1. Diin naton mahibabaroan an mahitungod han mahitatabo ha tiarabot?

NAGKITA ka na ba hin balita ha TV o namati hito ha radyo ngan naghunahuna ka, ‘Magtitikagrabe pa ba an kahimtang ha kalibotan?’ Damu hinduro an trahedya ngan kamadarahog salit an iba natoo nga hirani na an kataposan han kalibotan. Tinuod ba ito? Posible ba naton mahibaroan kon ano an mahitatabo ha tiarabot? Oo. An mga tawo diri makakagtagna kon ano an mahitatabo ha tiarabot, pero mahihimo ito ni Jehova nga Dios. Ha Biblia, iginsusumat niya ha aton an mahitungod han aton kabubuwason ngan han kabubuwason han tuna.​—Isaias 46:10; Santiago 4:14.

2, 3. Ano an karuyag mahibaroan han mga disipulo ni Jesus, ngan ano an baton ni Jesus ha ira?

² Kon nababasa naton ha Biblia an mahitungod ha kataposan han kalibotan, diri kataposan han planeta nga Tuna an iginpapasabot hito, kondi an kataposan han karaotan. Hi Jesus nagtutdo ha mga tawo nga an Ginhadian han Dios magmamando ha bug-os nga tuna. (Lucas 4:43) Karuyag mahibaroan han iya mga disipulo kon san-o maabot an Ginhadian han Dios, ngan nagpakiana hira kan Jesus: “San-o mahitatabo ini nga mga butang, ngan ano an magigin tigaman  han imo presensya ngan han ikatarapos han sistema han mga butang?” (Mateo 24:3) Hi Jesus waray iginsumat ha ira nga eksakto nga petsa, pero iginsumat niya ha ira kon ano an mahitatabo antes an kataposan hini nga kalibotan. An mga ginsiring ni Jesus nahitatabo na yana.

³ Hini nga kapitulo uusisahon naton an ebidensya nga nagkikinabuhi na kita ha panahon antes an kataposan han kalibotan. Pero kinahanglan mahibaroan anay naton an mahitungod ha girra nga nahitabo ha langit basi masabtan naton kon kay ano nga maraot hinduro an kahimtang dinhi ha tuna.

4, 5. (a) Ano an nahitabo ha langit waray pag-iha tikang han nagin Hadi hi Jesus? (b) Sumala ha Pahayag 12:12, ano an mahitatabo ha tuna katapos iglabog dida hi Satanas?

⁴ Ha Kapitulo 8 nahibaroan naton nga hi Jesus nagin Hadi ha langit han 1914. (Daniel 7:13, 14) Iginsusumat ha aton han libro han Pahayag kon ano an nahitabo: “Nagkaada girra ha langit: Hi Miguel [karuyag sidngon, hi Jesus] ngan an iya mga anghel nakig-away ha dragon [hi Satanas], ngan an dragon ngan an mga anghel hito nakig-away.” * Hi Satanas ngan an iya mga demonyo napirde ha girra ngan iginlabog nganhi ha tuna. Hunahunaa an kalipay nga inabat han mga anghel! Pero kumusta man an mga tawo ha tuna? An Biblia nasiring nga magigin masamok ito nga panahon para ha katawohan. Kay  ano? Tungod kay nasisina hinduro an Yawa, “kay maaram hiya nga halipot na la an iya panahon.”​—Pahayag 12:7, 9, 12.

⁵ An Yawa nagpapahinabo hin duro nga kasamok ha tuna. Nasisina gud hiya kay halipot na la an iya panahon antes hiya wad-on han Dios. Usisahon naton kon ano an ginsiring ni Jesus nga mahitatabo ha kataposan nga mga adlaw.​—Kitaa an Endnote 24.

6, 7. Ano an aton masisiring may kalabotan ha girra ngan gutom yana?

