1. Engkai maka perlu sipelajari kerna malekat-malekat?

ATE Jahwe gelah sitandai keluargaNa. Malekat-malekat bagin i bas keluarga Dibata. Pustaka si Badia nggelari kalak e ”anak-anak Dibata”. (Kejadin 6:2) Kai kin si ilakokenna? Uga malekat nampati manusia i bas jaman si adi? Janah banci kin kalak e nampati kita gundari?​—Nehen Penjelasen tambahen 8.

2. Janari rehna malekat? Asa kai buena?

² Perlu sieteh janari rehna malekat-malekat e. Kolose 1:16 ngataken maka kenca Jahwe nepa Jesus, ijadikenna ”kerina si nasa lit subuk i Surga bage pe i doni”. Enda termasuk malekat-malekat. Asa kai buena? Nina Pustaka si Badia lit erjuta-juta malekat.​—Masmur 103:20; Ketangkasen 5:11.

3. Kai si ikataken Jop 38:4-7 kerna malekat?

³ Pustaka si Badia pe ngajarken maka Jahwe nepa malekat sope nepa doni. Uga perasan kalak e paksa doni itepa? Nina buku Jop meriah kal ukurna. Kalak enda jadi sada keluarga i bas ngelayani Jahwe.​—Jop 38:4-7.

4. Janari banci sieteh maka malekat ermediate man manusia?

⁴ Malekat-malekat ermediate kal man manusia bage pe nandangi sura-sura Jahwe man doni enda. (Kuan-kuanen 8:30, 31; 1 Petrus 1:11, 12) Paksa Adam ras Hawa mberontak, ceda kal pusuh malekat-malekat. Tapi cedan ka ukurna gundari erkiteken nterem jelma  la patuh man Jahwe. Emaka paksa lit sekalak jelma ertobat janah dungna ngelayani Dibata, malekat-malekat e ermeriah ukur. (Lukas 15:10) Ermediate kal ia nandangi jelma si nembah Dibata. Jahwe nggunaken malekat guna nampati dingen ngelindungi juak-juakNa i doni. (Heber 1:7, 14) Mari sinehen piga-piga contohna.

5. Uga cara malekat nampati juak-juak Dibata i bas jaman si adi?

 ⁵ Jahwe ngutus dua malekat nampati Lut ras keluargana gelah bebas i bas kota Sodom ras Gomora si nandangi ikernepken. (Kejadin 19:15, 16) Ratusen tahun kenca si e, nabi Daniel ibenterken ku lubang singa, tapi la ia cilaka erkiteken ”Dibata nuruh malekat-malekatNa nutupi babah singa-singa e”. (Daniel 6:22) Paksa rasul Petrus ipenjaraken, Jahwe ngutus malekatNa guna mbebasken ia. (Perbahanen Rasul-Rasul 12:6-11) Malekat pe nampati Jesus paksa ia i doni. Contohna, kenca ia iperidiken, ”malekat-malekat reh nampati ia”. (Markus 1:13) Janah sope Jesus ibunuh, sekalak malekat ’mpegegehi ia’.​—Lukas 22:43.

6. (a) Janari banci sieteh malekat nampati umat Dibata denga gundari? (b) Penungkunen kai si man bahasenta bas pelajaren enda?

⁶ Gundari, malekat lanai ncidahken dirina man manusia. Tapi igunaken Dibata denga kalak e nampati umatNa. Pustaka si Badia ngatakenca, ”Malekat [JAHWE] ngkawali kalak si tutus, dingen mulahisa i bas si jahat nari.” (Masmur 34:8) Engkai maka kita perlu ilindungi? Erkiteken lit musuh si megegeh si atena ncilakai kita. Ise kin e? Janari rehna ia? Uga carana ia ncilakai kita? Guna ndatken jabapna, mari sinehen kai si terjadi la ndekah kenca Adam ras Hawa itepa.

7. Kai pengaruh tipun Setan man manusia?

⁷ Enggo sipelajari i bas Pasal 3 lit sekalak malekat si mberontak ngelawan Dibata, janah ia atena si erkuasa. Pustaka si Badia nggelari ia Setan si Iblis. (Ketangkasen 12:9) Ate Setan gelah kalak si deban pe mberontak ngelawan Dibata. Ia nggo berhasil nipu Hawa, janah nggo nterem jelma itipuna. Tapi, piga-piga kalak,  contohna Abil, Enoh, ras Nuah, tetap setia man Jahwe.​—Heber 11:4, 5, 7.

8. (a) Uga maka banci piga-piga malekat jadi begu-begu? (b) Kai si ilakoken begu-begu gelah banci selamat paksa Banjir si Mbelin?

