno de Dio el governarà sora tuta la Tera. (Lucas 4:43) I so dissìpoli i volea saver quando el Regno de Dio el vegnaria, par quela i ga domandà a Gesù: “Quando sucederà ste cose e qual sarà el segnal dela to presensa e del fin del sistema de cose?” Gesù no’l ga mia dato una data, ma el ga dito cossa sucederia pena vanti del fin del mondo. Ste robe le ze drio suceder adesso.

³ In questo capìtolo ndaremo considerar prove che semo drio viver pena vanti del fin del mondo. Prima gavemo de imparar sora la guera che la è  sucedesta ntel cielo, par dopo capir parché l’è drio suceder tante robe rugne ancoi.

4, 5. (a) Cossa l’è sucedesto ntel cielo pena dopo che Gesù l’è deventà Rè? (b) Cossa l’è sucedesto ntela Tera dopo che Sàtana l’è stà butà zo?

⁴ Ntel capìtolo 8 gavemo imparà che Gesù l’è deventà Rè ntel cielo in 1914. (Daniel 7:13, 14) El libro de Apocalisse el dise cossa l’è sucedesto: “Una guera la ga scominsià ntel cielo: Michel [che vol dir Gesù] e i so àngeli i ga fato guera contra el dragon [Sàtana], e el dragon e i so àngeli i ga fato guera.” * Sàtana e i so demoni i ga perso la guera e i ze stati butadi zo ala Tera. Imagina come i àngeli i ze restadi contenti! Ma cossa dir dele persone qua ntela Tera? La Bìblia la dise che scominsiaria un tempo de problemi par la umanità. Parché? El Diaol l’è pròpio inrabià “parché el sa che el ga una s-cianta de tempo.” —Apocalipse 12:7, 9, 12.

⁵ El Diaol l’è drio far tuto quel che el pol par causar problemi qua ntela Tera. Lu l’è pròpio inrabià parché el sa che el ga una scianta de tempo vanti de Dio cavarlo via. Ndemo considerar cossa Gesù el ga dito che sucederia in questi ùltimi giorni.—Vedi la Nota ­Final 24.

6, 7. Cossa se pol dir sora la guera e la fame ancoi?

⁶ Guera. Gesù el ga dito: “Nassion se levarà su contra nassion e regno contra regno.” (Mateus 24:7)  De pi persone le ze state copade ntele guere nei nostri giorni che in tuta la stòria umana. Una organisassion, che la stùdia i eventi mondiai, la mostra che dal 1914 in qua le guere le ga copà de pi de 100 milioni de persone. In 100 ani de guere, dal ano 1900 al ano 2000, le ze state copade tre volte de pi persone che in tute le guere nei 1.900 ani indrio. Imagina quanto sofrimento milioni de persone le ga passà par via dele guere!

⁷ Fame. Gesù el ga dito: “Ghen sarà mancansa de ma­gnar.” (Mateus 24:7) L’è vera che la produssion de magnar la è la pi granda dela stòria, ma tante persone le ze drio patir la fame. Parché? Parché no le ga i soldi par comprar el magnar o no le ga tere par piantar. Milioni e milioni de persone le ga de viver con manco de un dolar al giorno. La Organisassion Mondial dela Salute la dise che milioni de bambini i more tuti i ani parché no i ga gnente de magnar.

8, 9. Cossa mostra che le professie de Gesù sora i teremoti e le malatie le ze drio realisarse?

 ⁸ Teremoti. Gesù el ga profetisà: “Ghen sarà grandi teremoti.” (Lucas 21:11) Tuti i ani se speta tanti grandi teremoti. Dal 1900 in qua, i teremoti i ga copà de pi de due milioni de persone. Anca se la tecnologia la ga giutà a revelar i teremoti vanti de suceder, tante persone ancora le more.

⁹ Malatie. Gesù el ga dito che ghen saria “pestilense”. Brute malatie le se spaliaria suito e le coparia tante persone. (Lucas 21:11) I dotori i ga imparà a tratar tante malatie, ma ancora cossita arquante malatie no le ga cura. Infati, un relatòrio el spiega che tuti i ani milioni de persone le more par via de malatie come tubercolose, malària e còlera. E ancora par sora, de pi de 30 malatie le ze vegneste fora, arquante sensa cura.

10. Come le parole de 2 Timóteo 3:1-5 le ze drio realisarse ancoi?

¹⁰ La Bìblia la dise in 2 Timóteo 3:1-5: “Nei ùltimi giorni ghen sarà tempi crìtichi difìcili de soportar.” El apòstolo Paolo el ga descrito come le persone le se comportaria in questi ùltimi giorni. Lu el ga dito che le persone

• le saria egoiste

• le amaria i soldi

• le saria desobedienti ai genitori

• no le saria fedeli

• no le gavaria afeto par la so fameia

• no le gavaria autocontrolo

• le saria rugne e violente

• le amaria de pi i piaseri che a Dio

• le faria finta de amar a Dio ma no le obederia a Lu

11. D’acordo col Salmo 92:7, cossa sucederà cole persone rugne?

¹¹ Sarà che ancoi ghen’è tante persone cossita? In tuto el mondo ghen’è tante persone cossita. Ma presto Dio ndarà far qualcossa. Lu el promete: “Quando i perversi i buta come la erba e quei che i fà cose rugne i fiorisse,  l’è par esser destruti par sempre.” —Salmo 92:7.

12, 13. Cossa Geovà el ne ga insegnà in questi ùltimi giorni?

