1. Ангелдер керегинде чынды нениҥ учун билер керек?

ИЕГОВА бисти ангелдер керегинде чынды билип алзын деп кӱӱнзеп јат, не дезе, олор Кудайдыҥ билезине кирет. Агару Бичикте ангелдер «Кудайдыҥ уулдары» деп адалат (Иов 38:7). Ангелдер кандый иш эдет? Олор алдындагы ӧйдӧ улуска канайып болушкан? Олор бӱгӱнги кӱнде улуска болужат па? (8 Кожултаны кӧрӱгер.)

2. Ангелдер канайып табылган ла олордыҥ тоозы канча?

² Ангелдер канайып табылган? Колоссыдагыларга 1:16-да айдылганыла болзо, Иегова Иисусты јайаган кийнинеҥ «теҥеридезин де, јердезин де», ол тоодо, ангелдерди де јайаган. Олордыҥ тоозы канча? Агару Бичикте јӱс миллиондор ангелдер јайалган деп айдылат (Сарын 103:20; Ачылта 5:11).

3. Иов 38:4—7 ангелдер керегинде нени айдат?

³ Ангелдер јердеҥ озо јайалган. Иовтыҥ бичигинде Иегова јерди јайап турарда, ангелдер сӱреен тыҥ сӱӱнгилеген деп айдылат. Ол тушта ангелдер бастыразы кожо — бир биледий — Иеговага иштеген (Иов 38:4—7).

4. Ангелдер улуска болужарга кӱӱнзеп турган деп, бис кайдаҥ билерис?

⁴ Ангелдер алдынаҥ бери улуска болужарга кӱӱнзеген, анайда ок Иегованыҥ јерге ле кижиликке кӱӱн-табы кандый болгонын билерге кӱӱнзеген (Укаа сӧстӧр 8:30, 31; 1 Петр 1:11, 12). Адам ла Ева Кудайдыҥ сӧзин укпаган  болордо, олор тыҥ ачуурканган. Оныҥ учун бӱгӱнги де кӱнде кӧп саба улус Иегованы база укпай турган болордо, олор ачынып турган болор. Је кем-кем јаманын алынып, Кудайга келзе, ангелдер сӱӱнип јат (Лука 15:10). Ангелдер анчада ла Кудайга иштеп турган улуска болужарга белен болот деп, алаҥзу јок. Иегова бойыныҥ ишчилерин кичеерге эмезе олорды корулаарга ангелдерин ийет (Еврейлерге 1:14). Мыныла колбой, бир канча темдер кӧрӱп ийектер.

5. Азыйда Кудайдыҥ ишчилерине ангелдер канайып болушкан?

 ⁵ Содом ло Гоморра деп калалар јоголтылып јадарда, Иегова Лотко ло оныҥ билезине качарга болушсын деп, эки ангелди аткарган (Башталганы 19:15, 16). Судурчы Даниилди карагулалардыҥ орозындӧӧн таштап ийерде, «Кудай карагулалардыҥ оосторын јабып салзын деп, бойыныҥ ангелин аткарган». Анайып, Даниил аргадалган (Даниил 6:22). Анайда ок Иегова элчи Петрды тӱрменеҥ јайымдаарга ангелди аткарган (Апостолдордыҥ ижи 12:6—11). Иисус јерде болордо, ангелдер ого база болушкан. Темдектезе, Иисустыҥ сууга чӧҥӱрилгениниҥ кийнинде, удабай ла, «ангелдер Ого болужып тургандар» деп, Агару Бичикте айдылат (Марк 1:13). Анайда ок кыйнадып ӧлтӱртердиҥ алдында ангелдердиҥ бирӱзи оныҥ «тын-санаазын сергидип турды» деп айдылат (Лука 22:43).

6. а) Ангелдер бӱгӱнги кӱнде биске болужып турган деп, нениҥ учун алаҥзыбаска јараар? б) Бис кандый сурактар кӧрӧрис?

⁶ Ангелдер бӱгӱнги кӱнде улуска кӧрӱнбей јат. Је Кудай олор ажыра улуска эмдиге јетире болужып јат. Агару Бичикте: «Иегованыҥ ангели оноҥ коркып турган улусты корулайт ла аргадайт» — деп айдылып калган (Сарын 34:7). Ангелдердиҥ корузы биске нениҥ учун керектӱ? Нениҥ учун дезе бисте јаан ийде-кӱчтӱ ле казыр-калју ӧштӱлер бар. Олор кемдер? Олор кайдаҥ келген? Олор канайып биске каршузын јетирерге албаданат? Бу сурактардыҥ каруузын аларга, Адам ла Еваныҥ јайалганыныҥ кийнинде не болгонын эске алып ийектер.

