1. Ti pani onrowa onikhaliherya osuwela voohimya sa muhoolo?

NIIREKE mootoko wiiwa ihapari muraadioni aahiiso oweha mutelevisau, nto munuupuwela so: ‘Kiireke itthu sinrowa otepaka otakhala?’ Okhala wira ihasara ni otakhala ohuulaana, ni atthu annikupali wira wanikisa wa olumwenku ola ohaattamela. Kiireke tthiri nri wanikisa? Kiireke nnoowerya osuwela ele enrowa wiiraneya muhoolo? Aayo. Maana nnaamwi atthu ahiweryaka ohimya ele enrowa wiiraneya muhoolo, masi Yehova Muluku onniwerya. Omurumeelaka Biibiliya, Yehova onnihimya ele enrowa wiiraneya muhoolo ni elapo ela.​—Yesaya 46:10; Yakobo 4:14.

2, 3. Exeeni awiixutti a Yesu yaaphavela aya osuwela, nto Yesu aawaakhunle sai?

² Vaavo vanisoma ahu mBiibiliyani voohimya sa omala wa olumwenku ola, khonihimmwa omala wa elapo wala etthaya, masi onihimmwa omala wa atthu ootakhala. Yesu aahiwiixuttiha atthareli awe wira Omwene wa Muluku waarowa olamulelaka elapo yotheene. (Luka 4:43) Aphavelaka osuwela okathi onrowa aya orwa Omwene wa Muluku, awiixutti awe yaamukonhe so: “Itthu iya sinrowa okhumelela lini? Nave ethonyeryo y’orwa [“okhala”, NM] wanyu ni y’omala [“wanikisa wa”, NM] olumwenku t’ivi?” (Matheyo 24:3) Nnaamwi Yesu ahaaleelale awiixutti nihiku nene, masi aahaaleela itthu saarowa wiiraneya ohinatthi omala olumwenku ola. Nto ele Yesu aahimmye awe wira yaamwiiraneya, ti etthu enikhumelela olelo-va.

³ Muru ola ninrowa othokorerya ithoonyeryo sinooniherya wira ninkhala wanikisa wa olumwenku. Wanipacerya,  nihaana osuwela ekhotto yiiraneyale wiirimu wira niiwexexe nthowa naya itthu sihireere aya otakhala valaponi.

4, 5. (a) Nuumala Yesu okhala Mwene wiirimu, opanke exeeni? (b) Moovarihana ni Wisupulula 12:12, exeeni yaarowa wiiraneya valaponi nuumala Satana oriheliwa vathi?

⁴ Muru 8 nihiixutta wira Yesu ookhalihiwa Mwene wiirimu mwaakha wa 1914. (Daniyeli 7:13, 14) Eliivuru ya Wisupulula ennihimya ele yaakhumelenle eriki: “Yahikhumelela ekhotto wirimu. Nlaikha Mikhayeli [eyo piiyo, Yesu] ni makhw’aya nahiwana n’inow’eyo [Satana]: vano enowa yakhaliheriwa ni malaikh’aya”. * Satana ni axetwani awe yaahixinttiwa khuriheliwa valaponi. Nto malaikha oororomeleya yaahitthapa vanci! Ankhi atthu ari valaponi? Biibiliya onihimya wira yaarowa waakhumelela maxakha manceene. Nthowa xeeni? Nthowa noowi Diabo khoreere onanariwa, “okhala wira òsuwela wira orina okathi vakhani pahi”.​—Wisupulula 12:7, 9, 12.

⁵ Diabo onootepa okumiherya maxakha valaponi. Tthiri oonanariwa vanceene okhala wira ohalanne okathi vakhaani wira Muluku ompwetexe. Nrowe nithokorerye ele Yesu aahimmye awe wira yaarowa wiiraneya mahiku ookiserya.​—Nwehe Enoota 24.

6, 7. Niireke masu a Yesu voohimya sa ikhotto ni etala anniiraneya olelo-va?

⁶ Ikhotto. Yesu aahimmye so: “Maloko makina anowana ni maloko makhw’aya, elapo enotuphela elapo ekina”. (Matheyo 24:7) Mahiku ala atthu anceene  ahookhwa mwaha wa ikhotto ovikana khalai. Erelatoorio ya Instituto Worldwatch, enooniherya wira okhuma mwaakha wa 1914, atthu anivikana imilyau 100 ahookhwa mwaha wa ikhotto. Nto atthu akhwiiye mwaha wa ikhotto okhuma mwaakha wa 1900 mpakha 2000 khareere, ovikana ale akhwiiye ohinatthi mwaakha wa 1900. Nkahaya muupuwele ohaawa ni oxanka waaphwannye atthu imilyau sinceene mwaha wa ekhotto!