¹² La Bìblia la ga dito che nei ùltimi giorni el mondo el saria pien de dolor e sofrimento. Ma la Bìblia la dise che anca sucederia robe bele.

¹³ La comprension dela Bìblia. El profeta Daniel el ga scrito sora i ùltimi giorni. El ga dito: “La vera cognossensa la deventarà abondante.” (Daniel 12:4) Come mai prima, Dio el daria al so pòpolo la abilità de capir meio la Bìblia. Dal 1914 avanti, Geovà el ga fato questo. Par esémpio, Lu el ne ga insegnà la importansa del so nome, el so propòsito par la Tera, la verità sora el risgate, cossa sucede quando morimo e la ressuression. Gavemo imparà che sol el Regno de Dio el pol risolver tuti i nostri problemi. Anca gavemo imparà come esser felice e come viver de una maniera che a Dio el ghe piase. Ma cossa i servi de Dio i fà con quel che i ga imparà? Ndemo veder la risposta in nantra professia.—Vedi la Nota Final 21 e 25.

14. (a) Ndove le bone notìssie del Regno le ze predicade? (b) Chi l’è drio far sta predicassion?

¹⁴ La predicassion mondial. Gesù el ga dito sora i ùltimi giorni: “Queste bone notìssie del Regno le sarà predicade in tuta la tera abitada”. (Mateus 24:3, 14) Le bone notìssie del Regno le ze drio esser predicade in de pi de 230 paesi e in de pi de 700 léngue. Le Testimònie de Geovà de “tute le nassion e tribu” le ze drio giutar le  persone de tuta la Tera a capir cossa l’è el Regno de Dio e cossa ndarà far par la umanità. (Apocalipse 7:9) Lore le fà questo sensa gnanca un costo. Anca se tanti i òdia e i persegue le Testimònie de Geovà, gnente pol fermar la predicassion, pròpio come Gesù el gavea profetisà. —Lucas 21:17.

15. (a) Ti te credi che semo drio viver nei ùltimi giorni, e parché? (b) Cossa sucederà a quei che i obedisse a Dio e a quei che no i ghe obedisse mia?

¹⁵ Ti te credi che semo drio viver nei ùltimi giorni? Tante professie dela Bìblia sora i ùltimi giorni le se ga belche realisade. Presto Geovà el fermarà la predicassion dele bone notìssie e rivarà “el fin”. (Mateus 24:14) Elo cossa sto fin? L’è el Armagedon, la guera de Geovà par finir fora con tute le robe rugne. Geovà ndarà doperar Gesù e i so àngeli poderosi par finir fora con tuti quei che no i vol obedir a Lu e al so Fiol. (2 Tessalonicenses 1:6-9) Dopo de questo, Sàtana e i so demoni mai pi i ndarà inganar le persone. Quei che i vol obedir a Dio e acetar el so Regno i vederà tute le promesse de Dio realisarse. —Apocalipse 20:1-3; 21:3-5.

16. Savendo che el fin l’è darente, cossa te toca far?

¹⁶ Questo mondo de Sàtana presto el finirà. Par quela l’è importante domandarse: ‘Cossa me toca far?’ Geovà el vol che ti te impari tuto quel che te pol sora la Bìblia. Te ghè de esser diligente ntel to stùdio dela Bìblia. (João 17:3) Tute le stimane le Testimònie de Geovà le fà riunion par giutar le persone a capir la Bìblia. Fà tuto quel che te pol par assister ale riunion. (Lesi Hebreus 10:24, 25.) Se ti te impari che te ghè de far cambiamenti ntela to vita, no stà mia gaver paura de farli.  Se te fè sti cambiamenti, la to amicìssia con Geovà la deventarà ancora pi forte. —Tiago 4:8.

17. Parché la pi granda parte dele persone la ndarà spaurarse quando el fin rivarà?

¹⁷ El apòstolo Paolo el ga spiegà che la destrussion dele robe rugne la scominsiarà quando la pi granda parte dele persone no la saria drio spetarla, “come un ladro de note”. (1 Tessalonicenses 5:2) Gesù el ga profetisà che tante persone no le faria caso ale prove che semo drio viver nei ùltimi giorni. Lu el ga dito: “Come i era i giorni de Noè, cossita sarà la presensa del Fiol del omo [o ùltimi giorni]. Parché come lori i era in quei giorni vanti del dilùvio, i magnea e i bevea, i òmini i se maridea e le done le era date in matrimònio, fin el giorno che Noè l’è ndà rento la arca; e no i ga mia fato caso, fin che el dilùvio l’è vegnesto e el ga finio fora con tuti, cossita sarà la presensa del Fiol del omo.” —Mateus 24:37-39.

18. Che aviso Gesù el ga dato?

¹⁸ Gesù el ga avisà che gavemo de star atenti “col magnar massa e col bever massa e cole ansietà dela vita.” Lu el ga dito che el fin el vegnerà de colpo, “come un lasso” e che el “vegnerà sora quei che i abita ntela tera.” E ancora el ga dito: “Alora, vardé de star desmissiadi drio far sùpliche [o orassion pi sincere] tuto el tempo, cossita podé scampar de tute ste cose che le ga de suceder e podé star in pié davanti del Fiol del omo.” (Lucas 21:34-36) Parché l’è importante scoltar el aviso de Gesù? Parché presto el mondo rugno de Sàtana el sarà finio fora. Sol quei che i ze aprovadi par Geovà e Gesù i ndarà passar el fin con vita e i viverà par sempre ntel novo mondo. —João 3:16; 2 Pedro 3:13.