7. Сатана улусты неге јайа тарткан?

⁷ 3-чи бажалыктаҥ билип алганысла, бир ангел јаҥ аларга, Кудайга удура туруп чыккан. Агару Бичикте ол Сатана Дьявол деп адалат (Ачылта 12:9). Сатана улусты база  Кудайга удура туруп чыксын деп кӱӱнзеп, Еваны тӧгӱндеп ийген. Кийнинде јердеги улустыҥ кӧп сабазын база тӧгӱндеп салган. Је тӱҥей ле кезик улус Иеговага чындык арткан, темдектезе, Авель, Енох ло Ной (Еврейлерге 11:4, 5, 7).

8. а) Кезик ангелдер канайып кӧрмӧстӧр болуп калган? б) Чайыктаҥ аргаданарга, кӧрмӧстӧр нени эткен?

⁸ Нойдыҥ ӧйинде кезик ангелдер база Кудайга удура туруп чыккан. Олор теҥеридеги айылын артыргызып, јерге тӱжӱп, кижиниҥ бӱдӱмин алынган. Нениҥ учун? Агару Бичикте олор ӱй улус аларга кӱӱнзеген деп айдылат. (Башталганы 6:2 кычырыгар.) Је ангелдерге мынайып эдерге јарабас болгон (Иуда 6). Улус калју ангелдердеҥ улам кату-казыр болуп, балыр јӱрӱм јӱрӱп баштаган. Оныҥ учун Иегова чындык улусты аргадап аларга, јердиҥ ӱстинде казыр-калју улусты чайыкла јоголтып салган (Башталганы 7:17, 23). Мынайып улусла кожо јоголтылып калбаска, калју ангелдерге кайра теҥеридӧӧн барарга келишкен. Олор Агару Бичикте кӧрмӧстӧр деп адалат. Кӧрмӧстӧр Сатананыҥ тӱймеенине биригип, Дьяволды бойыныҥ башкараачызы эдип талдап алган (Матфей 9:34).

9. а) Кудай кӧрмӧстӧрди бойыныҥ билезине кайра алган ба? б) Оноҥ ары бис нени билип аларыс?

⁹ Иегова бу тӱймеечилерди бойыныҥ билезине кайра албаган (2 Петр 2:4, ЈТ). Бӱгӱн кӧрмӧстӧрдӧ улус болуп кубулар арга јок то болзо, олор алдындагы ла чылап «бастыра телекейди мекелеп» јат (Ачылта 12:9; 1 Иоанн 5:19). Је эмди олордыҥ андый кӧп улусты канайып тӧгӱндеп турганын кӧрӱп ийектер. (2 Коринфтегилерге 2:11 кычырыгар.)

10. Кӧрмӧстӧр улусты «тударга», ол эмезе тӧгӱндеерге, нени эткилейт?

¹⁰ Улус кӧрмӧстӧрлӧ колбуны бойлоры туткылайт эмезе камдар ла экстрасенстер ажыра туткылайт. Кӧрмӧстӧрлӧ  колбу тутканы демонизм, ӧскӧртӧ айтса, спиритизм деп адалат. Агару Бичик биске кӧрмӧстӧрлӧ колбулу немеге бир де јууктабазын деп айдат (Галаттарга 5:19—21). Нениҥ учун? Нениҥ учун дезе бу тузак болот. Аҥчы кижи кандый бир аҥды тудуп аларга, јӱзӱн-башка јемдер (приманка) тузаланып турганы чылап, кӧрмӧстӧр дӧ улусты јӱзӱн-башка јемдерле «тудат» (25 Кожултаны кӧрӱгер.)

11. Кӧрмӧстӧр улусты база кандый немениҥ болужыла тӧгӱндеп јат? Мындый аргала нениҥ учун тузаланарга јарабас?