⁸ I bas jaman Nuah, piga-piga malekat mberontak janah nadingken surga guna nggeluh jadi manusia i doni. Engkai? Pustaka si Badia ngatakenca kalak enda merhat ngempoi anak-anak diberu si lit i doni. (Oge Kejadin 6:2.) Tapi situhuna malekat la banci ngelakoken e. (Judas 6) Bali bagi malekat si jahat enda, nterem jelma i bas masa si e dungna jadi korup dingen kejam. Emaka ikernepken Jahwe kalak e alu ngerehken banjir si mbelin. Tapi juak-juakNa si setia iselamatkenNa. (Kejadin 7:17, 23) Gelah banci selamat, malekat-malekat si jahat e mulih ku surga. Pustaka si Badia nggelari kalak e begu-begu. Ipilihna ikut mberontak ras Setan, janah Setan jadi peminpinna.​—Matius 9:34.

9. (a) Kai si terjadi nandangi begu-begu paksa ia mulih ku surga? (b) Kai si man pelajarenta selanjutna?

⁹ Erkiteken begu-begu e mberontak, lanai ialoken Jahwe ia jadi keluargana. (2 Petrus 2:4) Begu-begu lanai banci ngubah dirina jadi manusia, tapi tetap denga ia ”nipu ibelang-belang doni enda”. (Ketangkasen 12:9; 1 Johanes 5:19) Mari sipelajari uga cara kalak enda nipu ntah pe nesatken melala jelma.​—Oge 2 Korinti 2:11.

10. Uga carana begu-begu nipu manusia?

¹⁰ Begu-begu nipu manusia alu erbage cara. Lit kalak ngerana ras begu-begu. Lit si langsung ntah pe erkelangken dukun. Erban hubungen ras begu-begu igelari demonisme ntah pe spiritisme. Tapi, Pustaka si  Badia mpersingeti kita gelah sipedauh dirinta i bas kerina si lit hubungenna ras begu-begu. (Galati 5:19-21) Engkai? Bali bagi sekalak perburu si make siding guna nangkap rubia-rubia, begu-begu pe nggunaken tipun gelah manusia kena sidingna ras ikuasaina.​—Nehen Penjelasen tambahen 26.

11. Kai kin ilmu ramal e, janah ngkai maka la banci silakoken?

¹¹ Salah sada tipunna igelari ilmu ramal. Ilmu ramal enda nggunaken kuasa begu-begu gelah banci meteh wari si pepagi ntah pe si lenga ieteh. Carana alu ngenehen ramalen bintang, ndarami pertanda, ngenehen kartu, nggunaken bola kristal, ntah pe ngenehen retak tan. Melala jelma erpengakap enda la bahaya, tapi enda seh kal bahayana. Contohna, Pustaka si Badia ngatakenca maka kuasa peramal rehna i bas begu-begu nari. I bas Perbahanen Rasul-Rasul 16:16-18 banci sioge kerna sekalak diberu si ”erjinujung” si erbanca ia ngasup ”nuriken kejadin si lenga reh”. Kenca ipedarat Paulus begu e, lanai lit kiningasupenna.

12. (a) Engkai maka bahaya nungkun man kalak mate? (b) Engkai maka juak-juak Dibata la nggit muat bagin i bas adat-istiadat si lit hubungenna ras begu-begu?

¹² Begu-begu nggunaken tipun si deban gelah manusia kena sidingna. Iusahakenna erban kita tek maka banci denga kita ngerana man kalak mate, kalak si nggo mate nggeluh denga bas ingan si deban ras banci denga ngerana ntah pe ncilakai kita. Contohna, sekalak jelma si temanna ntah pe kade-kadena mate, banci saja lawes ku dukun. Janah nina dukun e banci ia ngerana ras kalak mate. Iturikenna ka ciri-ciri jelma si nggo mate e janah iusihna ka sorana. (1 Samuel 28:3-19) Melala adat istiadat i bas acara penguburen ibahan  erpalasken kiniteken maka kalak si nggo mate nggeluh denga i bas ingan si deban. Misalna, acara nggendangi kalak mate, mperingeti wari kematen ntah pe naruhken bunga i bas wari-wari tertentu, erban cibal-cibalen, ntah pe njagai mait segedang berngi. Paksa kalak Kristen la nggit muat bagin i bas adat istiadat enda, kade-kadena ntah pe temanna sada kuta banci saja la senang, nokohi ia, ntah pe lanai nggit erteman ras ia. Tapi ieteh kalak Kristen maka kalak mate lanai nggeluh bas ingan si deban. Emaka lanai kita banci ngerana ras ia, janah ia pe la banci ncilakai kita. (Masmur 115:17) Metengetlah, ula pernah cubaken ngerana ras kalak mate ntah pe begu-begu bage pe muat bagin i bas adat istiadat si lit hubungenna ras begu-begu.​—Oge Ulangen 18:10, 11; Jesaya 8:19.

