1. Mase porlu iparlajari hita pasal malekat-malekat?

SIHOL do Jahowa ase hita mananda kaluarga-Ni. Ganup malekat kaluarga ni Naibata do. Bani Bibel sidea ihatahon “anak ni Naibata”. (Job 38:7) Aha do na ihorjahon sidea? Na basaia, sonaha sidea mangurupi jolma? Anjaha, boi ope sonari sidea mangurupi hita?​—Idah Ambah ni Hatorangan 8.

2. Hunja do asal ni ganup malekat? Piga bahat do sidea itompa?

² Porlu ibotoh hita hunja do asal ni ganup malekat. Kolosse 1:16 patugahkon hubanta, dobkonsi Jesus itompa Jahowa, ‘itompa ma haganup, na i nagori atas ampa na i tanoh on’. Dihut ma ai ganup malekat. Bibel patugahkon dong marlaksa-laksa atap marjuta-juta bilangan ni sidea.​—Psalmen 103:20; Pangungkabon 5:11.

3. Aha do na ipatugah bani Job 38:4-7 pasal ganup malekat?

³ Bibel pe patugahkon anggo malekat itompa Jahowa sanggah lape itompa tanoh on. Sonaha pangahap ni sidea mangidah tanoh on? Bani buku Job ihatahon anggo sidea marmalas ni uhur. Gabe sada kaluarga ma ganup sidea mangidangi Jahowa.​—Job 38:4-7.

4. Hunja do ibotoh hita anggo malekat-malekat marosuh mangidah jolma?

⁴ Malas do uhur ni malekat-malekat mangidah manisia janah sihol do sidea mambotoh sura-sura ni Jahowa bani jolma ampa tanoh on. (Podah 8:30, 31;  1 Petrus 1:11, 12) Tapi, sanggah si Adam pakon si Hawa manlawan Naibata, pusok do uhur ni malekat. Janah lambin pusok ma uhur ni sidea mangidah buei jolma manlawan dompak Jahowa. Tapi anggo adong humbani sipardousa in na mubah, malas do uhur ni malekat. (Lukas 15:10) Marosuh do sidea mangidah jolma na mangidangi Naibata. Halani ai ma ipakei Jahowa sidea laho mangurupi janah mangondingi juakjuak-Ni i tanoh on. (Heber 1:14) Idah hita ma sontohni.

5. Na basaia, sonaha do malekat-malekat mangurupi juakjuak ni Naibata?

 ⁵ Isuruh Jahowa do dua malekat paluahkon si Lot ampa kaluargani hun huta Sodom ampa Gumora na laho iripaskon. (1 Musa 19:15, 16) Dob marratus tahun, ‘isuruh Naibata do malekat-Ni manutup babah ni singa’ ase ulang iharat singa ai nabi Daniel na idabuhkon hubagas liang ni singa. (Daniel 6:23) Dob ai, sanggah apostel Petrus ipenjarahon, isuruh Jahowa do sada malekat laho paluahkonsi. (Lahoan ni Apostel 12:6-11) Iurupi malekat do homa Jesus sanggah i tanoh on. Sontohni, dobkonsi ididi ia, “malekat do marugas Bani”. (Markus 1:13) Paima iuhum matei Jesus, sada malekat “mampargogohi-Si”.​—Lukas 22:43.

6. (a) Hunja ibotoh hita iurupi malekat do juakjuak ni Naibata sonari on? (b) Sungkun-sungkun aha do na laho ibalosi hita?

⁶ Sonari, malekat-malekat lang be pataridahkon diri bani jolma. Tapi tong do ipakei Naibata sidea laho mangurupi juakjuak-Ni. Bibel mangkatahon, “Marjaga do malekat ni Jahowa inggot bani na mangkabiari-Si, anjaha ipaluah do sidea.” (Psalmen 34:8) Mase maningon iondingi hita? Halani dong munsuh na gogoh na laho manjahati hita. Ise do sidea? Hunja do asalni? Sonaha do sidea manjahati hita? Laho mambotoh balosni, idah hita ma lobei aha na masa dobkonsi si Adam pakon si Hawa itompa Naibata.

7. Aha do na ibahen Sibolis bani buei halak?

⁷ Bani Pasal 3 domma iparlajari hita dong sada malekat na manlawan Naibata janah sihol isombah jolma. Igoran do ia Setan Sibolis. (Pangungkabon 12:9) Marosuh do homa Sibolis ase bahat halak manlawan  Naibata. Ia domma pakahouhon si Hawa pakon buei halak na legan. Hassi pe sonai, totap do adong na setia bani Jahowa, songon si Abel, si Henok, ampa si Noak.​—Heber 11:4, 5, 7.

8. (a) Hunja do asal ni begu-begu? (b) Aha do na ibahen sidea ase maluah hun bah na sumbang?