⁷ Etala. Yesu aahimmye so: “Enokhumelela etala”. (Matheyo 24:7) Olelo-va, yoolya eniruweriwa khereere waatta, masi hata vari siiso, atthu anceene annookhwa mwaha wa etala. Nthowa xeeni? Nthowa noowi atthu awo kharina musurukhu oniphiyerya wira athume yoolya aahiiso opuro wowaala mmiso aya. Atthu anivikana ebilyau emosa kharina musurukhu oniphiyerya othuma yoolya khula nihiku. Nave, the World Health Organization (mutthenkeso wa ekumi wa olumwenku wotheene), onihimya wira anamwane imilyau sinceene annookhwa khuta mwaakha, anceene a yaawo anikhwa mwaha wa ohikhalana yoolya eniphiyerya.

8, 9. Exeeni enooniherya wira eprofesia ya Yesu voohimya sa itetere ni iretta sinniiraneya?

 ⁸ Itetere. Yesu aahimmye so: “Sinokhumelela itetere sulupale”. (Luka 21:11) Olelo-va, khuta mwaakha sinnikhumelela itetere suulupale. Okhuma mwaakha wa 1900, atthu anivikana imilyau piili, ahookhwa mwaha wa itetere. Nnaamwi orowa vahoolo wa siensia okhaliheryaka osuwela itetere sihinatthi wiiraneya, nlelo atthu anceene annookhwa.

⁹ Iretta. Yesu aahihimya vahinatthi wira saamukhumelela “iretta”. Iretta sootakhala saamuulaana ni owiiva atthu anceene. (Luka 21:11) Hata mameediko asuwelaka oloola iretta sinceene, nlelo sookhala iye sihinivoniwa. Tthiri, erelatoorio emosa enihimya wira khuta mwaakha, atthu imilyau sinceene annookhwa mwaha wa elapaha, malaaria, ni koolera. Nave mameediko ahoonela iretta 30 sa niinano, ni iretta sikina khasinivoniwa.

10. Mikhalelo xeeni sinilavuliwa 2 Timótheyo 3:1-5 sinooniherya aya atthu olelo?

¹⁰ Eliivuru ya 2 Timótheyo 3:1-5, Biibiliya onihimya so: “Okathi wokiserya, anophiya mahiku òxanka”. Murummwa Paulo aahitthokiherya  mikhalelo saarowa aya wooniheryaka atthu awo mahiku ookiserya. Paulo aahimmye wira atthu yaarowa okhala

• oowiisupuwela mmansaya paahi

• oosiveliwa muhakhu

• oohiwiiwelela anamuyari aya

• oohiroromeleya

• oohiphenta

• oohiisumaaliha

• oowali

• oophavela soopuha omuhiya Muluku

• antthuna wooneyaka ntoko atthu oowaamini, nto anookhootta ikuru so waamini weiwo

11. Moovarihana ni Esalimo 92:8, exeeni enrowa owiiraneela atthu ootakhala?

¹¹ Niireke atthu a muttetthe anyu annooniherya mikhalelo iya? Moohaaniherya, olumwenku wotheene, atthu anceene annooniherya mikhalelo iya. Moohipisa, Muluku onrowa waaphukela. Biibiliya onihimya wira: “Mwawoná atthu ahinamini ereriwaka, walá alipa-òtakhala yettaka sana: musuwele wira anrowa opwetexiwa”.​—Esalimo 92:8.

12, 13. Osuwela xeeni Yehova onivanhe awe mahiku ala ookiserya?

¹² Biibiliya aahihimya vahinatthi wira mahiku ookiserya, olumwenku ola waamusareya itthu sooriipiha murima ni ohaawa. Nave, Biibiliya onihimya wira saamukhumelela itthu sooreera.

¹³ Omwiiwexexa Biibiliya. Profeta Daniyeli, aahilepa voohimya sa mahiku ookiserya. Owo aahimmye so: Atthu “animwinjererya osuwela waya”. (Daniyeli 12:4) Muluku aarowa waavaha arumeyi awe owerya wa omwiiwexexa saana Biibiliya ovikana khalai. Tthiri Yehova oopaka eyo okhuma mwaakha wa 1914. Mwa ntakiheryo, ooniixuttiha otthuneya waya nsina nawe, ni yoolakela awe ni elapo ela, ekeekhai voohimya sa yowoopola, ele enniiraneela nakhwa vale ni ohihimuxiwa. Nave-tho nihiixutta wira Omwene wa Muluku paahi tonrowa omaliha mixankiho sa apinaatamu. Nihiixutta-tho moota wookhalana okumi woohakalaliha, ni okhala mwa enamuna enimuhakalaliha Muluku. Vano arumeyi a Muluku anirumeela sai osuwela nno? Eprofesia ekina enrowa waakhula nikoho nna.​—Nwehe Enoota 21 ni 25.