13. Kai si banci igejapken melala jelma si pernah mbiar man begu-begu?

¹³ Begu-begu pe pebiar-biarna manusia. Setan ras begu-beguna meteh maka ”kentisik nari ngenca kesempaten lit i bas ia” sope ikernepken Dibata bas doni enda nari, emaka reh kejamna dingen merawa kal ia gundari. (Ketangkasen 12:12, 17) Amin bage, ribun kalak si pernah mbiar man begu-begu, gundari lanai ia mbiar. Engkai maka banci bage?

14. Bali bagi kalak Kristen bas abad si pemena, uga kita banci bebas i bas begu-begu nari?

¹⁴ Ipebetehken Pustaka si Badia uga carana ngelawan begu-begu bage pe cara gelah bebas bas ia nari. Contohna, piga-piga kalak i kota Epesus lit hubungenna ras begu-begu sope erlajar kebenaren.  Uga kalak enda banci bebas? Pustaka si Badia ngatakenca, ”Nterem kalak si lit kinigurunna maba Pustakana jenari itutungna i lebe-lebe jelma si nterem.” (Perbahanen Rasul-Rasul 19:19) Erkiteken jadi kalak Kristen atena, itutungna kerina buku si lit hubungenna ras ilmu gaib. Gundari, penting gelah kerina si nggit ngelayani Jahwe ngambekken barang-barang si lit hubungenna ras begu-begu, sihir ntah pe ilmu gaib. Contohna buku, majalah, ramalen bintang, film, musik, permainen, bage pe gambar-gambar si tempa-tempa la bahaya ntah pe si menarik siakap. Bage ka pe, jimat si ipake kalak guna mpedauh dirina i bas bahaya nari.​—1 Korinti 10:21.

15. Kai nari si perlu silakoken guna ngelawan Setan ras begu-beguna?

¹⁵ Piga–piga tahun kenca kalak Epesus nutung buku-buku sihirna, isuratken rasul Paulus maka kalak enda arus denga erjuang dingen erusaha guna ’ngelawan kesah si jahat’. (Epesus 6:12) Jelaslah, amin gia buku e nggo itutung, tapi icubaken begu-begu denga ncilakai kalak e. Emaka kai nari si perlu ilakokenna? Nina Paulus, ”Bahanlah kinitekenndu jadi ampang-ampangndu katawari pe. Alu e banci inimpetindu kerina anak panah si gara si ipanahken si Jahat.” (Epesus 6:16) Bali bagi ampang-ampang ngelindungi tentera i bas perang, kinitekenta pe banci ngelindungi kita. Adi tuhu-tuhu kita tek Jahwe banci ngelindungi kita, kita pe ngasup ngelawan Setan ras begu-beguna.​—Matius 17:20.

16. Uga carana gelah kinitekenta man Jahwe reh paguhna?

¹⁶ Uga carana gelah kinitekenta man Jahwe reh paguhna? Perlu sioge Pustaka si Badia tiap wari janah  erpengendes man Jahwe guna ngelindungi kita. Adi paguh kinitekenta man Jahwe, Setan ras begu-beguna la banci ncilakai kita.​—1 Johanes 5:5.

17. Kai nari si banci ngelindungi kita i bas begu-begu nari?

¹⁷ Kai nari si perlu ilakoken kalak Kristen i Epesus? Kalak e tading i kota si dem alu pengaruh begu-begu. Emaka nina Paulus, ”Erjaga-jaga dingen tutuslah kam i bas ertoto.” (Epesus 6:18) Kalak enda arus terus mindo perlindungen Jahwe. Adi kita uga? Kita pe nggeluh i bas doni si dem alu pengaruh begu-begu. Emaka perlu ka sipindo perlindungen Jahwe janah nggunaken gelarNa paksa ertoto. (Oge Kuan-kuanen 18:10.) Adi terus sitotoken gelah Jahwe mbebasken kita i bas Setan nari, pasti jabapNa pertotonta.​—Masmur 145:19; Matius 6:13.

18, 19. (a) Uga carana gelah banci kita menang ngelawan Setan ras begu-beguna? (b) Penungkunen kai si ijabap i bas pasal selanjutna?

¹⁸ Adi siambekken kerina si lit hubungenna ras begu-begu janah erpengendes man Jahwe gelah ikawalina kita, banci silawan Setan ras begu-beguna. La perlu kita mbiar man bana. (Oge Jakup 4:7, 8.) Ndauh gegehen Jahwe asangken begu-begu. Jahwe ngukum kalak e sanga jaman Nuah, janah i bas wari si pepagi ikernepkenNa ia kerina. (Judas 6) Ingetlah, kita la sisada ngelawan Setan. Jahwe nuruh malekat-malekatNa guna ngelindungi kita. (2 Raja-Raja 6:15-17) Kita tek maka alu penampat Jahwe kita banci menang i bas ngelawan Setan ras begu-beguna.​—1 Petrus 5:6, 7; 2 Petrus 2:9.

¹⁹ Tapi, adi Setan ras begu-beguna si erbahan melala kiniseran, ngkai maka la mis ikernepken Dibata ia? Jabapna lit i bas pasal selanjutna.