1. Akoz nou devret aprann konn bann lanz?

ZEOVA i anvi ki nou aprann konn son fanmir. Bann lanz i form parti fanmir Bondye. Dan Labib zot ganny apele “bann garson Bondye.” (Zob 38:7) Ki bann lanz i fer? Ki mannyer zot in ed dimoun dan lepase? Eski zot kapab ed nou ozordi?​—Vwar Lezot lenformasyon nimero 8.

2. Kote bann lanz i sorti? Konbyen lanz Bondye ti kree?

² Nou bezwen konnen kote bann lanz i sorti. Kolosyen 1:16 i dir nou ki apre ki Zeova ti kree Zezi, “tou lezot keksoz dan lesyel e lo later [ti] ganny kree.” Sa i enkli bann lanz. Konbyen lanz Bondye ti kree? Labib i dir ki i annan plizyer santenn milyon lanz.​—Psonm 103:20; Revelasyon 5:11.

3. Ki Zob 38:4-7 i dir nou konsernan bann lanz?

³ Nou osi lir dan Labib ki Zeova ti kree bann lanz avan ki i ti kree later. Ki mannyer zot ti santi ler zot ti vwar later? Liv Zob dan Labib i dir nou ki zot ti dan lazwa. Zot ti en fanmir pros ki ti pe servi Zeova ansanm.​—Zob 38:4-7.

4. Ki mannyer nou konnen ki bann lanz i enterese avek bann imen?

⁴ Bann lanz in toultan enterese avek bann imen e avek plan Zeova pour bann imen ek later. (Proverb 8:30, 31, NWT; 1 Pyer 1:11, 12) I bezwen ki zot ti vreman tris ler zot ti vwar Adan ek Ev rebele. Ozordi i  bezwen ki zot pli tris ankor ler zot vwar ki laplipar imen in dezobei Zeova. Me bann lanz i kontan ler en dimoun i repantir e retourn ver Bondye. (Lik 15:10) Zot vreman enterese avek bann dimoun ki servi Bondye. Zeova i servi bann lanz pour ed e protez son bann serviter lo later. (Ebre 1:7, 14) Annou vwar detrwa legzanp kot sa ti arive.

5. Ki mannyer bann lanz ti ed bann serviter Bondye dan lepase?

 ⁵ Zeova ti anvoy de lanz pour ed Lot ek son fanmir sove ler lavil Sodonm ek Gomor ti pe al ganny detrir. (Zenez 19:15, 16) Plizyer santenn lannen pli tar, profet Danyel ti ganny zete dan en trou lyon, me bann lyon pa ti devor li parski “Bondye [ti] anvoy son lanz pour ferm lagel bann lyon.” (Danyel 6:22) Pli tar, ler zapot Pyer ti dan prizon, Zeova ti anvoy en lanz pour liber li. (Akt 12:6-11) Bann lanz ti osi ed Zezi ler i ti lo later. Par egzanp, ‘bann lanz ti servi li’ apre ki i ti’n batize. (Mark 1:13) Zis avan ki Zezi ti ganny touye, en lanz “ti aparet avek li e fortifye li.”​—Lik 22:43.

6. (a) Ki mannyer nou konnen ki bann lanz i ed pep Bondye ozordi? (b) Ki kestyon nou pou reponn aprezan?

⁶ Ozordi bann lanz i nepli aparet avek bann imen. Me Bondye i ankor pe servi bann lanz pour ed son bann serviter. Labib i dir: “Lanz [“Zeova,” NWT] i kanp otour sa bann ki annan respe pour [li]. I delivre zot dan tou danze.” (Psonm 34:7) Akoz nou bezwen ganny proteze? Parski nou annan bann lennmi pwisan ki anvi fer nou ditor. Lekel sa bann lennmi? Kote zot sorti? Ki mannyer zot pe esey fer nou ditor? Pour reponn sa bann kestyon, annou vwar ki ti arive pa bokou letan apre ki Adan ek Ev ti’n ganny kree.

7. Ki laplipar dimoun in fer akoz Satan in anbet zot?

⁷ Dan Sapit 3, nou ti aprann ki en lanz ti rebel kont Bondye e ki i ti anvi diriz lezot. Labib i apel li Satan ouswa Dyab. (Revelasyon 12:9) Satan ti osi anvi ki lezot i rebel kont Bondye. I ti anbet Ev pour ki li osi i rebel kont Bondye e depi sa letan, i’n anbet laplipar  imen pour fer parey. Par kont, i annan serten dimoun parey Abel, Enok ek Noe ki ti reste fidel avek Zeova.​—Ebre 11:4, 5, 7.

8. (a) Ki mannyer serten lanz ti vin bann demon? (b) Ki bann demon ti fer pour zot pa ganny detrir?