¹¹ Кӧрмӧстӧрдиҥ јемдериниҥ бирӱзи — белгелеери (гадание). Кезик улус не болгонын эмезе не болорын билип аларга, арчын тузаланат, кӧзӧр салат, магический шар тузаланат ла колдыҥ чийӱлерин кӧрӧт. Је кезиги неме билер улуска баштанат. Кӧп улус мындый немелер эдеринде јаман неме јок деп бодогылайт, је бу андый эмес. Бу ончо немедеҥ коркышту јаан каршу болот. Нениҥ учун дезе Агару Бичикте айдылганыла, неме билер улус кӧрмӧстӧрлӧ колбу тудуп јат. Апостолдордыҥ ижи 16:16—18-те бир ӱй кижиге «ырымдаачы тын», ол эмезе кӧрмӧс, кирип калган деп айдылат. Бу ӱй кижи кӧрмӧстиҥ болужыла неме билер аргалу болгон. Је элчи Павел кӧрмӧсти ӱй кижидеҥ чыгарып ийерде, оныҥ неме билер аргазы јоголып калган.

12. а) Божоп калган улусла колбу тудары нениҥ учун каршулу? б) Кудайдыҥ ишчилери сӧӧк јуур кезик чӱм-јаҥдарда нениҥ учун качан да турушпайдылар?

¹² Кӧрмӧстӧрдиҥ тузаланып турган база бир јеми — ӧлгӧн улусла куучындажары. Божоп калган улус кайда да јӱрӱп, бисле куучындажар эмезе каршузын јетирер аргалу деп кӧрмӧстӧр бисти бӱдӱмјилеерге кӱӱнзейт. Кезик улус јуук најызын эмезе тӧрӧӧнин јылыйтып, божоп калган улусла колбу тудар аргалу деп сананып турган улуска, темдектезе, камдарга ла неме билер улуска баштанат.  Олор божоп калган кижи керегинде нени-нени айдып берер аргалу, керек дезе божогон кижиниҥ ӱниле де куучынданар аргалу (1 Самуил 28:3—19). Анайда ок кезик улус божогондор кайда да оноҥ ары јӱрӱп турган деп бӱткилеп, сӧӧк јууган тушта кӧп чӱм-јаҥдар эткилейт. Темдектезе, божоп калган кижини ӱйдежерге, оныҥ коногын ӧткӱргилейт. Бу ончо чӱм-јаҥдардыҥ кийнинде кӧрмӧстӧр турат. Мындый чӱм-јаҥдарга турушпай барган христиан кижи тӧрӧӧндӧрине ле айылдаштарына јамандадарынаҥ ла јаргыладарынаҥ айабас. Керек дезе олор оныла куучындашпай да барар болор. Је христиандар, божоп калган улустыҥ кайда да јӱрбей турганын, биске каршу эдер арга јогын, анайда ок божогон улусла колбу тудар арга јогын билер (Сарын 115:17). Оныҥ учун ајарыҥкай болугар. Божоп калгандарла, чынынча айтса кӧрмӧстӧрлӧ, качан да колбу тутпагар ла мындый чӱм-јаҥдарда турушпагар. (Јаҥды такыганы 18:10, 11 кычырыгар; Исаия 8:19.)

13. Алдында кӧрмӧстӧрдӧҥ коркып јӱрген улус нени эткен?

¹³ Кӧрмӧстӧр улусты јӱк ле тӧгӱндеп турган эмес, је коркыдып та јат. Сатана ла кӧрмӧстӧр удабас јерге каршузын јетирип болбозын, ол эмезе «ӧйи ас болгонын билип», там ла казырланып, калјуурып јат (Ачылта 12:12, 17). Је алдында кӧрмӧстӧрдӧҥ јаантайын коркып јӱрген муҥдар тоолу улус, олордоҥ коркыбай барган. Олор кӧрмӧстӧрдиҥ каршузынаҥ канайып јайымдалган?

14. Эфестеги христиандар чылап, кӧрмӧстӧрдиҥ каршузынаҥ айрыларга, бӱгӱнги кӱнде нени эдер керек?

¹⁴ Агару Бичик бисти кӧрмӧстӧрдиҥ каршузынаҥ айрыларга, нени эдер керек деп ӱредет. Темдектезе, Эфес калада јуртаган улус, Кудай керегинде чындыкты билердеҥ  озо, кӧрмӧстӧрлӧ колбу туткан деп айдылат. Олор кӧрмӧстӧрдиҥ каршузынаҥ канайып јайымдалган? Апостолдордыҥ ижи 19:19-та: «Илбизиндеп јӱргендердиҥ тапту кӧбизи тӱрбектерин чогуп, ончо улус кӧзинче ӧртӧдилер» — деп бичилген. Олор христиандар болорго кӱӱнзегенинеҥ улам бойлорыныҥ илби-тармалу бичиктерин ӧртӧп салган. Бӱгӱн кем-кем Иегованыҥ ишчизи болорго кӱӱнзеп турган болзо, ого кӧрмӧстӧрлӧ колбулу ончо немелердеҥ база айрылар керек. Бу бичиктер, журналдар, гороскоптор, кинолор, јуруктар, ойындар эмезе кандый бир кӱӱ болор аргалу. Бу ончо немелердеҥ улам илби-тарма, кӧрмӧстӧрлӧ куучындажары эмезе кӧскӧ кӧрӱнбес калју тындардыҥ эдип турган керектери јилбилӱ ле каршулу эмес деп билдирет. Анайда ок бого јаманнаҥ коруланарга тузаланып турган эдимдер кирет (1 Коринфтегилерге 10:21).

