1. ¿Kʼãrẽa biʼia kʼawuaibara angelera ʉ̃rʉra?

ANGELERÃRA Daizeze warrara, Daizeze Bedʼeabara mawũã jarabʉ (Job 38:7). Maʉ̃ba Jeowabara kãgabʉ dayirãba ũdukʼawuadamarẽã yi wũãwũãrata. Mamina, ¿kʼãrẽta obʉ maʉ̃ra angelerãra? ¿Maʉ̃ra angelerabara sãwũã kʼarebasi nabema ẽbẽrarãra? ¿Idi ewadebida kʼarebaseabʉka angelerabara? (Akʉra nota 8ta).

2. (1) ¿Kʼaiba parãna angelerãra? (2) ¿Angelerãra sõbebʉ?

² Nããra kʼawuaibara kʼaiba parãsita maʉ̃ra angelerãra. Colosenses 1:16de jarabʉ, nããra Jeowaba parãsita Jesuta maʉ̃are «nekʼãrẽ jõma osi, bajãta, naʉ̃ ẽjũãta». Maʉ̃are parãsi angelerata. ¿Sõbe angelera osi Jeowabara? Daizeze Bedʼeabara jarabʉ mejãcha parãsi angelerãra (Salmo 103:20; Apocalipsis 5:11).

3. ¿Kʼãrẽta jarabʉ Job 38:4-7 bayeda angelera ʉ̃rʉ?

³ Adewara Daizeze Bedʼeabara jarabʉ, Daizezebara parãsita angelerãra naʉ̃ drʉa parãi naweda. ¿Kʼãrẽaba sobiasidaba angelerãra Jeowaba naʉ̃ drʉa parãsidera? Job librobara jarabʉ ãyira mejãcha sobiasidata, maʉ̃ra angelerãra jõma ãbapanasi baera akʉza Jeowaba jarabʉta opanasi (Job 38:4-7).

4. ¿Sãwũã kʼawuapanʉ angelerabara kʼarebakĩrãpanʉta ẽbẽrarã?

⁴ Angelerabara kʼarebabʉ ẽbẽrarã akʉza kãgapanʉ Jeowaba nekʼãrẽ bia weita naʉ̃ drʉa ʉ̃rʉ (Proverbios 8:30, 31; 1 Pedro 1:11, 12). Angelerãra sobiada ẽ basi Adan Ebaʉ̃meba ũrĩna ẽ baside Daizeze bedʼeata.  Idibasidu sobia ẽ panʉ Daizeze bedʼea ũrĩna ẽ baera. Mamina ãyira sobiabʉ ẽbẽra abaʉba kayirua obadata amaebʉrʉdera (Lucas 15:10). Angelerabara mejãcha kʼarebakĩrã Daizeze odepanʉrãra akʉza Daizezebara angelta zokʼabʉ, iyi kʼaidubemara kʼarebaita akʉza neida berabarida ẽ marẽã (Hebreos 1:7, 14). Maʉ̃nebemata yiza aba akʉdaya.

5. ¿Sãwũã kʼarebasida angelerabara nabema mebẽrãra?

 ⁵ Jeowabara zokʼabʉesi angel ũme Lota, yi mebẽrãbawara kʼarebamarẽã ẽdrʉita pʉwʉrʉ Sodomaneba akʉza Gomorradeba (Génesis 19:15, 16). Mawũã berabarida tẽã, propeta Danielra zobea zromane ibalbʉesida leon mejãcha bʉmae. Mamina maʉ̃ra leonrabara Danielra neida oda ẽ basi «angelta aba zokʼabʉesi, leonba ko ẽ marẽã» (Daniel 6:22). Akʉza nabema siglodera Daizezebara zokʼa bʉesi angel aba Pedro karseldeba ẽdrʉmarẽã (Hechos 12:6-11). Adewara Jesu nama udabasidera angelerabara kʼarebasida akʉza iyi buru kʼoesidebida (Marcos 1:13). Adewara Jesu beina angeleraba zareadiasida (Lucas 22:43).