⁶ Girra. Hi Jesus nagsiring: “An usa nga nasud makikig-away ha lain nga nasud ngan an usa nga ginhadian makikig-away ha lain nga ginhadian.” (Mateo 24:7) Mas damu nga tawo an namatay ha mga girra ha aton panahon kay ha bisan san-o nga panahon ha kasaysayan. Usa nga report tikang ha Worldwatch Institute an nagpapakita nga tikang han 1914, sobra 100 ka milyon nga tawo an namatay ha mga girra. An mga tawo nga namatay ha mga girra ha sulod hin 100 ka tuig tikang han tuig 1900 tubtob 2000 sobra tulo ka pilo nga mas damu kay ha mga namatay ha nakalabay nga 1,900 ka tuig. Hunahunaa la an kasubo ngan kasakit nga inabat han minilyon nga tawo tungod han girra!

⁷ Gutom. Hi Jesus nagsiring: “Magkakaada kakulang hin mga pagkaon.” (Mateo 24:7) Bisan kon mas damu yana an produksyon han pagkaon kay han mga naglabay, damu nga tawo an kulang hin pagkaon. Kay ano? Tungod kay kulang an ira kwarta para  ipalit hin pagkaon o waray hira tuna nga matatanoman. Sobra usa ka bilyon nga tawo an nagkikinabuhi nga an kwarta para ha usa ka adlaw waray mag-usa ka dolyar. An World Health Organization nasiring nga minilyon nga kabataan an namamatay kada tuig, kaurogan na tungod kay kulang an ira pagkaon basi magin mahimsog.

8, 9. Ano an nagpapakita nga natutuman an mga tagna ni Jesus mahitungod ha mga linog ngan sakit?

⁸ Linog. Hi Jesus nagtagna: “Magkakaada magkusog nga mga linog.” (Lucas 21:11) Yana, damu nga magkusog nga linog an ginlalaoman kada tuig. Tikang han tuig 1900, sobra duha ka milyon nga tawo an namatay tungod han mga linog. Ngan bisan kon nakakabulig yana an teknolohiya nga mas abanse nga mahibaroan an tiabot nga linog kay han hadto, damu pa gihapon an namamatay.

⁹ Sakit. Hi Jesus nagtagna nga magkakaada hin “mga epidemya.”  An peligroso nga mga sakit madagmit nga nakakatapon ngan tungod hito damu an namamatay. (Lucas 21:11) Bisan kon nahibaroan han mga doktor kon paonan-o tatambalon an damu nga sakit, may mga sakit la gihapon nga diri natatambal. Ha pagkamatuod, usa nga report an nagsasaysay nga kada tuig, minilyon nga tawo an namamatay tungod han mga sakit sugad han tuberkulosis, malarya, ngan kolera. Labot pa hito, an mga doktor may nadiskobrehan nga 30 nga bag-o nga sakit, ngan an iba hito waray tambal.

10. Paonan-o natutuman yana an 2 Timoteo 3:1-5?

¹⁰ Ha 2 Timoteo 3:1-5, an Biblia nasiring: “Ha kataposan nga mga adlaw maabot an peligroso nga mga panahon nga makuri pakiangayan.” Iginsaysay ni apostol Pablo kon ano an magigin kinaiya han damu nga  tawo ha kataposan nga mga adlaw. Hiya nagsiring nga an mga tawo magigin

• makikalugaringon

• mahigugmaon ha kwarta

• diri masinugtanon ha ira mga kag-anak

• diri maunungon

• diri mahigugmaon ha ira pamilya

• waray pagpugong ha kalugaringon

• bayolente ngan agresibo

• mas mahigugmaon ha kalipayan kay ha Dios

• mahigugmaon ha Dios pagkit-on pero nadiri pagsugot ha iya

11. Sumala ha Salmo 92:7, ano an mahitatabo ha magraot nga tawo?

¹¹ Sugad ba hito an kinaiya han damu nga tawo ha iyo lugar? Ha bug-os nga kalibotan, damu an sugad hito. Pero diri na mag-iiha, may bubuhaton an Dios may kalabotan hini. Hiya nagsasaad: “Kon an magraot manurok pariho hin mga banwa ngan kon an  ngatanan nga magburuhat hin sala mag-uswag, pupoohon [o, bubungkagon] la gihapon hira ha kadayonan.”​—Salmo 92:7.