⁸ Bani masa ni si Noak, dong malekat-malekat na manlawan, manadingkon iananni i surga janah roh hu tanoh on gabe jolma. Mase? Bibel patugahkon, sidea sihol mambuat boru ni jolma gabe parinangonni. (Basa 1 Musa 6:2.) Tapi salah do ai. (Judas 6) Songon malekat-malekat na jahat ai, buei halak ijia gabe jahat janah kejam. Halani ai, iripaskon Jahowa ma sidea marhitei bah na sumbang, tapi ipaluah do juakjuak-Ni na setia. (1 Musa 7:17, 23) Ase maluah hun bah na sumbang ai, mulak ma use malekat-malekat na jahat ai hu surga. Janah igoran ma sidea begu-begu. Marsada ma begu-begu ai pakon Sibolis manlawan Naibata janah Sibolis ma na manrajai sidea.​—Mateus 9:34.

9. (a) Aha na masa bani begu-begu ai sanggah sidea mulak hu surga? (b) Aha na laho iparlajari hita?

⁹ Halani sidea domma manlawan, lang be ijalo Jahowa sidea gabe kaluargani. (2 Petrus 2:4) Seng boi be sidea marubah gabe jolma, tapi totap do sidea “pakahouhon haganup dunia on”. (Pangungkabon 12:9; 1 Johannes 5:19) Parlajari hita ma sonaha do sidea mangoto-otoi atap pakahouhon buei jolma.​—Basa 2 Korint 2:11.

10. Sonaha do begu-begu pakahouhon jolma?

¹⁰ Bahat do tirangkap ni begu-begu laho pakahouhon  jolma. Adong na manungkun begu-begu marhitei datu. Igoran ma on spiritisme. Tapi, Bibel patugahkon hubanta ase daoh humbani horja sisonai. (Galatia 5:19-21) Mase? Songon sada parburu na mamakei tirangkap laho manangkap binatang, sonai ma begu-begu pakahouhon jolma.​—Idah Ambah ni Hatorangan 26.

11. Aha do martondung ai, janah mase hita maningon padaohkon diri humbani ai?

¹¹ Sada humbani tirangkap ni sidea igoran ma ai martondung. Martondung aima manggunahon gogoh ni begu-begu laho mangidah aha na laho masa. Adong na martondung marhitei ramalan bintang atap mangidah suratan ni tangan. Buei do halak na marpingkir lang mahua mangkorjahon sisonai. Tapi sasintongni parohkon hamagouan do ai. Sontohni Bibel patugahkon, sipartondung ai iurupi begu-begu. Bani Lahoan ni Apostel 16:16-18 ipatugah dong sada naboru sipartondung na iurupi tonduy na jahat laho mangkorjahon “partondungonni” ai. Dobkonsi iusir apostel Paulus tonduy na jahat ai, lang boi be naboru ai manondungi.

12. (a) Mase lang boi manungkun bani na matei? (b) Mase juakjuak ni Naibata lang dihut bani hasomalan-hasomalan pasal halak na matei?

¹² Dong use tirangkap ni sidea na legan. Marusaha do begu-begu mambahen hita porsaya, manggoluh ope tonduy ni na matei janah boi mangurupi atap pe manjahati hita. Sontohni, adong na manungkun bani kaluargani na dob matei marhitei datu. Datu ai boi patugahkon pasal na matei ai, janah boi mangusihi sorani. (1 Samuel 28:3-19) Buei do homa adat atap pe hasomalan na ibahen halani porsaya manggoluh ope tonduy ni  na matei ai. Sontohni mandalankon adat bani na matei, mambere galangan, lang modom-modom halani manjaga-jaga na matei, janah mambere tujung. Sanggah halak Kristen lang ra dihut bani acara sisonai, ra do sidea ihasogamkon atap irisai kaluarga pakon hasoman ni sahuta janah lang be ihasomani. Tapi ibotoh halak Kristen do, lang dong be tonduy ni na matei ai. Halani ai lang boi be marsahap bani sidea janah na matei ai lang boi manjahati hita. (Psalmen 115:17) Jadi, ulang manungkun bani na matei atap pe dihut bani hasomalan-hasomalan pasal halak na matei.​—Basa 5 Musa 18:10, 11; Jesaya 8:19.

13. Aha na iahapkon buei halak na ongga mabiar bani begu-begu?

¹³ Begu-begu lang pitah pakahouhon jolma, tapi pabiar-biarhon do homa sidea. Halani ibotoh Sibolis ampa begu-beguni “pondok mando panorangni” sonari, janah na laho iripaskon Naibata do sidea, lambin manringis ma sidea. (Pangungkabon 12:12, 17) Hassi pe sonai, marribu halak na ongga mabiar bani begu-begu, ujungni lang be mabiar bani sidea. Sonaha sidea paluahkon diri humbani begu-begu?