6. (1) ¿Sãwũã kʼawuapanʉ angelerabara kʼarebabʉta Daizeze ode panʉrata? (2) ¿Kʼãrẽ bedʼea widibʉta panʉnai?

⁶ Idi ewadera angelra ẽbẽrarã yi ũdubi ẽ. Mamina Daizezebara iyi kʼaidupanʉra kʼarebabʉ maʉ̃raneba. ¿Sãwũã kʼawuapanʉ? Daizeze Bedʼeaba jarabʉ: «Jeowa angelera bʉ yi wawiabʉ audu akʉza ẽdrʉbibʉ» (Salmo 34:7). Dayirã jõmaʉ̃ba nesidapanʉ kʼarebata, nejʉrata erpanʉ baera dayirã zʉbʉria okĩrãbʉta. ¿Kʼairape maʉ̃ra nejʉrarãra? ¿Samaʉ̃ba zesi maʉ̃ra? ¿Sãwũã zʉbʉria okĩrãbʉ dayirãra? Maʉ̃ bia kʼawuaita, akʉdaibara kʼãrẽta sãwũã berabarisita Adan Ebaʉ̃me ãyi parãna tẽã.

7. ¿Sãwũã sewa zebʉrʉ Diarʉbara?

⁷ Kapitulo 3de kʼawuasida, angel aba Daizeze bedʼea ũrĩ ẽ basita akʉza krĩchasi wuabemara zokʼaita. Maʉ̃ra Daizeze Bedʼeabara jarabʉ Diaruta iyabaʉta Satana (Ãtomĩa) (Apocalipsis 12:9). Diarubara kãgabasi iya oda kĩrãkʼa ẽbẽrarã jõmaʉ̃ba ũrĩna ẽ marẽã Daizeze bedʼeara. Maʉ̃ kʼarea sewasi Ebata akʉza mamaʉ̃ba  ʉ̃ta ẽbẽra jõmaʉ̃ta idibasidu sewanʉmʉ. Mamina mawũãsidu ʉ̃kʉrʉ ẽbẽrarã kʼẽrẽpapanasi Jeowaʉ̃me maʉ̃rãra Abel, Enok, Noe basi (Hebreos 11:4, 5, 7).

8. (1) ¿Ʉ̃kʉrʉ angelerãra sãwũã angel kayiruabasi? (2) ¿Kʼãrẽta osi angelera kayiruara kue zromane bei ẽ baita?

⁸ Noe ewaridera, ʉ̃kʉrʉ angelerabara okĩrãna ẽ basi Daizezeba kãgabʉta, maʉ̃ kʼarea nama egoro eda zesida dayi ẽbẽrane. ¿Kʼãrẽa zesidaba? Daizeze Bedʼeabara jarabʉ ãyira mia kʼãĩkĩrãba zesidata (akʉra Génesis 6:2). Mamina mawũã oda ẽ baibarabasi (Judas 6). Maʉ̃ ewaridera abarika angelera kayirua kĩrãkʼa opanasi ẽbẽrarãbida. Maʉ̃ kʼarea Jeowabara kue zromata zebisi ẽbẽra kayiruarãra makenaita, naʉ̃ drʉa zʉgʉita. Akʉza kʼarebasi ẽbẽra iyiʉ̃me kʼẽrẽpabadarata (Génesis 7:17, 23). Angelera kayiruara kue zromane bei ẽ baya ʉ̃ta wãsida. Maʉ̃rata Daizeze Bedʼeabara trʉ̃gabʉ, angelera kayiruata (Demonio). Ãyira Diaru kʼaidu wãsida, maʉ̃ʼa yi zokʼabisida (Mateo 9:34).

9. (1) ¿Kʼãrẽta sãwũã berabarisi angelera ʉ̃ta wãsidera? (2) ¿Kʼãrẽ ʉ̃rʉ kʼawudai atiara?

⁹ Maʉ̃ra angelera ʉ̃ta wãsidera, Jeowabara iduaribi ẽ basi iyibawara bʼaita (2 Pedro 2:4). Akʉza maʉ̃ra angelerãra wuara ẽbẽra kakuade zebe ẽ basi, mamina dayirãba ũdu ẽ mina, ãyara «naʉ̃ drʉa jõmaʉ̃nẽbemata sewa erbʉ» (Apocalipsis 12:9; 1 Juan 5:19). Atia kʼawuadaya sãwũã sewa erbʉta ẽbẽrarãra (akʉra 2 Corintios 2:11).

