1. Wari rengbe ani ka ino agu apai ni du ku mbatayo?

YA MO mo aginga apangbanga na ki berẽ gupai nga, ‘Ya mo apai angba berewe?’ Bakere gberãngo gbiati gu gbegberẽ apai namanga nasa aboro i niberẽ gupai nga ani ima mbeda kuti digido zegino. Ya mo rengo du? Ya mo gene ho tipa ka ino gupai nika manga kumbatayo? Ii. Wa vura duhe nga wiri aboro arengbanga ka ino gupai rengbe ka manga kumbatayo te, Yekova ima inoho. Ko napepa gaani raka kumbatayo furani rogo Baibiri gbiati gupai du tipa kpotosende kumbatayo a.—Yesaya 46:10; Yakoba 4:14.

2, 3. Ginipai ga Yesu abawiriki aaida ka inoho, na wai gu Yesu akaragapai fuyo?

² Ho ani ageda gupai ni rogo Baibiri du tipa digido zegino, anga si nga digido gi kpotosende re te, ono digido gbegberẽ apai. Yesu ayugu gupai fu aboro nga gu Kindo nga ga Mbori nika zogarago kurii kpotosende. (Ruka 4:43) Gako abawiriki aaida ka ino gini regbo ga Mbori Kindo nika ye ti ni, na i asana Yesu nga: “Gini rago agi apai ka manga re? gine i ka ina pa ga ye ti ni, na pa digida rago?” (Matayo 24:3) Yesu aayugongo ndikidi ramediwi fuyo te, ono ko agumba agu apai fuyo nika manga mbata fu digido zegino. Agu apai Yesu aya si nika manga namanga amanga awere.

³ Rogo gi kapita re, ani nika sakapai tipa agu agopai nayugo gupai nga ani naraka ti gu regbo du mbata fu digido zegino. Ni bambatapai, si naida ani inipa gu vura  namangi ngbangbaturũ yo tipa ka ruho ka ino gupai apai nagberẽ ti ni auru kpotosende ane.

4, 5. (a) Ginipai namangi nibasa ngbangbaturũ yo fuo da Yesu ni Bakindo? (b) Ringbisihe kuti Yugoti 12:12, ginipai si adu nga si nika manga fuo ba yo Satana ku auru kpotosende?

⁴ Rogo Kapita 8, ani awiriki gupai nga Yesu ada ni Bakindo ngbangbaturũ yo rogo 1914. (Daniere 7:13, 14) Gu kitabu nga Yugoti nape gupai furani namangi: “Vura ki du ngbangbaturũ yo, Mikaere [nga, Yesu] na gako amaraika ki so vura na daragona; [Satana] daragona ki niso vura na gako amaraika a.” * Satana na gako adaimona aadunga na diabese rogo gu vura re te na i ki bayo ku auru kpotosende no. Mo berẽnga pa gu ngbarago naadu ti amaraika! Ono ginipai tigaha du tipa agu aboro du auru kpotosende? Baibiri naya, si nika ngia regbo gberãngo fu aboro. Tipagine? Bambiko Bakitingbanga na bakere zinga, “bambiko ko ini he ya kina bete rago nye fu ko.”—Yugoti 12:7, 9, 12.

⁵ Bakitingbanga naye na badungu kpakaraapai ni kerehe ku auru kpotosende. Ko na bakere zinga bambiko regbo nye fu ko tooni tipa Mbori di ko kusayo. Ani bingo agu apai Yesu aya si nika manga ti yangara arame.—Mo bi gu 24 rukutu kekeapai du ti digido gi buku re.

6, 7. Ginipai du tipa avura na gomoro areme?

⁶ Vura. Yesu aya: “Rika aboro azínga kuti gu rika aboro, ngbi ki zingi kuti gu ngbi.” (Matayo 24:7) Badungu aboro ima kpi be vura ti gi gaani regbo re kisusi  agu avura namangi mbata kusayo. Tingidapai sa naye be gu riigbu nangerakurii agu apai namanga rogo zegino nayugo gupai nga tona rogo 1914, vura ima imo aboro bangeyo naima susa amirioni 100. Agu aboro kpiki be avura tona ti agu agarã naatona rogo 1900 kuti 2000 ima nge kisusi aguyo i aimi yo mbata fu agu agarã nangia 1,900. Mo berẽnga pa gu gbegberẽ apai gbiati gu igirã amirioni aboro agbiatiyo na ni mbiko vura!