14. Songon halak Kristen bani abad na parlobei, sonaha do hita paluahkon diri humbani begu-begu?

¹⁴ Bibel patugahkon hubanta sonaha do manlawan janah paluahkon diri humbani begu-begu. Sontohni, dong halak Kristen i Epesus na ongga mardatu sanggah lape mananda hasintongan. Sonaha sidea paluahkon diri? Bibel mangkatahon, “Buei do sihorjahon hadatuon hinan, mamboan pustaha-pustahani, lanjar itutung  ma ai i lobei ni halak na mabuei.” (Lahoan ni Apostel 19:19) Halani sihol gabe halak Kristen, itutung sidea ma ganup buku hadatuonni ai. Sonari pe sarupa do. Ganup halak na sihol mangidangi Jahowa, maningon do iambukkon sidea ganup na dong kaitanni bani spiritisme. Dihut ma ai buku-buku, majallah, buku ramalan bintang, film, musik, game, ampa gambar-gambar. Sonai homa aha pe na ipakei gabe panjaga ni badan maningon do iambukkon.​—1 Korint 10:21.

15. Aha ope na porlu ibahen hita ase boi manlawan Sibolis ampa begu-beguni?

¹⁵ Dob piga-piga tahun itutung halak Epesus buku-buku hadatuonni, itongos si Paulus ma surat bani sidea na patugahkon maningon do sidea tongtong “maruntol manlawan . . . tonduy hajahaton”. (Epesus 6:12) Hassi pe domma itutung sidea buku-buku hadatuon ai, tongtong do begu-begu manjahati sidea. Halani ai, aha ope na maningon bahenon ni sidea? Si Paulus mangkatahon, “Jalo nasiam ma gantar haporsayaon in, ai tarintopi nasiam do marhitei in haganup panah apuy ni parjahat in.” (Epesus 6:16) Songon gantar na mangondingi tentara i parporangan, sonai ma haporsayaon boi mangondingi hita. Anggo pos do uhurta Jahowa boi mangondingi hita, boi ma hita manlawan Sibolis ampa begu-beguni.​—Mateus 17:20.

16. Sonaha do ase toguh haporsayaonta bani Jahowa?

¹⁶ Sonaha do ase toguh haporsayaonta bani Jahowa? Basa ma Bibel tiap ari janah marpangunsandeian ma bani Jahowa anggo Ia boi manlinggomi hita. Anggo toguh do haporsayaonta bani Jahowa, Sibolis ampa begu-beguni lang be boi manjahati hita.​—1 Johannes 5:5.

17. Aha ope na porlu ibahen hita ase iondingi humbani begu-begu?

 ¹⁷ Aha ope na porlu ihorjahon halak Kristen i Epesus? Halani sidea tading i tongah-tongah halak na mangkorjahon hadatuon, nini si Paulus ma bani sidea, “Martonggo ma nasiam barang sadihari pe.” (Epesus 6:18) Maningon do ipindo sidea bani Jahowa ase iondingi bai ganup ari. Sonai homa halani hita tading i tongah-tongah ni dunia na mangkorjahon spiritisme, hita pe porlu mangindo parlinggoman humbani Jahowa. Anjaha dilo ma goran-Ni sanggah martonggo. (Basa Podah 18:10.) Ibalosi Jahowa do tonggonta anggo torus hita mangindo hu Bani, ase ipaluah humbani Sibolis.​—Psalmen 145:19; Mateus 6:13.

18, 19. (a) Sonaha do hita boi monang manlawan Sibolis ampa begu-beguni? (b) Bani pasal na mangihut, sungkun-sungkun aha do na laho iulas hita?

¹⁸ Anggo iambukkon hita ganup na dong hait kaitni bani spiritisme janah marpangunsandeian bani Jahowa, hita boi manlawan Sibolis ampa begu-beguni. Lang porlu be hita mabiar bani sidea. (Basa Jakobus 4:7, 8.) Gogohan do Jahowa humbani begu-begu. Bani masa ni si Noak, sidea domma iuhum Jahowa, janah ripaskonon-Ni do holi sidea. (Judas 6) Dingat ma, lang pitah hita na marporang. Igunahon Jahowa do malekat-malekat-Ni manlinggomi hita. (2 Raja-Raja 6:15-17) Pos ma uhurta bani pangurupion ni Jahowa anggo hita boi do monang manlawan Sibolis ampa begu-beguni.​—1 Petrus 5:6, 7; 2 Petrus 2:9.

¹⁹ Hassi pe bahat sitaronon na ibahen Sibolis ampa begu-beguni, tapi mase sidea lape iripaskon Naibata? Balosni sisungkunan ai boi iulas hita bani pasal na mangihut.