10. ¿Sãwũã sewabʉ angel kayiruarabara ẽbẽrarã?

¹⁰ Kĩrãtana obʉ angel kayiruarabara ẽbẽrarã sewaita. Ãya sewabʉ ẽbẽra jaibananeba akʉza ẽbẽra beidaʉ̃me bedʼeabibʉdeba. Maʉ̃ mawũã obʉ ẽbẽrarã jarapanʉ «jaidebema ĩjãbʉta». Daizezebara kãgabʉ maʉ̃ra  angelera kayiruadeba jĩgabamarẽã akʉza oda ẽ marẽã maʉ̃raba obʉta (Gálatas 5:19-21). Ẽbẽra miwãmiaba kʼawuabʉ kĩrãkʼa sãwũã nedʉwʉrʉ beaita, abarika angele kayiruarabida, kʼawuabʉ sãwũã sewaita ẽbẽrarã (akʉra nota 26de).

11. (1) ¿Kʼãrẽ ẽbẽra nekʼãrẽ oda aripe jaradiabarira? (2) ¿Kʼãrẽa oẽ baibara angelera kayiruaba obʉra?

¹¹ Adewara angel kayiruarabara sewabʉ, ẽbẽra nekʼãrẽ oda aripe jaradiabarideba, maʉ̃ ẽbẽrabara angelera kayirua kʼarebadeba kʼawuabʉ kʼãrẽta berabaribʉta akʉza jarabʉ ʉ̃ra kʼãrẽta sãwũã berabarita. Maʉ̃ba ʉ̃kʉrʉ ẽbẽrabara kʼawuabʉ, tazade kape dobʉrʉ tẽã, akʉbʉ kʼãrẽ sãwũã berabarita, mawũã ẽ bʉrʉ dayi juwa jãã akʉbʉrʉde kʼawuabʉ sãwũã berabarita akʉza ĩjãpanʉ jara ʉ̃rʉ (agüeros) adewara kʼawuapanʉ bedʼeade nekayirua oita. Ẽbẽra mejãchaʉba krĩchapanʉ maʉ̃ kʼawuaira kayirua ẽãta, mamina wãrĩnubaira maʉ̃ oira jipa kayirua. Akʉza Daizeze Bedʼeabara jarabʉ angel kayiruabara kʼarebabʉta maʉ̃ oira. Daizeze Bedʼeade Hechos 16:16-18 bayeda jarabʉ: «Jaidʼeba ne arimaẽ jarabarita» maʉ̃ wẽrãbara nekʼãrẽ ʉ̃ra zeita aripe jarabasi, mamina Pabloba angel kayirua ãĩ jʉretasidera maʉ̃ wẽrãra zarea neẽbasi nekʼãrẽ ʉ̃ra zei aripe jaraita.

12. (1) ¿Kʼãrẽa yibia ẽ beidaʉ̃me bedʼeaira? (2) ¿Kʼãrẽa kristianorãra bedʼeabe ẽ angele kayiruaʉ̃mera?