15. Сатана ла кӧрмӧстӧргӧ удура турарга, биске база нени эдер керек?

¹⁵ Эфестеги христиандар илби-тармалу бичиктеринеҥ айрылган кийнинде, канча јылдар ӧдӱп те калган болзо, элчи Павел олорды «јаманныҥ тындарына удура» тартыжарын токтотпозын деп кычырган (Ефестегилерге 6:12). Нениҥ учун? Нениҥ учун дезе кӧрмӧстӧр алдындагызы ла чылап олорго каршузын јетирерге албаданган. Бу христиандарга база нени эдер керек болгон? Элчи Павел: «Мынаҥ башка, бӱдериниҥ куйагын алыгар, оныла јаманныҥ кызыган ончо согоондорын ӧчӱрип [эмезе токтодып] ийеригер» — деп бичиген (Ефестегилерге 6:16). Јуучылды куйак канайып корулап турган, бӱдӱмјибис бисти анайып ла корулап јат. Иегова бисти корулап алар деп тыҥ бӱдӱп турган болзоос, бис Сатана ла кӧрмӧстӧргӧ удура турар аргалу болорыс (Матфей 17:20).

16. Бӱдӱп турганысты тыҥыдарга биске не болужар?

 ¹⁶ Иеговага бӱдӱп турганысты тыҥыдарга биске не болужар? Агару Бичикти кажы ла кӱн кычырып, Иеговага иженерге ӱренер керек. Ол тушта Сатана ла кӧрмӧстӧр биске каршузын јетирип болбос (1 Иоанн 5:5).

17. Бис кӧрмӧстӧрдӧҥ база канайып коруланар аргалу?

¹⁷ Эфес кӧрмӧстӧрлӧ толуп калган кала болгон, оныҥ учун анда јаткан христиандарга элчи Павел «јаантайын» мӱргӱгер деп јӧп берген (Ефестегилерге 6:18). Оныҥ учун олорго Кудайдаҥ јаантайын кору сураар керек болгон. Бис те кӧрмӧстӧрлӧ толуп калган телекейде јададыс. Оныҥ учун биске Иегованаҥ база кору сураар керек ле оныҥ адын адап мӱргӱӱр керек. (Укаа сӧстӧр 18:10 кычырыгар.) Бис Сатананаҥ јайымдаларга Иегованаҥ болуш суразаас, ол бисти корулаар (Сарын 145:19; Матфей 6:13).

18, 19. а) Сатана ла кӧрмӧстӧрди јеҥип аларга нени эдер керек? б) Келер бажалыктаҥ нени билип аларыс?

¹⁸ Анайдарда, бис кӧрмӧстӧрлӧ колбулу ончо немелердеҥ айрылып, Иегова бисти корулаар деп алаҥзыбай турзаас, Сатана ла кӧрмӧстӧргӧ удура туруп ийерис. Олордоҥ коркыбас керек. (Иаков 4:7, 8 кычырыгар.) Иегова кӧрмӧстӧрдӧҥ канча киреге кӱчтӱ. Нойдыҥ кӱндеринде Кудай олорды кату каруузына тургускан, келер ӧйдӧ ол олорды чек јоголтып салар (Иуда 6). Бис јаҥыскан тартышпай турганыс деп ундыбагар — Иегова бисти ангелдер ажыра корулап јат (2 Каандар 6:15—17). Иегованыҥ болужыла Сатананы ла кӧрмӧстӧрди јеҥип аларыс деп, бир де алаҥзыбагар (1 Петр 5:6, 7; 2 Петр 2:9).

¹⁹ Је Сатана ла кӧрмӧстӧр андый кӧп кыйын-шыра јетирип турарда, Кудай олорды нениҥ учун эмдиге јетире јоголтпогон? Бу керегинде келер бажалыктаҥ билип аларыс.