⁷ Gomoro. Yesu aya: “Angbongi nikadu” watadu zingo riahe. (Matayo 24:7) Wa vura duhe nga i nakusa riahe awere susi wai si adumbata, badungu aboro na riahe beyo tipa ka rihe te. Tipagine? Bambiko marã beyo tipa ka ngbe riahe watadu dagbangua beyo tipa ka rũ ahe rogoho te. Badungu abirioni aboro narihe ri dorari sa watadu kusende ti ni rogo uru sa. Gu riigbu nabipa ngerafuo kpotose rogo zegino dunduko naya amirioni agude nakpi na garã dũ, bambiko riahe beyo tipa ka sa kpotoyo si du wenengai te.—World Health Organization.

8, 9. Gini apai nayugo gupai nga ga Yesu sangbaanebi tipa abazigizo gbiati akaza ima da ti rengo?

 ⁸ Abazigizo. Yesu agumbapai ni sangbanebi nga: “Kpotosende adú ni zigizozigizo ho bakere.” (Ruka 21:11) Badungu kere abazigizo namanga na agarã dunduko. Natona rogo gu garã nangia 1900, aboro susi amirioni ue ima kpi be abazigizo. Wa vura duhe nga ahe kinaho nasa gupai nga i inipa bazigizo mbata fu si mangi, badungu aboro nakpi kindi.

⁹ Akaza. Yesu afura kumbatayo nga “gberãngbi” watadu ririakaza nika du. Si adu nga kere akaza nika gbandaka ni ipo na kini imi badungu aboro. (Ruka 21:11) Wa vura duhe nga amunganga ima ino wai ka husa badungu akaza, kura akaza kinaho adu nga gene beyo ka husaha ya. Nirengo, tingidapai sa naya rogo agarã ni basasa, amirioni aboro nakpi be agu akaza du wa dingo, mararia, gbiati banikiro (cholera). Anga kina gure sa te, amunganga ima bi vovo akaza nga 30, na agu akuraha, dawa tipaha te.

10. Wai gu 2 Timoteo 3:1-5 nada ti rengo areme?

¹⁰ Rogo 2 Timoteo 3:1-5, Baibiri naya: “Rogo kusa rago gbegberẽ rago aye.” Gu mokedi nangia Pauro aringbisipa wai badungu aboro nikaa mangaapai rogo yangara arame. Ko aya aboro nika ngia

• akpinyemu tise

• akpinyemu marã

• abasasangba avunguyo

• azanga ziaziapai

• aboro adu sakparakpa fu gayo aborokporo

• azanga rugatise

• aboro zuu na ni amangi gbegberẽ apai

• akpinyemu sangba borose susi nyemu Mbori

• akakuti kpia sinombori ono kini ti kango tandu he

11. Ringbisihe kuti Atambuahe 92:7, ginipai nika manga tipa gbegberẽ aboro?

¹¹ Ya mo ga aboro sino mangaapai wa gure rogo gu ba mo araka rogo yo? Wo du dungu aboro rogo zegino dunduko. Ono Mbori nika mangapai amanga tipaha barambeda. Ko kidohe nga: “Ka gbegberẽ aboro  vura kura wa tomo nvuo vurũ, amangi irairapai dunduko ki nizuga, i ringbisi yo tipa gbarasa yo nye anye kindi.”—Atambuahe 92:7.

12, 13. Gini apai Yekova nayuguhe furani vuru gi yangara arame yo re?

¹² Baibiri aima gumba gupai kumbatayo nga rogo kusa arago, zegino nika hi be aimisiri gbiati dungu arungo. Ono Baibiri ape gupai a nga weneapai kinaho nika manga.

¹³ Giarogo Baibiri Yo. Gu nebi nangia Daniere aima kepai tipa yangara arame. Ko aya: “Inahe amáa pai.” (Daniere 12:4) Mbori nika fu tandu fu gako aboro i girogo Baibiri yo ngba gu gene naamanganga mbata ya. Yekova aima manga gipai re gbe tona rogo 1914. Ni kpiapai, ko ima yugopa nyakapa rimoko na gako ringbisapai tipa kpotosende gbiati gu rengo du tipa ga Yesu motumo, gupai ninaamanga rani ho ani akpi ni, gbiati zingabekpio. Ani ima wirika gupai nga kina ga Mbori Kindo sa nika digiso gaani akpakarapai dunduko. Ani ima wirika wai a kadu na ngbarago na wai ka raka ngba gu gene nasa ngbarago ti Mbori. Ono ginipai ga Mbori amoyambu amangaha na gupai i nawirikihe re? Gu kura sangbanebi nafu karagapai fu rani.—Mo bi gu 21 na 25 rukutu kekeapai du ti digido gi buku re.