¹² Akʉza angelera kayiruarabara sewabʉ dayirãba ĩjãmarẽã beidaʉ̃me bedʼeaseabʉta. Ãyara kãgabʉ ẽbẽrarãba ĩjãmarẽã beida tẽãra jaurede zokʼai bidata akʉza ẽbẽrabawara bedʼeaseabʉta, kʼarebaseabʉta adewara neida obari dayirãra. Akʉza dayirã mebẽrã, neũdukʼawua beibʉrʉdera maʉ̃rabawara bedʼeaseabʉta, maʉ̃ba jʉrʉseabʉ ẽbẽra beidaʉ̃me bedʼeaita. Mamina maʉ̃bara maʉ̃ ẽbẽra beida kĩrãkʼa bedʼeabibʉ.  Maʉ̃ba krĩchabiseabʉ wãrĩnu beidarãra bedʼeaseabʉta, mamina wãrĩnubaira angelera kayiruata bedʼeabʉ (1 Samuel 28:3-19). Ẽbẽra mejãchaʉba krĩchapanʉ beida tẽãra zokʼai bidata dayi jaurera akʉza ewaradebidata. Maʉ̃ba poagaza beida kĩrãbepanʉ, edepanʉ nekʼãrẽta beidama, adewara zokʼaiduanʉ ẽbẽra beida koabarabʉdera akʉza ẽbẽra beida tẽã egoro zobeade wagaita ededade mõgarata kʼaidu bʉrebari bʉepanʉ. Mamina maʉ̃ beloriode mawũã oira angelera kayiruarane. Maʉ̃ kʼarea kristiano abaʉta yi wuabemarade kĩrãkʼa oda ẽ bʉrʉ, yi mebẽrãta akʉza wuabemarata kĩrʉseabʉ, i kayirua jaraseabʉ, mawũã ẽ bʉrʉ bedʼea ẽ bayi bʉme. Mamina kristianorabara kʼawuabʉ beida tẽãra zokʼai bida ẽãta akʉza beidaʉ̃mera bedʼeabe ẽãta, adewara beidabara neida oẽ dayirãra (Salmo 115:17). Maʉ̃ kʼarea jʉra kʼawuabara. Beidaʉ̃me bedʼeaita krĩcharãra maʉ̃ta neẽbʉrʉ angel kayiruaʉ̃me bedʼeabaya akʉza ãyiʉ̃me bedʼeaita krĩcha ẽ baibara (akʉra Deuteronomio 18:10, 11; Isaías 8:19).

13. ¿Kʼãrẽta obʉda ẽbẽrarã angelera kayirua kʼarea perabadara?

¹³ Angel kayiruarabara sewabʉ daʉcha, daʉperabʉ. Diarubara akʉza iyi kʼaidubemabawaraʉba kʼawuapanʉ, ewari bio erbʉ ẽãta, kayirua oita naʉ̃ drʉade, Daizezeba aranʉ makenañi jõma. Maʉ̃ kʼarea angel kayiruara mejãcha kĩrʉbarabʉ akʉza audre kayiruata obarabʉ (Apocalipsis 12:12, 17). Maʉ̃ba ʉ̃kʉrʉ ẽbẽra nabemara mejãcha perabasi, mamina idira perada ẽ angelera kayiruara kʼareara. ¿Kʼãrẽta osida perada ẽ baita?

14. Nabema kristianoraba oda kĩrãkʼa, ¿dayirãbida kʼãrẽta oseapanʉ?

¹⁴ Daizeze Bedʼeabara jarabʉ sãwũã ẽdrʉseabʉta  angel kayiruadebara. Bari jaraita, nabema siglodera, ʉ̃kʉrʉ ẽbẽra Éfeso pʉwʉrʉdebemara bedʼeabasi angel kayiruabawara, ãyi kristiano bai naweda. Mamina ¿sãwũã ẽdrʉsi maʉ̃nebara? Daizeze Bedʼeaba jarabʉ: «Jaidʼebema kʼaudʼa bʼeadʼabidʼa libro jaidʼebemata wekuadʼape bakuasidʼa jõmaʉ̃ kĩrãbita» (Hechos 19:19). Ãyi jõmaʉ̃ta kristiano bakĩrãbasibaera, maʉ̃ librora jõma babʉesida jai ʉ̃rʉ bedʼeabadara. Idibida dayirãbara abarika oibara. Dayirãta Jeowa neũdukʼawua bakĩrãbʉbʉrʉ, jõma babʉeibara angelera kayiruadeba zebʉra. Maʉ̃ne edabʉ librota, naipeta, pelikulata, jai trãbita akʉza jai barrata, jõma jai ʉ̃rʉ bedʼeabʉra balbʉeibara akʉza idubʉibara nekʼãrẽ jaiba wara ẽ marẽã jʉ̃bʉta (1 Corintios 10:21).

15. ¿Kʼãrẽta oibara Diaruba akʉza angelera kayiruaraba neida oda ẽ marẽãra?