12, 13. Ano an igintututdo ha aton ni Jehova ha kataposan nga mga adlaw?

¹² Igintagna han Biblia nga ha kataposan nga mga adlaw, an kalibotan mapupuno hin kasakit ngan pag-antos. Pero nasiring liwat an Biblia nga may mag-opay nga mga butang nga mahitatabo.

¹³ Pagsabot ha Biblia. Hi propeta Daniel nagsurat mahitungod ha kataposan nga mga adlaw. Hiya nagsiring: “Magigin hura an tinuod nga kahibaro.” (Daniel 12:4) Tatagan han Dios an iya katawohan han abilidad ha pagsabot ha Biblia hin mas klaro kay han naglabay nga mga panahon. Ginbuhat ini ni Jehova labi na tikang han 1914. Pananglitan, igintututdo niya ha aton an importansya han iya ngaran ngan han iya katuyoan para ha tuna, pati an kamatuoran mahitungod han lukat, kon ano an mahitatabo ha aton kon mamatay kita, ngan han pagkabanhaw. Nahibabaroan naton nga an Ginhadian han Dios gud la an makakasulbad han ngatanan naton nga problema. Nahibabaroan liwat naton kon paonan-o magigin malipayon ngan kon paonan-o magkikinabuhi ha paagi nga nakakapalipay ha Dios. Pero ano an ginbubuhat han mga surugoon han Dios ha ira mga nahibabaroan? An usa pa nga tagna nagsusumat ha aton han baton.​—Kitaa an Endnote 21 ngan 25.

14. Diin iginsasangyaw an maopay nga sumat han Ginhadian, ngan hin-o an nagsasangyaw hito?

 ¹⁴ An bug-os-kalibotan nga pagsangyaw nga buruhaton. May kalabotan ha kataposan nga mga adlaw, hi Jesus nagsiring: “Inin maopay nga sumat han Ginhadian isasangyaw ha bug-os nga inuukyan nga tuna.” (Mateo 24:3, 14) An maopay nga sumat han Ginhadian iginsasangyaw ha sobra 230 nga nasud ngan ha sobra 700 nga linggwahe. Oo, ha bug-os nga tuna, ginbubuligan han mga Saksi ni Jehova tikang ha “ngatanan nga nasud ngan mga tribo” an mga tawo nga masabtan kon ano an Ginhadian ngan kon ano an bubuhaton hito para ha katawohan. (Pahayag 7:9) Ngan ginbubuhat nira ini nga waray bayad. Bisan kon damu an nangangalas ngan nagtitimaraot ha ira, waray makakapaundang ha pagsangyaw nga buruhaton, sugad han igintagna ni Jesus.​—Lucas 21:17.

15. (a) Natoo ka ba nga nagkikinabuhi na kita ha kataposan nga mga adlaw? Kay ano? (b) Ano an mahitatabo ha mga nasugot kan Jehova ngan ha mga diri nasugot ha iya?

¹⁵ Natoo ka ba nga nagkikinabuhi na kita ha kataposan nga mga adlaw? Damu nga mga tagna ha Biblia mahitungod ha kataposan nga mga adlaw an natutuman na. Diri na mag-iiha, igpapaundang na ni Jehova an pagsangyaw han maopay nga sumat ngan “an kataposan” maabot. (Mateo 24:14) Ano an kataposan? Amo ito an Armagedon, ha dida nga wawad-on han Dios an ngatanan nga karaotan. Gagamiton ni Jehova hi Jesus ngan an iya gamhanan nga mga anghel basi bungkagon an bisan hin-o nga nadiri pagsugot  ha Iya ngan ha iya Anak. (2 Tesalonica 1:6-9) Katapos hito, hi Satanas ngan an iya mga demonyo diri na manlilimbong ha mga tawo. Ngan an ngatanan nga naruruyag pagsugot ha Dios ngan pagkarawat han iya Ginhadian makakakita nga natutuman an tagsa nga saad han Dios.​—Pahayag 20:1-3; 21:3-5.