14. Ilapo kavi sinilaleiwa aya ihapari sooreera sa Omwene wa Muluku, nto tani anilaleerya?

¹⁴ Muteko woolaleerya olumwenku wotheene. Olavulaka sa mahiku ookiserya, Yesu aahimmye wira: “Ehapar’ila yorera y’omwene wa wirimu enolaleiwa mulaponi mothene”. (Matheyo 24:3, 14) Nto, ihapari sooreera sa Omwene sinnilaleiwa ilapo sinivikana 230, mattaava anivikana 700. Tthiri, olumwenku wotheene, Anamoona a Yehova a “ilapo sothene ni maloko othene ni mahimo othene”, annaakhaliherya atthu wiiwexexa Omwene wa Muluku ni ele enrowa aya opaka. (Wisupulula 7:9) Annipaka eyo moohiliviwa  etthu. Hata atthu anceene yaanyokhaka ni waalupattha, khaniwerya waahiiha muteko aya woolaleerya, ntoko Yesu aahimmye awe vahinatthi.​—Luka 21:17.

15. (a) Niireke munnikupali wira ninkhala mahiku ookiserya, nto enookupalihani exeeni? (b) Exeeni enrowa owiiraneela ale animwiiwelela Yehova ni ale ahinimwiiwelela?

¹⁵ Niireke munnikupali wira ninkhala mahiku ookiserya? Iprofesia sinceene sa Biibiliya voohimya sa mahiku ookiserya sihiiraneya. Moohipisa, Yehova onrowa ohimya wira woomala muteko woolaleerya ihapari sooreera, “vano-nto olumwenk’ula omaleke”. (Matheyo 24:14) Omala onitaphulela exeeni? Onitaphulela wira ekhotto ya Muluku eniihaniwa Harmagedoni enrowa omaliha otakhala. Yehova onrowa omurumeela Yesu ni malaikha awe oowerya wira yaapwetexe ale anikhootta omwiiwelela Yehova ni Mwanawe. (2 aTesalonika 1:6-9) Nuumala-vo, Satana ni axetwani awe khanrowa-tho waawokaka atthu. Vano ale anithanla omwiiwelela Muluku ni weemererya Omwene awe, anrowa waaweha anatiri a Muluku yiiraneyaka.​—Wisupulula 20:1-3; 21:3-5.

16. Okhala wira olumwenku ohanle ‘omala’, muhaana opaka exeeni?

¹⁶ Olumwenku ola onilamuleliwa ni Satana onoomala moohipisa-va. Nto ti vootthuneya wiikoha so: ‘Kihaana opaka exeeni?’ Yehova oniphavela wira mutepeke ophavela omwiiwexexa Biibiliya. Muluttuweliweke ni yoosoma anyu ya Biibiliya. (Yohani 17:3) Anamoona a Yehova annithukumana khuta esumana wira yaakhaliherye atthu omwiiwexexa Biibiliya. Muroweleke mithukumano iyo khula esumana. (Mmusome aHéberi 10:24, 25.) Okathi oniphwanya anyu mBiibiliyani etthu yoohiloka enipaka  anyu, muhaana ottharuwa. Mwiira siiso, wataana wanyu ni Yehova onootepaka olipa.​—Yakobo 4:8.

17. Nthowa xeeni opwetexiwa wa atakhali onrowa aya waatutuxerya anamunceene?

¹⁷ Murummwa Paulo aahitthokiherya wira opwetexiwa wa atakhali onrowa wiiraneya mootutuxerya, ntoko “orwa wa nawiye”. (1 aTesalonika 5:2) Yesu aahihimya vahinatthi wira atthu anceene khiyaarowa ocalela ithoonyeryo sa mahiku ookiserya. Yesu aahimmye so: “Orwa wa Mwana a Mutthu [aahiiso mahiku ookiserya] onokhumelela volikana n’itthu sìraneĩye mahiku a Nowé. Tthirí, mahiku awo, ehalaka orupa epula ya mutáseke, atthu yanilya, yaniwurya, yanithelana, mpakha nihiku Nowé nakenlyawe mukalawani. Awo khiyànyiherya etthu, mpakha ophiya epula ya mutáseke, khuwivakasa atthu othene. Vanimwiraneya siso-tho okathi onrwawe Mwana a Mutthu”.​—Matheyo 24:37-39.

18. Yoolopola xeeni Yesu onivanhe awe?

¹⁸ Tivonto, Yesu aahinlopola wira nihilemeliwe ni ‘olya, owurya sohapala, ni sovelaveliha s’ekumi’. Ni aahimyale wira wanikisa onrwa mootutuxerya ntoko “ntthavi”. Nto onimwaaphwanya “atthu othene ankhala mulaponi mothene”. Nave aahincererya oriki: “Vano mulipeleleke, muhirupé: mulompeke okathi t’ukathi [aahiiso ovekela ni murima wotheene], wira mphwanele otthyawa sothene sinrowa okhumelela ni wemela n’uroromela oholo wa Mwana a Mutthu”. (Luka 21:34-36) Xeeni varyaaya vootthuneya weettela miruku iya sa Yesu? Mwaha woowi moohipisa-va, olumwenku wa Satana onrowa opwetexiwa. Paahi ale aneemereriwa ni Yehova ni Yesu, tanrowa woopowa wira akhaleke mahiku otheene elapo esya.​—Yohani 3:16; 2 Pedru 3:13.