14. Wari du i atungusa gu wene pangbanga nga ga Kindo ni, na ada natungusaha?

¹⁴ Gu sunge tungusapai namanga rogo zegino dũ. Yesu afura tipa yangara arame, ki ya: “Gi wene pangbanga nga ga ngbi re i atungusa ha rogo zegino dunduko.” (Matayo 24:3, 14) I natungusa gi wene pangbanga nga ga Kindo re awere rogo aringara naima susa 230 na rogo afugo naima susa 700. Rogo zegino dunduko, aDezire  Yekova “dagba rika aboro dunduko, na angbatunga yo” naundo aboro i ini ginihe nga Kindo na gupai si nika mangaha fu ngbatunga aboro dunduko. (Yugoti 7:9) Na i namanga gipai re gbua zanga i tumoyo tipaha. Wa vura duhe nga badungu aboro nasogoyo na kini rungosiyo kina wai Yesu apehe rogo gako sangbanebi yo, he ho rengbe ka rugusa sunge tungusapai te.—Ruka 21:17.

15. (a) Ya mo mo idi kuti gupai nga ani naraka rogo yangara arame, na tipagine? (b) Ginipai nika manga tipa agu aboro nagiasangba Yekova gbiati aguyo agianga ko ya?

¹⁵ Ya mo mo idi kuti gupai nga ani naraka rogo yangara arame? Dungu gu sangbaanebi nga ga Baibiri du tipa yangara arame nada ti rengo. Barambeda, Yekova nika diaberã tipa ka rugusa sunge tungusa wene pangbanga na “ragoho ki digi” adigo. (Matayo 24:14) Gine nga digido rago? Si nga Aramegido, ho Mbori nika dia gbegberẽ apai ni dunduko kusayo. Yekova nika mangasunge na Yesu gbiati gako amaraika i gberesi agu aboro na ká ka giasangba Ko gbiati Wiriko. (2 ATesaroniko 1: 6-9) Fuo gure, Satana na gako adaimona ananganga aboro berewe te. Agu aboro dunduko naida ka giasangba Mbori na ki idi kuti gako Kindo, i nika bi agu akidohe nga ga Mbori dunduko si nidigisitihe.—Yugoti 20:1-3; 21:3-5.

16. Wa duhe nga gi zegino re nambeda ka digo, ginipai si aida mo mangihe?

¹⁶ Gi zegino Satana azogaha re nika digo barambeda. Si ni nyanyakipa pai ani sana tirani nga, ‘Ginipai si aida mi mangihe?’ Yekova naida mo wiriki badungu apai rogo Baibiri yo. Si naida mo bi gamo wirikapai na nyanyakipaha. (Yoane 17:3) ADezire Yekova namanga adunguratise na aposo dunduko tipa ka undo aboro i girogo  Baibiri yo. Mo asadi ka du pati agu adunguratise re dedede. (Mo gedi AEbere 10:24, 25.) Ka mo bi gupai nga si naida mo mangi aˈariapai, ka mo gunde nga ti mangaha ya. Wa mo nikaa mangaha, gamo pagume na Yekova nika du ni banyanyaki he.—Yakoba 4:8.

17. Tipagine digido rago nika tunguo badungu aboro atunguo ti ni?

¹⁷ Gu mokedi nangia Pauro ape gupai nga gbarasahe nika ye kurii gbegberẽ aboro ka i ainongo ho ya, “wa iradĩ naye yuru.” (1 ATesaroniko 5:2) Yesu ape sangbanebi nga dungu aboro nikaa idanga ka degatuyo kuti gu gopai nayugo gupai nga ani naraka rogo yangara arame ya. Ko aya: “Wa si adu rago Noa, wo pa ye Wiri boro [watadu yangara arame] nikadu. Bambiko, wa si adu ni gu rago naadu mbata fu ngirimo akangbi re, i aniri he nimbiri he, nirogo ade nifuku ade sa roga yo, ki da ti gu uru Noa arimi ni ku kurungba yo, ka i aina nga ha ya daho ngirimo akangbi aye ni ki nirogo yo dunduko ku sa yo; wo ye Wiri boro nikadu.”—Matayo 24:37-39.

18. Gini zahe Yesu afuhe furani?

¹⁸ Yesu azahe nga ka ani hisingo ‘kpotoraniyo na bakere riahe na berãpa gi unga re’ ya. Ko aya digido rago nika ye kina wai “gbina naza.” Ko aya berewe a “si [ni]ka da fu agu aboro dunduko naraka auru kpotosende.” Ko ape kurapai nga: “Oni ngére dedede, ki nikpari, [watadu kini kpari kakaka] ya oni di be pai ka bata be agi apai nikamanga dunduko re, ki ru barangba Wiri boro.” (Ruka 21:34-36) Tipagine duhe ti ni ni nyanyakipa pai ka degatue kuti ga Yesu zahe? Bambiko barambeda, i nika gbarasa gi ga Satana gbegberẽ zegino re. Kina agu aboro Yekova gbiati Yesu naidi na gayo pai i nika bata ti digido gi zegino re tipa ka raka nyeanye kindi rogo vovo zegino.—Yoane 3:16; 2 Petero 3:13.