¹⁵ Poaga bio berabarisi ẽbẽra Éfesodebemaba libro jaidebema babʉedata, maʉ̃ tẽã Pabloba bʉsi «awuarabʉrʉ jai kayirua naʉ̃ drʉadebʉbawara yõpanʉa» (Efesios 6:12). Libro babʉesidamina, angel kayiruarabara neida okĩrãpanasi maʉ̃ra kristianorãra. Maʉ̃ kʼarea ¿Ãyara kʼãrẽta oibarabasi? Maʉ̃ra kristianora Diaruʉ̃me yõnamarẽã, Pabloba jarasi: «Erbara joudrʉbari (escudo) zroma ĩjãinebemata» (Efesios 6:16). Abarika gorogoroba juwade joudrʉbari erbʉba iyi kʼarebabʉ kĩrãkʼa, dayirãba ĩjãbʉba kʼarebaseabʉ angelera kayiruaraba neida oda ẽ marẽã. Dayirãba wãrĩnu soiduba Jeowata ĩjãpanʉbʉrʉ iya kʼarebayi Diaruba akʉza angelera kayiruaraba neida oda ẽ marẽã (Mateo 17:20).

16. ¿Kʼãrẽta oibara Jeowa audre ĩjãita?

¹⁶ ¿Kʼãrẽta oibara Jeowata audre ĩjãita? Ewariza akʉibara Daizeze Bedʼeata, adewara wãrĩnu ĩjãibara iya kʼarebaita.  Dayirãba Jeowata wãrĩnu ĩjãpanʉbʉrʉ, Diaruba akʉza angel kayiruaraba neida oda ẽ bayi (1 Juan 5:5).

17. ¿Kʼãrẽta oibara angel kayiruaraba neida oẽ marẽãra?

¹⁷ ¿Kʼãrẽta oibarabasi kristianora Éfesodebemabara? Ãyira basi pʉwʉrʉ jai opanabarimae. Maʉ̃ kʼarea Pablobara jarasi, Daizezeʼa yiwidʼibarata (Efesios 6:18). Daizeze Jeowa kʼarebata ewariza widibarabasi. Idi dayirãsida jai opanʉmaepanʉ, maʉ̃ba ewariza Jeowaʼa widibara dayirã kʼarebamarẽã akʉza iyi trʉ̃ta jaraibara yiwidʼibʉrʉdera (akʉra Proverbios 18:10). Dayirãba ewariza Jeowaʼa kʼarebata widira panʉñi dayirãba widibʉra mawũã Diarubara neida oẽ bayi (Salmo 145:19; Mateo 6:13).

18, 19. (1) ¿Sãwũã yõnaibara Diaruʉ̃me akʉza angel kayiruarabawarara? (2) ¿Kʼãrẽ bedʼea widibʉta panʉnai tẽãnera?

¹⁸ Dayirãba jõma balbʉera angelera kayiruaraba kãgabʉta akʉza Jeowata wãrĩnu ĩjãnara, Diaruba akʉza angelera kayiruaraba neida oẽ bayi. Maʉ̃ kʼarea pera ẽ baibara (akʉra Santiago 4:7, 8). Jeowara audre zareabarabʉ angelera kayiruaraira. Daya kʼawuasida Noe ewaridera angel kayiruarãra zʉbʉria berabarisita akʉza kʼawuapanʉ aranʉ ãyi jõma makenaita (Judas 6). Kĩrãbera dayirãra doba yõpanʉ ẽãta. Jeowabara kʼarebayi iyi angelera biaraneba (2 Reyes 6:15-17). Jeowa kʼarebadeba Diaruta akʉza angelera kayiruarata dayirã edre babiya (1 Pedro 5:6, 7; 2 Pedro 2:9).

¹⁹ Daya kʼawuasida Diaruta akʉza angelera kayiruabawaraʉba zʉbʉria obʉta ẽbẽrarã. Mamina dayirãba krĩchaseabʉ: «¿Kʼãrẽa Daizezebara makena ẽ maʉ̃rarã?». Naʉ̃ra panʉñi yi 11de.