16. Tungod kay hirani na gud an kataposan, ano an kinahanglan mo buhaton?

¹⁶ Diri na mag-iiha, matatapos ini nga kalibotan nga ginmamandoan ni Satanas. Salit importante gud nga pakianhan naton an aton kalugaringon, ‘Ano an kinahanglan ko buhaton?’ Karuyag ni Jehova nga damu gud an imo mahibaroan tikang ha Biblia tubtob ha imo mahihimo. Kinahanglan seryosohon mo an imo pag-aram. (Juan 17:3) An mga Saksi ni Jehova may mga katirok kada semana basi buligan an mga tawo nga masabtan an Biblia. Talinguhaa nga makatambong ka hin regular hito nga mga katirok. (Basaha an Hebreo 10:24, 25.) Kon mahibaroan mo nga kinahanglan mo maghimo hin mga pagbag-o, ayaw kahadlok ha pagbuhat hito. Samtang ginbubuhat mo ito, mas magririg-on an imo pakigsangkay kan Jehova.​—Santiago 4:8.

17. Kay ano nga matitigdaan an kadam-an nga tawo kon umabot an kataposan?

¹⁷ Hi apostol Pablo nagsaysay nga an kabungkagan han mga magraot maabot ha panahon nga kadam-an nga tawo an diri naglalaom hito, ‘sugad hin kawatan ha gab-i.’ (1 Tesalonica 5:2) Igintagna ni Jesus nga damu an magbabalewaray han mga ebidensya nga nagkikinabuhi na kita ha kataposan nga mga adlaw.  Hiya nagsiring: “Sugad la han mga adlaw ni Noe, magigin sugad liwat hito an presensya han Anak han tawo [o, an kataposan nga mga adlaw]. Kay sugad la han mga adlaw antes han Baha, nga an mga tawo nangangaon ngan nanginginom, nangangasawa an kalalakin-an ngan ginpapangasawa an kababayin-an, tubtob han adlaw nga sinulod hi Noe ha arka, ngan waray hira maghatag hin atensyon tubtob nga inabot an Baha ngan igin-anod hira ngatanan, magigin sugad liwat hito an presensya han Anak han tawo.”​—Mateo 24:37-39.

18. Ano an pahamangno ha aton ni Jesus?

¹⁸ Ginpahamangnoan kita ni Jesus nga diri sadang mawara an aton pokus tungod han “sobra nga pagkinaon ngan sobra nga pag-ininom ngan mga kabaraka ha kinabuhi.” Hiya nagsiring nga an kataposan tigda nga maabot, “sugad hin lit-ag.” Nagsiring liwat hiya nga “maabot ito ha ngatanan nga naukoy ha bawbaw han bug-os nga tuna.” Katapos, nagsiring pa hiya: “Salit padayon nga magmata, nga nangangamuyo [o, sinsero gud nga nag-aampo] ha ngatanan nga panahon nga maglampos kamo ha pagpalagiw hini ngatanan nga butang nga kinahanglan mahitabo ngan ha pagtindog ha atubangan han Anak han tawo.” (Lucas 21:34-36) Kay ano nga importante gud nga mamati ha pahamangno ni Jesus? Tungod kay hirani na gud bungkagon an maraot nga kalibotan ni Satanas. An mga tawo la nga gin-uuyonan ni Jehova ngan ni Jesus an makakatalwas ha kataposan ngan mabubuhi ha kadayonan ha bag-o nga kalibotan.​—Juan 3:16; 2 Pedro 3:13.