⁸ Dan letan Noe, serten lanz ti rebele e kit zot landrwa reste dan lesyel pour viv konman bann imen lo later. Akoz? Labib i dir nou ki zot ti anvi ganny bann madanm. (Lir Zenez 6:2.) Me i ti mal pour bann lanz fer sa. (Zid 6) Parey sa bann move lanz, laplipar dimoun sa letan ti vin move e vyolan. Apre sa, Zeova ti deside detri bann move dimoun par fer lapli tonbe ziska ki later antye ti kouver avek delo. Me i ti sov son bann serviter fidel. (Zenez 7:17, 23) Bann move lanz ti retourn dan lesyel pour zot pa mor. Labib i apel sa bann move lanz bann demon. Zot ti pran kote avek Satan, rebel kont Bondye e Satan ti vin zot sef.​—Matye 9:34.

9. (a) Ki ti arive avek bann demon ler zot ti retourn dan lesyel? (b) Ki nou pou diskite aprezan?

⁹ Ler sa bann demon ti retourn dan lesyel, Zeova ti nepli aksepte zot dan son fanmir parski zot ti’n rebel kont li. (2 Pyer 2:4) Bann demon i nepli kapab vin bann imen, me zot ankor “pe anbet dimoun lo later antye.” (Revelasyon 12:9; 1 Zan 5:19) Annou vwar ki mannyer zot kapab anbet oubyen trik bokou dimoun.​—Lir 2 Korentyen 2:11.

10. Ki mannyer bann demon i trik dimoun?

¹⁰ Bann demon i anbet dimoun dan plizyer fason. Dimoun i swa kominik avek bann demon direkteman ouswa atraver en lot dimoun tel parey en bonnonm  dibwa. Tousala i bann pratik demonyak oubyen grigri. Me Labib i demann nou pour reste lwen avek okenn keksoz ki annan pour fer avek bann demon. (Galat 5:19-21) Akoz? Parski bann demon i servi bann trik pour anbet e kontrol dimoun, zis parey en saser i servi en latrap pour atrap bann zannimo.​—Vwar Lezot lenformasyon nimero 26.

11. Ki mannyer dimoun i devinen oubyen predir lavenir e akoz sa i mal?

¹¹ En trik ki bann demon i servi i devinen oubyen predir lavenir. Sa i ler en dimoun i servi pouvwar bann demon pour esey rode ki pou arive a lavenir oubyen pour rod en lenformasyon ki zot pa konnen. En dimoun i kapab esey fer sa par get oroskop, enterpret bann siny, bat kart, get dan boul kristal oubyen lir dan lanmen. Bokou dimoun i krwar ki napa nanryen mal avek sa. Me o kontrer, sa bann keksoz i vreman danzere. Par egzanp, Labib i montre ki bann dimoun ki predir lavenir i ganny zot pouvwar avek bann demon. Akt 16:16-18 i koz lo en fiy ki ti “predir lavenir” akoz i ti annan “en demon ki ti fer li devinen.” Apre ki zapot Pol ti tir sa demon, sa fiy ti nepli kapab predir lavenir.

12. (a) Akoz i danzere pour esey kominik avek bann dimoun mor? (b) Akoz bann serviter Bondye pa zanmen partisip dan bann pratik demonyak?

¹² Bann demon i servi en lot trik pour anbet dimoun. Zot esey fer nou krwar ki nou kapab koz avek bann dimoun mor, ki zot ankor vivan kekpar e ki zot kapab kominik avek nou ouswa fer nou ditor. Par egzanp, en dimoun ki son zanmi oubyen fanmir i mor i kapab al kot en bonnonm dibwa pour koz avek li. Petet sa bonnonm dibwa pou dir en keksoz enteresan lo sa  dimoun ki’n mor e menm imit son lavwa. (1 Samyel 28:3-19) I annan bokou koutim lanterman ki baze lo sa krwayans ki bann dimoun mor i ankor vivan kekpar. Sa i kapab enkli bann selebrasyon ek lanniverser lanterman, sakrifis pour bann mor, seremoni tradisyonnel pour bann vev ek vef ouswa serten koutim ki annan pour fer avek vey lekor mor. Ler bann Kretyen i refize pran par dan sa bann koutim, petet zot fanmir ouswa vwazen i kapab kritik zot, maltret zot ouswa kareman refize annan okenn keksoz pour fer avek zot. Me bann Kretyen i konnen ki bann dimoun mor pa vivan kekpar. I enposib pour kominik avek zot e zot pa kapab fer nou ditor. (Psonm 115:17) Fer byen atansyon. Pa zanmen esey kominik avek bann dimoun mor ouswa bann demon e pa zanmen pran par dan bann pratik demonyak.​—Lir Deterononm 18:10, 11; Izai 8:19.

13. Ki bokou dimoun ki ti per bann demon in arive fer?

¹³ Bann demon pa zis anbet dimoun me zot osi fer zot per. Ozordi, Satan ek son bann demon i konnen ki zot annan zis “en ptigin letan” avan ki Bondye i tir zot lo later, alor zot pli vyolan e agresif ki avan. (Revelasyon 12:12, 17) Par kont, plizyer milye dimoun ki ti abitye per bann demon i nepli per zot. Akoz zot nepli per bann demon konmela?

14. Ki mannyer nou kapab sorti anba lenfliyans bann demon parey bann Kretyen dan premye syek?

¹⁴ Labib i dir nou ki mannyer pour reziste bann demon e sorti anba zot lenfliyans. Par egzanp, serten  dan lavil Efez ti abitye kominik avek bann demon avan ki zot ti aprann laverite. Ki mannyer zot ti sorti anba zot lenfliyans? Labib i dir: “En bon pe dimoun ki ti fer mazik ti anmas zot liv e bril zot devan tou dimoun.” (Akt 19:19) Zot ti detri tou zot liv ki ti annan pour fer avek mazik akoz zot ti anvi vin Kretyen. Nou osi nou bezwen fer parey ozordi. Tou dimoun ki anvi servi Zeova i bezwen debaras zot avek tou sa ki annan pour fer avek demon. Sa i enkli bann liv, magazin, oroskop, film, lanmizik, zwe e menm bann poster ki donn lenpresyon ki bann demon ek mazik i gou ouswa ki napa nanryen mal avek. I osi enkli bann keksoz ki dimoun i mete pour protez zot lekor kont sa ki mal.​—1 Korentyen 10:21.

15. Kwa ankor ki nou bezwen fer pour reziste Satan ek bann demon?

¹⁵ Detrwa lannen apre ki bann Kretyen Efez ti’n bril zot bann liv mazik, zapot Pol ti ekri ki zot ti ankor bezwen “lalit” e lager “avek bann demon.” (Efezyen 6:12) Wi, menm si zot ti’n fini bril zot liv, bann demon ti ankor pe esey fer zot ditor. Alor, kwa ankor ki zot ti bezwen fer? Pol ti dir zot: “Pran sa gran boukliye lafwa pour ki zot kapab tenny tou bann dart alimen sorti kot sa enn move.” (Efezyen 6:16) Zis parey en boukliye i protez en solda dan lager, nou lafwa i kapab protez nou. Si nou annan konfyans total ki Zeova i kapab protez nou, nou pou kapab reziste Satan ek bann demon.​—Matye 17:20.

16. Ki mannyer nou kapab fer nou lafwa dan Zeova vin pli solid?

¹⁶ Ki mannyer nou kapab fer nou lafwa dan Zeova vin pli solid? Nou bezwen lir Labib toulezour e  aprann depan lo li pour protez nou. Si nou annan konfyans total dan Zeova, Satan ek bann demon pa pou kapab fer nou ditor.​—1 Zan 5:5.

17. Kwa ankor ki pou protez nou kont bann demon?

¹⁷ Kwa ankor ki bann Kretyen Efez ti bezwen fer? Zot ti viv dan en lavil kot bann pratik demonyak ti popiler. Alor Pol ti dir zot: “Kontinyen priye dan tou lokazyon.” (Efezyen 6:18) Zot ti bezwen demann Zeova pour toultan protez zot. Me nou? Nou osi nou viv dan en lemonn ki ranpli avek bann pratik demonyak. Alor nou osi nou bezwen demann Zeova pour protez nou e nou bezwen servi son non ler nou priye. (Lir Proverb 18:10.) Si nou kontinyen demann Zeova pour sov nou kont Satan, Zeova pou reponn nou lapriyer.​—Psonm 145:19; Matye 6:13.

18, 19. (a) Ki mannyer nou kapab ranport laviktwar lo Satan ek bann demon? (b) Ki kestyon nou pou reponn dan Sapit 11?

¹⁸ Si nou debaras nou avek tou keksoz ki annan pour fer avek demon e depan lo Zeova pour protez nou, nou kapab reziste Satan ek bann demon. Nou pa bezwen per zot. (Lir Zak 4:7, 8.) Zeova i bokou pli for ki bann demon. I ti pini zot dan letan Noe e a lavenir i pou detri zot. (Zid 6) Rapel ki nou pa tousel dan sa lager. Zeova pe servi son bann lanz pour protez nou. (2 Lerwa 6:15-17) Nou kapab asire ki avek led Zeova, nou kapab ranport laviktwar lo Satan ek bann demon.​—1 Pyer 5:6, 7; 2 Pyer 2:9.

¹⁹ Me si Satan ek bann demon pe telman fer en kantite dimoun soufer, akoz Bondye pa ankor detri zot? Nou pou reponn sa kestyon dan Sapit 11.